構圖

維梅爾嘅《畫畫嘅藝術》；呢幅畫成日都俾人攞嚟做構圖嘅基本例子。

構圖（粵拼：gau3 tou4，又有讀「粵拼：kau3 tou4」；英文：visual composition / composition）係視覺藝術上嘅一個概念。一幅視藝作品嘅構圖指嗰幅作品當中唔同物件嘅位置－包括每件物件相對個框嘅位置以及彼此之間嘅相對位置：一幅視藝作品－例如係一幅畫或者一張相－當中會有若干件藝術元素（element of art）；藝術元素包括咗線、形狀同色水等；每件元素會喺幅作品上有個位置以及相對於第啲元素嘅位置。視藝上對構圖嘅思考就旨在諗「藝術元素嘅位置要點安排，先可以賦予幅作品結構同埋表達藝術家嘅意圖，造出令人覺得賞心悅目嘅作品」。

以荷蘭畫家維梅爾（Johannes Vermeer）嘅其中一幅出名作品《畫畫嘅藝術》（The Art of Painting；附圖）為例，《畫畫嘅藝術》個構圖簡單講如下：圖中有「塊掛毯」、「個畫家」同「個模特兒」等嘅多件物件，當中個畫家線條上大致垂直（線），佔嘅空間大致成四方形（形狀），形態係一個坐喺度嘅人（形態），置於塊掛毯之後同個模特兒之前（相對第啲元素嘅位置；塊掛毯起咗「將觀眾視線引入個畫家身處空間」嘅作用），離右邊界距離大約係成幅畫闊度嘅 1/3（相對於個框嘅位置）。

喺視覺藝術上，構圖扮演咗多種重要嘅作用，包括令幅圖變得更和諧同幫觀眾了解個場景等等。物件彼此之間嘅關係、相似嘅規律之間點樣分群、同物件點樣同背景分離等如果做得好會令成幅作品望落更加和諧，仲可以巧妙噉引導觀眾嘅眼光，令藝術家能夠控制觀眾點樣體驗佢幅作品（例如頭先提到，《畫畫嘅藝術》當中塊掛毯將觀眾眼光引入個畫家身處嘅空間）。事實係，認知心理學（cognitive psychology；研究認知嘅心理學子領域）上對視知覺嘅研究表明咗，一幅圖像嘅構圖會影響觀眾嘅眼珠點郁動以至觀眾有幾鍾意幅作品。

藝術元素

各藝術元素嘅簡單圖例

内文：藝術元素

一幅圖像可以揼散做好多細嘅組成部份。喺視覺藝術上思考同埋分析一份作品嗰陣，分析者通常會用某幾樣嘢當做一幅圖嘅基本組成部份，呢啲嘢就係所謂嘅藝術元素（element of art）。藝術上嘅形式分析（formal analysis）會對一份作品嘅元素作出詳細嘅分析，嘗試了解份作品用咗乜元素同埋啲元素以乜嘢方式排列埋一齊（構圖），以及呢啲安排引致觀眾有乜反應。喺一般形式分析上，藝術元素可以分做七大種：

• 線條（line）－引導視線喺作品上郁動嘅線；
• 形狀（shape）－作品當中嘅唔同區域，可以但唔一定由明確嘅邊界分；
• 顏色（color）－作品當中用咗乜色調以及各忽色調嘅濃度；
• 亮值（value / lightness）－作品唔同忽嘅光暗度，用嚟強調形態；
• 肌理（texture）－物件表面嘅特性，用嚟產生觸感嘅錯覺；
• 形態（form）－作品描繪嘅立體物件嘅長闊高；
• 空間（space）－物件所霸嘅空間（正空間）同物件之間嘅空間（負空間）。

佈置元素

根據主流藝術學者嘅見解，決定一幅作品嘅藝術元素嘅佈置（構圖）嗰陣有 CRBP 四大因素要考慮：

• 對比（Contrast），指兩件同類嘅藝術元素喺物理性質上有差異，簡例：兩條線唔同長度，或者兩個形狀一個係三角形一個係正方形。
• 節奏（Rhythm），指一個對比方式嘅重複，簡例：幅圖入面有三個喺各方面（顏色、形狀、大細）完全一樣嘅長方形，第二個長方形喺正第一個長方形右邊 10 厘米遠嘅位置（「彼此之間相距 10 厘米」係呢兩個長方形之間嘅對比），而第三個長方形喺正第二個長方形右邊 10 厘米遠嘅位置（將「彼此之間相距 10 厘米」呢樣對比重複咗一次）。
• 平衡（Balance），指一個空間兩邊嘅「重量」一唔一樣，一樣嘅話就係平衡，簡例：幅畫入面有兩邊，左手邊有一個大嘅三角形同一個細嘅三角形，右手邊有一個中等大細嘅三角形，噉幅圖喺「啲形狀嘅大細」上就算係平衡。
• 比例（Proportion），指同類嘅藝術元素之間喺大細同距離同嘅特性上成特定嘅比例，簡例：第一條線同第二條線之間長度比例係 1:2，第三條線同第四條線之間嘅長度比例都係 1:2。

左：一幅平衡嘅圖；右：一幅唔平衡嘅圖。

有藝術學者主張，人一般都對喺 CRBP 上具有某啲特性嘅事物有好感，會覺得呢啲嘢有美感。有學者由生物學嘅角度思考：佢哋指出，稍為複雜啲嘅動物都會進化到鍾意顯示嘢食出現嘅物理刺激，例如食昆蟲嘅哺乳類動物會對「識郁嘅黑色點點」（望落似周圍爬嚟爬去嘅細隻昆蟲）有好感－就算呢啲黑色點點唔係真係昆蟲都好；而人類係一種雜食性動物，所以理論上會進化成對任何望落似有生命嘅嘢－即係對人類嚟講有可能係食得嘅嘢－有上述呢種反應，而有生命嘅嘢普遍都喺 CRBP 上具有某啲特性嘅，例如健康正常嘅生物一般都係左右大致上對稱嘅，於是人類就進化成會對具有呢啲特性嘅冇生命物體（例如係人造嘅藝術品）有好感，令到對稱性成為受歡迎嘅藝術品常有嘅特徵之一。

• 
  一塊大致左右對稱嘅樹葉
• 
  一隻大致左右對稱嘅蝴蝶
• 
  一棟喺形狀上大致左右對稱嘅建築物

節奏

莫奈嘅《四樖樹》

内文：節奏

節奏（rhythm）係構圖嘅一個重要考量：最廣義上嚟講，節奏可以指「一連串以特定規律對比嘅刺激」；喺音樂上，節奏會係指每隔一段時間就有一串具有某啲特定性質嘅聲出現，而喺視藝上，節奏可以想像成「定時通過空間移動」（timed movement through space）－例如一棟建築物有若干個窗，而且啲窗之間彼此距離一致（第一個窗同第二個窗之間嘅距離，等如第二個窗同第三個窗之間嘅... 如此類推），又或者係一幅畫入面畫咗四樖樹，而嗰四樖樹彼此之間嘅距離一致，於是睇嗰份作品嘅人如果係以恆定嘅速度移動佢嘅目光嘅話，就會每隔一段特定長度嘅時間就見到其中一個元素（以開始賞畫嘅時間做 0 點，個人喺第 $n$ 秒睇到第一樖樹，第 $2n$ 秒睇到第二樖樹...），而呢點能夠造到一般俾人覺得靚嘅美學效果。

例如係法國印象派始祖莫奈（Claude Monet）嘅《白楊樹》系列當中嘅《四樖樹》（The Four Trees；1891 年）噉，喺呢幅畫入面有四樖白楊樹，佢哋之間相隔大致恆定嘅距離（節奏－物件之間以恆定嘅規律成對比），同時四樖樹之間喺距離上有少量嘅不一致，令啲樹望落自然，而且背景嘅物件唔跟節奏，反而更強調四樖樹所形成嘅節奏。順帶一提，亦有藝術界嘅人指出，節奏使唔使完全一致視乎物件係人造定自然：佢哋認為，自然物件多數都係有些少不規律性嘅，所以畫自然物件嗰陣，節奏要帶些少不規律性先會順眼（例如《四樖樹》當中嗰四樖樹之間嘅距離就唔完全一致）；相比之下，好似建築物呢啲人造物件就大可以有完美前後一致嘅幾何性規律。

黃金比例

黃金比例嘅圖解

内文：黃金比例

"Without Mathematics There is No Art." （「冇咗數學，就唔會有藝術。」）

Luca Pacioli （盧卡·帕西奧利）

藝術界有對構圖嘅數學特性作出思考。有唔少藝術方面嘅工作者同學者認為，構圖上展示某啲數學特性嘅畫會零舍有美感，而黃金比例（golden ratio；$\varphi$）就係一個成日俾人指同美感有重大關係嘅數值：想像有兩個數值 $a$ 同 $b$，$a>b$；如果「$a+b$ 同 $a$ 之間嘅比例」等同「$a$ 同 $b$ 之間嘅比例」嘅話，$a$ 同 $b$ 就算係成黃金比例，即係話：

${\frac {a+b}{a}}={\frac {a}{b}}\ {\stackrel {\text{def}}{=}}\ \varphi$

$\varphi ={\frac {1+{\sqrt {5}}}{2}}=1.6180339887\ldots .$

有好多藝術界嘅工作者相信，一幅靚嘅畫構圖需要喺某啲方面展示黃金比例；而文藝復興時期（Renaissance）嘅意大利藝術家廣泛噉將黃金比例用喺佢哋作品嘅構圖當中，以達文西（Da Vinci）舉世聞名嘅作品《蒙娜麗莎》（Mona Lisa）為例：

黃金長方形嘅圖解；圖中嘅 同 成黃金比例。 黃金長方形嘅圖解；圖中嘅 $a$ 同 $b$ 成黃金比例。  《蒙娜麗莎》全圖 《蒙娜麗莎》全圖  蒙娜麗莎塊面俾人指係運用咗黃金長方形嘅原理。 蒙娜麗莎塊面俾人指係運用咗黃金長方形嘅原理。

睇埋

• 視藝設計原則
• 畫畫
• 攝影
• 圖像設計
• 建築設計
• 電腦圖像
• 幾何學

參考文獻

• Arnheim, Rudolf (1974). Art and Visual Perception: A Psychology of the Creative Eye. University of California Press. ISBN 978-0-520-02613-1.
• Bouleau, C. (2014). The painter's secret geometry: A study of composition in art. Courier Corporation.
• Downer, Marion (1947). Discovering Design. Lothrop Lee & Shepard. ISBN 0-688-41266-1.
• Graham, Peter (2004). An Introduction to Painting Still Life. Chartwell Books Inc. ISBN 0-7858-1750-6.
• Grill, Tom; Scanlon, Mark (1990). Photographic Composition. Watson-Guptill Publications. ISBN 0-8174-5427-6.
• Peterson, Bryan (1988). Learning to See Creatively. Watson-Guptill Publications. ISBN 0-8174-4177-8.
• Stebbing, P. D. (2004). A universal grammar for visual composition? (PDF). Leonardo, 37(1), 63-70.
• Langford, Michael (1982). The Master Guide to Photography. New York: Dorling Kindersley Limited. ISBN 0-394-50873-4.

拎

• Percy Principles of Art and Composition, Goshen College Art Department.
• Using Detail and why it is important.