中文房間

出自維基百科,自由嘅百科全書
跳去導覽 跳去搵嘢

中文房間Chinese room)係由約翰·希爾勒提出嘅一個思想實驗,藉以反駁強人工智能嘅觀點。根據強人工智能嘅觀點,只要電腦有適當嘅程式,就可以話部電腦擁有自己嘅認知狀態,並且可以好似人噉進行認知活動。

呢個思想實驗可以噉樣講:

將一個對中文一竅不通,淨係識英文嘅人韞喺一間只有一個開口嘅封閉房入面。房裏面有本用英文寫成嘅手冊,指示應該點樣處理收到嘅中文信息同埋點樣用中文相應噉回覆。房外嘅人會係噉向房內遞用中文寫嘅問題。房內嘅人就按手冊嘅說明,搵出合適嘅指示,將相應嘅中文字元組合成對問題嘅解答,並且將答案遞出房外面。

約翰·希爾勒認為,就算房入面嘅人做到以假亂真,令房外嘅人以為佢真係識中文,但佢查實根本唔識中文。