跳去內容

職業摔角

出自維基百科，自由嘅百科全書
世界摔角娛樂摔角手格鬥實況

職業摔角（Professional wrestling），簡稱職摔，英文係Pro-wrestling，通常都係指由受薪摔角手參與嘅一種表演藝術。大部份嘅職業摔角比賽，尤其喺美國同加拿大嗰啲，比賽結果都係事先定好，最多都係喺表演過程中發生嘅一啲突發意外。所謂職業摔角，都係用嚟定義呢類以表演性質為主嘅比賽。傳統或者以競技為主嘅摔角比賽，都唔容許有拳打腳踢嘅動作，但係喺職業摔角入面，就容許有拳擊同格鬥技嘅元素，等比賽睇起嚟更加刺激[1]。

而家嘅職摔都會滲入好多娛樂元素，例如摔角手會分開正派同反派兩種角色發展對抗故事，因為咁嘅原固，有人會叫職摔做「體育娛樂」（Sports entertainment），至於喺日本，由於佢哋追求職摔入面嘅剛烈感覺，所以會叫做「鬥魂」或者「王道」，而喺墨西哥，佢哋會叫職摔做自由式格鬥（Lucha libre）。

簡史

[編輯]

早喺十八世紀，職摔已經出現，早期嘅職業摔角表演多數都係馬戲團入面嘅附屬表演，英文叫做 ad show（宣傳騷），由於當時嘅傳媒並無而家咁先進，而馬戲團、遊樂場之類可以聚集群眾嘅地方，就成為好多人用嚟作為訊息交流嘅地方，而好多商人就會利用馬戲團、遊樂場可以聚眾嘅特點，去宣傳自己嘅商品。

當時馬戲團、遊樂場入面，都會有好多人做唔同嘅嘢去吸引群眾，而職業摔角表演就係其中一種。由於職業摔角嘅動作大，肢體語言豐富，所以戲劇性好強，因而令到職業摔角表演可以吸引到好多人去睇，成為宣傳商品嘅主要工具，亦因為呢個原因，所以傳統落嚟喺英文講嘅職摔組織或者公司都會叫做 Promotion（宣傳），而嗰陣時啲表演做得最多嘅宣傳商品就係賣藥。

後來開始有電視，但由於最初嘅電視係無聲，而職摔入面豐富嘅肢體語言就成為咗最適合無聲電視播放嘅節目之一。

而隨住各種傳播媒體發達，加上科技發展，職摔再唔係只係馬戲團入面賣藥嘅表演。而且能夠獨立發展，加入好多唔同嘅嘢入去，例如煙花、燈光同音樂效果，唔單止大陣仗，娛樂性亦好豐富，令人賞心悅目，今時今日成為咗好多人會特登畀錢去睇嘅表演[2]。

日本

[編輯]

日本職摔叫做プロレス（Puroresu），係日文プロフェッショナルレスリング（purofesshonaru resuringu）嘅簡寫，原本係英文 Professional wrestling 嘅日文讀法，嚴格嚟計其實係一個錯字，但係因為太多人用，慢慢就變咗做正字，而家好多人都用 Puroresu 嚟作為日本職摔嘅稱呼，而台灣就將 Puroresu 跟音譯做「普羅擂司」。

自從1951年由力道山將職業摔角引入日本之後[3]，職摔就成為日本文化嘅其中一部份。

墨西哥

[編輯]

墨西哥亦係一個職摔娛樂發展得好大嘅地方，電影Nacho Libre就係一套以墨西哥摔角為題材嘅戲。

香港

[編輯]

嚴格嚟講香港其實冇本土職摔，喺香港主要以播出外國嘅職摔節目為主，早喺1960年代尾，無綫電視就有播澳洲嘅職摔節目，而且大受歡迎，甚至可以話係狂熱，而且重喺1972年12月8號連續三日喺香港會球場舉行過摔角比賽，由何守信主持，而且場場爆滿。但後嚟因為發生咗有小朋友模仿摔角手過招而搞出人命，又有細路因為霸電視爭睇摔角而跳樓，喺社會輿論壓力之下，就冇再播摔角[4]。

一直到大概1992年亞洲電視先再播職摔節目「週末摔角大狂熱」，同時衛星電視亦有播 WWE Raw，到咗大概 2000年又有無綫電視明珠台播砌低你，但已經冇咗1960年代嗰種狂熱。

規則

[編輯]

由於職摔嘅表演性質，令職摔嘅形式可以比傳統摔角更加變化多端，所追求嘅亦以戲劇性同故事性為主，結果出現好多得意嘅情況，例如比緊賽嗰陣突然間有人出嚟偷襲，或者一啲有權有勢嘅人例如老闆咁，會走出嚟干擾比賽，或者取消摔角手資格，甚至可以有摔角手因為輸咗比賽之後唔服，而上返台毆打贏咗嗰摔角手都有。

不過正常嚟計，職摔由於係承傳自傳統嘅摔角比賽，所以規則上都係以制壓對手，將比賽對手制服為之贏，具體嚟講，職摔嘅目的，就係將比賽對手「制壓」，「制壓」嘅意思，係指背脊嘅兩個膊頭部份貼住個地三秒以上。任何一方能夠成功「制壓」對手為之贏。

除此之外，又可以用「關節技」令比賽對手投降，關節技亦即係柔道上所講嘅寢技，即係指利用扭曲對方嘅關節，令對手因為太痛而投降，柔道上嘅寢技好似：袈裟固定、三角固定、十字固定、勒頸鎖技都有引入職摔表演入面，利用關節技令比賽對手投降亦可以為之贏。

除咗「壓制」同「關節技」，另一種贏比賽嘅方法係令對手出錯犯規，犯規有好多原因，例如離開擂台超過二十秒，有啲就計十秒，呢個時間入面返唔到上擂台就為之輸，用武器攻擊對手同樣係屬於犯規，不過唔計一啲畀用武器嘅特別比賽規則。亦有另一種情況係兩個摔角手都唔喺擂台上面，呢個情況之下用武器攻擊亦唔算犯規，只要喺指定時間入面返得返上台就得。

職摔組織

[編輯]

美國最大嘅職摔公司都可算係「世界摔角娛樂」（World Wrestling Entertainment，簡稱 WWE），另外新幾年冒起嘅 TNA 亦係美國職摔界嘅代表。

日本方面，而家日本最大嘅職摔公司，要算係由豬木安東尼奧開辦嘅新日本職業摔角、三澤光晴創辦嘅 Noah、Ultimo Dragon 創辦嘅鬥龍門，重有由高田延彥所搞嘅Hustle，都係而家喺日本最受歡迎嘅職摔組織。

墨西哥亦係一個職摔娛樂發展得好大嘅地方，比較大規模嘅職摔組織有：Consejo Mundial de Lucha Libre (CMLL)、Asistencia Asesoría y Administración (AAA) ，都係大受墨西哥職摔迷歡迎。

參考

[編輯]
  1. ↑ 記錄片 Professional Wrestling : Tricks of the Trade，2003年2月喺 Travel Channel 播出
  2. ↑ The Unreal Story of Pro Wrestling (1999) DVD
  3. ↑ 力道山景氣論：[1] 互聯網檔案館嘅歸檔，歸檔日期2007年3月20號，.
  4. ↑ 吳昊，《挑戰歲月飛越70年代》，ISBN 962-17-8603-7

睇埋

[編輯]

拎

[編輯]
維基同享有多媒體嘅嘢：
Professional wrestling
由「https://zh-yue.wikipedia.org/w/index.php?title=職業摔角&oldid=2086433」收