建築學
建築學(粵拼:gin3 zuk1 hok6;英文:architecture),廣東話日常用語有陣時會嗌做「aak1 ki2」,係一門研究建築物要點起嘅學問[1],內容包含咗起建築物嘅過程當中嘅規劃、設計、同埋施工等嘅工作[2],再廣義少少仲可以包埋宏觀啲嘅城市規劃(諗一個城市入面啲建築物要點規劃等等)以至微觀啲嘅室內設計(諗啲傢俬要點擺等等)。
作為專用詞嘅「建築學」所研究嘅對象唔淨衹係建築物本身,而仲會著重探討人類對建築物嘅要求同埋一棟建築物要點先至滿足到人類嘅需求-建築學嘅專家會運用柱同牆等嘅基本元素砌想要起嘅建築物出嚟,途中會考慮棟建築物企唔企到喺度、能唔能夠做到人類想佢做嘅功能、仲會諗埋棟嘢有冇美感等多方面嘅問題。因為呢啲多方面嘅考量,建築學上嘅作品好多時唔淨衹有實用價值,仲會俾起佢哋嘅族群覺得係佢哋文化嘅象徵[2]。例如係廣州西關嘅陳氏書院噉,啲人喺討論粵文化同粵式建築嗰陣成日都會提起佢[3]。
建築學某程度上係一門跨學科領域:要做建築師要識數學、物理、工程、藝術、以至社會科學等各方面嘅嘢。公元前 1 世紀嘅古羅馬工程師維特魯威(Vitruvius)就講,話建築學係由好多領域嗰度融合誕生出嚟嘅。佢仲主張話建築師應該要識音樂、哲學、同天文學方面嘅知識[4],而事實係,歷史上好多建築師喺起佢哋嘅大作嗰陣都會參考當代嘅哲學同天文知識。
建築理論[編輯]
三大原則[編輯]
目前現存最古老嘅建築學著作係由古羅馬工程師維特魯威(Vitruvius)喺公元前 1 世紀所寫嘅《De architectura》(粵文:建築之書)[4]。維特魯威主張,一座好嘅建築物必需要達到三大原則[5][6]:
- Firmitas:即係拉丁文入面「穩陣」噉解,指一棟建築物要能夠企到喺度而且維持良好嘅狀態;
- Utilitas:拉丁文入面係指「有用」,呢一點係講緊嗰棟建築物應該要啱做人類想佢做嘅工作;
- Venustas:呢個字喺拉丁文裏面大致係指「靚」嘅意思,指棟建築物應該要有美感[7]。
根據維特魯威,一個建築師喺起一棟建築物嗰陣應該盡量令到座嘢達到嗮呢三個條件。但係第三個條件查實有啲含糊-美感呢家嘢有時可以好主觀。對於「要點先至算係靚」嘅問題,一個比較有影響力嘅觀點係由 15 世紀嘅意大利作家 Leon Battista Alberti 喺佢本《De Re Aedificatoria》(粵文:論起建築嘅藝術)嗰度提出嘅,佢主張美感查實主要由比例話事(雖然佢承認裝飾都有一定作用),而最有美感嘅建築比例同支配人體美感嘅一樣-即係數學上嗰個黃金比例(The Golden Ratio;數值大約係 1.61803)[8]。呢個諗法意味咗一樣嘢:美感最緊要嗰部份唔係一啲表面嘅嘢,而係一啲普世性嘅真理。
美感定實用[編輯]
有啲建築方面嘅學者主張,美感係建築學最緊要嗰部份:19 世紀嘅英格蘭藝術評論家 John Ruskin 喺佢 1849 年出嗰本《The Seven Lamps of Architecture》(粵文:建築學嘅七盞燈)話覺得「建築學」應該界定為「一門安排同修飾人所起嘅建築嘅藝術...(令到)見到佢哋」就令「佢嘅心靈健康提升、覺得有力量、同埋覺得有樂趣」[9]。對於 Ruskin 嚟講,美感係建築學當中至關重要嘅,佢仲話一棟建築物除非用某啲方法「修飾」過,唔係就唔算係建築學作品[9];打後嘅廿世紀建築師柯比意(Le Corbusier)又認為,就噉揾啲物料起屋同皇宮衹不過係「建築工程」(construction),而如果起嗰棟嘢感動到佢,令佢覺得開心,佢先會覺得算得上係「建築學」(architecture)[10]。
另一方面,喺 19 世紀尾開始,由美國建築師 Louis Sullivan 提出嘅形態跟從功能(Form follows function)[11][12]原則開始受歡迎,呢條原則主張起一棟建築物嗰陣,佢個形態嘅設計應該係要配合佢個功能。呢種見解強調咗維特魯威所講嘅「utilitas」,並且將「功能」嘅概念擴展到包含嗮所有人會用建築物嚟做嘅嘢-由「居住」等嘅實際用途以至「觀賞」等嘅心理文化用途都俾佢包含咗喺呢個用途入面。但係對於呢條原則,有啲建築師唔係好受落。
可持續性[編輯]
喺廿世紀尾橛,建築學界有咗可持續性(sustainability)呢一個新諗頭,形成咗所謂嘅可持續性建築風潮[13]:為咗滿足當代嘅社會思潮,起一棟建築物嗰陣時個建築師應該要考慮棟嘢係咪環保,例如要用環保嘅物料起、要諗吓棟嘢對周圍環境嘅影響、而且要諗埋棟嘢嘅運作(即係冷氣、用水、同廢物處理呀噉)會唔會需要太多嘅非可再生能源等等。
歐美建築[編輯]
古典式[編輯]
古典主義建築(classical architecture)狹義上係指歐洲嘅文明起源-古希臘同埋古羅馬-嘅建築風格[14][15]。古希臘風格嘅建築主要係由公民需要(而唔係宗教)嗰度演化出嚟嘅,而打後羅馬帝國大幅噉吸納古希臘人嘅文化,學埋古希臘嘅建築術,並且將古希臘人嘅建築實現喺佢哋自己起嘅嘢嗰度[14],令到兩者喺風格上好相似。例如維特魯威喺寫佢本鉅著嗰陣就引用咗唔少古希臘建築師嘅諗頭,並且再發展上去。古希臘同古羅馬對成個歐洲文明嘅影響好深遠,所以就算到咗現代,古希臘人同古羅馬人嘅後代-歐洲人同美加紐澳等地嘅人-都仲係好興將古典主義建築嘅元素融入去佢哋嘅建築嗰度[14]。
古典主義建築有佢獨到嘅特徵[14]。雖然話由古希臘文明嘅誕生(大約公元前 8 世紀)至西羅馬帝國(公元 5 世紀)冧呢兩件事之間相差成超過 1,000 年嘅時間,而且古希臘同古羅馬一路喺建築風格上都有隨住時間演變,但係呢個時期嘅建築作品依然有好多共通點:喺整體設計上,古典主義建築重視對稱同理性秩序,務求一棟建築顯現出謙卑同智慧,所以喺設計棟建築物嗰陣古典主義嘅建築師會運用大量嘅數學原則(例如係頭先提到嘅黃金比例);而喺技術上,古典主義建築特點係偏向強調大條而且完全打戙嘅柱(尤其係喺棟建築嘅正面)同三角楣飾(pediment)嘅使用,偏好用雕像做裝飾,興用石頭同大理石做料而少用木,羅馬嘅建築會大量噉使用拱... 等等。
中世紀[編輯]
公元 5 世紀打後,隨住西羅馬帝國倒塌,歐洲正式步入中世紀。喺中世紀嘅歐洲,唔同行業嘅工匠同商人興建立公會(guild),每個公會各自負責監控屬佢嗰行嘅歐洲人做嘢同埋組織嗰行嘅質易(中世紀歐洲嘅建築師都有佢哋自己嘅公會)[16]。另一方面,中世紀嘅歐洲全面開始基督教化[17]:遠古時期嘅歐洲人興拜嗰啲希臘羅馬噉嘅多神信仰走向衰落,並且俾一神論嘅基督教取代-令到有股要求宗教建築轉變嘅潮流。於是乎,神職人員同商人帶住建築學方面嘅知識同埋改革歐洲建築嘅意欲行勻成個歐洲大陸[17],令到兩種泛歐洲風格喺 10 世紀開始成形-羅曼式同哥德式。
羅曼式[編輯]
- 內文: 羅曼式建築
羅曼式建築(romanesque architecture)係喺 8 至 9 世紀開始興起嘅[18][19]。當時呢種風格係查理曼大帝(Charlemagne, king of the Franks;768-814)偏愛嘅建築風格,查理曼大帝喺保護歐洲免受回教徒入侵上做咗好大嘅貢獻,令到佢相當受嗰陣時嘅歐洲人歡迎,仲喺 800 年嘅聖誕日俾人正式封咗做神聖羅馬帝國皇帝。於是乎,查理曼大帝鍾意嘅羅曼式建築開始由意大利、法國、同德國嗰度擴散開去,遠及斯堪的納維亞。
羅曼式建築有以下嘅特色[18]:啲建築物(尤其係教堂)好興用十字架噉形嘅平面佈置,半圓形後殿(apse)後面有啲俾牆遮住咗嘅走廊喺度,啲門上面好多時會有具有浮雕嘅半圓形鼓室(tympanum),而且頭頂上嘅拱頂(vault;指由多個彼此之間平衡嘅拱組成嘅天花板)會由好粗嘅柱同厚嘅牆支撐-因為當時啲建築師仲未係好識點樣整輕嘅拱頂,而牆厚呢一點亦都令到啲窗焗住要細啲,搞到啲教堂內部好多時會比較暗。另一樣好獨特嘅特徵係佢哋興用盲拱廊(blind arcade;指冇門冇窗喺下面嘅拱)修飾一啲冇窗嘅牆,據講噉係因為用呢種手法修飾啲牆易過用玻璃窗。
比薩主教座堂;
佢外牆有好多盲拱廊。
德國瓦爾特堡
哥德式[編輯]
- 內文: 哥德式建築
哥德式建築(gothic architecture)係喺腥風血雨嘅十字軍時期(11 世紀尾至 13 世紀尾)嘅法國興起嘅,俾好多人覺得係人類史上其中一個最有影響力嘅建築風格[20]。呢種風格最重點嘅特徵係飛扶壁(flying buttress)[20]:飛扶壁係一啲拱型嘅結構,由一埲牆嘅上半橛伸出嚟,一路伸落去一個質量大啲嘅物體嗰度(通常係地下或者棟嘢嘅下一層),用嗰舊大啲嘅物體嘅質量抵抗嗰埲牆所受(由一個好高好重嘅天花施加)嘅力。
喺當代嘅歐洲,飛扶壁係一樣建築學上嘅大革新:呢種結構令到中世紀歐洲嘅建築師突然間變成能夠起一啲(同打前嗰啲建築物嘅天花板比起上嚟)高好多重好多嘅拱頂;而且因為有飛扶壁幫手撐住個天花板,哥德式建築啲牆可以唔使噉厚,啲窗可以大好多[20],啲窗大就即係有得用有色玻璃,而事實係,哥德式嘅教堂建築成日會用有色玻璃描繪聖經或者聖人嘅故仔;同時,「有得起好高嘅結構」引起咗一股「要指向天堂」嘅風潮,啲建築物嘅塔頂好多時都變到好尖,啲拱頂高得好交關,起到一個「要向天堂進發」嘅氣勢。哥德式建築嘅呢啲宏大嘅結構俾當時嘅教會同貴族用嚟向平民-啲平民好多時連有冇飯開都成問題-展示自己幾噉威[21]。
德國古龍大教堂外部由南面睇
- 法國沙特爾主教座堂(Cathédrale Notre-Dame de Chartres)
拜占庭式[編輯]
- 內文: 拜占庭式建築
東歐嘅傳統建築係建基於拜占庭式建築嘅。拜占庭式建築(byzantine architecture)係指東羅馬帝國(又叫「拜占庭帝國」)嘅建築風格。喺公元 330 年,羅馬帝國將首都搬咗去東歐嘅君士坦丁堡(Constantinople;希臘文:Κωνσταντινούπολις)嗰度,而打後羅馬帝國喪失咗佢西半橛大部份嘅領土,令到西羅馬帝國倒塌。雖然係噉,東羅馬帝國依然統治住大半個東歐同細亞細亞,而且繼續以「羅馬人」自居,要再過多成差唔多 1,000 年先至冧[22]。拜占庭式建築都係受古典建築影響嘅,但係因為東歐同西歐喺文化上嘅種種差異(例如東歐人多數信東正教,唔似得中世紀西歐人噉聽羅馬教會話),令到拜占庭人發展咗一套唔同嘅風格。呢套風格對成個東歐-遠至俄羅斯同高加索地區-影響深遠。例如俄羅斯就曾經喺 19 世紀早期搞復興拜占庭式建築嘅風潮,仲將佢嗰種建築風格傳到去受過佢影響嘅地區,好似係東北三省噉[23]。
拜占庭建築喺幾何上嘅複雜度同古典建築比起上嚟提高咗、好興喺中央大圓頂下面整一環窗、用料上唔淨衹用石頭仲會用磚、會自由噉使用古典建築嘅柱形、偏好用鑲嵌藝術(mosaic)做裝飾多過用雕刻、而且啲窗興用一浸浸薄嘅雪花石膏嚟令到室內光啲。現存嘅拜占庭式建築多數都係宗教性嘅建築。
一般認為,拜占庭建築嘅代表作係位於伊斯坦堡(舊名「君士坦丁堡」)、家陣俾土耳其攞咗嚟做博物館嘅聖蘇菲亞大教堂(Hagia Sophia;Αγία Σοφία)。
俄羅斯海軍聖尼古拉主教座堂;
佢明顯受到拜占庭風格影響。
文藝復興[編輯]
- 內文: 文藝復興建築
中世紀嘅基督教喺某種程度上偏向排斥信多神信仰嘅古希臘同古羅馬文化,但係由 1400 年代開始,歐洲有咗大變革-史稱文藝復興(The Renaissance)[24]。喺呢個時代,歐洲人發明咗一樣革命性嘅技術-印刷術,令到歐洲嘅文化又再一次起咗重大變化:印刷術嘅發明令到歐洲人有得大規模噉印書同分享知識,搞到教會冇得再獨佔住啲知識,一方面令到歐洲人重拾對古典時代(古希臘同古羅馬)嘅興趣,同時令人文主義興起,歐洲人開始重視對人嘅研究,而唔淨衹係集中研究上帝同神學,有代表性嘅建築物當中多咗好多非宗教性嘅建築物。好多時文藝復興啲人都對個別建築師-例如係米高安哲羅-嘅風格有興趣,有咗所謂嘅藝術家個人崇拜。
文藝復興建築(Renaissance architecture)好有特色:呢種風格運用咗大量嘅古典主義元素得嚟又結合中世紀(尤其係哥德式)嘅元素喺入面[25],好似古典式噉重視對稱、比例、同埋秩序,尤其係啲柱、拱、同埋圓頂嘅安排會跟從好嚴格但係又簡單嘅數學方程式,唔似得中世紀噉興複雜-甚至有少少岩岩巉巉-嘅比例系統[25];另一方面,新興嘅技術令到建築物多咗某啲新元素可以用,例如係水利工程上嘅創新令到建築物有得用噴水池做裝飾。
巴洛克式[編輯]
- 內文: 巴洛克式建築
巴洛克式建築(baroque architecture)係一種喺 17 世紀嘅意大利發源嘅建築風格[26]。當時基督新教發源咗冇幾耐,但係成功噉由羅馬天主教會手上攞走咗好多信徒,於是依然由羅馬天主教主導嘅拉丁歐洲-指法國、意大利、西班牙、同葡萄牙呢啲語言發源自拉丁話嘅地區-發展咗一套用嚟展示羅馬教會權威嘅風格。
巴洛克式建築係一種好浮誇嘅風格:巴洛克式嘅教堂興有好闊、有時呈橢圓形嘅中殿;有陣時啲建築元素會特登整到好似唔完整噉嘅樣;啲裝飾會華麗得好交關而且興鑲金;天花板會有大規模嘅濕壁畫;內部會勁喺度用畫同雕像做裝飾;甚至乎啲牆上面嘅裝飾興運用視錯覺呀噉。大量使用圖像(無論係畫定係雕像)同埋華麗裝飾呢啲特徵好具有羅馬天主教嘅作風[26],所以以新教徒為主嘅日耳曼地區(包括英國、德國、同北歐等)好多時都唔多鍾意呢種風格,甚至對巴洛克懷有敵意,所以巴洛克嘅代表作多數集中喺拉丁歐洲同埋受拉丁歐洲影響過嘅地區。
巴洛克式嘅建築喺粵港澳地區都見得到,噉係因為嗰陣時嘅粵港澳地區係大明皇朝對西歐嘅主要港口,令到西歐文化湧入粵港澳地區。
古典復興[編輯]
- 內文: 新古典主義建築
喺 18 世紀嗰陣,歐美地區開始咗一股新古典主義建築(neoclassical architecture)嘅風潮[27]:歐美人開始大規模噉做考古學工作,掘咗好多古羅馬同古希臘嘅文物出嚟,再一次令到歐美人對古典時代嘅興趣大增,新古典主義嘅時代背景係歐洲各大國同埋當時啱啱立咗國冇幾耐嘅美國都有志將自己塑造成古希臘同古羅馬嘅「真正」繼承者,再將古典建築融入埋當代嘅技術,形成咗規模龐大、啲造型又似十足古典主義嘅新建築物。呢啲新古典主義建築好多去到廿一世紀都仲具有象徵性嘅地位,例如巴黎嘅凱旋門就俾好多人同法國聯想埋一齊。
哥德復興[編輯]
- 內文: 哥德復興式建築
哥德復興式建築(gothic revival architecture)始於 18 世紀中嘅英格蘭。當時維多利亞女王下嘅英國聖公會好想將自己塑造成新教分裂打前嘅羅馬教會嘅繼承者[28],所以開始返睇中世紀嘅教堂建築風格,外加嗰時嘅美國勁喺度用新古典風格起嘢,令到嗰陣嘅英國最後決定作對式噉用哥德式風格起教堂,仲開始鼓吹用同樣嘅風格起一啲非宗教性嘅建築物。跟手英格蘭仲靠住大英帝國嘅影響力,將呢股潮流引進到去受大英帝國統治或者影響嘅地區-包括澳紐、印度、同香港呀噉。呢種風潮取得空前嘅成功,仲影響咗美國同俄羅斯呢啲理應同英國唔啱牙嘅國家。
英格蘭利物浦座堂
- 西班牙聖家大教堂(Sagrada Família)
工業革命及後[編輯]
喺 19 世紀初開始,歐美地區開始咗全面嘅工業革命(The Industrial Revolution),生產嘅過程由人手做為主變成用機械大規模噉做[29]。令到建築風格起咗重大嘅變化,包括新材料(例如係鋼)嘅使用以及「鐵同玻璃」(iron-and-glass)嘅結構。而且中產階層嘅出現令到藝術成為咗一樣大眾化嘅嘢,所以呢個時期嘅代表性建築物經已唔會再以宗教建築為主,而係以公共建築物同有錢人嘅屋企等為主。
喺現代嘅創作當中,蒸汽龐克(steampunk)[30]風格嘅作品好多時都會運用呢啲「鋼同機械」嘅建築美學。
伊斯蘭式建築[編輯]
- 內文: 伊斯蘭式建築
現代中東嘅建築主要係以伊斯蘭式建築(islamic architecture)為主[31][32]。呢種風格起源自 7 世紀,當時嚟自麥加嘅先知穆罕默德(Muhammad;阿拉伯文:مُحمّد)建立咗伊斯蘭教(又叫回教),而打後受到穆罕默德嘅啟發,阿拉伯人積極噉將伊斯蘭教傳揚開去,令伊斯蘭教橫掃成個中東同埋北非(包括埃及),甚至仲伸延到去伊比利亞半島同中亞嗰度。伊斯蘭教建築局部建基於喺佢之前嘅中東基督教建築,又有參考古希臘同古羅馬嘅建築。另一方面,伊斯蘭教嘅其中一樣最大嘅特徵係嚴禁拜偶像[31],所以好忌諱整雕像或者浮雕,多數時間亦都會禁止信徒用任何形式嘅圖像-無論係畫、雕像、定浮雕-描繪上帝(回教徒稱之為「真主阿拉」)或者包括穆罕默德在內嘅眾先知[31]。呢種對圖像嘅忌諱令到伊斯蘭建築冇得用傳統建築興用嘅裝飾,所以要諗新橋裝飾啲建築物-形成咗獨特嘅伊斯蘭風格建築。
初期[編輯]
初期嘅伊斯蘭式建築特徵有一啲古典主義嘅特色,但係又有好多佢獨有嘅特徵,包括咗[31]:清真寺會有又高又細指向天(有陣時螺旋形)嘅宣禮塔,呢啲宣禮塔嘅用途係俾教士喺塔頂大聲噉呼喚信徒做禮拜;因為多數起喺沙漠地區嗰度,所以好少可用木做料;啲門同窗嘅拱多數以馬蹄形、尖頂形、或者複雜形狀為主;近乎完全冇圖像裝飾,反而會大量噉使用植物圖案、幾何圖案、色水鮮艷嘅磚片、同埋用阿拉伯字母寫成嘅書法嚟做裝飾,啲書法多數以阿拉伯文為主-因為原版可蘭經(Quran;القرآن)係用阿拉伯文寫成嘅。呢啲特徵令到佢同歐洲或者印度嘅建築起到鮮明嘅對比。
呢類建築喺全中東都揾得到,而且因為當時回教徒成功噉征服咗伊比利亞半島成幾個世紀,所以呢類建築喺西班牙同葡萄牙都大把。好似係西班牙哥多華嘅哥多華大教堂(Mezquita-Catedral de Córdoba)噉,佢本嚟係一座清真寺,而基督徒喺 13 世紀收服西班牙之後將佢變返做座教堂,但係佢嘅建築風格依然睇到明顯嘅伊斯蘭影響。
薩邁拉大清真寺嘅螺旋尖塔
- 西班牙哥多華大教堂(Mezquita-Catedral de Córdoba)
波斯式[編輯]
波斯(Persia)係伊朗(波斯文:ایران)舊時喺英文入面嗰個名,但係查實波斯人自古以嚟都係嗌開自己住嗰笪地做「伊朗」嘅[33]。喺遠古時代,波斯喺宗教上係以本土嘅拜火教做主導嘅,回教徒喺 7 世紀嗰陣成功噉征服波斯,令到波斯開始伊斯蘭化[34]。雖然係噉,波斯人不嬲都對自己嘅文化好自豪,會將自己原來嘅文化同當時新嚟嘅伊斯蘭文化融合,再加上伊朗喺地勢上俾群山圍住,令到佢同中東第啲地區相對隔絕,最後形成咗一套獨特嘅波斯式伊斯蘭建築。
波斯式伊斯蘭建築有以下特點[35]:呢種建築興用大量凹陷嘅外牆,尤其係啲有窗嘅牆,個窗會喺凹陷咗嘅位嗰度,呢種設計令到啲窗冇噉易俾太陽曬到-令到啲窗涼爽啲;啲窗好多時會係好精細嘅幾何圖案;圓頂會好似有少少漲咗噉嘅樣,而且內部有極之精緻嘅磚片裝飾;幾何圖案嘅運用比起伊斯蘭世界第啲地區嘅仲犀利得嚟,又冇阿拉伯建築噉忌諱圖像... 等等。波斯式伊斯蘭建築仲有大量嘅樂園花園(paradise garden),用一個善用水、又綠意盎然嘅花園嚟模擬傳統回教徒相信虔誠信徒死咗之後會去嘅天園[35]。
波斯式伊斯蘭建築喺印度都唔少。噉查實有段故[36]:成吉思汗嘅大帝國喺成吉思汗死咗冇幾耐就散咗,分裂做幾個國家,成吉思汗其中一啲後裔霸住波斯獨據一方,而後嚟巴布爾(Babur the Tiger;ظهیرالدین محمد بابُر)南下攻打印度,征服咗大半個印度半島,建立咗蒙兀兒汗國(Mughal Empire;گورکانیان),將蒙兀兒嗰一套波斯式伊斯蘭文化傳到去印度。例如舉世聞名嘅泰姬陵(Taj Mahal;梵文:ताज महल)噉,就用咗波斯式伊斯蘭風格。
伊斯法罕阿里卡普宮
- 印度北方邦泰姬陵(Taj Mahal;ताज महल)
奧斯曼式[編輯]
喺 13 世紀尾嗰陣,拜占庭帝國沒落,細亞細亞喺政治上分裂咗做一大柞彼此之間獨立嘅土耳其人親王國,當中由奧斯曼一世(Osman I;奧斯曼土耳其文:عثمان غازى)所率領嗰個集結咗一大班唔同宗教背景嘅人,攻佔咗戰略重點城市伊斯坦堡(Istanbul),仲向歐洲同非洲進攻,建立咗橫越歐亞非三個大陸嘅大帝國-史稱奧斯曼帝國(奧斯曼土耳其文:دولت عليه عثمانیه;現代土耳其文:Osmanlı Devleti)[37]。
奧斯曼帝國同佢打前嘅拜占庭帝國同樣以細亞細亞做權力中心,加上又佔領咗一大橛嘅東歐,所以受東歐基督教(東正教)影響得好犀利,令到奧斯曼建築(Ottoman architecture)有一套同第啲伊斯蘭式建築好唔一樣嘅特色,而且奧斯曼建築唔同時期之間有相當大嘅變化。當中古典奧斯曼建築時代(1437–1703)最常俾人攞嚟做奧斯曼建築嘅代表:奧斯曼人受拜占庭式建築代表作聖蘇菲亞大教堂影響,興用好似聖蘇菲亞大教堂噉嘅大圓頂,但係又改變咗啲比例,將建築物內部開放出嚟,等建築物內部有充足嘅光,並且闊綽噉用窗嚟造光同影[38]。
奧斯曼建築嘅代表作係就係主要集中喺屬奧斯曼帝國心臟地帶嘅細亞細亞,但係喺受奧斯曼統治過嘅中東同東歐各地都有唔少奧斯曼建築作品。
印度建築[編輯]
- 內文: 印度建築
印度河文明(Indus Valley civilization)係人類史上其中一個最早嘅文明,距今超過 5,000 年歷史[39]。印度河文明可以話係兩河流域文明嘅東方分枝,所以早期嘅印度建築同兩河流域嘅有好多相似之處。當時嘅遠古印度人拜好多唔同嘅神,而後嚟呢啲信仰形成咗印度教(Hinduism),印度教持有一種同時似泛神論同一神論嘅觀點[40],世界萬物都係各種神祇嘅延伸,而好多印度教徒相信,各種神祇講到尾都係一個全能上帝嘅唔同面相,由牛、神祇、以至皇者都可以係崇拜嘅對象。印度教又有獨特嘅宇宙觀,認為宇宙嘅本質係循環,相信宇宙係噉重複受創造同毀滅,而佛教當中嘅投胎轉世呢個諗頭都係起源自印度教嘅[41]。呢啲獨特嘅宇宙觀好多時會反映喺印度建築(Indian architecture)上-而且唔淨衹宗教性嘅建築係噉[39][42]。
現代印度具有不遜色於中國同歐洲嘅文化多樣性,所以唔同地區嘅建築風格可以好唔同:直至廿一世紀,成個印度有幾廿種地區性嘅建築風格[43]。
古印度[編輯]
遠古時代(指公元 500 年之前)嘅印度喺宗教同哲學思想上發展得好蓬勃,思想家人才輩出(例如係釋迦牟尼噉)。古印度嘅建築好多時都反映咗當時嘅印度人嘅世界觀同宇宙觀:古印度建築(尤其係宗教建築)興用又高又勁雕嘢、好似山噉形狀嘅塔嚟講故仔,用塔上面嘅浮雕或者第啲圖案反映印度教入面嗰啲人物嘅故仔,啲圖案有陣時可以好大膽,例如係描繪印度教神祇嘅性愛;因為印度教當中「眾生皆平等」嘅諗法,而好鍾意用動物嘅形象做裝飾;而喺要塞同宮殿嘅高處會用大量嘅開放式便亭(kiosk)。印度亦都出咗名零舍多岩雕建築(rock-cut architecture;指由啲自然存在嘅巨大岩石嗰度雕一棟建築物出嚟),例如當中阿旃陀石窟(Ajanta Caves)就舉世聞名,係一列 30 個嘅佛教石窟紀念碑[44]。
除咗呢啲,古印度一樣好有特色嘅建築係舍利塔(stupa;梵文:स्तूप)-用一個圓頂嘅(通常石造)結構代表印度教宇宙當中嘅神山須彌山(Mount Meru;मेरु),而啲古印度人好興攞呢種結構嚟儲藏一啲同佛祖有關嘅聖物。呢類建築喺受印度影響過嘅南亞同東南亞各地,以至東亞都揾得到:舍利塔成日俾東亞嘅佛教徒攞嚟放高僧嘅舍利[45],而舍利塔嘅興建仲遠至歷史上不嬲都與世隔絕嘅日本嗰度。
影響[編輯]
古印度對佢周邊嘅國家同地區有好勁嘅文化影響力,就連中國都由古印度嗰度借咗(例如)佛教過去。古印度嘅龐大影響力令到南亞各地同東南亞(以至東亞某啲地區)等地嘅人喺宗教上都受印度教或者佛教影響,而且佢哋嘅建築風格往往有印度建築嘅影喺度,會具有上述嗰啲古印度建築噉嘅特徵。
錫克教建築[編輯]
- 內文: 錫克教建築
錫克教建築(Sikh architecture)係源自於錫克教嘅一種建築風格。錫克教(Sikhism;頻渣別文:ਸਿੱਖੀ)係 15 世紀尾喺印度北部起源嘅一個印度宗教,當時印度半島嘅印度教徒同回教徒關係好緊張,教祖納那克(Guru Nanak)創立咗錫克教,呢個教喺哲學上結合咗印度教同回教嘅元素,主張人類應該過真誠、忠貞、同埋純潔嘅生活[46]。喺納那克開始傳道之後冇幾耐,錫克教嘅人氣就有住爆發性嘅增長,到咗廿一世紀經已係世界十大宗教之一。早期嘅錫克教徒想佢哋嘅禮拜堂有獨到嘅特徵,於是就創建咗錫克教建築呢種新風格出嚟[47]。
錫克教建築受到印度教建築同伊斯蘭式建築嘅影響,又有一套獨特嘅風格,特色係帶有一種進步嘅價值觀、有複雜精細嘅裝飾、追求簡樸嘅美感、同埋流動嘅線條。雖然話錫克教建築係一套源自宗教嘅建築風格,但係佢相當受歡迎,喺廿一世紀經已俾人攞嚟起各種各樣嘅非宗教性建築[47]。
中國建築[編輯]
- 內文: 中國建築
成個漢字文化圈嘅建築藝術都係受到遠古時代嘅中國所影響嘅。現代中國各地喺建築風格上有相當高嘅多樣性,但係都有某啲共通點(顯示佢哋喺好大程度上同源)[48]:無論係喺中國邊忽,啲傳統建築都興講求要兩面對稱、會整一啲俾建築四面環繞嘅開放空間、興運用由風水嗰度走出嚟嘅諗頭、偏好打橫發展(而唔係打戙發展)、同埋會使用道教宇宙觀同埋神話入面嘅符號象徵。除咗噉,同歐亞大陸第啲地區嘅建築比起上嚟,中國古建築零舍鍾意用木做料嚟起(呢點間接搞到古建築好多時比較難保存)[48]。上述嘅呢啲特徵喺日本、朝鮮半島、同越南等地嘅建築風格身上亦都睇得到[48]。
直至廿世紀為止,中國嘅古建築可以分做多個流派,最出名嘅有六大派:皖派、蘇派、閩派、京派、晉派、同埋川派[49];另一方面,粵人亦都有獨特嘅粵式建築[3]。
按朝代分[編輯]
古代中國個個朝代嘅建築風格都唔同。對於粵人嚟講,中國古建築當中最重要嘅要數唐朝嘅建築:喺公元前 1 世紀嗰陣,南越國俾漢皇朝收服,令到嶺南喺歷史上第一次成為中原皇朝嘅領土,但係嗰陣時經已有百越人喺呢頭住,百越人有自己嘅語言同文化,包括建築;打後喺 7 世紀頭開始,大唐皇朝開始全面噉漢化今日嘅華南,先至令到南越語言開始受中古漢語同化(最後形成今日嘅廣東話)之餘,亦都令到嶺南呢頭喺第啲方面-包括建築風格-開始全面噉漢化。現代粵文化受大唐嘅文化影響深遠[50]。
唐朝[編輯]
- 內文: 唐朝建築
唐朝建築泛指唐朝嘅建築風格。喺南北朝時期嘅尾段,中國陷入紛亂,而後嚟本來服侍住北朝嘅李淵趁勢喺地方起兵,最後喺公元 618 年贏得江山統一天下,並且將國號定為「大唐」,建立咗古代中國其中一個最輝煌嘅朝代。大唐嘅一個特點係佛教開始興盛-同獨專儒術嘅漢朝形成相當強烈嘅對比。大唐對佛教嘅重視亦都反映喺其他方面,唐朝人派咗好多使者-例如係唐三藏-遠赴印度(唐朝人稱之為「天竺」)學佛,呢啲使者仲將由印度嗰度學到嘅第啲知識傳返過去中土嗰度,令到唐朝建築一定程度上受印度建築嘅影響,形成咗一套同打前嘅朝代嘅建築截然不同嘅一套風格[51][52]。代表作有位於山西五台縣、俾建築學家梁思成稱之為「中國第一國寶」嘅佛光寺。
喺風格上,唐朝建築嘅特徵係氣魄宏偉、嚴整開朗、舒展樸實、色調簡潔明快。唐朝建築好多時都規模宏大而且有住好嚴整嘅規劃,亦都開始成熟噉運用建築群嘅整體規劃[53]。唐朝建築善於大量噉使用木做料,而啲佛塔就主要用磚石嚟起[53]。唐朝建築影響力好勁,唔單衹影響咗後世嘅中國建築,仲對隔咗個海嘅日本建築影響深遠[54]:日本由奈良時代(8 世紀大部份時間)開始引入咗大唐嘅建築風格,將唐朝建築作為自身嘅建築風格嘅基礎,並且獨立於中國噉繼續將呢種風格發展上去,喺某啲方面比起後代中國建築仲更加完整噉保留咗唐朝建築嘅風貌[55]。
喺廿世紀及後嘅粵港澳地區,不嬲興以「唐人」自居嘅粵人又有起咗啲參考唐朝風格嘅建築物,例如香港鑽石山嘅志蓮淨院就係一個出眾嘅作品。
山西五台南禪寺大殿
- 香港志蓮淨院
按地區分[編輯]
要將中國建築分類,又有得按地區嚟分。自古以嚟,中國內部經已有唔細嘅文化多樣性,而呢股多樣性一路延續到近代。中國嘅各大派古建築喺遠古時期打後先後噉成形。現代中國有成幾廿種地區性嘅建築風格,當中以下呢幾種最廣受人愛戴:
皖派[編輯]
- 內文: 皖派建築
安徽嘅皖派建築以徽州嘅徽派建築為代表。徽派建築特徵係青瓦白牆,料以磚、木、石為主,以木做架,而且廣泛使用磚木石三雕[56][57]。華人對徽派建築好欣賞,例如明朝戲曲家湯顯祖就曾經講過話「一生痴絕處,無夢到徽州」。徽派建築仲喺 2000 年俾人列咗做「世界遺產名錄」[49]。
安徽南部嘅宏村;
佢俾好多人視為徽派建築代表。
蘇派[編輯]
- 內文: 蘇派建築
蘇派建築係指江南其中一個文化大城蘇州嘅建築風格,有超過 2,000 年歷史[49][58]。蘇派建築集合咗華南同華北建築嘅特徵,興用園林式佈局、脊角高翹嘅屋頂、有江南風格嘅走馬樓、用磚雕、明瓦窗、同過街樓等等,俾人評為「顯現出清、淡、雅、素嘅藝術特色」[49]。
閩派[編輯]
- 內文: 閩派建築
閩派建築泛指福建嗰頭嘅古建築風格[49][59]。閩派建築包含咗閩南等多種嘅地區性建築,當中最出名嘅要數由閩南人所建立嘅閩南建築同主要由客家人所起嘅福建土樓[60]。呢類建築喺以閩南人同客家人為主嘅台灣嗰度都好常見。
京派[編輯]
- 內文: 京派建築
京派建築指以北京為中心發展出嚟嘅一套建築風格,係華北建築嘅代表,有成超過 700 年噉耐歷史[61]。最出名嘅代表作係北京四合院同埋喺 15 世紀初起、明清兩代皇帝祭天求雨用嘅天壇[62]。
北京梅蘭芳故居正房
晉派[編輯]
- 內文: 晉派建築
晉派建築係指山西、陝西、以至甘肅等地嘅建築風格。晉派建築出名在佢嘅斗拱飛檐、彩飾金裝、磚瓦磨合、同城樓細做[49]。除咗噉,晉派仲有歷史超過 3,000 年嘅窯洞呢種特色建築。
川派[編輯]
- 內文: 川派建築
川派建築係指四川嗰頭嘅古建築。四川自古多少數民族,又俾群山隔開,形成咗一套同中國第啲地區唔同嘅風格[63]。
四川特色嘅吊腳樓
粵派[編輯]
- 內文: 粵式建築
粵派建築,又叫嶺南建築,泛指嶺南地區粵人嘅建築風格。古典嶺南建築係喺 14 世紀成形嘅:嗰時嶺南漢化得七七八八,百越同漢文化融合,形成咗一種新風格。古典嶺南建築好有地方特色:同中原核心地帶(即係北方)比起上嚟,嶺南氣候又熱又濕立立,如果將中原嗰套建築風格直接搬落嚟嘅話,會好容易有温度唔舒服或者發霉呢類濕滯嘢。所以粵人整咗一套同中原人唔同嘅建築風格。古典嶺南建築通常比較輕,而且會用通透同冇咁易發霉嘅材料起,色水會偏好灰白或者係綠呢啲柔和嘅色調。喺結構方面,呢啲建築通常有多層嘅斜坡頂同方形柱,而且因為氣候冇中原地方咁凍,令到嗰度啲人鍾意向外面行,所以嶺南民居建築就發展咗好多露台呢類嘅開放式結構,等人有得唞涼。總體嚟講,呢柞特徵令到古典嶺南風格嘅建築物望落都比較輕同涼爽[64][65][66]。
除咗噉,因為嶺南自從明朝時代(14 至 17 世紀)開始就做咗中國嘅主要對西方港口,所以受西歐文化影響得好犀利,好興將西方建築嘅某一啲特徵(例如係巴洛克式同洛可可式嘅建築元素)融入古典嶺南建築嘅作品當中[64]。
- 廣州陳氏書院
日本建築[編輯]
- 內文: 日本建築
日本建築(平假名:にほんけんちく;日羅:nihon kenchiku)係指日本嘅傳統建築風格[67][68]。雖然日本建築同中國各派古建築一樣都係受到唐朝建築影響,但係因為日本地理上與世隔絕,又加上日本本土經已有一定嘅固有文化,令到日本人最後將由唐朝學返嚟嘅建築術變成自己獨有嘅風格。日本建築有唔少唐朝建築有嘅特徵,但係又有好多佢獨有嘅嘢:包括係極之重視用木(有大量純木製建築物,好似係東大寺噉)、傾向係噉咦離開地面少少、同啲屋頂會用瓦片或者茅葺;內部地板興用疊蓆,等啲人可以坐或者瞓喺上面;而啲房好多時用趟門而唔係牆隔開,等間屋嘅主人有得按照場合改變空間嘅使用。除咗噉,日本亦都係歐洲同中東以外少數傳統會起城堡嘅地區。
由廿世紀開始,日本建築同其他日本文化一樣,隨住動漫等嘅影視作品傳到去世界各地。
廿世紀及後[編輯]
現代建築[編輯]
喺廿世紀頭嘅西方世界,建築學界開始唔妥成日都淨係復興舊建築風格,亦都開始唔鍾意巴洛克或者哥德嗰啲勁用裝飾嘅風格,於是產生咗一系列新嘅思想,掀起咗現代建築(modern architecture)嘅風潮。當中德國喺 1907 年建立嘅德意志工藝聯盟(Deutscher Werkbund)同埋喺 1919 年建立嘅包浩斯(Bauhaus)學派尤其令人注目,佢哋重新界定建築學,將建築學視為藝術、工藝、同科技嘅終極結合[69]。
初頭嗰陣,現代建築係一套哲學同美學嘅運動,而喺一戰打後,現代建築師開始諗咗一套完整嘅風格應付戰後嘅新社經秩序,集中於應對中產階層同基層嘅需要,而唔係好似舊時啲建築師噉一味用有歷史性嘅風格嚟迎合(嗰時經已沒落嘅)貴族階層嘅需要。現代建築嘅特色係將建築物簡約化,攞走啲不必要嘅裝飾,而淨係流露出棟建築物嘅幾何型態;現代建築物會展現佢哋嘅功能同結構元素,唔介意露出棟嘢嘅鋼筋同水泥;而且加上科技上嘅進步,建築物嘅高度進一步提升,例如孟加拉裔建築師 Fazlur Rahman Khan 所發明嘅管狀結構令到人類能夠起超過 40 層高嘅樓[70]。而好似賴特(Frank Lloyd Wright)等嘅名建築師發展出有機建築(organic architecture)嘅諗頭,指出建築物嘅型態應該由用佢嘅人嘅需要同佢周圍嘅環境定義。
去到廿世紀中,現代建築經已成咗形做埋國際風格(international style)-全世界嘅人冚唪唥都喺度用緊。
後現代主義[編輯]
- 內文: 後現代主義建築
喺廿世紀中,有好多建築師都開始唔妥現代建築嘅潮流,嫌現代建築裝飾少,冇啲美感。二戰及後,好似 Marcel Breuer 等嘅建築師開始嘗試將粗野主義(brutalism)嘅美學融入去現代建築嗰度,起一啲外部有明顯雕刻裝飾嘅建築物。再後少少嗰代建築師批評現代建築同粗野主義太過一元同標準化,而冇諗到歷史耐啲嘅建築物所展現嘅人類經驗嘅豐富性,覺得呢啲建築「凍冰冰」[71]。於是喺廿世紀中嘅歐洲,新一代嘅建築師之間掀起咗隱喻式建築(metaphoric architecture)嘅潮流-運用大自然嚟做建築設計嘅基礎[71][72]。呢股潮流後嚟仲散佈到去全世界。
後現代主義建築(postmodern architecture)結合當代嘅建築科技同埋平價嘅材料,並且運用現代前嘅建築美學嚟起嘢,好多時會用古代風格嘅元素(例如哥德式元素仲係相當有人氣)。美國建築師 Robert Venturi 將後現代主義界定為一個「修飾過嘅屋仔」(decorated shed)-一棟普通嘅建築物,內部設計基於功能,而外部設計係有住花巧裝飾嘅[73]。後現代主義建築喺幾何上複雜度高、興將大型結構揼散做細部份、形狀成日都唔對稱而且好多時基於大自然入面嘅物件、而外形嘅設計好多時帶有坎普風(camp style)[73]。
睇埋[編輯]
攷[編輯]
- ↑ "architecture". Encyclopedia Britannica.
- ↑ 2.0 2.1 Ching, F. D. (2014). Architecture: Form, space, and order. John Wiley & Sons.
- ↑ 3.0 3.1 清末陳家祠內探「七絕」集嶺南建築藝. 中國新聞網.
- ↑ 4.0 4.1 D. Rowland – T.N. Howe: Vitruvius. Ten Books on Architecture. Cambridge University Press, Cambridge 1999.
- ↑ Kruft, Hanno-Walter. A History of Architectural Theory from Vitruvius to the Present (New York, Princeton Architectural Press: 1994).
- ↑ "Vitruvius Ten Books on Architecture, with regard to landscape and garden design". gardenvisit.com.
- ↑ Françoise Choay, Alberti and Vitruvius, editor, Joseph Rykwert, Profile 21, Architectural Design, Vol. 49 No. 5–6
- ↑ Alberti, Leon Battista. De re aedificatoria. On the art of building in ten books. (translated by Joseph Rykwert, Robert Tavernor and Neil Leach). Cambridge, Massachusetts: MIT Press, 1988.
- ↑ 9.0 9.1 John Ruskin, The Seven Lamps of Architecture, G. Allen (1880), reprinted Dover, (1989).
- ↑ Le Corbusier, Towards a New Architecture, Dover Publications (1985).
- ↑ Sullivan, Louis H. (1896). The tall office building artistically considered. Getty Research Institute.
- ↑ Sullivan, Louis (1924). Autobiography of an Idea. New York City: Press of the American institute of Architects, Inc. p. 108.
- ↑ M. DeKay & G.Z. Brown, Sun Wind & Light, architectural design strategies, 3rd ed. Wiley, 2014.
- ↑ 14.0 14.1 14.2 14.3 "Introduction to Greek architecture". Khan Academy.
- ↑ Summerson, John (1980). The Classical Language of Architecture. Thames and Hudson Ltd. pp. 7–8.
- ↑ Epstein, S.R.; Prak, Maarten, eds. (2008). Guilds, Innovation and the European Economy, 1400–1800. Cambridge University Press.
- ↑ 17.0 17.1 Fletcher, Richard, The Conversion of Europe. From Paganism to Christianity 371-1386 AD. London 1997.
- ↑ 18.0 18.1 V.I. Atroshenko and Judith Collins, The Origins of the Romanesque, Lund Humphries, London, 1985.
- ↑ Rolf Toman, Romanesque: Architecture, Sculpture, Painting, Könemann, (1997).
- ↑ 20.0 20.1 20.2 Grodecki, Louis (1977). Nervi, Luigi, ed. Gothic Architecture. In collaboration with Anne Prache and Roland Recht, translated from French by I. Mark Paris.
- ↑ Wilson, Christopher (2005). The Gothic Cathedral – Architecture of the Great Church. Thames and Hudson.
- ↑ Bordewich, Fergus M. "A Monumental Struggle to Preserve Hagia Sophia". Smithsonian.
- ↑ Savelyev, Yu. R. Vizantiysky stil v architecture Rossii (Савельев, Ю. Р. Византийский стиль в архитектуре России. - СПБ., 2005) Saint Petersburg, 2005.
- ↑ Andrew Martindale, Man and the Renaissance, 1966, Paul Hamlyn,
- ↑ 25.0 25.1 Banister Fletcher, History of Architecture on the Comparative Method (first published 1896, current edition 2001, Elsevier Science & Technology.
- ↑ 26.0 26.1 Though there is a vast literature on the subject, a succinct overview can be found in: Francis Ching, Mark Jarzombek, Vikram Prakash, A Global History of Architecture, Wiley Press, 2006.
- ↑ Dowling, Elizabeth Meredith, New Classicism, Rizzoli, 2004.
- ↑ Curl, James Stevens (1990). Victorian Architecture. Newton Abbot, Devon and London: David & Charles.
- ↑ David S. Landes (1969). The Unbound Prometheus. Press Syndicate of the University of Cambridge.
- ↑ Steam Punk. TV Tropes.
- ↑ 31.0 31.1 31.2 31.3 Esposito, John (1998). Islam: The Straight Path (3rd ed.). Oxford University Press. pp. 9, 12.
- ↑ Fletcher, Banister. A History of Architecture on the Comparative Method 4th Edition, London, p. 476.
- ↑ Yarshater, Ehsan. Persia or Iran, Persian or Farsi.
- ↑ Caheb C., Cambridge History of Iran, Tribes, Cities and Social Organization, vol. 4, p305–328
- ↑ 35.0 35.1 Arthur Upham Pope. Persian Architecture. George Braziller, New York, 1965.
- ↑ Richards, John F. (1995), The Mughal Empire, Cambridge University Press.
- ↑ Necipoğlu, Gülru (1995). Muqarnas: An Annual on Islamic Art and Architecture. Volume 12. Leiden : E.J. Brill.
- ↑ Goodwin, Godfrey (1993). Sinan: Ottoman Architecture & its Values Today. London: Saqi Books.
- ↑ 39.0 39.1 Singh, Upinder (2008). A History of Ancient and Early medieval India : from the Stone Age to the 12th century. New Delhi: Pearson Education.
- ↑ Charles Taliaferro and Elsa J. Marty (2010), A Dictionary of Philosophy of Religion, Bloomsbury Academic, pages 98-99.
- ↑ Damien Keown (2013). Buddhism: A Very Short Introduction. Oxford University Press. pp. 28, 32–38.
- ↑ Harle, J.C., The Art and Architecture of the Indian Subcontinent, 2nd edn. 1994, Yale University Press Pelican History of Art,
- ↑ Encyclopædia Britannica (2008), North Indian temple architecture.
- ↑ "Ajanta Caves".
- ↑ 吳, 慶洲. 藏傳佛塔與建築裝飾. 中國建築. Vol. 034. 錦繡出版 (王進榮).
- ↑ Rose, Tudor (2015). Agree to Differ. UNESCO Publishing.
- ↑ 47.0 47.1 Kerry Brown, ed. (1999). Sikh Art and Literature. Routledge.
- ↑ 48.0 48.1 48.2 Liang, Ssu-ch'eng 1984, A pictorial history of Chinese architecture: a study of the development of its structural system and the evolution of its types, ed. by Wilma Fairbanks, Cambridge (Mass.): MIT Press.
- ↑ 49.0 49.1 49.2 49.3 49.4 49.5 中國建築六大派,驚艷四海!.
- ↑ 嶺南建築.
- ↑ 穿越印度古今:影響東方建築的印度古文明.
- ↑ 唐朝——曾經有一個這樣的中國!. 每日頭條.
- ↑ 53.0 53.1 簫默. 敦煌建築研究. 機械工業出版社. 2002.
- ↑ 東大寺.
- ↑ Paine, R. T., & Soper, A. C. (1981). The art and architecture of Japan (Vol. 8). Yale University Press.
- ↑ 陆林, & 焦华富. (1995). 徽派建筑的文化含量. 南京大学学报: 哲学. 人文科学. 社会科学, (2), 163-171.
- ↑ 侯曙芳, & 李道先. (2006). 徽派古民居建筑的地域文化特征. 重庆建筑大学学报, 28(6), 24-26.
- ↑ 中國古建築六大門派之二蘇派.
- ↑ 陈凯峰. (2007). “闽派” 南建筑的传承——海峡两岸共此一脉. 城乡建设, (11), 71-72.
- ↑ 黃漢民. 福建土樓:中國傳統民居的瑰寶. 生活·讀書·新知三聯書店. 2003.
- ↑ 吴怡雯. (2015). 找回京派传统建筑失落的魂——浅析 “运河岸上的院子” 的建筑美. 居业, (4X), 112-113.
- ↑ 炳坚. (1999). 北京四合院建筑. 天津大学出版社.
- ↑ Silbergeld, J. (2004). Beyond Suzhou: Region and Memory in the Gardens of Sichuan. The Art Bulletin, 86(2), 207-227.
- ↑ 64.0 64.1 淺談嶺南民居的嶺南建築特色
- ↑ 王伟俊. (2018). 岭南建筑设计中风格的表现手法特点探讨. 建材与装饰, (2018 年 33), 94-95.
- ↑ 张静, 刘佳男, & 刘淑娟. (2018). 岭南传统建筑与湿热气候关系研究——以西关大屋为例. 四川水泥, (2018 年 07), 297-297.
- ↑ Nishi, Kazuo; Hozumi, Kazuo (1996) [1983]. What is Japanese architecture? (illustrated ed.). Kodansha International.
- ↑ Stone, Jacqueline (December 1993). "Review of Of Heretics and Martyrs in Meiji Japan: Muslim and Its Persecution by James Edward Ketelaar". Harvard Journal of Asiatic Studies. 53 (2): 582–598.
- ↑ "What is Modern architecture?". Royal Institute of British Architects.
- ↑ Weingardt, Richard (2005). Engineering Legends. ASCE Publications. p. 76.
- ↑ 71.0 71.1 Fez-Barringten, Barie (2012). Architecture: The Making of Metaphors. Newcastle upon Tyne: Cambridge Scholars Publishing.
- ↑ Otero-Pailos, Jorge (2010). Architecture's Historical Turn: Phenomenology and the Rise of the Postmodern. Minneapolis: University of Minnesota Press.
- ↑ 73.0 73.1 Venturi, Robert (1966). Complexity and Contradiction in Architecture. New York: Museum of Modern Art.
拎[編輯]
| 維基同享有多媒體嘅嘢: 建築學 |