公行
公行（英文：Cohong），係清朝中期喺廣州成立嘅壟斷對外貿易嘅組織，喺大概成百年嘅時間入邊，為大清帝國壟斷咗同西方間嘅主要生意。
性質[編輯]
喺粵海關獨大嘅時代，由地方督撫、海關監督同行商共管外貿嘅體系入邊，公行係一個受海關監督控制下，擁有著貿易特權嘅組織，而形成咗「廣州制度」（一口通商）特色。公行行商係要代表大清政府，對喺中華領土入邊活動嘅外商，進行監督同管理[1]，而公行亦係作為（大清帝國）喺外貿入邊抽剝巨額財源嘅工具。公行除咗同海關監督優先提供啲利益，廣州嘅官差同大清朝廷，亦透過公行間接咁獲取到利益[2]。
史[編輯]
公行最早喺1720年成立，嗰陣時唔少嘅行商，為咗加強自身嘅地位，兼同「皇商」競爭，因而成立咗組織，最初嘅成員有十六名行商，佢哋自己訂落咗一套規則，有十三個條款，愛來指定啲價格同交易嘅程序，仲訂明咗新加入嘅成員必須俾一千兩銀嘅會資，先至俾佢入會。此外，所有公行嘅成員，交易度都要抽3%做「公所費」。
公行雖然係有民間自發嘅性質，但有著官府嘅背書支持，清廷官府係樂於有咁嘅組織，作為中間機構同外商打交道，仲代埋官府徵收啲關稅。有咗官府嘅支持，公行就壟斷埋貿易，而多次引起其他商人同外商嘅反對，第一次建立嘅公行好快就喺1721年解散咗。但到咗1760年公行有恢復返，直至1771年再俾人解散，跟著喺1782年又出返來，一直做到大清喺鴉片戰爭打敗仗後簽訂《南京條約》（1842年）先至俾廢除。
規例[編輯]
1720年公行行規：[3]
- 華夷商民，同屬食毛踐土，應一體仰戴皇仁，誓圖報稱。
- 為使公私利益界劃清楚起見，爰立行規，共相遵守。
- 華夷商民一視同仁，倘夷商買賤賣貴，則行商必致虧折，且恐發生魚目混珠之弊，故各行商應與夷商相聚一堂，茼議價，其有單獨行為者應受處罰。
- 他處或他省商人來省與夷商交易時，本行應與之協訂貨價，俾得賣價公道；有自行訂定貨價或暗中購入貨物者罰。
- 貨價既經協議妥貼之後，貨物應力求道地，有以劣貨欺瞞夷商者應受處罰。
- 為防止私販起見，凡落貨夷船時均須填冊；有故意規避或手續不清者應受懲罰。
- 手工業品如扇、漆器、刺繡、圖畫之類，得由普通商家任意經營販賣之。
- 瓷器有待特別鑒定者，任何人得自行販賣，但賣者無論嬴虧，均須以賣價百分之三十納交本行。
- 綠茶淨量應從實呈報，違者處罰。
- 自夷船卸貨及締訂裝貨合同時，均須筅期交款，以後並須將餘款交清，違者處罰。
- 夷船欲專擇某商交易時,該商得承受此船貨物之一半，但其他一半須歸本行同仁攤分之；有獨攬全船之貨物者處罰。
- 行商中對於公行負責最重及擔任經費最大者，許其在外洋貿易佔一全股，次者佔半股，其餘則佔一股之四分之一。
- 頭等行，即佔一全股者，凡五，二等者五，三等六；新入公行者，應納銀一千兩作為公共開支經費，並列入三等行內。
睇埋[編輯]
參考文[編輯]
- ↑ 十三行行商与清政府的“夷务” 徐素琴 中華文史網
- ↑ 东印度公司对华贸易编年史: 第一、二卷 [美]马士（H.B.Morse） 中山大学出版社 1991
- ↑ 楊黎光 (2019-09-27), 《粵商：承載近代中國轉型之重》, 香港中和出版, pp. 139–140, ISBN 978-988-8570-28-7
- 徐中約著，計秋楓、朱歷葆譯《中國近代史》（香港：中文大學出版社，2002）