物理

出自維基百科,自由嘅百科全書
跳去: 定向搵嘢
唔同嘅物理現象

物理學粵拼mat6 lei5 hok6英國話:Physics;希臘話:φύσις),簡稱物理,係一門自然科學。佢主要研究嘅係宇宙嘅基本組成要素:物質(Matter)、物質喺時間同空間入面嘅運動、同埋好似係能量(Energy)或者力(Force)呢啲相關嘅概念都係物理嘅研究題目-細至構成物質嘅基本粒子,大至成個宇宙,都係物理學嘅研究範圍。佢主要係透過分析同發現宇宙嘅基本定律(呢啲定律通常係用數學方程式嚟表達嘅)嚟去了解宇宙點運行。因為宇宙入面幾乎所有嘢都會受制於呢柞定律,物理學可以話係自然科學之中最基本(Fundamental),覆蓋面最廣嘅。

物理學係其中一門歷史最悠久嘅自然科學,成二千年之前嘅古希臘人已經有喺度研究。雖然係咁,響一至廿世紀嘅大多數時間,物理都畀人睇成一種自然哲學,要去到成 17 世紀左右科學革命(Scientific Revolution)打後物理學先至自己分咗出嚟做一門獨立學科[1]。物理學係一門好基礎嘅科學-其他自然科學(好似係生物學化學地質學)研究嘅對象都係會遵守物理定律嘅,所以好多科學家都會同物理學家(Physicist)合作搞跨學科研究;物理學同數學之間亦都有好密切嘅關係-物理定律往往都係要用算式物理公式嚟表達先至夠精確。最後,物理亦都同各門工程學(Engineering)有啦掕。好多科技上嘅發明都要靠物理嘅知識先整到出嚟[2]。總體嚟講,物理學喺科學界入面係一個好緊要、好有影響力嘅學科。

哲學同研究方法[編輯]

內文: 物理哲學

物理哲學(粵拼:Mat6 lei5 zit3 hok6;Philosophy of physics)係哲學嘅一門,指哲學家同物理學家對於「物理學應該點搞」嘅一啲睇法。喺呢方面,物理同其他科學(Science)一樣,會跟足科學方法(Scientific method)嚟去研究物理世界-物理學家會諗啲理論出嚟,跟手就靠住做實驗同觀察攞數據驗證吓啲理論啱唔啱,再根據攞到嘅數據去睇吓個理論使唔使改[3][4]

後嚟,物理學上嘅發展重令到哲學上對於「宇宙到底係啲乜」同「時間到底係啲乜」嘅觀念有所改變。例如係量子力學咁,好似 Pierre-Simon Laplace 咁嘅 19 世紀科學家普遍都重相信古典嘅決定論(Determinism)-指一種世界觀,認為只要人知道嗮宇宙喺某一個時間點嘅狀態就會有能力預測嗮跟住落嚟會發生乜嘢事;但係後嚟量子力學嘅研究發現咗宇宙入面有啲現象係本質上就有隨機性(Randomness)嘅,即係話就算一個人知道嗮宇宙喺某一個時間點嘅狀態,都會有啲現象係佢冇辦法準確預測嘅-所以家吓啲物理學家都好少可重會堅定咁信古典決定論呢種世界觀,或者至少會諗吓有冇啲新型嘅決定論[5]

主要理論[編輯]

古典物理學[編輯]

現代物理學[編輯]

主要研究課題[編輯]

同其他科嘅啦掕[編輯]

好多其他學科都同物理有啦能。由於多數自然現象都係其實科學範疇嘅研究範圍,科學家喺發現新物理定律嘅時候好多時都會掂到其他學科。有啲物理定律,例如能量守衡喺所有學科上都用得着。其他發明,例如超導體,係呢啲定律嘅衍生品。不過呢啲衍生現象唔可以叫做定律,因為佢哋唔係所有地方都啱用。

原子嘅電子殼顯示圖。唔同顏色代表唔同嘅出現機率。

睇埋[編輯]

[編輯]

  1. Krupp, E.C. (2003). Echoes of the Ancient Skies: The Astronomy of Lost Civilizations. Dover Publications. ISBN 0-486-42882-6.
  2. Young, H.D.; Freedman, R.A. (2014). Sears and Zemansky's University Physics with Modern Physics Technology Update (13th ed.). Pearson Education. ISBN 978-1-292-02063-1.
  3. Bunge, M. (1973). Philosophy of physics (p. 122). Dordrecht: Reidel.
  4. Sklar, L. (1992). Philosophy of physics. Dimensions of Philosophy S.
  5. The Quantum Physics of Free Will