共同進化

一隻蜜蜂喺度採花蜜。

共同進化（coevolution）係指兩個或者以上物種嘅生物喺物競天擇下互相影響對方嘅進化。例如達爾文同第啲生物學家就思考過開花植物同蝴蝶蜜蜂之間嘅共同進化：對開花植物嚟講，進化到啲花色水鮮艷啲會比較容易吸引蝴蝶同蜜蜂幫自己傳粉，而同時對蝴蝶同蜜蜂嚟講，進化到分辨色水嘅能力勁啲會有助自己判斷一朵花有幾多花蜜，於是兩者就一齊進化並且影響對方嘅進化。