屎甲蟲

How to read a taxobox 屎甲蟲
Scarabaeus viettei
物種分類
界 動物界 Animalia 門 節足動物門 Arthropoda 綱 昆蟲綱 Insecta 目 鞘翅目 Coleoptera 科 金甲蟲 Scarabaeidae

屎甲蟲（粵音：si2 gaap3 cung4），又叫推屎蟲、牛屎蟲、屎殼螂（俗寫屎殼郎），係金甲蟲下嘅一類甲蟲。屎甲蟲出嗮名鍾意食大啲嘅動物嘅屎：好多物種嘅屎甲蟲係所謂嘅 roller，會將大啲嘅動物嘅屎搓成波噉形，形成屎波，而一嚿噉嘅屎波可以成個蘋果咁大；屎波成形之後，屎甲蟲就會將個波轆返去竇度，喺個竇儲起一大拃屎波用嚟食；啲屎甲蟲乸仲會將啲蛋生喺啲屎波入面，等啲幼蟲一出世就有嘢食；屎甲蟲相當大食，一隻屎甲蟲可以喺廿四個鐘頭內食超過佢自己重量嘅屎－因為噉，屎甲蟲幫到手將屎變做對第啲生物有用嘅物質，畀好多人覺得係益蟲。

雖然話屎甲蟲最出名係會食屎，但佢哋（視乎物種）有陣時亦會食死屍。

形態

睇埋：甲蟲同金甲蟲

喺外形上，屎甲蟲通常圓碌碌噉形，翼鞘短，令佢哋嘅腹部暴露咗出嚟，體長由 5 至 30 mm（0.2 至 1.2 in）不等；色水上，佢哋通常暗淡，尤其係以黑色好常見，不過有唔少屎甲蟲塊「外甲」會有金屬噉嘅光澤。

2009 年南非一角影到嘅片；隻屎甲蟲喺度推個屎波，想轆個屎波返竇。

又一段片展示屎甲蟲推屎。

一隻公嘅彩虹聖甲蟲（Phanaeus vindex）

生命週期

睇埋：完全變態

同第啲甲蟲一樣，屎甲蟲係行完全變態嘅，一世蟲分蛋、幼蟲、蛹同成蟲四個階段，

生態角色

屎甲蟲喺生態系統當中擔當咗重要嘅角色，例如係有生態學家指出，屎甲蟲食屎會令生態系統裏面嘅屎量少咗，間接壓抑咗啲會喺屎入面生蛋嘅害蟲（例如係多種嘅烏蠅）嘅數量，對人嚟講好有益。

文化相關

聖甲蟲

一座古埃及神殿上面嘅聖甲蟲標誌

内文：聖甲蟲

聖甲蟲係古埃及成日用嘅一種符號，喺某啲人造物件上面描繪咗屎甲蟲嘅形象。

聖甲蟲呢種符號源自古埃及人嘅信仰：古埃及人相信，太陽神拉（古埃及文：rꜥ；成個古埃及信仰入面最重要嘅天神之一）每日都會負責推住太陽，令到太陽日出嗰陣就轆上天，到咗日落就轆返落山；佢哋又觀察到屎甲蟲會將啲屎搓做球體再轆返個竇度，覺得呢種行為有啲似太陽神拉；於是好多古埃及人就因而相信屎甲蟲有神力，所以會攞呢啲甲蟲嘅形象嚟造護身符等嘅物品，甚至雕埋聖甲蟲嘅形象落（例如）神殿嘅牆度。

睇埋

• 兜蟲同鍬甲蟲，屎甲蟲嘅近親。
• 生物地球化學循環

文獻

• Nichols, E., Spector, S., Louzada, J., Larsen, T., Amezquita, S., Favila, M. E., & Network, T. S. R. (2008). Ecological functions and ecosystem services provided by Scarabaeinae dung beetles. Biological conservation, 141(6), 1461-1474.

拎

• Dung beetle. Encyclopedia Britannica.