節奏

出自維基百科,自由嘅百科全書
一部拍子機會週期性噉出一吓聲,每吓都係一吓拍子[註 1][1]
120 bpm 咁快嘅節奏

節奏粵拼zit3 zau3英文rhythm),又或者叫節律,係音樂上嘅一個重要概念,指一段音樂嗰啲時間當中嘅擺位,會令到一段音樂有週期性時強時弱」噉嘅變化[2]:節奏嘅基本組成部份係拍子,拍子係音樂上嘅計時單位,一吓拍子(以計)嘅長度可變但喺同一段音樂裏面恆定,而一段音樂每分鐘有幾多吓拍子(bpm)就反映咗段音樂嘅 tempo-bpm 高就係 tempo 快,bpm 低就係 tempo 慢[3][4]

節奏同舞蹈有極之緊密嘅關係:人體本質上就係一嚿有節奏性嘅物體,好多生理活動(例如心跳)都係好似拍子噉「定時一吓」嘅,而事實表明,喺聽到拍子嗰陣,成日都會不自覺噉身體某啲部份嘗試跟住啲拍子郁;廿一世紀初嘅神經科學研究仲發現咗所謂嘅神經同步化嘅現象,發現人腦喺受到一個週期性嘅刺激嗰時,個腦某啲神經細胞嘅活動規律嘅節奏會變到同嗰個刺激嘅一樣[5],而呢樣嘢被指係人有能力跟拍子郁嘅原因[6]

呢幾個彼此之間距離一致-「每隔一段固定嘅時間就有樣重要嘢發生」。

除此之外,藝術界甚至仲有將節奏嘅概念廣義化到去畫畫雕塑建築設計呢啲唔涉及聲嘅視藝嗰度:喺視藝上,節奏俾人指可以想像成定時通過空間移動,例如想像一棟建築物(一件建築設計作品),棟嘢有若干個,啲窗之間彼此之間距離一致,令到欣賞棟建築物嘅人每隔一段時間-佢嘅目光每郁一段距離[註 2]-就見到一個窗,就好似音樂嘅節奏噉,「每隔一段固定嘅時間就有樣重要嘢發生」[7][8]

概念基礎[編輯]

睇埋:音樂同埋樂理

就算到咗廿一世紀初,音樂界對於「節奏」呢個詞要點定義仲未有完全一致嘅共識。不過啲人一般都會認同,節奏最少會包含咗以下嘅元素:

拍子[編輯]

一段節拍;呢段音樂係 4/4,即係話段節拍入面有 4 吓拍子,每吓拍子都係一個四分音符咁長。
呢段聲入面嘅跟 3/4 嘅華爾茲節奏;每段節拍第一吓拍子重音
以 96 bpm 打緊拍子嘅拍子機嘅聲;每吓聲算係一吓拍子。
內文:拍子節拍
睇埋:拍子機拍節重音音符時值同埋拍子記號

音樂本質上就係喺時間當中編排,相對於雕塑等嘅視藝係喺空間當中編排色彩,所以樂理其中一樣最基本要分析嘅嘢就係時間。

拍子(beat,可以做粵拼bit1)同節拍係兩個緊密相連嘅基礎樂理概念,成日俾人攞嚟做音樂最基本嘅計時單位:絕大多數嘅音樂都有所謂嘅節拍-想像將一段音樂斬開做若干橛,每橛喺時間上都一樣咁長(有週期性),每一橛算係一個節拍,而每橛節拍都會包含若干吓拍子,每一橛節拍包含嘅拍子數量都一樣。喺現代嘅樂譜當中,節拍通常會掕住一對數字-例如「4/4」噉-一上一下喺條五線譜上面,呢啲數字就係所謂嘅拍子記號[9][10]

  • 喺上面嗰個數字表示一段節拍裏面有幾多吓拍子,
  • 而另外嗰個數字表示一吓拍子維持幾耐時間(以音符時值計)。

拍子亦都同重音嘅概念息息相關:重音指其中一個或者一啲音符要零舍「強」,「強」嗰啲音符會(例如)大聲啲;想像家陣有個人要打拍子(指用某啲方法幫自己或者身邊嘅人留意住啲拍子),佢可以用腳板踏地,腳板每吓掂地算一吓拍子,又或者索性用口數住啲拍子1 2 3 4,1 2 3 4... 噉數);打拍子嘅人通常都會靠「每段節拍最頭嗰吓拍子強」嚟分啲節拍邊段打邊段,例如家陣要用腳踏方法打 4/4 嘅拍子,打拍子嗰個人通常會用「強弱弱弱、強弱弱弱、強弱弱弱...」噉嘅打法,每吓強拍嗰吓隻腳板會踏得明顯大力啲-噉每有一吓強拍出現就能夠知進入咗一段新嘅節拍,令身邊嘅人知道節拍同節拍之間嘅間線。順帶一提,啲人將音樂或者舞蹈分類嗰陣,好多時就係靠住啲拍子同重音嘅特性嚟分嘅,例如華爾茲就出嗮名興用 3/4,每段節拍三吓拍子,當中每段節拍嘅第一吓拍子重音[11]

要留意嘅係,拍子同節拍原則上係存在喺聽音樂嘅人嘅腦海當中嘅嘢,建基於打拍子嘅人對時間流逝嘅感覺:事實表明咗,拍子同節拍唔一定係有聲嘅;人有能力喺完全冇聲嘅情況下打拍子,例如係齋靠一班人圍埋一齊同步噉郁佢哋嘅或者手嚟打拍子[12][13];而想像家陣播一首音樂俾一班人聽,首音樂去到其中一段係完全冇聲嘅,對現實嘅觀察表明,聽嘅人雖然喺呢段期間聽唔到聲,但佢哋依然有能力或者跟住佢哋心目中預期嘅節拍喺度打拍子。要留意嘅係,預期係個關鍵字-有研究試過訓練普通獼猴打拍子,發覺就算經過超過一年咁耐嘅訓練,啲獼猴打拍子嗰陣每吓都硬係遲咗幾百毫秒,即係話獼猴似乎唔識好似人噉「估下一吓拍子幾時出現」,淨係靠住「一聽到拍子機嘅聲就俾反應」嚟「打拍子」[14]

Tempo[編輯]

內文:Tempo
睇埋:時值

速度(tempo;意大利文時間噉解)喺嚴格嘅樂理上係指啲拍節頻率:一首音樂嘅 tempo 係指首音樂「啲拍子有幾快」,而喺實際應用上,音樂嘅 tempo 通常係用每分鐘拍子(bpm;顧名思義指每分鐘有幾多吓拍子)嚟做基準衡量嘅,一首音樂每單位時間之內有愈多拍子就愈算係 tempo 快[13]:p. 237

  • 一般嚟講,70 至 80 bpm 算係「正常 tempo」-人行路嗰陣每分鐘會行 76 至 80 步,而一個健康嘅大人每分鐘會有大約 72 吓心跳。喺 bpm 數值上高過呢個間距嘅音樂一般會俾人覺得係「速度快」,而喺 bpm 數值上低過呢個間距嘅音樂一般會俾人覺得係「tempo 慢」。
  • 有學者主張,一首音樂嘅 tempo 最低可以係 40 bpm 左右,而最高就通常頂櫳可以去到 240 bpm 左右-如果一首音樂慢過 30 - 40 bpm,就會搞到一個單位時間內嘅拍子數量少得滯,聽嘅人會唔覺得嗰啲拍子反映緊同一段音樂,而如果一首音樂快過 480 - 600 bpm,因為人嘅聽覺能力所限,聽嘅人會冇能力再將每吓拍子聽做獨立嘅聲,會搞到成段聲聽落似係一串連續過嘅噉(想像一架鋼琴嘅 key 俾彈嗰個人撳住唔放手)。順帶一提,呢個間距大致等同於人嘅心跳可能間距-生勾勾、清醒嘅人嘅心跳正路都係會喺每分鐘 40 吓至每分鐘 240 吓之間嘅[15]
  • 專門寫嚟俾人跳舞用嘅音樂(即係所謂嘅舞曲)tempo 多數都會快過一般嘅心跳。唔同舞種可能會偏好唔同嘅 tempo,多數跳舞音樂 tempo 都係喺 120 bpm 左右[16],而喺(例如)芭蕾舞某啲舞段當中,啲音樂嘅 tempo 可以去到成 180 至 200 bpm 咁快,會令舞蹈員心跳率跟住一齊升到頂點[17]
  • 喺實際嘅音樂表演上,一首音樂嘅 tempo 唔係完全定死咗冇得變嘅。音樂界有所謂嘅 tempo rubato(意大利文「偷返嚟嘅時間」噉解)概念:根據呢個諗頭,人冇可能做到長時間完美噉跟住一個特定音樂 tempo 打拍子,所以做指揮或者獨唱等工作嘅人大可以(或者甚至係應該)响一段音樂或者舞蹈表演途中係噉咦改變音樂嘅 tempo,變完一陣之後再返去原本嗰個 tempo [18]

... 等等。

重複性[編輯]

睇埋:強弱法重複 (音樂)同埋週期性

一般認為,節奏實係有重複性嘅,就算係喺音樂以外嘅領域嗰度用「節奏」呢個詞嗰陣,都實係指緊一啲會重複嘅嘢。音樂上嘅節奏會包含一啲相對立(例如強對弱)嘅元素有秩序噉交間出現。啲拍子會重複-例如首音樂會有若干段節拍,每段節拍有嘅拍子數量都一樣,而啲人跟首音樂打拍子嘅話(當佢哋跟最常見嘅做法,每段節拍 4 吓拍子,頭一吓拍子強),會係噉重複「強弱弱弱、強弱弱弱、強弱弱弱...」噉嘅規律[11]

有學者指,強同弱拍子之間嘅交替係源於人性深處嘅,喺音樂、舞蹈等歷史悠久嘅藝術嗰度都可以見得到,例如啲人喺跳舞嗰陣成日都會用其中一隻腳嘅腳板踏地嚟打拍子,隻腳板重複噉上落,隻腳板每一吓掂地都算一吓拍子,重複噉「1 2 3 4、1 2 3 4、1 2 3 4...」噉打,嘗試熟習用自己身體嘅郁動嚟配合首音樂嘅節拍[註 3],而舞蹈界一般認同,舞蹈嘅美感其中一個最重要嘅來源正正就係舞步同首音樂當中嗰啲(一路重複嘅)拍子之間嘅配合[19][20]

事實係,重複係音樂上嘅一個重要嘅概念,指啲音樂好興將同一段旋律重複若干次,例如下圖係《London Bridge Is Falling Down》(倫敦大橋冧緊落嚟)呢首簡單樂曲嘅樂譜,拍號 2/4,而且首音樂有重複性-第一行嘅第一段小節同第二行嘅第一段小節完全一個板。喺現實世界,受歡迎嘅樂曲作品大多數都有重複嘅情況[21]

風格差異[編輯]

唔同曲種舞種喺節奏特性上可以好唔同,舉幾個例說明:

  • 華爾茲:華爾茲呢種舞源於 16 世紀嘅奧地利一帶;華爾茲音樂係一種舞曲,一般都係專門作嚟俾人跳華爾茲嘅,華爾茲音樂會用三拍子,多數都係 3/4(例如下圖),速度上偏中等至快,啲人喺跳華爾茲或者彈奏華爾茲音樂嗰陣,通常會「1 2 3、1 2 3...」噉打拍子,當中每段節拍第一吓拍子強另外嗰兩吓拍子弱。就算到咗廿一世紀初,華爾茲都仲係好受歡迎,成日都俾人攞嚟喺社交場合度一男一女一齊共舞,而奧地利作曲家約翰施特勞斯二世响 1866 年作嘅《藍色多瑙河》就係一首好出名嘅華爾茲音樂[22]
《藍色多瑙河》其中一段
一首布尼舞曲
  • 瑪祖卡:瑪祖卡係源自 16 世紀波蘭東部嘅一種舞曲,三拍子,一係 3/4 一係 3/8,每段節拍第二吓拍子強(好似下圖噉嘅例子);啲人喺跟瑪祖卡跳舞嗰陣,通常會一對對男女圍成一個圈噉嚟跳;瑪祖卡初頭嗰時淨係波蘭嗰度有人跳,打後廣泛噉傳到去俄羅斯德國法國英格蘭等地,仲因為人氣高俾第啲舞種-例如芭蕾舞-融合咗入去佢哋嘅技巧嗰度[25],而瑪祖卡亦都因為噉而成為咗波蘭文化當中最出名嘅嘢之一[26],而 19 世紀著名波蘭作曲家蕭邦一世人就出咗差唔多成 60 首瑪祖卡咁多[27]
德布西嘅瑪祖卡
  • 查達斯:查達斯係源自 18 世紀匈牙利嘅一種民俗舞,通常係攞嚟喺社交場合嗰度男女成雙成對噉跳嘅;喺節奏上(下圖嘅例子),一首查達斯音樂會用 2/4 或者 4/4,帶有切分音(指有啲段會特登唔跟原有嘅拍子),而且分做開頭嘅慢段落(lassú)同跟尾嘅快段落(friss);查達斯係就係源自匈牙利,但喺成個東歐嚟講都有返咁上下影響力,例如喺 1870 年首演嘅著名芭蕾舞劇歌碧麗亞》嗰度就採用咗查達斯[28]
一首查達斯音樂
  • 佛蘭明歌:佛蘭明歌係源自 18 世紀尾嘅西班牙南部嘅一套民間音樂傳統,包括咗歌曲同舞蹈;佛蘭明歌嘅音樂同舞蹈可以再細分做好多種,每種佛蘭明歌嘅節奏特性都唔同,當中最強烈嗰種叫做 cante jondo,出咗名有啲音樂會用到一段節拍 12 吓拍子呢種極端嘅節奏,例如第 3、6、8、10 同 12 吓拍子強(兩段三拍子然後三段兩拍子;類似下圖嗰幅例子噉),拍號上會混合 6/8、3/4 或者 12/8,而且啲歌喺主題上會表達死亡絕望等強烈哀怨嘅情緒。佛蘭明歌相當受歡迎,對歌劇同世界各地嘅演藝都有造成影響。到咗廿一世紀初,好似美國日本等地都有開學校專門教佛蘭明歌相關嘅藝術[29]
一首佛蘭明歌音樂
  • 普卡:普卡係源自 19 世紀中波希米亞嘅一種舞曲,打後喺 1843 年响巴黎舞會舞台嗰度成名,傳到去歐洲美洲等多個地區,當中愛爾蘭出咗名零舍鍾意普卡音樂同舞蹈[25];普卡音樂一般會跟 2/4 拍(睇下面嗰段樂譜),好興唔跟「每段節拍第一吓拍子重音」嘅規律;愛爾蘭嘅普卡會有 32 橛小節,而呢啲小節細分 4 部份,每部份 8 小節,而且愛爾蘭嘅普卡速度通常都比較快,通常都會接近或者超過 130 bpm [30]
一首普卡音樂
  • 藍調:藍調係源自 19 世紀後半橛嘅美國南部黑人群體嘅一套民間音樂,喺廿世紀中開始盛行全美國;喺 19 世紀後半橛嘅美國打完南北戰爭冇幾耐,經濟開始轉差又有好多人因為打仗而傷亡,形成藍調呢種幽怨嘅音樂-藍調最大嘅特性係成日都會用歌詞嚟表達哀愁等嘅情緒,而喺節奏上,藍調比較多會用 12 小節嘅結構,每行頭嗰兩段半小節實會有歌詞,4/4 拍(好似下圖噉),帶有切分音,最簡單嗰種藍調成首曲會分做三大節,每節都有特定嘅和音特性,藍調嘅速度相當多變,由 60 bpm 至 180 bpm 嘅作品都有[31]。可以睇埋鄉村音樂(Country)-鄉村音樂係廿世紀初喺美國鄉郊地方興起嘅一種流行音樂,鄉村音樂受到藍調同二戰等嘅嘢影響,歌詞上又係時不時會講啲憂鬱嘅題材,好似係貧窮同埋「因為要離鄉別井打工而覺得孤單」呀噉[32]
  • 探戈:探戈呢種舞源於 1880 年代嘅阿根廷首都布宜諾斯艾利斯等地,有自己嘅一套音樂;喺初時,探戈係由啲低下階層嘅人跳嘅,但後嚟大受歡迎而廣傳,喺 1910 年代嘅歐洲盛極一時,亦都因此之出咗多個地區性嘅風格;傳統上,探戈音樂會係主要用結他嚟彈嘅,有陣時亦會加入小提琴低音提琴或者鋼琴[33],而喺節奏特性上,典型嘅探戈嘅拍號係 4/4 或者 2/4(好似下圖噉嘅例子),當中探戈發源地阿根廷嗰種探戈速度上一般都偏比較快,多數都係喺 90 bpm 至 130 bpm 左右[34]

... 等等。

舞蹈節奏[編輯]

顯示一男一女跳華爾茲嘅動畫;「一男一女跳舞」响好多文化當中都係拍拖嘅開端。
睇埋:跳舞舞蹈理論同埋舞蹈科學

跳舞呢家嘢定義上就係指一個或者多個人跟住特定嘅節奏嚟郁動佢哋嘅身體人體本質上就係一嚿有節奏性嘅物體:有好多生理活動都係需要維持特定嘅節奏,個人先至會生存得到,例子有[35]

... 呀噉。人類學研究表明,跳舞係普世文化通則[39],喺文明嘅歷史上,世界各地都會有跳舞嘅習俗,會有人負責提供拍子(簡單例子有搵個人喺側面打鼓),等跳舞嗰個人跟住跳,按拍子出現嘅時間起始或者終結一個個嘅舞步[40][41],而唔係專登喺度跳舞嘅人聽到拍子嗰陣,都成日會不自覺噉身體開始跟住郁[註 4][42]

喺作為表演藝術嘅舞蹈當中,排舞(指「安排一場舞蹈表演入面啲動作」嘅工作)必然要考慮舞步同節奏之間嘅啦掕:喺最基本上,排舞師會諗每一個舞步(例如一吓跳躍或者旋轉轉一個圈)要用幾多時間,以及係一段舞裏面嘅每個舞步能唔能夠配合到段音樂嗰啲拍子,速度慢嘅音樂涉及慢嘅舞步,而音樂速度快嗰陣舞步就要跟住變快;進階啲嘅排舞師有陣時又會特登玩弄節奏,透過改變節奏、動作以及兩者之間嘅關係嚟令場舞展現唔同嘅情緒[43][44]

心理學研究表明,「跟住節奏嚟郁動身體」係情感親密嘅重要一環:有研究指,兩個人「將佢哋嘅身體以同樣嘅節奏郁動」有助佢哋之間產生良好嘅社會關係心理實驗試過將受試者分做一組兩個人嘅組,再叫佢哋試吓喺身體郁動上同步化,即係例如試吓要佢哋行路嗰陣特登以同樣嘅節奏踏步,結果發現噉做會令啲受試者對同佢哋同步嘅同伴產生更強嘅同理心(簡單講就係感受對方嘅情緒嘅能力)[45];而且又有實驗證據指出,包括人在內嘅好多動物都能夠透過觀察異性跳舞嚟評估異性健康,而呢一點又會影響佢哋揀邊個異性個體進行求偶-實驗發現,人能夠透過睇異性嘅跳舞能力估計個異性有幾健康,並且覺得跳舞跳得好(表示嗰個異性健康)嘅異性零舍有吸引力,而事實係,世界好多地方都有習俗俾後生男女喺聚會當中一齊跳舞(可以睇吓社交舞),等佢哋有得乘機搵拍拖嘅對象[46]

語言節奏[編輯]

內文:等時

語言往往會或多或少噉有節奏。例如有語言學研究試過觀察唔同語言嘅音節特性,發現唔同語言喺「音節之間嘅時間間隔」嘅變異數上有差異,即係話有啲語言傾向相鄰嘅音節之間永遠隔咗一樣咁長嘅時間,又有啲語言音節之間有時隔好長時間有啲隔好短時間。因為噉,有語言學家喺 1980 年代提出咗等時嘅概念,等時係指語言呢家嘢會好似有節奏噉,「每隔一段固定長度嘅時間就有某啲嘢發生」,語言可以按「邊啲嘢等時」嚟分類,而佢哋按呢套將語言分做三大類[47][48]

不過要留意嘅係,等時呢個概念喺廿一世紀初都仲係有一定嘅爭議性,有啲研究指語言查實冇得清楚噉分做以上呢啲類別[42][49]

心理研究[編輯]

顯微鏡下睇到嘅神經細胞
內文:節奏神經科學音樂心理學
睇埋:時間知覺發射頻率同埋神經同步化

音樂心理學心理學嘅一個子領域,專門研究音樂同心理現象之間嘅關係,簡單例子有研究人腦點樣由感知到嘅聲嗰度判斷節奏令到個人有能力打拍子。喺自然界當中,打拍子嘅能力查實並唔常見:例如上面提到訓練普通獼猴打拍子嘅研究噉,呢啲研究表明,多數動物查實都唔識打拍子,即係唔識好似人噉喺腦海入面預期下一吓拍子幾時出現,頂嗮櫳都淨係做到「對拍子機嘅每一吓聲俾反應撳掣」[14];除此之外,就算一個動物物種曉進行某啲有節奏性嘅活動,佢哋啲節奏好多時都淨係限死咗喺其中一種感官嗰度,例如青蛙曉有節奏噉發但啲節奏淨係局限咗喺聲(聽覺)嗰度,好多種嘅螢火蟲曉有節奏噉閃光但啲節奏淨係局限咗喺視覺)嗰度[50],相比之下,人就能夠同時用多過一種感官嚟打拍子,例如係靠睇拍子機嘅郁動(視覺)嚟有節奏噉用口「1 2 3 4...」(用聲)噉打拍子[40];總括嚟講,人類打拍子嘅能力以動物嚟講查實相當之唔尋常[註 6][51]

神經節奏

由日常觀察經已可知,人腦有能力感知時間嘅流逝,能夠(唔完全準確噉)判斷「過咗幾耐時間」。一般認為,噉表示人腦有啲類似噉嘅機制,即係腦入面某啲物理過程係有週期性嘅,每定時一吓,令人腦能夠按「過咗幾多吓呢啲週期」同埋週期嘅相位嚟判斷過咗幾耐時間[52]

事實上,神經科學研究經已表明咗,人腦入面有好多嘢都係有週期性嘅:神經細胞好多時都會靠發射頻率嚟傳達資訊,即係例如粒細胞射電訊號頻率硬係會同某個外界刺激嘅物理特性(例如係見到嗰束頻率)成正比,等個腦收到訊號嗰時可以靠睇個訊號嘅頻率嚟判斷嗰個刺激嘅特性[53];喺一個正常行緊嘅人腦入面,有數以百億計嘅神經細胞無時無刻喺度各自以唔同嘅頻率射訊號,當中有啲神經細胞會以 10 Hz 嘅頻率射,有啲會以 15 Hz 嘅頻率射... 如此類推,而所謂嘅腦電波就係指唔同頻率分別有幾多神經細胞喺度射訊號,例如如果家陣話 10 Hz 嘅腦電波有大嘅振幅,意思即係指有好多神經細胞喺度以 10 Hz 嘅頻率射訊號[54][55]。有關呢啲嘢嘅詳情,可以睇腦電圖神經編碼嘅嘢。

神經科學上仲有所謂嘅神經同步化現象:發現人腦喺受到一啲帶有週期性嘅刺激嗰時,個腦某啲神經細胞-尤其係聽覺皮層嗰啲-嘅活動規律嘅節奏會變到同嗰啲刺激嘅一樣,例如研究發現當一個人聽講嘢嘅聲嗰陣,個腦嘅 θ 波(4 - 8 Hz)活動會出現相位重設,變到同聽到嘅句子嘅某啲定時出現嘅特性同步[56];噉亦都表示,人腦有機制記錄低周圍環境嘅刺激(例如拍子機嘅一吓吓聲)嘅頻率,而假設個腦有機制喺個刺激消失咗嘅情況下維持腦內相應活動嘅頻率(攞走咗拍子機,但腦內對應拍子機啲聲嗰種神經活動繼續一吓吓行),個腦就有可能做到按已知嘅頻率預計下一吓拍子幾時出現(攞走咗拍子機都照樣識繼續打拍子)[5][57]

視藝節奏[編輯]

睇埋:構圖同埋花臣

傳統上,節奏係一個屬於音樂領域嘅概念,指一連串嘅聲喺時間當中嘅擺位,不過由廿世紀開始,就有視覺藝術方面嘅工作者喺度嘗試將節奏嘅概念廣義化到去畫畫雕塑建築設計等(唔涉及聲)嘅視藝嗰度。有視藝方面嘅學者指出,視藝上嘅分析可以考慮睇一件視藝作品嘅人對嘅郁動:用眼動追蹤心理實驗上常用嘅技術,用部機量度受試者對眼望緊一個畫面嘅邊忽)做嘅研究表明,人喺望一幅圖像嗰陣對眼係會隨時間郁嚟郁去嘅[58],噉即係表示人喺欣賞一件視藝作品嗰時,會「每隔一段時間就望到某樣嘢」-就好似音樂上嘅拍子噉「每隔一段時間就有嘢發生」[7]

因為噉,有學者提出,視藝上嘅節奏可以想像成所謂嘅「定時通過空間移動」(timed movement through space)[7];例如係法國印象派始祖莫奈畫嘅《白楊樹》系列當中嘅《四樖樹》(1891 年)呢幅油畫噉,喺呢幅畫入面有四樖白楊樹,佢哋之間相隔大致恆定嘅距離,令到睇畫嗰個人對眼每郁一段距離就有「見到樖樹」呢樣嘢發生(節奏-物件喺時間上以恆定嘅規律出現)[註 2];同時,畫入面嗰四樖樹之間喺距離上有少量嘅不一致,令啲樹望落自然,而且背景嘅物件唔跟節奏,反而更強調四樖樹所形成嘅節奏[59]

順帶一提,亦有藝術界嘅人進一步指出,一幅圖像嘅視覺節奏「使唔使完全一致」視乎畫中嘅物件係人造定自然:佢哋認為,自然物件多數都係有些少不規律性嘅,所以响畫自然物件嗰陣,節奏要帶些少不規律性先至會順眼(例如《四樖樹》當中嗰四樖樹之間嘅距離就唔完全一致);相比之下,好似建築物等嘅人造物件就大可以有完美前後一致嘅幾何性規律[60][註 7],例如俾好多人覺得係建築設計當中一大傑作嘅泰姬陵(下圖係泰姬陵主陵墓)噉,棟主陵墓總共有四座尖塔,四個角落頭各一座,而且四座尖尖塔之間嘅距離同角度完全一致,棟陵墓嗰啲圓頂都係一樣咁規律,而因為棟嘢係建築物,本身就係人造物體,所以用高度規律嘅視覺節奏都唔會令人唔舒服[61]

喺視藝當中,節奏仲有得按「點樣重複法」分做好多種[62]

  • 固定節奏(regular rhythm):指段節奏每次重複嗰陣都係完全一個板嘅[63],例:「強弱弱弱、強弱弱弱、強弱弱弱...」。
  • 流動節奏(flowing rhythm):指段節奏每次重複嗰陣都係有少少唔同咗樣(有一啲望落似係隨機嘅上上落落),但依然有返咁上下相似,相似度高到睇或者聽嗰個人覺得嗰幾段節奏屬於同類,例:一幅入面有若干朵花,每朵花彼之相距差唔多,但每朵花嘅色水都同打前嗰個有些少唔同。一般認為,流動節奏會令一樣嘢望落似有機-有生命嘅嘢好少可會係完全「件件一個板嘅」,所以固定節奏會令一樣嘢望落似係人造,而相比之下,用流動節奏就會顯得件物體似係自然嘅,(例如)啲畫家畫起等嘅自然景物嗰時就好興用流動節奏[64]
  • 漸進節奏(progressive rhythm):指段節奏又係每次重複嗰陣都係有少少唔同咗樣,但變起上嚟係逐啲逐啲噉變嘅,例:又係幅畫入面有幾朵花,每朵花彼之相距一樣,第二朵花係第一朵花旋轉咗 30°,而第三朵花又係第二朵花旋轉咗 30°(每次變化嘅改變幅度都係一樣咁多)... 如此類推[65]

... 等等。

節奏遊戲[編輯]

內文:節奏遊戲
睇埋:音樂教育

節奏遊戲係一種電子遊戲類型,指一啲考玩家節奏感嘅電子遊戲。喺最廣義上,一隻節奏遊戲做嘅通常係播一啲音樂或者最少有拍子,要求玩家喺適當嘅時間俾適當嘅反應,簡單例子有每吓拍子都要撳一個掣,然後隻遊戲就會按照玩家嘅節奏感-即係按玩家能唔能夠做到喺準確嘅時間點撳掣-嚟評分,跟手就按玩家嘅得分給予獎勵,例如係啲玩家要攞到最少若干分先至會有得玩下一,等玩家有意慾盡力提升自己嘅得分;節奏遊戲好多仲會要求玩家能夠俾正確嘅音高輸入,即係例如有個虛擬嘅鍵盤樂器鋼琴等),玩家唔淨只要喺適當嘅時間點撳掣,仲要係有幾個掣可以撳,要撳啱個掣先至有分[66]

雖然話節奏遊戲主要考節奏感等同聽覺有關嘅能力,呢啲遊戲正路依然會用視覺嘅方式嚟呈現啲嘢俾玩家睇:例如廿一世紀嘅節奏遊戲多數都會有一條音符通道俾玩家望實,每當有個音符通過條音符通道嗰陣,玩家都要撳相應嗰個掣,撳啱先有分;除此之外,唔少節奏遊戲仲會喺畫面嗰度加入啲得意或者有型嘅虛擬角色,要呢啲角色對玩家嘅表現俾反應,例如玩家表現唔好嗰時畫面入面個角色就耍手擰頭,作為遊戲俾玩家嘅一種回輸[66]

到咗廿一世紀初,節奏遊戲經已取得相當嘅成功,好似《太鼓之達人》就係一隻出名嘅節奏遊戲。而除咗商業上嘅成功之外,節奏遊戲仲吸引咗教育界嘅注意,有遊戲設計方面嘅專家喺度諗緊用節奏遊戲做音樂教育嘅一部份[66],亦有音樂界嘅人士參考節奏遊戲嘅設計嚟設計用嚟幫人訓練節奏感嘅流動應用程式[67]

註釋[編輯]

  1. 有研究指,拍子機好少可做到 100% 完美噉配合拍子。
  2. 2.0 2.1 假設佢對眼郁速度恆定。
  3. 喺現代社會,跳舞通常都會跟音樂,不過舞呢家嘢理論上係可以跟非人造音樂嘅節奏嚟跳嘅。
  4. 一個人跟拍子嘅能力就係所謂嘅節奏感。呢樣嘢可以有個體差異,不過多數大人都能夠喺聽住拍子嘅情況下跟住打。
  5. 事實上,自然語言呢家嘢往往冇乜定死咗嘅規則,所以呢個分類講嘅只係「呢隻呢隻語言『傾向』音節定時」。
  6. 有關識得打拍子嘅非人類物種,可以睇吓鳳頭鸚鵡
  7. 可以睇埋 TV TropesSinister Geometry

睇埋[編輯]

文獻[編輯]

  • Berry, W. (1987). Structural functions in music. Courier Corporation.
  • Chernoff, J. M. (1979). African Rhythm and African Sensibility: Aesthetic and Social Action in African Musical Idioms. Chicago: The University of Chicago Press.
  • Cooper, Grosvenor, and Leonard B. Meyer (1960). The Rhythmic Structure of Music. Chicago: University of Chicago Press. ISBN 0-226-11521-6/ISBN 0-226-11522-4.
  • Cooper, Paul (1973). Perspectives in Music Theory: An Historical-Analytical Approach. New York: Dodd, Mead.
  • Côté-Laurence, P. (2000). The role of rhythm in ballet training (PDF). Research in Dance Education, 1(2), 173-191.
  • Edwards, M. W. (2009). Sound, Sense, and Rhythm. Princeton University Press.
  • Hasty, Christopher (1997). Meter as Rhythm. Oxford: Oxford University Press.
  • Lester, J. (1986). The Rhythms of Tonal Music. Hillsdale, NY: Pendragon Press.
  • Petersen, Peter (2013). Music and Rhythm: Fundamentals, History, Analysis. New York: Peter Lang.
  • Rothstein, William (1989). Phrase Rhythm in Tonal Music. New York: Schirmer Books.
  • Toussaint, G. (2004, October). The geometry of musical rhythm (PDF). In Japanese Conference on Discrete and Computational Geometry (pp. 198-212). Springer, Berlin, Heidelberg.

粵樂嘅文獻:

講節奏相關心理嘅文獻:

  • Brown, W. M., Cronk, L., Grochow, K., Jacobson, A., Liu, C. K., Popović, Z., & Trivers, R. (2005). Dance reveals symmetry especially in young men (PDF). Nature, 438(7071), 1148-1150.
  • Dalla Bella, S., & Peretz, I. (2005). Differentiation of classical music requires little learning but rhythm (PDF). Cognition, 96(2), B65-B78.
  • London, Justin (2004). Hearing in Time: Psychological Aspects of Musical Meter. Oxford and New York: Oxford University Press.
  • Patel, A. D. (2006). Musical rhythm, linguistic rhythm, and human evolution. Music Perception, 24(1), 99-104.
  • Patel, A. D. (25 March 2014). "The Evolutionary Biology of Musical Rhythm: Was Darwin Wrong?" (PDF). PLOS Biology. 12 (3): e1001821.
  • Fitch, W. T., & Rosenfeld, A. J. (2007). Perception and production of syncopated rhythms. Music Perception, 25(1), 43-58.
  • Sacks, Oliver (2007). "Keeping Time: Rhythm and Movement". Musicophilia, Tales of Music and the Brain. New York and Toronto: Alfred A. Knopf.
  • Tanguiane, A. S. (1994). A principle of correlativity of perception and its application to music recognition. Music Perception, 11(4), 465-502.
  • Toiviainen, P., Luck, G., & Thompson, M. R. (2010). Embodied meter: hierarchical eigenmodes in music-induced movement. Music Perception, 28(1), 59-70.

引咗[編輯]

  1. Bonus, A. E. (2010). The Metronomic Performance Practice: A History of Rhythm, Metronomes, and the Mechanization of Musicality 互聯網檔案館歸檔,歸檔日期2021年6月14號,. (PDF) (Doctoral dissertation, Case Western Reserve University).
  2. Anon. (1971). The Compact Edition of the Oxford English Dictionary II. Oxford and New York: Oxford University Press.
  3. Epstein, David (1995). Shaping Time: Music, the Brain, and Performance. New York: Schirmer Books.
  4. Cooper, Grosvenor, and Leonard B. Meyer (1960). The Rhythmic Structure of Music. Chicago: University of Chicago Press.
  5. 5.0 5.1 Obleser, J., & Kayser, C. (2019). Neural entrainment and attentional selection in the listening brain (PDF). Trends in cognitive sciences, 23(11), 913-926.
  6. Rhythm on the brain, and why we can't stop dancing. The Conversation.
  7. 7.0 7.1 7.2 Jirousek, Charlotte. 1995. "Rhythm". In An Interactive Textbook, Ithaca: Cornell University
  8. Yeston, Maury. (1976). The Stratification of Musical Rhythm. New Haven and London: Yale University Press.
  9. Berry, Wallace (1987). Structural Functions in Music, 2nd edition. New York: Dover Publications.
  10. Fitch, W. Tecumseh, and Andrew J. Rosenfeld (2007). "Perception and Production of Syncopated Rhythms". Music Perception, Vol. 25, Issue 1:43–58.
  11. 11.0 11.1 Wechsberg, Joseph (1973). The Waltz Emperors: The Life and Times and Music of the Strauss Family. Putnam. p. 49.
  12. Toiviainen, P., Luck, G., & Thompson, M. R. (2010). Embodied meter: hierarchical eigenmodes in music-induced movement. Music Perception, 28(1), 59-70.
  13. 13.0 13.1 Winold, Allen (1975). "Rhythm in Twentieth-Century Music". In Aspects of Twentieth-Century Music, edited by Gary Wittlich, 208-269. Englewood Cliffs, New Jersey: Prentice-Hall.
  14. 14.0 14.1 Zarco, W., Merchant, H., Prado, L., & Mendez, J. C. (2009). Subsecond timing in primates: comparison of interval production between human subjects and rhesus monkeys. Journal of neurophysiology, 102(6), 3191-3202.
  15. Fraisse, Paul (1956). Les Structures Rhythmiques, with a preface by A. Michotte. Studia Psychologica. Louvain: Publications Universitaires; Paris and Brussels: Édition Erasme; Antwerp and Amsterdam: Standaard Boekhandel.
  16. Moelants, D. (2003). Dance music, movement and tempo preferences (PDF). In Proceedings of the 5th Triennial ESCOM Conference (pp. 649-652). Hanover University of Music and Drama.
  17. Cohen, J. L., Segal, K. R., & McArdle, W. D. (1982). Heart rate response to ballet stage performance 互聯網檔案館歸檔,歸檔日期2021年6月24號,.. The Physician and Sportsmedicine, 10(11), 120-133.
  18. Jackson, R. (2014). Performance Practice: A Dictionary-Guide for Musicians. New York, NY: Routledge, Taylor & Francis Group. p. 88.
  19. MacPherson, S. (1930). Form in Music, London: Joseph Williams.
  20. Rhythm in Dance - Auburn University.
  21. Kivy, P. (1993). The fine art of repetition: Essays in the philosophy of music. Cambridge University Press.
  22. McKee, E. (2012). Decorum of the minuet, delirium of the waltz: A study of dance-music relations in 3/4 time. Indiana University Press.
  23. Meredith Ellis Little and Matthew Werley, "Gavotte", The New Grove Dictionary of Music and Musicians, 2nd edition, (London: Macmillan Publishers).
  24. Scholes, P. (1970). The Oxford Companion to Music, OUP, article; "Bourrée".
  25. 25.0 25.1 Blatter, A. (2007). Revisiting music theory: a guide to the practice. Taylor & Francis. p.28.
  26. Liszt, Franz (1880). Life of Chopin. Translated by Cook, Martha Walker (4th ed.). Project Gutenberg.
  27. Kallberg, J. (1988). The Problem of Repetition and Return in Chopin's Mazurkas. Chopin Studies, 1, 1-23.
  28. Lafex, A. E. (2013). Reviving Ballet in the Nineteenth Century: Music, Narrative, and Dance in Delibes's Coppélia (Doctoral dissertation, University of Kansas).
  29. Hayes, M. H. (2009). Flamenco: Conflicting Histories of the Dance. North Carolina: McFarland Books.
  30. Vallely, F. (1999). The Companion to Traditional Irish Music. New York University Press: New York, p. 301.
  31. Abbott, Lynn and Doug Seroff (2019). The Original Blues: The Emergence of the Blues in African-American Vaudeville, 1889–1926. Jackson, MS: University Press of Mississippi.
  32. The Best Subjects For Country Music 互聯網檔案館歸檔,歸檔日期2021年7月9號,..
  33. Thompson, R. F. (2010). Tango: The art history of love. Vintage.
  34. Argentine Tango.
  35. Argüello, C., & Iregui, M. (2016, July). Exploring Rhythmic Patterns in Dance Movements by Video Analysis (PDF). In International Conference on Digital Human Modeling and Applications in Health, Safety, Ergonomics and Risk Management (pp. 123-131). Springer, Cham.
  36. Li, H., & Tan, J. (2009). Heartbeat-driven medium-access control for body sensor networks (PDF). IEEE transactions on information technology in biomedicine, 14(1), 44-51.
  37. Respiratory rate 4: breathing rhythm and chest movement. Nursing Times.
  38. Pearson, K. (1976). The control of walking (PDF). Scientific American, 235(6), 72-87.
  39. Morley, I. (2013). The prehistory of music: human evolution, archaeology, and the origins of musicality. Oxford University Press.
  40. 40.0 40.1 Patel, A. D. (25 March 2014). "The Evolutionary Biology of Musical Rhythm: Was Darwin Wrong?" (PDF). PLOS Biology. 12 (3): e1001821.
  41. Phillips-Silver, J., & Trainor, L. J. (2007). Hearing what the body feels: Auditory encoding of rhythmic movement. Cognition, 105(3), 533-546.
  42. 42.0 42.1 Patel, A. D. (2006). Musical rhythm, linguistic rhythm, and human evolution. Music Perception, 24(1), 99-104.
  43. Blom, L. A., & Chaplin, L. T. (1982). The intimate act of choreography. University of Pittsburgh Pre.
  44. Cancienne, M. B., & Snowber, C. N. (2003). Writing rhythm: Movement as method (PDF). Qualitative inquiry, 9(2), 237-253.
  45. Koehne, S., Hatri, A., Cacioppo, J. T., & Dziobek, I. (2016). Perceived interpersonal synchrony increases empathy: insights from autism spectrum disorder (PDF). Cognition, 146, 8-15.
  46. Brown, W. M., Cronk, L., Grochow, K., Jacobson, A., Liu, C. K., Popović, Z., & Trivers, R. (2005). Dance reveals symmetry especially in young men (PDF). Nature, 438(7071), 1148-1150.
  47. Nespor, M., Shukla, M., & Mehler, J. (2011). Stress‐timed vs. syllable‐timed languages (PDF). The Blackwell companion to phonology, 1-13.
  48. Roach, P. (1982). On the distinction between 'stress-timed' and 'syllable-timed' languages (PDF). Linguistic controversies, 73, 79.
  49. Ramus, F., Nespor, M., & Mehler, J. (1999). Correlates of linguistic rhythm in the speech signal. Cognition, 73(3), 265-292.
  50. Hanson, F. E., Case, J. F., Buck, E., & Buck, J. (1971). Synchrony and flash entrainment in a New Guinea firefly. Science, 174(4005), 161-164.
  51. Heinsohn, R., Zdenek, C. N., Cunningham, R. B., Endler, J. A., & Langmore, N. E. (2017). Tool-assisted rhythmic drumming in palm cockatoos shares key elements of human instrumental music. Science advances, 3(6), e1602399.
  52. Livni E (8 January 2019). "Physics explains why time passes faster as you age". Quartz.
  53. Kandel, E.; Schwartz, J.; Jessel, T.M. (1991). Principles of Neural Science (3rd ed.). Elsevier.
  54. Ward, L. M. (2003). Synchronous neural oscillations and cognitive processes. Trends in cognitive sciences, 7(12), 553-559.
  55. Nunez, P. L. (1974). The brain wave equation: a model for the EEG. Mathematical Biosciences, 21(3-4), 279-297.
  56. Kösem, A., Bosker, H. R., Takashima, A., Meyer, A., Jensen, O., & Hagoort, P. (2018). Neural entrainment determines the words we hear. Current Biology, 28(18), 2867-2875.
  57. Tal, I., Large, E. W., Rabinovitch, E., Wei, Y., Schroeder, C. E., Poeppel, D., & Golumbic, E. Z. (2017). Neural entrainment to the beat: The "missing-pulse" phenomenon. Journal of Neuroscience, 37(26), 6331-6341.
  58. Robert J. K. Jacob; Keith S. Karn (2003). "Eye Tracking in Human-Computer Interaction and Usability Research: Ready to Deliver the Promises". In Hyona; Radach; Deubel (eds.). The Mind's Eye: Cognitive and Applied Aspects of Eye Movement Research. Oxford, England: Elsevier Science BV.
  59. Rhythm in Art – Master Painting Examples. Draw Paint Academy.
  60. GEOMETRIC VS ORGANIC SHAPES 互聯網檔案館歸檔,歸檔日期2020年6月19號,..
  61. Asher, Catherine B. (1992). Architecture of Mughal India. Cambridge University Press. p. 210.
  62. Rhythm. National 5.
  63. Galagudza, M., Kurapeev, D., Minasian, S., Valen, G., & Vaage, J. (2004). Ischemic postconditioning: brief ischemia during reperfusion converts persistent ventricular fibrillation into regular rhythm. European journal of cardio-thoracic surgery, 25(6), 1006-1010.
  64. Chan, C. S. (2012). Phenomenology of rhythm in design. Frontiers of Architectural Research, 1(3), 253-258.
  65. Ching, F. D. (2014). Architecture: Form, space, and order. John Wiley & Sons.
  66. 66.0 66.1 66.2 Park, S. I., & Kihl, T. S. (2012). Rhythm game design for effective music education. Journal of Korea Game Society, 12(1), 33-42.
  67. 6 Great Rhythm Training Apps and Websites. Musician Wave.

外拎[編輯]