情節裝置

喺魔戒個故仔入面，魔戒係人人都想搶嘅物件，所以魔戒帶動咗情節嘅發展。

情節裝置（譯自英文：plot device）係敘事學上嘅概念：如果某個角色或者物件，存在純粹係要用嚟帶動情節發展、kip1 住情節流動或者解決情節當中嘅狀況，噉呢個角色或物件就謂之情節裝置。舉個例，想像有本奇幻小說，講主角同佢嘅同伴嘗試追尋一件力量巨大嘅法寶，同時假如邪惡魔王又想得到呢件法寶，件法寶就可以成為情節裝置－佢會係多數角色動機嘅重心，所以件法寶嘅移動會引致啲角色跟住移動，而呢啲移動會帶領角色去完一個地方又去下一個，確保情節唔會企喺度唔郁。

重要概念

情節裝置嘅相關概念：

• 麥高芬（英文：MacGuffin）係指對情節或者角色動機嚟講必要嘅物件或者事件，但呢件物件或者事件本身嘅特質未必係咁重要（可以換做第樣物件，但功能不變），例如奇幻故仔常用嘅「威力無邊嘅法寶」就係一種常見嘅麥高芬，呢件「威力無邊嘅法寶」可以係一隻有魔法力量嘅戒指，但原則上，就算件法寶係有魔法力量嘅頸鏈或者有魔法力量嘅馬桶，情節嘅內容基本上都唔會點變。
• 卓哥夫把槍（英文：Chekhov's gun）喺敘事學上可以係指喺情節早期出現，打後對情節有巨大影響嘅事物，例如喺情節早期主角由佢阿爺嗰度得到一件家傳之寶，主角開頭諗住件家傳之寶只係有象徵意義嘅飾物，但喺情節後期，主角同佢同伴先至知，呢件家傳之寶原來係「威力無邊嘅法寶」嘅最後一塊碎片，而魔王由主角手上攞走件家傳之寶，重新砌返件法寶出嚟，得到巨大嘅力量，令故仔踏入衝突嘅最高峰－呢件家傳之寶就係卓哥夫把槍嘅例子。
• 紅鯡魚（英文：red herring）係指引誘故仔角色同讀者諗錯嘢嘅情節裝置，一開始就吸引觀眾嘅注意力（唔似得卓哥夫把槍噉，一開始望落無關痛癢）。例如想像有個偵探故事，主角同佢嘅最好朋友一齊負責查一單謀殺案，故仔早期有多條線索，指出阿明係犯人－ D 有犯案動機又冇不在場證明等，令主角同佢朋友跟住去調查阿明，即係阿明令情節得以進展，但及後嘅調查發現，原來主角個朋友至係殺人犯－喺呢個故仔當中，阿明扮演咗紅鯡魚嘅角色，引導角色同讀者諗錯嘢。
• 天外救星（拉丁文：deus ex machina）係指故事當中出現望落冇可能解到嘅狀況，突然由某啲完全出乎意料同可能性極低嘅事件解決。極端嘅例子可以想像噉嘅故事：主角同佢嘅同伴俾邪惡魔王韞咗喺地牢，地牢嘅天花板有尖刺，而且天花板慢慢向下移，主角同佢嘅同伴無計可施，只有等死（望落冇可能解到嘅狀況）... 然後下一刻，佢哋俾人傳送咗去椰林樹影、水清沙幼嘅沙灘，原來有一個故事之前完全冇提過嘅神仙，貪得意用魔法變佢哋去沙灘－呢個神仙就係佢哋嘅天外救星。有好多作家都認為，天外救星係極低水平嘅寫作技法。

睇埋

• 情節
• 故仔

拎

• （英文）情節裝置，電視橋段網