蛺蝶

蛺蝶科（Nymphalidae）係一科蝴蝶，特徵係多數前腳細隻，望落好似得四隻腳噉；色水好多時鮮艷。呢一科包含咗好多著名嘅物種，例如帝王斑蝶、小紅蛺蝶、北美眼蛺蝶、銀紋紅袖蝶、艾地堇蛺蝶、大藍閃蝶。

語源

蛺蝶科嘅學名係科級分類後綴「-idae」配上源自新拉丁語嘅「nymphalis」，源自拉丁文「nympha」，源自古希臘語「νύμφη」，解作新娘。

分佈

物種遍佈世界各地，各類陸上環境都有種類適合棲息。熱帶地區嘅物種多樣性最高，然而溫帶同寒帶地區都有好多獨特嘅類群棲息。

喺台灣記錄咗大約130種；香港94種。