管弦樂團
(由交響樂團跳轉過嚟)
管弦樂團（Orchestra），又叫交響樂團，係演奏管弦樂嘅樂團，一般都有幾十人一齊演出，主要包括弦樂器、木管樂器、銅管樂器同敲擊樂器。
音樂
[編輯]内文：交響樂
睇埋：協奏曲
喺現代，交響曲（symphony）係指專門作攞嚟畀交響樂團演奏用嘅樂曲。交響樂團閒閒哋會成有 40 至 50 位演奏者一齊演奏；交響樂團會結合多種唔同音色嘅樂器，包括好似小提琴同中提琴等嘅弓弦樂器、好似笛同雙簧管等嘅木管樂器、圓號同小號等嘅銅管樂器、以至定音鼓同鈸等嘅敲擊樂器；喺音樂特性上，交響樂團會做到好多獨特嘅效果，例如「將咁多種唔同樂器嘅聲以唔同方法結合埋一齊」噉嘅效果，係寫嚟獨奏或者俾細樂隊演奏嘅曲做唔到嘅－因為噉，喺好多作曲家心目中，「作交響曲」都係一種難得嘅藝術機會[1]。
要留意嘅係，交響曲同協奏曲（concerto）唔同，兩者都會用到樂團，但主要分別在於「有無獨奏者」：協奏曲作嚟係預咗俾若干位獨奏者，先後噉喺有隊樂團奏伴奏嘅情況下演奏嘅，即係話隊樂團負責奏嗰段聲明顯係攞嚟做獨奏者嘅陪襯；交響曲正路就無特定嘅獨奏者，而係俾成個交響樂團一齊合作奏，當中無任何一位演奏者零舍會做注意力嘅中心[2]。
