樂理

出自維基百科,自由嘅百科全書
跳去導覽 跳去搵嘢
18 世紀德國作曲家巴哈手寫嘅樂譜;樂譜會用唔同符號嚟表示段音樂啲聲嘅特性,係一段聲嘅抽象化表示方式。

樂理粵拼ok6 lei5英文music theory),全名音樂理論,泛指對音樂理論性研究[1]。喺最基本上,樂理研究集中於藝術方面嘅思考:研究者會留意一段音樂嗰啲物理性質-包括咗啲音符音高(音高對應一吓聲嘅頻率)同埋首音樂嘅節奏(指啲聲喺時間當中嘅擺位)呀噉;佢哋會用各種符號嚟表達呢啲性質(樂譜),例如根據現代慣例,一個音符喺條五線譜上面位置有幾高表示個音符嘅音高,個音符位置愈高表示佢愈高音。清楚記錄咗一首樂曲嘅物理性質之後,研究者就會分析呢啲物理性質會點樣影響首曲係咪「有美感」-係咪能夠令聽嘅人有賞心悅耳嘅感受[2][3]

除咗藝術性嘅研究之外,樂理仲可以包埋哲學科學層面嘅思考:喺哲學方面,「乜嘢係音樂」呢條定義上嘅問題到咗廿一世紀初都仲係有好多學者喺度詏緊,例如曾經有人提出音樂可以定義做「一段有組織性嘅聲」,但話咁快就俾人指出佢個定義有甩漏-講嘢嘅聲都係一段段有組織性嘅聲,所以啲學者跟住又開始咗對音樂嘅定義作出爭辯[4],而且音樂係門藝術,所以美感呢樣嘢一般都認為對音樂嚟講好緊要,但「」呢個概念要點定義又係一條大問題[5];响另一方面,由 19 世紀中開始就有人對音樂作出科學性嘅研究,音樂心理學(psychology of music)嘗試將心理學上嘅知識應用落去音樂嗰度,簡單例子有用心理實驗方法剖析音樂引起嘅感知體驗同邊啲腦區有啦掕[6]。廣義上,呢啲哲學性同科學性嘅研究冚唪唥都屬樂理嘅範疇之內。

樂理呢家嘢歷史好悠久:根據考古學上嘅研究,早喺公元前 1,500 年咁古老嘅兩河流域文明嗰時經已有人喺度對音樂作出理論性嘅思考,會用佢哋嘅一套行話表達音樂上嘅概念[7];而廿一世紀分析音樂嗰陣實會用到嘅五線譜就最少可以追溯到去 11 世紀早期(即係中世紀中期)嘅意大利嗰度[註 1][8]。到咗廿一世紀初,樂理經已成為咗套龐大嘅理論體系,有齊成套樂譜方法嚟表示同記錄音樂,而對於樂理嘅藝術、哲學同科學研究仲產生咗大量嘅文獻資料-鍾意音樂嘅學者同第啲工作者都會寫文獻嚟傾樂理方面嘅嘢,交流對音樂嘅見解[9]

定位[編輯]

睇埋:音樂音樂哲學同埋音樂嘅定義

"Music expresses that which cannot be put into words and that which cannot remain silent." (「音樂表達嘅,係唔可以用言語描述得嚟又唔可以保持沉默嘅嘢。」)

Victor Hugo (法國大文豪雨果[10]

樂理定位上係「針對音樂理論性研究」,所以思考樂理最基本嘅,就係首先要答咗呢條定義上嘅問題先[4]

何謂音樂?

呢條問題就噉睇好似好簡單,但就算到咗廿一世紀初,音樂嘅定義音樂哲學(philosophy of music)上都仲係一條廣受爭議嘅問題。例如喺廿世紀曾經有人主張音樂可以定義做有組織性嘅(organized sounds),但講嘢產生嘅聲都係一種有組織性嘅聲(語言會有文法,指定邊啲句子可以接受邊啲句子唔可以)-即係話個定義包埋一啲直覺上認為應該唔屬於音樂嘅嘢,所以唔可以攞嚟做音樂嘅定義[5]。又有啲定義嘗試由美感嘅角度出發,將音樂定義做「有組織性得嚟又有美感嘅聲」,但又有個問題係美感呢家嘢相當主觀,而一般認為定義係最好應該係要客觀[11]

雖然有呢啲定義上嘅問題,但學界一般冇人會否定音樂係一種有組織性嘅聲:有組織性嘅聲唔係全部都係音樂,但音樂全部都係有組織性嘅聲,而淨係基於呢點,樂理研究者經已可以作出相當多嘅分析-例如「有組織性嘅聲」冚唪唥都可以有音高節奏等嘅特性,所以無論最後音樂嘅定義係乜,樂理都應該要對有組織性嘅聲作出分析[註 2][12]。樂理上嘅思考會對音樂嘅聲特性作出抽象化理論定義上就係抽象化嘅研究),將唔同嘅聲特性轉化做一個個嘅概念,用嚟對音樂作出思考,包括係諗[4][13]

  • 一首音樂嘅聲特性會點樣影響聽嘅人嘅感受?點樣用音樂嘅聲特性創造美感?(藝術
  • 一首音樂嘅聲特性會引起點樣嘅腦活動?會點樣影響聽嘅人有幾鍾意首音樂?(音樂心理學
  • 「音樂嘅聲特性對聽嘅人嘅心理影響」可以攞嚟做乜嘢實用嘅用途?(聲設計等嘅應用領域)

... 等等嘅問題。

呢班人喺度表演粵樂名曲《彩雲追月》。

音樂元素[編輯]

內文:音樂元素
睇埋:樂譜同埋聲學

音高[編輯]

內文:音高

音高(pitch)係指人腦對一個音符(note;簡單講就係一吓聲)嘅頻率嘅感受:聲本質上係一種波動,而頻率係波動會有嘅特性(詳情可以睇吓聲學方面嘅嘢);實證嘅研究表明,如果一吓聲嘅頻率高(例如 880 Hz),聽嘅人就會覺得吓聲「高音」,而相反如果一吓聲嘅頻率低(例如 55 Hz),聽嘅人就會覺得吓聲「低音」。喺現代樂理上,啲人一般會用羅馬字母嚟表達啲聲嘅呢啲音高,即係用「CDEF...」噉嘅方法嚟表示每個音符嘅音高[14],當中嘅中 C(middle C)係最出名嘅音高之一,係 C 大調嘅基礎,亦係啲人學鋼琴嗰陣通常第一個會彈嘅聲,而 C5 嘅頻率大約係 523.251 Hz 左右[15]

廿一世紀初嘅樂譜會用一個音符喺條五線譜(staff)上面嘅高度嚟表示個音符嘅音高:一條五線譜會由五條打橫嘅直線組成,五條直線之間會形成四條空白嘅空間,一個音符個「頭」一係喺正其中一條(畫低咗或者假想嘅)打橫直線上面、一係喺其中一條打橫空間裏面俾其中兩條直線夾住,而個「頭」嘅位置就表示個音符嘅音高;一張樂譜嘅每行都會有兩條五線譜一上一下,中 C 就係位於上五線譜對落嘅位嗰度(睇附圖)[16]。响演奏一段音樂嗰時,演奏嘅人要望住張樂譜(或者事先背熟咗張樂譜)並且順序一吓一吓噉彈出每一個音符,途中每一吓佢手指撳邊個位(多數樂器)或者彈邊條(例如結他豎琴)等嘅動作就會決定件樂器發出幾高音嘅聲[17]

以下係基本 C 大調嗰啲音高喺樂譜入面嘅樣:

C major scale letter notation.png
呢段聲係用鋼琴將 C 大調嘅音符由低至高彈出嚟,彈到最高再由高至低彈多次。

音階[編輯]

內文:音階

協和性[編輯]

內文:協和同不協和

協和同不協和(consonance and dissonance)指兩個同時或者時間上極相近嘅聲係咪「好聽」。不過呢家嘢有少少主觀

和音[編輯]

內文:和音

和音(harmony)指若干個同時出現但音高等特性上有異嘅聲。

和弦(chord),係指一柞和音、包含多個音符嘅音高,聽嗰個人覺得佢哋係同一時間發出嘅。

節奏[編輯]

內文:節奏

節奏(rhythm)最廣義上係指一段音樂當中有若干週期嘅規律。

旋律[編輯]

內文:旋律

旋律(melody)指一柞俾聽嗰個人當係同一件物體嘅音符,可以算係音高同節奏嘅結合。

音色[編輯]

內文:音色

音色(timbre)指一個音符聽起嚟似係由乜嘢嘢(例如邊種樂器)發出嘅。

音樂形式[編輯]

內文:音樂形式

曲種[編輯]

內文:曲種

音樂分析[編輯]

內文:音樂分析

音樂心理[編輯]

內文:音樂心理學

同數學嘅拏褦[編輯]

簡史[編輯]

註釋[編輯]

  1. 不過亦有證據指,五線譜仲有得再追溯到去打前嗰一兩個世紀嘅歐洲
  2. 同時因為語言都係有組織性嘅聲,廿一世紀初嘅樂理概念喺語言學上都會用到,例子可以睇等時性呢個概念-等時性基本上等同樂理所講嘅節奏

睇埋[編輯]

[編輯]

  1. theory. The Oxford Companion to Music. Oxford Music Online.
  2. See, for example, chapters 4–7 of Christensen, Thomas (2002). The Cambridge History of Western Music Theory. Cambridge, UK: Cambridge University Press.
  3. Tagg, P. (1982). Analysing popular music: theory, method and practice. Popular music, 2, 37-67.
  4. 4.0 4.1 4.2 Gracyk, T. & A. Kania (eds.), 2011, The Routledge Companion to Philosophy and Music, New York: Routledge. pp. 1-13. "Definition".
  5. 5.0 5.1 Scruton, R. (1999). The Aesthetics of Music. Oxford University Press.
  6. London, Justin (2004). Hearing in Time: Psychological Aspects of Musical Meter. Oxford and New York: Oxford University Press.
  7. Mirelman, Sam (2013). "Tuning Procedures in Ancient Iraq" (PDF). Analytical Approaches to World Music 2, no. 2:43–56.
  8. Haines, J. (2009). The origins of the musical staff. The Musical Quarterly, 91(3-4), 327-378.
  9. Duinker, B., & Gauvin, H. L. (2017). Changing content in flagship music theory journals, 1979-2014. Music Theory Online, 23(4).
  10. Victor Hugo > Quotes > Quotable Quote. Goodreads.
  11. Levonsin, (1990). Music, Art, and Metaphysics, Ithaca, NY: Cornell University Press. pp. 267-78.
  12. Nespor, M., Shukla, M., & Mehler, J. (2011). Stress‐timed vs. syllable‐timed languages (PDF). The Blackwell companion to phonology, 1-13.
  13. Hansberry, B. (2017). Phenomenon and Abstraction: Coordinating Concepts in Music Theory and Analysis. Columbia University.
  14. Parncutt, R. (1989). Harmony: A Psychoacoustical Approach. Berlin: Springer-Verlag.
  15. Large, John (February 1981). "Theory in Practice: Building a Firm Foundation". Music Educators Journal. 32: 30–35.
  16. Rachmaninoff, Sergei (1965). Piano concertos nos. 1, 2, and 3. Courier Dover Publications
  17. Järveläinen, H., Verma, T., & Välimäki, V. (2002). Perception and adjustment of pitch in inharmonic string instrument tones. Journal of New Music Research, 31(4), 311-319.

[編輯]