暫停懷疑
唔肯暫停懷疑嘅讀者：超，龍呢樣嘢根本就唔存在，個故仔呃人嘅。唔想睇喇。
响廿一世紀初，創意寫作同編劇等嘅工作頗為睇重暫停懷疑呢個概念，尤其係科幻同奇幻等嘅推想型體裁：有人指，享受一件虛構故仔作品可以想像成作者同讀者觀眾之間嘅不成文契約－作者提供一個好睇嘅故仔，讀者觀眾接受個故仔嘅現實，當啲角色係以自己嘅自由意志行事嘅（而唔係作者嘅傀儡）；事實係經驗表明，如果一位讀者或者觀眾缺少暫停懷疑，佢睇睇吓件作品就會開始冇癮唔想睇，而一般認為呢一點對科幻同奇幻等嘅體裁嚟講零舍重要，因為呢啲體裁本質上就係講一啲現實世界冇嘅嘢嘅[2][3]。
因為暫停懷疑咁緊要，有唔少創意寫作工作者都好關注呢個概念：佢哋會就「寫作嗰陣有啲咩失誤，係一犯咗就會破壞讀者觀眾嘅暫停懷疑」噉嘅問題作出討論，向從事作故仔相關工作嘅人俾出技巧上嘅建議；而且佢哋有啲仲會用心理學概念嚟諗暫停懷疑涉及咩認知過程，想對暫停懷疑有理論性嘅了解[4]。
定義[編輯]
暫停懷疑呢個概念係由英國浪漫主義詩人柯勒律治（Samuel Taylor Coleridge）喺 1817 年提出嘅。柯勒律治指出，如果一個作家能夠喺佢嘅作品當中加入人情同有些少似現實嘅嘢（human interest and a semblance of truth），噉讀者觀眾就會自願噉「暫停佢哋對故仔內容嘅質疑」；意思即係話[5]
- 讀者心知自己睇緊一份虛構故仔作品（包括散文、電影或者漫畫呀噉），知作品入面啲角色同情節係虛構嘅；
- 事實係，虛構故仔好多時會有明顯唔真實嘅內容，好多虛構故仔會講到超自然力量，例如鬼故會講到嘅鬼魂同埋奇幻作品好興提及嘅魔法呀噉，又有好多故仔會講到啲有可能存在、但擺明已知唔存在嘅嘢，例如科幻作品會提到嘅超先進科技噉[6]；
- 原則上，人喺睇到聽到一啲佢哋認為明顯唔真確嘅嘢嗰陣，個腦海會有「超，呢個故仔根本唔真實嘅，唔想睇喇」噉嘅諗法；
- 不過事實表明，人喺睇呢啲明顯唔真實嘅虛構故仔嗰時，依然有可能會對個故仔有強烈嘅情緒反應，例如一個重要嘅角色死咗嗰陣，投入嘅讀者往往會傷心－例子可以睇吓眾多成功嘅奇幻同科幻作品；
噉即係表示，成功嘅虛構故仔有某啲嘢，令讀者觀眾放低「超，呢個故仔根本唔真實嘅，呃人嘅」噉嘅諗法，會某程度上當咗啲角色同情節係真嘅噉，並且去享受個故仔。呢樣嘢就係所謂嘅暫停懷疑。
技巧[編輯]
一般認為，暫停懷疑對奇幻或者科幻等嘅推想性體裁零舍重要：現代文學理論上認為，一個故仔唔使一定要真實，而只係需要做到
- 可信（喺個故仔世界入面屬正常）同
- 內部一致（即係話個故仔世界要按一啲法則運作，而且呢啲法則彼此之間唔會有矛盾），
就有可能令讀者觀眾接受個故仔嘅內容；而當一個作者挑戰讀者觀眾嘅暫停懷疑底線挑戰得太過分（例如一個奇幻故仔，個故仔早期講明咗個世界嘅魔法一定係要手持魔法杖先用得嘅，但喺高潮嗰陣主角無啦啦做到空手用魔法，而且事後又冇解釋），就會破壞讀者觀眾嘅暫停懷疑，令讀者觀眾開始拒絕個故仔嘅內容，並且覺得個故仔唔好睇。
一般認為，要確保讀者觀眾肯暫停懷疑，其中最重要嘅一樣嘢就係穩陣嘅世界創建（world building）：世界創建泛指建立一個虛構世界嘅過程；世界創建會為個故仔「有可能發生咩事」設低一啲限制，而作者作故仔嗰時要小心，設好咗個世界嘅特性之後，情節入面發生嘅事唔可以同呢啲特性有矛盾[7]；例如 2000 年代嘅奇幻名作《哈利波特》噉，就花咗唔少篇幅講主角哈利仔喺魔法學校學魔法，呢啲情節得意之餘，仲會間接話俾讀者觀眾知「哈利波特世界裏面嘅魔法係點運作嘅」，而打後情節當中發生嘅事唔會同呢啲法則有所矛盾[8]。
睇埋[編輯]
攷[編輯]
- ↑ Verisimilitude. Literary Devices.
- ↑ 2.0 2.1 Schaper, E. (1978). Fiction and the Suspension of Disbelief. British Journal of Aesthetics, 18(1), 31-44.
- ↑ Vickers, D. (1997). Social science fiction and the suspension of disbelief. Journal of Post Keynesian Economics, 20(1), 89-101.
- ↑ Böcking, S. (2008). Suspension of disbelief. The international encyclopedia of communication.
- ↑ Kivy, Peter (2011). Once-Told Tales: An Essay in Literary Aesthetics. West Sussex: John Wiley & Sons. p. 100.
- ↑ Welkos, Robert W. (15 April 1993). "From 'King Kong' to 'Indecent Proposal,' audiences have been asked to buy a premise that can make - or break - a film". Los Angeles Times. Retrieved 24 October 2010.
- ↑ Tolkien, J. R. R. (1983), Tolkien, Christopher (ed.), "On Fairy Stories", The Monsters and the Critics and Other Essays, pp. 109-161.
- ↑ Highfield, Roger (2002). The Science of Harry Potter: How magic really works. New York: Viking.
