脈衝神經網絡

脈衝神經網絡（spiking neural network，SNN）係所謂嘅第三代人工神經網絡，嘗試進一步真實噉模擬生物神經網絡，重點在於會考慮時間：喺現實世界嘅生物神經網絡當中，唔同神經細胞之間嘅連繫可能會喺長度上唔一致，而呢類嘅原因會令到（例如）一粒神經細胞射訊號嗰陣，受佢訊號嗰啲細胞會喺唔同時間點收到個訊號；相比之下，廿世紀嘅人工神經網絡並冇考慮呢一點，當一粒人工神經細胞射訊號嗰時，下一排嗰啲細胞冚唪唥都會喺同一時間點收到個訊號。於是，脈衝神經網絡喺運算嗰陣，係以模擬嘅時間點（而唔係以運算週期）做個 foreach迴圈嘅基礎，簡單啲講嘅話：

 Foreach 模擬嘅時間點， // 非脈衝神經網絡會係「foreach 細胞層，計...」
   記住每個訊號嘅位置；
   按訊號速度，計出每個訊號喺下一個時間點嘅位置；
   按啟動函數，計吓邊啲細胞要啟動；
   ......

為咗更加接近現實嘅生物神經細胞，脈衝神經細胞好多時會用「人工神經細胞射訊號嘅頻率」等嘅變數做網絡嘅輸出。詳情可以睇吓神經編碼（neural coding）。