上帝

  想搵中華文化入面嘅上帝嘅話，請睇上帝 (中華)。

各大宗教入面對上帝或者至高神嘅描述：
左上係名畫《創造亞當》入面嘅天父；
右上係拜火教入面嘅阿胡拉·馬茲達；
左下係猶太教入面嘅四字神名；
右下係印度教入面嘅毗濕奴。

上帝，又叫最高存在體，係一神論入便嘅至高神，只有一個。多數主流宗教都有提到上帝，不過唔同宗教對上帝本質有唔同嘅見解：喺猶太教、基督教、回教同拜火教之中，創造宇宙嘅主宰係唯一嘅神，除咗佢之外就無其他神；同時，基督教傳統上主張耶穌係上帝個仔，但係猶太教同回教唔同意依種觀點。第啲宗教亦有非常近似上帝嘅概念，譬如印度教一般被認為係多神論嘅宗教，但佢哋有梵依個概念－唔少印度教徒都認為，咁多唔同神祇查實都係至高主宰嘅唔同形態。

對於上帝嘅具體特性，唔同宗教見解稍異，不過多數觀點都認為，上帝創造萬物，係世界同宇宙嘅主宰，會監視世上一切；而好似係無所不知、無所不能、無所不在、至善至聖、自有永有... 等，都係上帝概念嘅常見特質。

除咗宗教觀點之外，亦有人對上帝持有非宗教嘅立場，而宗教哲學就涉及針對上帝係咪存在等課題嘅哲學討論：無神論認為，宇宙中並無任何神聖存在，唔信任何形式嘅神祇，亦唔信上帝；不可知論就主張人類無法確切知道上帝係咪存在，所以持不確定嘅態度。而諸如邪惡問題同全能悖論等嘅宗教哲學問題，亦成為咗哲學史之中長久存在嘅議題。

各語叫法

德國畫家杜勒嘅畫作《祈禱之手》；喺多個宗教中，雙手合埋一齊祈禱都被視為同上帝溝通嘅方式。

世界多地嘅語言，都有唔同嘅名，用嚟稱呼至高無上、創造宇宙嘅神。

漢語

睇埋：神

粵語中對上帝嘅稱呼：

• 上帝，粵拼：soeng6 dai3
• 神，粵拼：san4

漢語上帝一詞可以理解為在上嘅帝王噉解，帶有最高主宰嘅含意。帝係就天，殷商搭柴，火燒升煙，向天請示，就係帝。後尾帝祭寫成禘。所以帝係天嘅代字。上帝、天、上天、上蒼、天主、天帝等，都係同一意思。上帝最早可見於《尚書》，依本古代典籍講到周朝同商朝君臣嘅對話紀錄，期間有提到當時啲人會拜上帝。而基督教等嘅宗教傳入中國，唐人開始用上帝一詞嚟稱呼聖經中創造天地嘅主宰。

眾漢語中亦成日會用神依個字詞嚟指上帝，不過依隻漢字嘅意思就比較廣泛同含糊，既可以指上帝，但又可以指「非至高無上、但有人會拜佢哋」嘅神祇，例如係粵港地區嘅華人成日會拜嘅土地公同黃大仙、日本神道教入便嗰啲神靈、或者希臘神話裡便嘅宙斯等天神，都會被稱為神。相比之下，上帝一詞嘅詞義，就係好特定噉指「至高無上、創造宇宙、冇形體」嗰個神。

其他

喺英文，上帝嘅名一般會寫做 God －當中個 G 字一定要大階，否則就唔係指緊上帝，而係泛指神祇，包括希臘神話或者北歐神話入便嗰啲眾神。而猶太人使用英文嗰陣，成日會將上帝嘅名寫做 G-d －原因係猶太教中有個傳統，覺得擦走上帝嘅名係不敬嘅，所以就改為寫 G-d －噉佢哋真係要擦走啲字嗰陣，就唔會真係擦走上帝個名。

真主阿拉係上帝喺阿拉伯文嘅名：根據回教徒嘅信仰，穆罕默德係至聖嗰位先知；穆罕默德係阿拉伯人，而回教經典嘅原版就係用古典阿拉伯文寫成嘅，用左阿拉伯文阿拉一詞稱呼造物主；依個詞回教徒成日用，用嚟稱呼創造宇宙嘅主宰。不過原則上，阿拉唔係回教專用詞彙，而係阿拉伯語上帝、造物主噉解，所以講阿拉伯語嘅基督徒同猶太教徒，都會用阿拉一詞嚟稱呼上帝。

猶太教常用嘅希伯來文，亦有多個名，稱呼創造宇宙嘅主宰，當中四字神名就廣為人知，亦係希伯來聖經用得最多嗰個名：

四字神名係上帝喺希伯來文嘅其中一個名：

יהוה

依個詞據講係源自古動詞存在，或者類似嘅意思。用羅馬字寫嘅話，依串字一般作

YHWH 或者 YHVH

希伯來文用嘅希伯來字係輔音字母，傳統上只寫輔音不寫元音。西人用羅馬字寫依個名嗰陣，好多時會加插返啲元音落去，變成 Yahweh（近似粵拼 jaa1 wei4，漢化常作耶和華）依個名。而由於基督教同猶太教同源，耶穌亦係猶太人，現代嘅基督徒亦時會用耶和華依個詞嚟稱呼造物主。

喺二〇一〇年巴黎一角影到嘅裝飾，粒大衛之星中間，寫咗猶太教中嘅四字神名。 喺二〇一〇年巴黎一角影到嘅裝飾，粒大衛之星中間，寫咗猶太教中嘅四字神名。

重要特徵

原則上，上帝係冇形體嘅，但西洋人用畫等嘅媒介描繪上帝嗰陣，好興將佢畫成一位有權威嘅老翁噉嘅樣。

睇埋：神學、宗教哲學同上帝係咪存在

對於上帝係咪存在，神學同哲學等領域嘅思想家都起過激辯：

• 無神論：無神論者否定任何嘅神祇，唔信上帝存在。
• 不可知論：不可知論者對上帝係咪存在，持有不確定嘅取態，甚至可能主張人冇可能肯定知道上帝係咪存在。
• 自然神論：確信宇宙存在，但係認為上帝創造宇宙之後，唔會再對宇宙作出任何干預。美國國父好多都有自然神論嘅傾向，例如湯瑪斯傑佛遜噉。
• 泛神論：認為上帝同宇宙係一體嘅，或者宇宙係上帝嘅體現。

世界各大宗教，都有講到上帝或者非常近似嘅概念，所以對上帝係咪存在普遍持肯定態度。一般嚟講，多數主流宗教都認同最高存在體具有無所不知、無所不能、創造宇宙... 等嘅特性，但佢哋對某啲細節嘅睇法可以好唔同。整體而言，上帝概念上係宇宙入便最偉大嘅存在體：佢自有永有，意思即係話佢係萬物嘅原因，而且永遠不滅，佢係宇宙嘅創造者、維持者、同埋統治者，例如《妥拉》嘅創世紀，就有講到上帝用七日創造天地萬物嘅故事；喺各宗教中，上帝無形體而且具有超越性，獨立於物質世界。此外，上帝仲係無所不知、無所不能、無所不在嘅，佢至善至聖，想帶領人類走向正道。

創世

睇埋：創造神

喺主流嘅一神論宗教入面，上帝係造物主。

例如根據聖經《創世紀》嘅記載，上帝用咗六日嘅時間創造天地萬物：佢喺第一日創造光，將光同黑暗分開；第二日創造分開天同海；第三日就分開海洋同陸地，並且令到陸地生出植物；第四日創造日月星辰，標誌晝夜同季節；第五日創造飛鳥同水中生物；第六日就創造陸上嘅走獸，最後按照自己嘅形象創造人類。到第七日，上帝休息。喺猶太教嘅傳統中，依日係聖日，謂之安息日，猶太人要放低手上嘅工作，好好噉唞。二十一世紀初嘅基督教，都有沿襲依個傳統。

全知

内文：全知

喺各大宗教之中，上帝另一個重要特徵係無所不知，意思即係話佢咩都知道。

譬如喺主流基督教教義入面，人死咗之後，上帝會根據佢生前嘅信仰同品行，決定佢嘅靈魂應該上天堂定係落地獄。由於上帝係全知嘅，每一個人生前嘅思想、言語同行為係點佢都知道得一清二楚，冇任何嘢可以隱瞞得到－假如某個人殺左人，就算佢收埋左條屍，到死嗰日都冇俾人捉到，而且一世都喺其他人面前扮好人，都唔會瞞得到上帝。依種信念強調咗上帝作為至高審判者嘅角色，而且同基督教嘅道德觀有緊密關連。

全能

内文：全能

喺各大宗教之中，上帝亦有無所不能依個特性，意思大致可以理解為係佢咩都做得到。

無所不能依個概念嘅具體定義引起咗唔少爭詏：例如有人就提出咗一條問題，問上帝係咪有能力造出一嚿佢自己舉唔起嘅石頭；如果上帝有能力噉做，就表示佢舉唔起嗰嚿石頭，表示有最少一樣嘢係佢做唔到嘅，同無所不能嘅概念起咗矛盾；而若果上帝造唔到噉嘅石頭，又表示有最少一樣嘢係佢做唔到嘅，噉就起咗個悖論。因此哲學同神學等領域嘅討論，就開始傾無所不能嘅具體定義為何：有唔少學者主張，無所不能意思係指合邏輯嘅全能，即係話任何合邏輯嘅事上帝都做到，亦有學者主張，上帝只係非常有能，能夠創造天地萬物，但唔係真係字面上解噉咩都做到。

全善

内文：全善

除咗全知同全能之外，上帝亦係至善嘅。喺傳統嘅猶太教同基督教教義中，上帝係道德嘅源頭，並且透過律法去引導人嘅行為。例如舊約聖經出埃及記入便就講到摩西帶領猶太人離開埃及，及後喺西乃山上受到上帝啟示而頒佈十誡，教導信徒要尊敬上帝、孝敬父母、唔可以殺人、唔可以偷竊、唔可以作假見證... 等，喺猶太教同基督教之中，依啲誡命被視為上帝賜俾人類嘅道德準則，反映佢至善嘅本性。

不過至善依個概念，又引起咗一啲爭義，尤其係宗教哲學上著名嘅邪惡問題。簡單講，依條問題係問緊：如果上帝真係全知、全能同至善，點解世上仲存在咁多痛苦同邪惡？根據一種簡單嘅睇法，假如上帝真係全知全能全善嘅，佢理應知道邪惡存在、有能力消滅邪惡、又有動機消滅邪惡，而邪惡存在，就表示上帝根本唔存在。另一方面，唔同嘅宗教學者又提出解釋，例如有啲神學觀點指出，苦難可以起到試煉嘅作用，而現代嘅猶太教當中有修正世界嘅概念，認為默西亞尚未降臨所以世界唔完美，世人要繼續努力。

一體

睇埋：三位一體、梵同一元論

某啲信仰系統認為，上帝可以「有唔同形態」：

• 傳統上，基督教（包括天主教、基督新教同東正教等）主張三位一體論：喺依套觀點下，聖父、聖子同聖靈三者本質上一體，三者並唔相同，但都共通係上帝，而身為聖子嘅耶穌基督，可以視為上帝以血肉之軀降臨人世而成；三位一體嘅諗法，強調上帝係唯一嘅，但同時可以以三個唔同嘅位格去同人互動。
• 依個觀念，有少少似印度教所講嘅梵：唔少印度教徒（但唔係全部）相信，印度教眾多神祇－毗濕奴同濕婆等－其實都係同一個至高神（簡單講即係梵）嘅唔同「面相」或者「體現」。有人稱依種信仰為多態一神論，即係話佢哋相信單一一個神，同時認為依個神可以用唔同形態現身。

相比之下，猶太教同回教就堅持嚴格嘅一神論：佢哋嘅睇法係，上帝唔會有咩分身或者面相，佢哋亦唔接受上帝會以人身降世噉嘅講法，認為信徒除咗單一上帝之外唔可以敬拜任何嘢。對於耶穌嘅具體身份，猶太教徒普遍視佢為歷史上一位猶太人老師，唔少猶太人亦欣賞耶穌嘅教誨，覺得佢係一個品行好嘅猶太人，但無論如何，佢哋始終唔認為耶穌係默西亞或者上帝之子；而回教徒亦相當敬重耶穌，認為佢係重要嘅先知。

睇埋

• 一神論
• 多神論
• 亞巴郎諸教
• 巨匠造物主

拎

• （英文）祖父上帝，講到西方人成日將上帝描繪成好似祖父噉嘅形象。