粵港澳

粵港澳（粵拼：Jyut6 Gong2 Ou3），又可以講省港澳（粵拼：Saang2 Gong2 Ou3）、穗港澳（粵拼：Seoi6 Gong2 Ou3），係指廣州、香港、澳門三個地頭，呢個係南粵地區發展最快、財富最集中嘅地區。民間一路有「廣州城」、「香港地」、「澳門街」嘅講法。另外仲有「粵港澳湛」嘅講法，因香港、澳門仲有湛江（廣州灣），都係有過西人嘅管治。另睇埋七子之歌。

概覽

「省」係可以指廣東省城廣州市。由於地理人口嘅緊密度極高，作為經濟、文化體，同時三地都係有同屬廣東嘅歷史，經常俾睇做係一體。唔少時候，香港同廣州嘅合作係較為受關注，一般就講粵港（港粵）、省港，如省港大罷工、省港盃等。而省港澳三地層面嘅共進例子，有喺1991年農曆除夕，直播過嘅省港澳呈祥迎新歲.

關係嘅發展

行政

前214年（秦始皇卅三年）秦朝征服咗百越，之後設咗南海郡，其中下設嘅番禺縣管轄埋香港、澳門。到咗東晉咸和六年（331年），港澳改由寶安縣管轄。宋紹興二十二年（1152 年），澳門劃咗畀香山。明萬曆元年（1573 年），香港劃咗畀新安縣。建置呢陣開始定咗型，直至葡萄牙人同英國人，喺16世紀中葉同19世紀中葉，分別居留、管治兩地之前。之後就出現咗粵（省）同港、澳有咗各自嘅政府系統，而呈現「三國分治」嘅局面。喺港澳嘅主權再移交俾中共前，三地嘅政府間關係，實質就變咗三地所屬嘅宗主國間、中央政府層嘅外交關係，而受制於呢種國際間關係，到咗中共建政後嘅改革開放之後，三地政府又喺經濟層面發展返合作關係。

澳門同廣東/廣州

喺澳門定居嘅葡萄牙人，喺1580年自己選咗法官，喺當地實施埋葡國嘅法律，呢個仲要係喺明政府控制咁嘅領土度搞，自不然明朝廷係唔會應承呢種做法嘅。新到任嘅兩廣總督劉堯誨就代表咗朝廷，責備兼查辦咗呢次活動。後尾澳門地方長官、葡國貿易船隊司令官米南德（Aires Gonç alve s deMiranda）嘅代表本內拉（Mat ia Penel la）去同明官府啲人傾咗一輪，而平息咗事態。而嗰陣嘅明政府係強調返，居澳葡人必須服從朝廷官員嘅管轄。到咗1582年左右，明政府喺行政、司法、課稅等方面，對澳門建立咗套特殊嘅管轄制度，譬如喺1584年，明官府就出面「任命」咗居澳葡人嘅首領「管理」啲葡人，仲「授予」首領管理住埋喺居留地入邊嘅華籍商人同居民嘅權力。與此同時，明政府仲喺澳門葡人居留地建立咗議事亭，作為中葡雙方官員會面商討政務嘅場所。

經濟貿易

澳門同廣東/廣州

澳門由明代到香港開埠前，係廣東對外貿易嘅重要外港，廣東度出產嘅生絲、絲綢品、瓷器同中草藥等貨品，係經由澳門運去南洋、歐洲、日本同墨西哥等地。而葡萄牙經由澳門，就向廣州輸入咗胡椒、蘇木；日本、墨西哥同秘魯嘅白銀、馬尼拉嘅棉花、蜂蠟等亦經澳門輸入嚟。各類入口貨入邊最大佔比嘅係銀元，據計算萬曆元年至崇禎十七年（1573 ~ 1644），葡萄牙、西班牙、日本等國經澳門輸入嘅白銀，超過咗1億。喺閉關鎖國時期，外國商船冇法直入廣州做生意，外商亦冇法居留，澳門就成咗入粤外商船舶嘅港口，仲有到廣州繼續做生意嘅外商嘅旅居地。

到咗1578年，明政府允許返啲外商入廣州做生意，東南亞各國商人同其他外國商人，就唔再停留澳門而紛紛直接去返廣州做生意，澳門慢慢變成咗葡萄牙獨佔嘅商埠。而貿易重心轉移嘅同時，廣東地方官仲制訂咗詳細辦法，管控喺當地嘅外商同啲外貿活動，包括咗外商必須有同業組織指定嘅富有華商做「擔保」，而唔遵守嘅外商有機會冇法獲得當地服務同生活用品。聯繫埋官府財稅徵收嘅來源轉變，為後來嘅朝貢貿易嘅變體——公行嘅形成，奠定咗一定嘅基礎。

香港同廣東/廣州

香港範圍盛產海鹽。喺南宋初年，朝廷試過喺九龍灣一帶設立官富場，管理當地嘅產鹽事務，係嗰時南海郡東莞縣四大鹽場之一。另一方面，朝廷嚴禁咗近官家鹽場嘅大奚山傜民自己做鹽業，但初時係搞懷柔政策，打擊「私鹽」冇乜收效。宋孝宗淳熙十年（1183年）嘅5月29號，宋帝落詔話：「大奚山私鹽大盛，令廣東帥臣遞送節次，已降指揮，常切督責彈壓官並澳長等，嚴行禁約。」 明令打擊大奚山私鹽，引起咗當地居民強烈不滿，後尾居民反抗被官兵鎮壓咗，大奚山嘅產鹽業轉變式微。

而由明到清初，東莞所產嘅莞香成為咗上貢佳品，唔止喺廣東入邊暢銷，仲遠銷內地乃至日本，同埋南直隸、浙江等地嘅需求極大。製香業就咁喺香港興盛咗起身，當其時喺瀝源（而家嘅沙田），大奚山（而家嘅大嶼山）沙螺灣等地生產嘅香樹製品，會用啲木箱裝好嗮，跟著啲貨經陸路運去尖沙頭（而家嘅尖沙咀）嘅香埠頭（香料專用碼頭），用艇仔送到石排灣（而家嘅香港仔）集中堆放，再用俗稱「大眼雞」嘅艚船運上去廣州。啲貨到省城後，跟著係再由陸路經南雄，過大庾嶺，過贛江去到九江府，沿著長江送達蘇杭等地販售。

財稅

澳門同廣東/廣州

明朝政府喺洪武四年（1371年），設置咗廣東市舶提舉司，由呢度派咗名副提舉落澳門，負責徵收外國船貨嘅關稅。喺隆慶五年（1571年）前，係按明初貢舶貿易「十抽五」嘅抽分制收稅。之後改咗用「丈抽法」徵稅，外商啲稅負相對少過「十抽五」。廣東地方官府後期注意到，葡萄牙商人同華商係自己喺大明境內做生意，明官府自己就收唔到啲稅。為咗再有錢收，官府由萬曆六年（ 1578）開始畀澳門嘅葡萄牙商人，喺每年夏、冬兩季到廣州河南海珠島（而家嘅省總工會一帶），參加會開幾個禮拜嘅定期市（類似返交易會），同啲華商喺官府監視下做生意，入境嘅葡商同時會被官府徵收啲巨額船餉（噸稅或水餉），仲有貨稅。

軍事

香港同廣東/廣州

想知多啲：屯門軍鎮

喺漢武帝統治埋嶺南嘅時代，就開始設有鹽官統領軍隊同船艇，駐紮喺屯門一帶，監督九龍灣沿海仲有沙頭角等鹽田嘅作業。

到咗唐朝時廣州係南方嘅最大商港，嗰陣時啲由印度、波斯灣仲有南洋諸地嚟嘅外國海船去廣州通商，會行近屯門一帶啲深水嘅東面航道上廣州，而商船往返廣州都會逗留屯門呢個外港，啲商船喺返航時，會先到屯門避風、等著返季風之後再扯𢃇繼續行。屯門就咁做咗廣州到波斯灣之間航線嘅第二個啟航港口，同時亦係由大陸入大洋前，最後一個補給物資嘅供應站，係嗰陣重要嘅交通樞紐。大唐為咗保護海上貿易仲有強化維安，喺公元736年就喺呢處設立咗軍港（軍鎮） 。屯門個名可以話就係由此而來。呢陣時啲文人亦有耳聞屯門嘅交通重要度，所以嗰陣有唔少對屯門嘅酬詠詩歌，相對出名嘅有韓愈嘅《贈 別元十八協律第六首》，仲有劉禹錫嘅《踏潮歌》。

宋寧宗慶元三年（1197年），廣東提舉鹽茶徐安國派人去大嶼山緝捕民間鹽販，引起咗島上鹽民嘅大規模反抗。數百鹽民以萬登為首，仲有意打去廣州城，但被官兵發射嘅火箭擊潰咗，跟著啲官兵殺嗮啲島民，遇難者有130多人，官府仲留咗三百官兵駐守著大奚山，至慶元六年（1200年）再將當中嘅150人改駐官富場。

明政府為防衛廣州沿海而設南頭寨，防禦東至大屋，西至廣海；由嘉靖四十四年（1565年）開始南頭寨指揮係一名參將。到明神宗萬曆十四年至十八年（1586年至1590年）一度改由更高級嘅總兵擔任。呢個水寨總兵管轄咗六度汛地駐軍，每處大概有二百人，而屬依家香港範圍嘅地點係有佛堂門、龍船灣同大澳。

澳門同廣東/廣州

喺嘉靖三十六年（1557年）嘅12月2號，葡萄牙人幫過廣東官府平定漳州巨盜、澳門「阿媽賊」老萬集團，廣東官府允許埋葡人僑寓濠鏡（澳門）。

1564年（明嘉靖四十三年）4月，潮州柘林嘅水兵因缺餉斷糧而起事，其中徐永泰等人帶水兵，仲集結埋其他嘅武裝，到達咗虎門附近嘅三門海，嚴重威脅到廣州。嗰時做過濠鏡（澳門）葡萄牙人首領嘅佩雷拉（Diogo Pereira），派人去到廣州，同明將俞大猷話願意出兵協助平亂。獲同意後，佩就同華日貿易船隊司令德梅洛（Luiz de Mello）率領咗300個葡萄牙士兵，分成兩隊登上裝備咗西式火炮嘅明廷戰船出發，以突襲戰術擊敗咗啲叛兵，據計當堂生擒咗612人，仲有唔少起事者係被斬首。

葡萄牙人喺澳門仲搞過佛郎機炮製造業，同廣東（內地官府）有過緊密聯繫。似喺嘉靖三十六年（1557年），葡萄牙鑄造專家伯多祿·波加羅（Pedro Tavorres Bocarro）喺西望洋半山（而家高可甯紳士街左近、竹子室村尾）興建咗鑄炮廠，鑄炮工係搵咗佛山鑄鐵工人嚟做嘅，火藥同鑄鐵原料亦係由廣東提供，製成品仲會經由廣州等地向內地販售。去到咗萬曆四十八年（1620年），廠係夠規模生產埋銅炮、鐵炮，而喺呢一年，明廷批准咗李之藻門人張燾到澳門購買佛郎機炮，時廣東按察司吳中偉仲協助埋呢單交易。崇禎二年（1629年）初，明廷又試過派兩廣軍門李逢節、王尊德去澳門伯加祿炮廠度入手10個佛郎機炮，啲到手嘅裝備係經廣州北上，送咗入北京嘅琉璃河。