八度

C音嘅純八度音程。

八度（英文：octave）係音程嘅一種，就咁講 ｢八度｣ 係指6個全音嘅距離（喺十二平均律之下等於12個半音，而今一般人亦都係會咁講），相距八度嘅兩個音一定係一樣音名。雖然 ｢八度｣ 字面上係指五線譜上面相差八個位，但係西方嘅音樂傳統其實係基於物理上樂音頻率嘅比例，而八度就係指頻率比例係 1:2，換句話，高八度即係頻率變兩倍，低八度即係頻率減半。 因為兩個音嘅泛音有大概一半係相同頻率，所以聽落去感覺好似係同一個音。

6個全音嘅八度喺性質（quality）上屬於 ｢完全｣ 音程（perfect interval）；所以畀名叫嘅時候叫純八度（perfect octave，簡寫 P8）、完全八度或者完美八度，一般俾人感覺係舒服嘅。

喺和聲學入面，純八度係第二簡單嘅音程關係（最簡單嘅係純一度），亦都畀人叫做「音樂上成日用到嘅音程」。

增八度同減八度

純八度升半音叫增八度（augmented octave，簡寫 A8），即係13個半音嘅音程；純八度降半音叫減八度（diminished octave，簡寫 d8），即係11個半音。喺十二平均律之下，減八度同大七度係同一個音程，唔同名只係因為喺五線譜上面寫法唔同。