環境平面設計

出自維基百科,自由嘅百科全書
環境平面設計係一個喺生活上經常接觸到但係好少人聽過嘅設計領域

環境平面設計英文environmental graphic design,又叫 experiential graphic design,簡稱 EGD 或者 XGD)係平面設計嘅一個分支[1]:14,喺1973年由平面設計分出來[2],但係同建築學工業設計景觀設計室內設計都有關係[3];環境平面設計嘅目的係透過平面設計嘅設計元素,喺三維空間達到傳達訊息嘅目標,主要工作可以粗略咁分做 「尋路系統」 同 「展覽設計」 兩大類[4][5]:71

環境平面設計可以同品牌設計結合或者按住設計好嘅品牌做(英文叫 placemaking),目的係訪客對嗰笪地方有好嘅印象,唔會覺得同個品牌嘅其他嘢唔夾[6]:73

一般嘅平面設計師都可能會做環境平面設計,但係有啲人專做環境平面設計,呢啲人叫環境平面設計師

尋路系統[編輯]

尋路系統畀嘅資訊要齊,但係呢個輕鐵站唔過馬路都唔知啲車向東定向西,資訊唔齊,設計好唔理想
  呢篇文講人搵路。想搵電腦搵路嘅話,請睇搵路

「尋路」(wayfinding)呢個領域係指設計一個包含各種指示牌嘅系統,等人知道自己喺邊,同點樣搵路去第個地方[5]:71。人搵路不外乎兩種方法,一係就已經熟悉嗰個地方,唔使幫就識靠地標搵路;一係就要問人或者靠架生,跟住指示由一點 A 去到另一點 B,直至到達終點為止,呢種方法叫做 linear wayfinding(線性尋路)[5]:72

所謂 「尋路系統」(wayfinding system)或者 「指示牌系統」(signage system)[7]就係呢種幫人用線性尋路來搵路嘅系統,原理係用指示牌等等嘅設計元素製造一啲人造地標,令人可以認路。一個理想嘅尋路系統會提供又齊又準嘅資訊,而表達方法就又睇得明又有文理[5]:72

尋路系統用嘅指示牌通常按功能可以分做幾大類,包括標示位置(identification)、教人點去第度(directional)、地圖(orientation)同規管性質(regulatory,例如 「左行右企」、「請勿觸摸」 等等)[6]:47。除咗牌之外,亦可以喺環境入面加入例如顏色、圖標、聲音、數碼科技等等[8][7][9][10]

設計指示牌有一啲標準嘅圖標可以用[11]:173,但係唔表示設計者喺呢方面唔使做嘢。例如,歐美設計嘅圖標可能喺亞洲唔係好啱用,設計者就要改圖標或者創作一啲新嘅圖標[12]

工作概要[編輯]

設計尋路系統係一種要做好多準備工夫先做得好嘅工作,最重要嘅第一步就係分析當地環境,以便預計用嗰笪地方嘅人嘅需要,而爾步最基本就係要睇圖則,根據份則估計啲人會喺邊度入、喺入便會要去邊、企邊度望乜嘢角度要睇到乜、完咗喺邊度走出去等等,再估計邊度要擺牌,啲牌又要寫乜嘢,啲字要幾大等等[6]:57

到恁一般認為係平面設計嘅嘢(例如顏色、字體等等)都唔係想點就可以點。例如,當中有啲嘢(例如字體比例、使唔使放凸字等等)可能有法例規定[5]:72–75,又或者有時品牌用開嘅設計元素唔啱喺三維空間用[6]:69。所謂唔啱用,係因為指示牌好多時係畀人遠距離望,所以啲字一定要好遠都好清楚,所以唔可以亂揀字體[6]:80,亦都唔可以亂揀顏色[6]:88–90

設計完成之後,設計師要寫一系列嘅文件,用來解釋點解咁設計,同話畀其他人知啲牌點整,放喺邊、點放等等[6]:138–140

展覽設計[編輯]

設計展覽要計劃啲人點行,啲嘢點擺,啲字幾大先至喺某個距離睇得清楚

展覽設計就係指設計點樣喺展覽度傳達某種訊息或者講一件事、一段歷史或者一個故仔[5]:71。展覽設計除咗要預計啲人會點行,應該點擺啲嘢之外,亦都好可能涉及好多相對近距離睇嘅長文,除咗文章點排版之外,亦都要顧及啲文放嘅高度,同啲展品會唔會對傷殘人士造成危險等等[5]:72, 75–76

睇埋[編輯]

[編輯]

  • Guimapang, Katherine (2022年3月16號). "Environmental graphic design and its history with architecture highlights the value of cross-disciplinary expertise". Archinect News (英文). 喺2022年10月7號搵到.

[編輯]

  1. The Business of Graphic Design: The RGD Professional Handbook (加拿大英文) (第3版). Toronto, Canada: Association of Registered Graphic Designers. 2015.
  2. "40 Great Moments in EGD" (美國英文). Society for Experiential Graphic Design. 原著喺2022年10月8號歸檔. 喺2022年10月7號搵到.
  3. Bedrossian, Rebecca (2008年3月6號). "Environmental Graphic Design" (英文). 喺2022年10月7號搵到.
  4. Dixon, Peter. "What is SEGD" (英文). Society for Experiential Graphic Design. § What is Experiential Graphic Design? [XGD]. 喺2022年10月5號搵到.{{cite web}}: CS1 maint: url-status (link)
  5. 5.0 5.1 5.2 5.3 5.4 5.5 5.6 Access Ability: A Practical Handbook on Accessible Web Design (PDF) (加拿大英文) (第2版). Toronto, Canada: Association of Registered Graphic Designers. 2019. 喺2022年10月7號搵到.
  6. 6.0 6.1 6.2 6.3 6.4 6.5 6.6 Gibson, David (2009). The Wayfinding Handbook: Information Design for Public Places. New York: Princeton Architectural Press. ISBN 978-1-56898-769-9.
  7. 7.0 7.1 葉振軒 (2022年). (作品展) (香港中文). 喺2022年10月7號搵到.
  8. Thakre, Rajendra (2022年4月9號). "Wayfinding Design System for MIT Institute of Design". AIGA Teaching Resource (美國英文). American Institute of Graphic Arts. 喺2022年10月7號搵到.
  9. Gosling, Emily (2017年6月19號). "Why Icon Design is an Evolving Discipline According to Lance Wyman". AIGA Eye on Design (美國英文). American Institute of Graphic Arts. 喺2022年10月7號搵到.
  10. Duhatschek, Paula (2019年). "Advocates are installing a network of wayfinding "beacons" for the blind in downtown London" (加拿大英文). Canadian Broadcasting Corporation. 喺2022年10月7號搵到.
  11. Graphic Artists Guild Handbook: Pricing & Ethical Guidelines (英文) (第14版). New York: Graphic Artists Guild. 2013. ISBN 978-0-932102-16-4.
  12. Riechers, Angela (2017年12月8號). "The Simple Genius of the Official Chinese Icon System Is Finally Available For All To See". AIGA Eye on Design (美國英文). American Institute of Graphic Arts. 喺2022年10月7號搵到.