拍子

呢段動畫展示一部行緊嘅拍子機。條擺每一次重複活動都係一吓拍子。

呢段聲入面嘅鼓跟 3/4 嘅華爾茲節奏（每段節拍 3 吓拍子）；每段節拍第一吓拍子重音。

一段節拍；呢段音樂係 4/4，即係話段節拍入面有 4 吓拍子，每吓拍子都係一個四分音符咁長。

拍子（beat，可以做粵拼：bit1，假借漢字必bit1）係音樂上最基本嘅計時單位。音樂本質上就係喺時間當中組合聲，表演一段音樂嘅人要喺適當嘅時間點發出適當嘅聲，所以需要有啲方法幫自己計時。想像家陣有個人演奏一首樂曲，佢可以係噉喺度用把口數住「1 2 3 4，1 2 3 4...」，每吓之間嘅時間間隔都完全一樣，佢就可以用呢一吓吓時間間隔​——​每吓就係一吓拍子​——​嚟幫自己留意住過咗幾多時間。

拍子同節拍（英式英文：metre）關係密切：想像將一段音樂斬開做若干橛，每橛喺時間上都一樣咁長，每一橛就係一段節拍，而每橛節拍都會包含若干吓拍子，每一橛節拍包含嘅拍子數量都一樣；喺現代嘅樂譜當中，節拍通常會掕住一對數字​——​例如「4/4」噉​——​一上一下喺條五線譜上面，呢啲數字就係所謂嘅拍子記號：

• 喺上面嗰個數字表示一段節拍裏面有幾多吓拍子，
• 而另外嗰個數字表示一吓拍子維持幾耐時間（以音符時值計）。

節拍局限咗一段小節裏面可以擺幾多個音符，反映節奏（rhythm）嘅強弱。

打拍子

打拍子（beat time）係指一個人用某啲方法嚟用定時嘅聲或者身體郁動嚟幫自己或者身邊嘅人留意住拍子，例子有數拍子，即係用把口「1 2 3 4，1 2 3 4...」噉數住啲拍子。可以睇埋拍子機呢種玩音樂嘅人常用嘅打拍子架生。

節拍嘅種類

内文：節拍同板眼

節拍嘅種類有好多種，喺西樂多數用嘅有 4 拍，仲有3拍，同 2 拍；喺中樂多數有 4 拍、2 拍同 1 拍。

節奏嘅強弱

睇埋：強弱法

節奏嘅強弱係關節拍事。

2拍	3拍	4拍
強-弱	強-弱-弱	強-弱-次強-弱

睇埋

• 節奏
• 拍子機
• 節奏遊戲
• 時間知覺

文獻

• Cone, Edward T. (1968). Musical Form and Musical Performance. New York: W. W. Norton. ISBN 0-393-09767-6.