聲設計

出自維基百科,自由嘅百科全書
跳去導覽 跳去搵嘢
一列用嚟控制聲嘅設備,2010 年

聲設計粵拼seng1 cit3 gai3英文sound design)指幫某啲項目設計音樂聲效,當中「項目」通常係一啲媒體創作方面嘅工作,例如拍戲或者遊戲製作呀噉。喺廿一世紀初,聲設計係一門相當高技術性嘅專業:做聲設計嘅人要對音樂同聲效等嘅嘢有相當嘅了解,知唔同嘅音樂同聲效會製造乜嘢氣氛或者藝術效果等等,而製作電子遊戲電視劇電影呢啲創作品嘅人都會請專業做聲設計嘅人(聲設計師)幫手為佢哋嘅產品設計需要用嘅聲[1]

工作[編輯]

內文:聲效背景音樂
睇埋:拍戲同埋遊戲製作

一般嚟講,一位俾人請佢幫或者電視劇做嘢嘅聲設計師要做嘅嘢大致如下[2][3]

  • 睇熟嗮份劇本先,知個故仔情節角色係點-理解個故仔大致上需要點樣嘅氣氛同心情。
  • 情節同角色仲會話俾位聲設計師知,份作品需要用啲乜嘢聲效-例如情節講到有一幕係講到其中兩個角色用嚟單挑嘅話,位聲設計師就需要準備槍聲嘅聲效。
  • 有咗個表知道需要用啲乜嘢聲之後,位聲設計師就要郁手準備啲聲;聲檔案可以嚟自好多源頭,一位聲設計師要清楚知道每種聲要去邊度搵-原則上,位聲設計師有得靠自己憑空創造啲聲,但另一方面,佢又可以去一啲資源庫攞一啲個個都要用嘅聲(例:槍聲喺好多創作品當中都會用得著,所以有做媒體創作嘅人會索性擺啲槍聲檔案上網公開,俾人隨意攞去用)。
  • 有齊嗮要用嘅聲,位聲設計師就要郁手將啲聲「貼」落去份作品嗰度,例如拍好咗段片,聲設計師跟手就要用專化嘅電腦軟件嚟將啲聲檔案擺入去段影片適當嘅地方。
  • 跟住落嚟,位聲設計師仲要做好多測試-將啲聲檔案貼嗮入去份作品之後,佢同工作團隊嘅第啲成員仲要睇吓份作品點(將段片睇好多次),睇吓有冇乜嘢甩漏或者唔滿意嘅地方(喺現實世界,工作團隊通常都會喺呢個時候發現一啲問題);有嘅話就位聲設計師要諗吓計、郁手改同埋再做測試,而呢個過程通常起碼會重複幾次。

睇埋[編輯]

[編輯]

  1. Whittington, W. (2007). Sound design and science fiction. University of Texas Press.
  2. Role of the sound designer. Encyclopedia Britannica.
  3. Müller, Bastian (2008). Sound Design: The Development of Sound Design for Hollywood Films and its Impact on Modern Cinema. Hamburg: diplom.de.

[編輯]