振幅

喺呢張圖入面，"y" 表示波嘅振幅

振幅（粵拼：zan3 fuk1，英文：amplitude ），物理學上成日用符號 A 表示，係一種特性，波動或者第啲週期性質嘅變化可以具有，講緊喺呢段週期變化入面，距離平衡位置或者靜止位置嘅最大位移。若果手上分析緊嘅訊號非週期性，振幅就係指佢某一個特定參考值相比之下嘅量值有幾大。各科學同工程學領域做分析嗰陣，時會提到振幅呢個概念。

用詞嗌法

喺舊陣時，啲人有時會用振幅一詞嚟稱呼相位。

喺冇咁嚴謹嘅討論之中，振幅又有個中文名叫波幅（粵音：bo1 fuk1 ）。

背景概念

内文：波動同波形

最基本上，振幅呢個概念係講緊波動嘅一種特性。物理學講嘅波動，係指能量或者資訊喺介質或者空間入面傳遞。喺較直觀嘅情況入便，例如水體表面嘅波動，波動嘅呈現為介質質點嘅往復郁動，呢種郁動會隨住時間同空間嘅變化，而形成有規律嘅波形。

現實世界嘅海浪（左圖）同相關嘅表面波現象，可以想像成水嘅粒子受到擾動而上下噉來回郁（右圖嘅抽象圖解），而且呢股擾動仲會沿住水面傳開去。振幅嘅數值，可以睇水粒子離中心點嘅位移點樣隨時間變大變細，呢個位移嘅最大值就係其振幅。

喺物理學同相關領域上，研究者可以用好多變數嚟描述波動，好似係頻率同波長呀噉。而振幅就係描述波動嗰時，其中一個最重要嘅數值。喺最基本上，

• 定義：如果用嘅係最常用嗰種定義，振幅就係指喺波動過程中，位移最高會偏離平衡位置——中心值——幾遠，而呢種計法會攞位移最大值嘅絕對值，絕對值即係話唔理正負號。除咗呢種定義，學界仲有第啲方法界定咩謂之振幅。
• 意義：喺聲波等嘅機械波當中，振幅通常對應住能量嘅大細；振幅愈大，就表示該股波動帶嘅能量愈強，比如係聲波噉，某股聲波振幅愈大，聽落就愈嘈。

物理學上教波動嗰時，慣常會用位移嚟想像波動，呢種情況常見於機械波，即係聲波同海浪等嘅表面波呢啲會令到粒子來回振盪嘅波動。不過喺物理學同訊號處理入便，波動呢個概念有得進一步廣義化，將打戙嗰條軸表示嘅嘢，想像成例如電場 E 同磁場 B 嘅週期性上上落落——光波就係呢種情況，好似下圖噉，係經過線性偏振嘅光波嘅抽象圖解，X 軸係 E、Y 軸係 B 而 Z 軸則係時間：

畫成噉樣嘅圖之後，振幅嘅概念可以用同樣道理嚟諗，係指電場同磁場最高會偏離平均點幾多。

定義方法

喺呢股正弦波之中，1 嘅數值就係該股波動嘅頂峰振幅。

睇埋：正弦波

要形式化噉寫出嚟嘅話，設以下呢條正弦式嘅波動方程，用嚟描述波動：

$x=A\sin(\omega [t-K])+b$

當中

• $|A|$ 係頂峰振幅，即係振幅最常見嗰種定義法。
• $x$ 係振盪緊嘅變數，喺機械波當中會係粒子嘅位移。
• $\omega$ 係角頻率。
• $t$ 係時間。
• $K$ 同 $b$ 係特定嘅常數，表示時間同位移嘅 offset 值。

計算單位

振幅可以用好多唔同計量單位嚟量度，要睇分析者係講緊邊種波動。

若果研究緊嘅係好似水面波同聲波等嘅機械波，振幅通常會係由位移值反映，所以會用米同埋毫米等嘅單位嚟度。

另見

• 波動嘅其他特性：頻率、波長、波形等等
• 光學
• 聲學
• 音高
• 簡諧運動