芭蕾舞詞彙表

出自維基百科,自由嘅百科全書
Jump to navigation Jump to search

1847 年法國嘅一幅油畫;幅畫描述當時嘅一堂芭蕾舞堂。

以下係芭蕾舞ballet法文讀音:[ba.lɛ])上常用嘅詞彙列表。呢個表包括咗跳芭蕾舞嗰陣時用嘅技法、用具、以至係芭蕾舞相關人員所用嘅稱謂呀噉。呢個詞彙表以英國皇家舞蹈學院(Royal Academy of Dance;簡稱「RAD」)嗰套做中心,噉係因為地區喺芭蕾舞上不嬲跟開英國嗰套標準嘅,而事實係,大中華地區啲芭蕾舞老師主要都跟 RAD 嗰套標準[1][2]

呢柞詞彙當中有好多都嚟自英文以外嘅歐洲語言,尤其係法文:今日所見嘅芭蕾舞技法有好多都係起源於 16 至 17 世紀嘅法國嘅-當時芭蕾舞啱啱成咗形冇幾耐,技術仲未成熟,於是當代嘅法國藝術家就幫手發展芭蕾舞嘅技法,用法文字幫啲技法改名,最後令芭蕾舞成為一種廣受人認同嘅藝術;因為呢段歷史,芭蕾舞詞彙當中有好多都係由法文直接借過去英文嗰度嘅字。芭蕾舞老師等嘅人員喺讀呢啲字嗰陣時,多數都會跟返法文嘅讀音。而除咗法文字之外,英文嘅芭蕾舞詞彙入面都有一部份係嚟自意大利文意大利係芭蕾舞發源地)或者俄羅斯文俄羅斯係另一個芭蕾舞大國)嘅[3]

用具詞彙[編輯]

一個芭蕾舞蹈員一隻手掹住條可攜式練功扶手練習。佢身後仲有塊全身鏡。芭蕾舞課室通常都會有全身鏡-用意在於俾學生練舞嗰陣睇到自己身體嘅擺位。

架生[編輯]

Barre

練功扶手(barre;法文讀音:[baʁ])係芭蕾舞堂常用嘅一種工具,係一碌打橫、通常用木或者金屬造嘅長條,一條練功扶手可以係鑲咗喺埲牆上面嘅,又或者係有兩條腳喺左右兩邊撐住嘅(可攜式)都得。喺使用練功扶手嗰陣,個學生會一隻手掹住條練功扶手,一路慢慢噉做出佢想練習嘅舞步。噉樣做係因為,芭蕾舞有好多舞步都要求極強嘅平衡力,好多時個學生一開始嗰陣都唔夠平衡力獨力做出個舞步,所以個老師就搵條扶手俾佢練吓喺有嘢扶住嘅情況下做出個舞步,等佢做到有噉上下熟先試吓要佢唔靠扶手做出個舞步[4]

無論初階定高階,一個芭蕾舞堂通常都係以喺練功扶手側邊運動開始。個老師會首先要啲學生喺掹住條扶手嘅情況下練習嗰堂要學嘅舞步,等到佢哋曉正確噉做出個舞步,個老師好多時就會攞走條扶手,要啲學生唔扶住任何嘢做出啱啱學咗嘅舞步。除咗噉,好多時專業嘅芭蕾舞蹈員都會用練功扶手做熱身或者用嚟微調自己啲技法[4]

衫褲[編輯]

Tights

古典芭蕾舞蹈喺跳舞嗰陣通常會著住緊身褲(tights),又或者叫「襪褲」。喺練習嗰陣,著住緊身褲令老師可以睇清楚佢哋對髀每一舊肌肉嘅狀態啱唔啱;而喺表演嗰陣,緊身褲幫到佢哋展示身體嘅線條。芭蕾舞用嘅緊身褲分男女裝:女裝色水上偏粉色,而且好多時半透明;男裝就比較厚(遮得住啲腳毛),兼色水偏暗淡,以黑、白、同深藍為主[5]

Tutu

芭蕾舞傘裙(tutu)係女芭蕾舞蹈員表演嗰陣通常會著嘅一種裙,多數著喺腰噉高嘅位置,比較短,頂櫳去到大髀噉長,而且硬淨過一般嘅裙,喺個女舞蹈員做一啲旋轉性嘅舞步嗰陣會跟住旋轉,形成一種特殊嘅美感。浪漫芭蕾舞當中嘅芭蕾舞裙會比較長,可以一路落到遮住對細髀[6]

Leotard

連體衣(leotard)係舞蹈員練習嗰陣會著嘅一種緊身嘅衫,覆蓋個舞蹈員嘅膊頭軀幹,袖可長可短,又有啲係冇袖嘅。連體衣多數係女舞蹈員先會著嘅[7]

Dance belt

舞蹈腰帶(dance belt)係男芭蕾舞蹈員會著喺佢哋緊身褲裏面嘅一種褲。舞蹈腰帶好似一條底褲噉形,但係稍微硬淨啲,幫到手遮住同固定個男舞蹈員嘅下體,令到佢喺著住緊身褲跳舞嗰時唔會因為俾人睇到佢下體嘅形狀而引起尷尬[8]

Ballet shoes

芭蕾舞軟鞋(ballet shoes,又有叫「ballet slipper」或者「soft shoes」)係專門設計嚟喺跳芭蕾舞嗰陣著住嘅輕質軟鞋,材質由軟皮革帆布、以至綢緞都有。喺色水方面,女舞蹈員通常會著粉色嘅軟鞋,而男舞蹈員通常會著白色或者黑色嘅。啲芭蕾舞蹈員揀緊身褲嗰時興揀一啲同自己對鞋一樣色水嘅,等自己可以做到望落好似冇著鞋跳舞噉嘅視覺效果[5]

Pointe shoes

足尖鞋(pointe shoes)係一種為女舞蹈員特別設計嘅芭蕾舞鞋。呢種鞋喺腳尖個位特別加強咗,令到著住佢嘅舞蹈員能夠做完全腳尖企(睇「pointe」)做一段長啲嘅時間。個舞蹈員著住呢啲鞋嗰時,通常會係噉勁做腳尖企-將自己全身重量施落去對鞋嘅腳尖位度,所以一對足尖鞋通常著得嗰十零廿個鐘頭已經開始爛(相比之下,一對普通嘅芭蕾舞鞋喺正常情況下,起碼可以著成兩三個月)[9]

技法詞彙[編輯]

基礎[編輯]

Ballet techniques

芭蕾舞技法(ballet techniques)係跳芭蕾舞嗰陣用到嘅技法,涉及個舞蹈員嘗試用各種特定嘅手腳位置組合嚟喺舞台上有美感噉移動,達到令觀眾覺得賞心悅目嘅效果。芭蕾舞技法可以視乎門派而有所差異[10]

Positions of the feet

腳位(positions of the feet)係芭蕾舞技法嘅基本概念。無論係跟邊個門派,芭蕾舞學生首先要學識嘅實係五大腳位(The five positions of the feet)。五大腳位係喺 1725 年由 Pierre Beauchamp 制定嘅,指五個雙腳腳板嘅擺法,係古典芭蕾舞當中最緊要最基礎嘅技法之一-芭蕾舞嘅舞步差唔多冚唪唥都係以五大腳位當中其中一個起始同作結嘅。五大腳位大致上如下[1]

五大腳位嘅圖解;最左手邊係第一腳位,佢隔離嘅係第二腳位,如此類推。
  • 第一腳位(first position):兩腳腳踭掂住,而腳尖就指住相反方向,雙要直一直。
  • 第二腳位(second position):似第一腳位,但係兩腳腳踭要分開,彼此之間維持大約髖關節噉闊嘅距離。
  • 第三腳位(third position):同第一腳位類似,但係雙腳嘅腳踭要互相平行,大致上去到另一隻腳板嘅中間位置;呢個係比較少用嘅一個腳位,因為成日俾人以為係一個做得衰嘅第一或者第五腳位。
  • 第四腳位(fourth position):兩隻腳板平行但腳尖指住相反方向,腳尖要去到另一隻腳踭噉遠,兩隻腳板相距大約一隻腳板嘅距離。
  • 第五腳位(fifth position):係五大腳位當中最難做嗰個;同第四腳位類似,唯一嘅分別係兩隻腳板要掂住。

除咗呢五大腳位,仲有由烏克蘭裔芭蕾舞蹈員 Serge Lifar 發明嘅第六同第七腳位等等[11]

Turnout

外開(turnout)係指個舞蹈員用髖關節嘅力(而唔係膝頭嘅力)將兩條髀向外面轉,令到對膝頭同腳尖彼此遠離,喺第一腳位同第二腳位嗰度都會用到。用髖關節將雙髀向外轉一般俾人認為好睇過用膝頭嘅力令對髀向外轉,而且亦都冇噉易整親個舞蹈員[12]:p. 55

Ballet feet 1st position.png Ballet feet 2nd position.png Ballet feet 3rd position.png Ballet feet closed 4th position.png Ballet feet 5th position.png
第一腳位 第二腳位 第三腳位 第四腳位 第五腳位
Positions of the arms

芭蕾舞手位(positions of the arms)係指跳芭蕾舞嗰陣,跳舞嗰個人對手臂通常會擺嗰幾個特定嘅位。喺最基本嘅芭蕾舞手位當中,雙手會維持若干(相同嘅)高度,而且兩隻手掌嘅手指尖要差啲掂住,雙手手掌嘅高度可以係喺髖關節噉高、又或者係喺肚臍噉高、又或者高到喺個舞蹈員頭頂上都得;而喺第啲手位當中,雙手手臂可能會延伸並且彼此遠離,令到兩隻手掌分別去到身體嘅左右兩邊嘅遠處;有陣時,一個芭蕾舞蹈員又可以兩隻手分別做唔同嘅手位[1][13]

唔同嘅芭蕾舞門派對手位嘅定義有啲唔同,可能會用同一個名指唔同嘅手位,又或者有第啲門派冇嘅手位,例如俄羅斯派嘅芭蕾舞會用三個手位,而其他主要門派興用五個。香港同中國大陸嘅芭蕾舞老師多數都係用英國皇家舞蹈學院所指定嗰套手位嘅。五大手位如下[13]

Přípravná pozice.JPG Aaron Sharratt - La Belle, Prince Désiré - Prix de Lausanne 2010-2.jpg Mingyi Liang - Giselle, Prince Albrecht - Prix de Lausanne 2010-8.jpg Mai Miyazaki - Coppelia, Swanilda-Prix de Lausanne 2010-2.jpg Chunwai Chan - Giselle, Prince Albrecht - Prix de Lausanne 2010-3.jpg Jiwee Kwen - La Bayadère, Ombres 2e v. - Prix de Lausanne 2010-3.jpg
準備位 第一手位 第二手位 第三手位(RAD 式) 第四手位打開 第五手位
  • 準備位(bras bas,又作「bras au repos」)係指個舞蹈員將雙手手臂垂低,雙手手掌要差啲掂住,手掌要喺髖關節左右噉高。顧名思義,呢個係啲芭蕾舞蹈員喺對手臂要開始做大動作之前會做一吓嘅一個手位。
  • 第一手位(first position)同準備位差唔多,都係雙手手掌要差啲掂住(好似攬住某啲嘢噉),主要分別係手掌嘅高度要高過準備位嘅-第一手位嘅手掌要喺肚臍同胸骨之間嘅高度。喺意大利嘅切劇蒂派當中,第一手位會稍為低少少,去到芭蕾舞裙嗰個高度。
  • 第二手位(second position)指雙手要向左右兩邊伸出去,手掌要彼此遠離,但唔完全伸直(好似攬住啲好大嘅嘢噉);手瓜嘅內部要同地板平衡而前臂同手掌要盡可能面向觀眾。唔同芭蕾舞門派嘅第二手位都係噉,不過佢哋喺做第二手位嗰陣膊頭嘅圓度同手臂嘅高度有所不同。
  • 第三手位(third position)喺唔同門派當中好唔同:
    • 法國派同英國皇家舞蹈學院嗰套嘅第三手位(又有叫「bras croisé」;法文讀音:[bʁa kʁwaze])涉及個舞蹈員左右手當中是但一隻做第一手位,另外嗰隻就做做第二手位。
    • 喺切劇蒂派當中,第三手位指個舞蹈員是但一隻手做佢哋嗰套第一手位,而另一隻就做半第二手位(睇下面)。
    • 喺俄羅斯派當中,第三手位等同其他主要門派當中嘅第五手位(睇下面)。
  • 第四手位(fourth position)分兩種:
    • 第四手位打開(fourth position ouvert)指其中一隻手高舉,而另外嗰隻就做第二手位-兩隻手處於好開放嘅位置。
    • 第四手位相交(fourth position croisé),喺切劇蒂派當中有叫西班牙式第四手位(Spanish fourth),指其中一隻手高舉,而另外嗰隻做第一手位。
    • 俄羅斯派當中並冇第四手位。
  • 第五手位(fifth position)喺法國派同英國皇家舞蹈學院嗰套當中如下:個舞蹈員要將雙手高舉,兩隻手掌要指向對方但唔一定要掂到;兩隻手掌位置要稍為向前令到個芭蕾舞蹈員能夠眼尾望到自己手掌,而且手掌要稍為向內,用其他手指遮住手指公;個舞蹈員對手臂關節拗彎嘅角度要大啲,令到雙手手臂好似形成一個圓形或者橢圓形噉。俄羅斯派嗌呢個手位做第三手位,而且冇指定乜嘢係第五手位。
  • 除咗噉,
    • 半手(demi-bras)指一隻手處於第一同第二手位之間,向外延伸。
    • 半第二手位(demi-seconde)似第二手位,不過雙臂要低啲,手掌通常向下。
Rond de bras

手臂圈(rond de bras;法文讀音:[ʁɔ̃ d(ə) bʁa])係指「手臂形成嘅圓圈」,指當一個舞蹈員做各種手位嗰陣雙手手臂所形成嘅圓圈,喺做第五手位嗰時零舍容易見到[14]

初階技法[編輯]

一班芭蕾舞學生喺度做向側面嘅腰屈曲。
Cambré

腰屈曲(cambré;法文讀音:[kɑ̃bʁe])係指個舞蹈員條腰屈曲,令上半身向前、向後、或者向側面傾斜。通常喺做腰屈曲嗰陣,上半身都要維持垂直,個頭要同胸腹指向同一個方向[15]

Demi-pointe

半腳尖企(demi-pointe;法文讀音:[dəmi pwɛ̃t])係指個芭蕾舞蹈員腳踭離地,提起自己成個身體,並且淨係腳板前半橛掂地。半腳尖企喺做好多舞步嗰陣都會用到,能夠令個舞蹈員做某啲舞步嗰時望落更加輕盈[16]。睇埋腳尖企(pointe)。

Relevé

上升(relevé,或者「élevé」;法文讀音:[ʁəlve])係一種初階舞步,指個舞蹈員兩隻腳一齊由企定定嘅腳位進入半腳尖企狀態,跟手再落返嚟,而慢慢上升(relevé lent)就係指做得慢嘅上升。上升(尤其係慢慢上升)係初階芭蕾舞堂當中成日會做嘅一種運動,因為佢簡單得嚟又能夠有效噉訓練學生嘅細髀肌肉[17]

除非個舞蹈員著住某啲特製嘅鞋(睇埋「pointe shoes」),上升一般都唔會做到完全腳尖企(睇「pointe」)。

Sous-sous

落落(sous-sous,又有叫「sus-sous」;法文讀音:[su su])係上升(睇「relevé」)嘅一個變種,指個舞蹈員以第五腳位做起始嚟做上升,喺成個過程當中雙腳腳板都要掂住,腳踭交叉,造成由前面睇好似一隻腳板有兩隻腳踭噉嘅視覺效果[18]

Détourné

轉向旋轉(détourné;法文讀音:[detuʁne])係一種基本舞步,涉及個舞蹈員由第三或者第五腳位起始,用上升(睇「relevé」)進入兩隻腳都半腳尖企(睇「demi-pointe」)或者腳尖企(睇「pointe」)嘅狀態,跟住再慢慢噉旋轉一個圈,途中靜靜雞兩隻腳前後互換(例如如果開始嗰陣右腳喺前、左腳喺後,做完轉向旋轉之後要變成左腳喺前、右腳喺後),最後再落返地成企定定嘅腳位。轉向旋轉係一種芭蕾舞堂當中好常做嘅運動,因為呢個動作相當講求平衡力,而且轉向旋轉喺舞台上都會用到[19]

  • 半轉向旋轉(demi-détourné;法文讀音:[dəmi detuʁne])係指做轉向旋轉嗰時淨係轉半個圈,即係話喺做完之後,個舞蹈員要變成面向相反方向。半轉向旋轉喺舞台上比較少見,比較常見嘅用途係喺芭蕾舞堂當中:芭蕾舞堂當中有一半以上嘅時間都涉及啲學生喺練功扶手(barre)側邊練習,如果一個學生右手掂住練功扶手,佢通常會用左髀做抬起髀練髀同腳嘅舞步,但喺呢個情況下,佢要用右髀練舞步就會難,所以一種常見做法係,個老師要班學生練到噉上下做一個半轉向旋轉,變成用另一隻手掂練功扶手,等佢哋開始用本嚟冇乜點郁嗰條髀做抬起髀練習[20]
Tendu

髀伸展(tendu;法文讀音:[tɑ̃dy])係芭蕾舞堂上成日會做嘅一種簡單舞步,用嚟教初階學生熟習啲腳位同埋學做腳尖企(睇「pointe」同「demi-pointe」)。做髀伸展嗰陣,個舞蹈員會首先以其中一個腳位企定定,一隻手掹住條練功扶手(barre),然後其中一條髀要伸展跣出去,遠離另外嗰條髀,伸展嗰條髀喺去到最遠嗰點嘅時候要淨係腳尖掂地,所以同時冇伸展嗰條髀就要負責支撐住成個身體嘅重量。喺芭蕾舞堂上,當一個學生做咗髀伸展之後,佢老師通常跟手會快速噉俾指令佢要佢做出唔同嘅腳位、擊打(睇「battement」)、或者用髀畫圈(睇「rond de jambe」)等涉及條髀同腳嘅舞步-快速噉做髀伸展運動幫到學生手熟習髀同腳方面嘅舞步[21]

Cuisse

用大髀(cuisse;法文讀音:[kɥis],法文入面「大髀」噉解)係老師可能會喺芭蕾舞堂上俾嘅一個指令,意思係提醒個學生用大髀嘅肌肉。例如係喺做髀伸展(睇「tendu」)嗰陣,可能個學生會太過依賴髖關節同細髀嘅力,對大髀肌肉嘅運用唔夠(令到條髀伸得唔夠直),喺呢個時候,老師就可能會用「cuisse」呢個字,提醒學生大髀肌肉要用力[22]

一個學生掹住條練功扶手喺度做向側嘅髀伸展(tendu à la seconde)。
Dégagé

解離(dégagé;法文讀音:[deɡaʒe])係一個簡單嘅動作,指個舞蹈員由某一個腳位將其中一隻腳移去(向前、向後、或者向側)髀伸展(睇「tendu」)嘅狀態,跟住再喺兩髀伸到直一直嘅情況下,將伸出去嗰隻腳抬起離地(同地面「解離」)30 至 45 度角,維持喺嗰個狀態唔郁一陣,再落返地。喺芭蕾舞堂上,老師好多會要學生維持抬起狀態維持幾秒,目的係要鍛鍊學生嘅髀肌肉同平衡力[23]

Retiré

抽起(retiré,法國派興叫「raccourci」;法文讀音:[ʁətiʁe])係髀嘅一種位置。喺做抽起嗰陣,個舞蹈員其中一條髀(支撐髀)要企定定喺地下做支撐,而另外嗰隻髀(抬起髀)就要外開(睇「turnout」),兼且喺腳板一路掂住支撐髀嘅細髀嘅情況下,慢慢噉抬起,抬起髀嘅大髀同細髀之間嘅角度要慢慢變細,直至條抬起髀嘅腳板掂到條支撐髀嘅膝頭為止。抽起可以細分做向前(retiré devant;抬起髀腳板喺支撐髀前)同向後(retiré derriére;抬起髀腳板喺支撐髀後)兩種[24]

抽起係一個好緊要嘅基本舞步,因為佢係多個進階舞步-例如係腳尖旋轉(睇「pirouette」)-嘅重要組成部份。

向前(左)同向後(右)做嘅抽起
Frappé

彈腳(frappé;法文讀音:[fʁape])係一個通常喺芭蕾舞堂當中,扶住條練功扶手嗰陣先會做嘅舞步,步驟如下:個舞蹈員開始嗰時其中一隻腳要繃緊外開(睇「turnout」),並且係噉咦離地,腳踭要去到支撐髀隻腳板嘅腳踭上面嘅位置,跟住抬起咗嗰隻腳要一嘢向外伸,條髀要一嘢伸直,令到抬起髀嘅腳板擦過地板一吓(喺俄羅斯派當中,彈腳隻腳會一嘢伸直,但唔會掂到地板)。彈腳嘅用途在於提升髀同腳嘅速度同準確性,好多時用嚟作為喺練功扶手側面做嘅熱身運動嘅終結[25]

向前同向後做嘅彈腳
Cou-de-pied

(cou-de-pied;法文讀音:[ku də pje])係腳位置嘅一種,指個舞蹈員其中一條髀做好似抽起(詳情睇「retiré」)噉嘅動作,用冇抬起嗰條髀支撐身體,但抬起髀淨係抽起少少,形成抬起髀嘅腳尖處於支撐髀嘅細髀同腳踭之間嘅位置嗰度。喺多數芭蕾舞流派當中,跗可以分做向前(cou-de-pied devant;抽起髀腳尖喺前)同向後(cou-de-pied derriére;抽起髀腳尖喺後)兩種,而俄羅斯嘅華加諾娃派當中仲有所謂嘅包裹跗(wrapped cou-de-pied,或者「sur le cou-de-pied」),指個舞蹈員將抬起髀嘅腳踭放喺支撐髀嘅前方,但抬起髀嘅腳板就要「包裹」住支撐髀嘅細髀下橛,令到抬起髀嘅腳尖掂到支撐髀嘅腳踭後方[26]

Pas de cheval

馬步(pas de cheval;法文讀音:[pɑ də ʃ(ə)val])步驟如下:個舞蹈員要以第五腳位做起始,跟住將其中一隻腳抬起,變成跗(cou-de-pied)狀態,然後嗰隻腳要用髀伸展(tendu)噉嘅方式伸向前、向側、或者向後伸出去,可以以解離(dégagé)嘅方式作結。呢個舞步主要係喺練習嗰陣先會做嘅,用嚟訓練學生雙腳嘅速度[27]

馬步之所以會有個噉嘅名,據講係因為啲人覺得個舞步望落有少少似將髀收埋再一嘢踢出去嘅樣[27]

Coupé

切入(coupé;法文讀音:[kupe])係一個動作,用嚟連接唔同嘅舞步,好多時係用嚟做某啲大舞步嘅準備動作。好多芭蕾舞舞步都涉及個舞蹈員一隻腳喺前另外嗰隻喺後,而做切入嗰陣,佢要用某啲方法(例如係稍為跳起)令兩隻腳位置互換。舉個例說明:想像家吓有個舞蹈員處於跗(睇「cou-de-pied」)左腳抬起咗喺前、右腳喺後支撐嘅狀態,佢想用切入令兩隻腳位置互換;首先,佢喺後面嘅右腳要進入半腳尖企,同時左腳落返地成半腳尖企,跟住左腳要變成完全掂地,同時右腳離地成喺左腳後嘅跗狀態-最後變成一個同之前兩腳位置相反嘅跗狀態[28]

Plié
髀屈曲嘅示範;個舞蹈員雙髀係噉咦屈曲(半屈曲),再返去企定定嘅第一腳位。

髀屈曲(plié;法文讀音:[plije],法文入面「彎咗」噉解)係指隻髀喺個膝頭嗰度向外彎曲、同時上半身維持垂直、而且身體冇橫向郁動嘅舞姿。大致上可以分做兩種[1][29]

半髀屈曲(demi-plié)係指個舞蹈員係噉咦屈曲膝頭。喺開始做半髀屈曲嗰陣,對腳板可以係處於是但一個腳位(睇「五大腳位」)都得,手臂嘅位置唔定,跟住個舞蹈員嘅膝頭會慢慢噉屈曲,大髀同細髀之間嘅角度開始變細,但係角度唔可以太細,個角度要足以俾對腳踭全程都掂實塊地板,下降嘅速度要大致上均一,做到平衡嘅美感,而且個上半身喺落嘅過程當中要一路維持住垂直嘅(要抵抗個上半身向前傾嘅衝動),落到最底之後,再慢慢噉上返去雙髀大髀掂住、企定定嘅腳位。

宏髀屈曲(grand plié)係指個舞蹈員做髀屈曲,而且膝頭屈曲嘅程度好大,大到喺最低點嗰陣,同一條髀嘅大髀同細髀差唔多係掂住嘅。喺開始做宏髀屈曲嗰陣,對腳板可以係處於是但一個腳位都得,手臂嘅位置唔定,而跟手個舞蹈員嘅膝頭會慢慢噉屈曲,大髀同細髀之間嘅角度開始變細,最後膝頭位屈曲嘅角度勁到對腳踭焗住要離地,兩隻大髀差唔多變成打橫,下降嘅速度要大致上均一嚟做到平衡嘅美感,而同半髀屈曲一樣,個上半身喺落嘅過程當中要一路維持垂直,落到最底之後,再慢慢噉上返去雙髀大髀互相掂住、企定定嘅腳位。宏髀屈曲可以對膝頭造成相當大嘅壓力。

髀屈曲係一種又基本又重要嘅舞步:通常啲人學芭蕾舞喺初班嗰陣老師經已喺度要佢哋做髀屈曲;事實係,髀屈曲係好多中階同進階舞步嘅必要組成部份,例如一個舞蹈員跳起或者跳起咗跟住落地嗰時,都要用到半髀屈曲,而且半髀屈曲可以保護一個舞蹈員,令佢做一啲激啲嘅跳躍嗰陣冇噉易整親,例如當個舞蹈員做完一個大嘅跳躍落地嗰時,佢落地之後嗰一刻要做一吓半髀屈曲,令到雙髀可以好似彈弓噉吸收落地嗰吓嘅衝擊力。

Échappé

脫逃(échappés;法文讀音:[eʃape])指個舞蹈員由一個一個封閉腳位(第一或者第五)變成一個開放腳位(第二或者第四),通常係第一變第二或者第五變第四,可以分做兩種[30]

  • 脫逃半腳尖企(échappé demi-pointes,又有叫「échappé sur le pointes」)係標準嗰種脫逃,涉及以下步驟:個舞蹈員要以封閉腳位企好,跟住佢要雙腳都向外彈,成一個兩腳都半腳尖企(睇「demi-pointe」)嘅開放腳位,再落返地,由頭到尾隻腳腳板都唔會完全離地(兩隻腳板由一個封閉腳位「脫逃」)。呢個舞步喺女舞蹈員嘅獨舞(睇「variation」)當中好常見。
  • 脫逃跳躍(échappé sauté)涉及個舞蹈員起始嗰時要做一個半髀屈曲(睇「demi-plié」)先,再一跳,落地嗰時做一個半髀屈曲嘅開放腳位。
Temps lié

重心轉移(temps lié;法文讀音:[tɑ̃ lje])係一個簡單舞步,指個舞蹈員首先以其中一個腳位企喺度,然後做一個半髀屈曲(demi-plié),雙髀屈曲咗之後用一個髀伸展(tendu)嘅方式將是但一條髀伸出(向前、向側、或者向右),跟住伸咗出向嗰條髀(帶頭髀)要落地企定,再喺雙髀都做髀屈曲嘅狀態下將重心移去帶頭髀嗰度,變成以帶頭髀做支撐嘅髀伸展狀態,最後將而家成為咗伸出髀嗰條髀收返埋,個人成一個企定定嘅腳位。重心轉移可以幫舞蹈員喺舞台上做短距離嘅移動[2]

Glissade

滑行(glissade;法文讀音:[ɡlisad])係一個小型嘅跳躍性舞步,步驟如下:個舞蹈員首先要用第五腳位企定定,再做一個半髀屈曲(睇「demi-plié」),其中一隻腳跟住要用解離(睇「dégagé」)嘅方式移向前(à la seconde)、向側(devant)、或者向後(derrière)成抬起髀,條抬起髀抬起大約 20 度,跟住條支撐髀一嘢伸直,令到成個人起跳,喺半空中嗰一剎那,個舞蹈員要兩條髀伸直,腳尖指住地下;最後條抬起髀嘅腳板要著地並且係噉咦屈曲,而條支撐髀跟住再落地,最後兩腳關埋,成第五腳位。如果個滑行係向側做嘅話,通常最後嗰個第五腳位係支撐髀腳板喺前嘅[31]

  • 準備性滑行(glissade précipitée;法文讀音:[ɡlisad pʁesipite])係指用嚟為下一個舞步做準備嘅滑行。
Battement

擊打(battements;法文讀音:[batmɑ̃])涉及個舞蹈員其中一條髀(向前、向後、或者向側)抬起若干角度,抬起嘅角度由 30 度嘅細角以至 90 度都得,而抬起髀要遠離仲掂住地嗰條支撐髀,跟手抬起髀要再落返地,直至掂返到支撐髀。呢個過程速度唔定,可以重複若干次,而喺成個過程當中,個舞蹈員嘅上半身都要維持垂直。呢個動作之所以叫做「擊打」,係因為喺快速噉做呢個動作嘅時候,抬起髀落地嗰陣會「擊打」支撐髀[32]

擊打係初階芭蕾舞堂上成日會做嘅一種運動,噉係因為呢個動作能夠提升個學生嘅柔軟度,而且擊打仲係好多進階舞步嘅重要組成部份(例如係宏髀跳;睇「grand jeté」),所以練習擊打仲幫到個學生準備做嗰啲進階舞步。

  • 細擊打(petit battements)係指抬起角度細嘅擊打。
  • 宏擊打(grand battements)係指抬起角度大嘅擊打。
  • 伸展擊打(battements tendu)係指做擊打嗰陣做到去髀伸展(睇「tendu」)嘅狀態再停低,跟住返去企定定嘅腳位。
  • 滑行擊打(battements glissé)係指做擊打嗰陣去到髀伸展嘅位之後,隻腳板要係噉咦離地(大約離地 2 至 3 厘米),跟住先落返地同返去企定定嘅腳位。
  • 單髀屈曲擊打(battements fondu)係另一種特殊嘅擊打,涉及個舞蹈員用一路用支撐髀做一個半髀屈曲(睇「demi-plié」)、另一條髀一路屈曲(向前、向後、或者向側)抬起,而支撐髀屈曲到極點嘅同時抬起髀要伸到最直兼去到最高點。可以睇埋「fondu」。
  • 延伸發展擊打(battements développé)係指一種特殊嘅擊打,涉及個舞蹈員以第五腳位做起始,再將要抬嗰條髀以抽起(睇「retiré」)嘅形式,再向前、向後、或者向側面打開成擊打最高點噉嘅姿勢,最後抬起咗嗰條髀要慢慢落返嚟,最後成一個企定定嘅第五腳位。可以睇埋「développé」。
  • 切擊打(battements frappé)係指做擊打嗰陣,條抬起髀起始嘅時候要處於外開咗(睇「turnout」)、而且繃緊嘅狀態,嗰條髀嘅腳踭要係噉咦離地,腳踭掂到支撐髀嘅腳踭對上嘅地方,跟住條抬起髀先至一路遠離支撐髀一路慢慢噉伸直。
Rond de jambe

用髀畫圈(rond de jambe;法文讀音:[ʁɔ̃ d(ə) ʒɑ̃b])係一種喺芭蕾舞堂同埋表演嗰陣都成日會用到嘅基礎舞步,步驟如下:個舞蹈員企定定(通常係第一或者第三腳位),跟住佢要用其中一條髀企喺度,另一條髀向前(或者向後)伸展而且淨係腳板尖掂地(或者係噉咦離地;睇「tendu」),伸展嗰條髀跟手要移向身體側面,再移向身體後面(前面),最後返到去企定定嘅腳位。成個過程就好似係用隻腳尖喺身體其中一邊嘅地板畫半個圖圈噉樣。用髀畫圈可以分做幾種[33]

  • 喺地下用髀畫圈(rond de jambe à terre/par terre):全程抬起咗嗰條髀嘅腳尖都掂住地板嘅用髀畫圈。
  • 半空用髀畫圈(rond de jambe en l'air):全程抬起咗嗰條髀都要喺身體側邊(à la seconde),郁嘅淨係膝頭以下嘅地方。如果條大髀同身體成嘅角度細過 90 度嘅話,抬起咗嗰條髀啲腳趾應該會喺企喺度嗰條髀嘅細髀對開嘅空中畫一個圖圈,而如果條大髀同身體成 90 度角,噉抬起咗嗰條髀啲腳趾應該會喺另一條髀嘅膝頭高度嘅半空畫圈。
  • 大半空用髀畫圈(grand rond de jambe en l'air):指做半空用髀畫圈嗰時全程條抬起咗嘅髀都要喺大擊打(睇「battement」)嘅高度。
  • 用髀畫圈鶴立(rond de jambe attitude):指做用髀畫圈嗰陣時抬起咗嗰條髀一開始嗰陣要喺身體前面,再向側移,再向後移,跟手支撐住身體嗰條髀要腳尖企或者半腳尖企(睇「pointe」),成個人形成鶴立式舞姿(睇「attitude」)。
喺地下用髀畫圈嘅示範圖
Sickling

鐮刀腳(sickling,又有叫「sickled foot」)係學生常犯嘅一種錯誤,指個學生其中一隻腳嘅角度唔靚,搞到由前面睇隻腳望落好似向內拗咗噉樣。例如係喺做髀伸展(睇「tendu」)嗰陣,伸咗出去嗰條髀正路應該係成條髀同隻腳板成一條(有美感嘅)直線、而且淨係腳尖掂地嘅,但好多時一個學生可能因為條髀未夠力,所以唔覺意係噉咦屈曲咗隻腳板,無意中想用隻腳板嘅力支撐住身體-形成隻腳板好似把鐮刀噉,向內拗咗。喺古典芭蕾舞上,鐮刀腳一般都俾人視為一種失誤,因為多數欣賞芭蕾舞嘅人都覺得鐮刀腳會破壞「條髀同隻腳板成一直線」嘅美感,而且如果一個舞蹈員喺跳起落地嗰陣鐮刀腳,佢好大機會會扭親[34]

雖然話鐮刀腳喺多數情況下都俾人視為一種失誤,但都有啲編舞師會特登要啲舞蹈員做鐮刀腳嚟達到某啲藝術效果[35]

Petit saut

細跳躍(petit saut;法文讀音:[p(ə)ti so])係指一個細嘅跳躍,涉及個舞蹈員由是但一個腳位起跳,跳嗰時冇橫向移動或者跳一段短嘅距離,期間唔會改變腳位。呢種舞步喺俄羅斯派當中俾人嗌做「temps levé sauté」[1]

Soubresaut

突然躍起(soubresaut;法文讀音:[subʁəso])係一種基礎嘅跳躍,涉及個舞蹈員由是但一個腳位向前起跳一段短嘅距離,喺空中對髀完全伸直並且改變雙腳腳板嘅位置,令到落地嗰陣變成第五腳位,手臂嘅位置唔定。突然躍起通常俾人用嚟做一啲高階舞步嘅準備動作,喺男舞蹈員做獨舞嗰時零舍常用[1]

Changement

交換(changement,全名「changement de pieds」;法文讀音:[ʃɑ̃ʒmɑ̃])係指一個舞蹈員由一個半髀屈曲嘅第五腳位跳起,喺空中一路伸直雙髀同腳板,一路快速噉改變腳位,令到最後落地嗰陣變成前後相反咗嘅第五腳位(即係例如起跳之前係左腳前右腳後嘅,做咗交換落地嗰時就要變成左腳後右腳前,反之亦然)。交換呢個舞步通常都係一連串噉做嘅,可以係一連跳幾吓而每吓都交換一次,又可以係跳一吓但途中雙腳前後互換幾次都得[1]

華加諾娃派當中仲有「petit changement de pieds」,指做交換嗰時雙腳腳尖要近乎掂到地板[1]

延伸發展嘅圖解
經過舞步嘅圖解
Développé

延伸發展(développé;法文讀音:[devlɔpe])涉及個舞蹈員用抽起(睇「retiré」)將佢其中一條髀抬起,而喺條抬起髀去到最高點(掂到支撐髀嘅膝頭)之後,抬起髀要向前、向側、或者向後外開。全程條支撐髀都要伸到直一直,而且條抬起髀嘅移動速度要均一,然後條抬起髀要落返地成髀伸展(睇「tendu」)噉嘅狀態,通常最後條抬起髀會返埋去條支撐髀度,成一個企定定嘅腳位。延伸發展喺古典芭蕾舞以至多種芭蕾舞以外嘅舞蹈當中好常見嘅一個舞步,而且算係初階舞步,但係就易學難精,就連好多進階嘅學生同專業嘅芭蕾舞蹈員都俾老師話佢嘅延伸發展做得唔夠靚[36]

Enveloppé

內合舞步(enveloppé;法文讀音:[envlɔpe])係延伸發展(睇「développé」)嘅相反:喺做內合舞步嗰陣,個舞蹈員要首先將抬起髀向前做髀伸展(睇「tendu」),跟住等到條抬起髀伸到最盡之後,條髀要抬起離地,條抬起髀去到最大高度之後,就要收返埋,變成抽起(睇「retiré」)或者跗(睇「cou-de-pied」)狀態-內合舞步基本上就係將延伸發展掉返轉嚟做[37]

Passé

經過(passé;法文讀音:[pɑse])係一種簡單(但係好有用)嘅初階舞步,涉及個舞蹈員抬起一隻本嚟喺另一隻腳板後面嘅腳板,令佢變成喺前面(或者相反),通常做法係要抬起嗰條髀(抬起髀)會先做一個抽起(睇「retiré」),然後當抬起咗嗰隻腳板嘅腳尖掂到企喺度嗰條髀嘅膝頭嗰陣,個舞蹈員要乘勢將嗰隻腳板移向另外嗰條髀個膝頭嘅前面或者後面,最後再落返地板[38]

經過舞步可以用嚟喺做完腳尖旋轉(睇「pirouette」)等嘅大舞步之後改變重心腳,等個舞蹈員可以乘勢做下一個舞步。

Classical walk

古典式行走(classical walk)係指古典芭蕾舞當中舞蹈員行起路上嚟嘅一種姿態。用古典式行走行路步驟如下:首先,個舞蹈員要企定定,跟手要踏出去嗰隻腳要進入好似腳尖企噉嘅狀態,再跣出去移動若干距離,嗰隻腳去到最遠處嗰陣,成條髀會好似成髀伸展(睇「tendu」)噉嘅樣、而且淨係腳趾尖掂地,然後踏咗出去嗰隻腳要落地,腳掌前半橛掂地先,最後至腳踭掂地;腳踭掂咗地之後,個舞蹈員會將自己身體向前移,令重心移去家陣喺前嗰隻腳掌度,而跟住後面隻腳要以一個小型嘅延伸發展(詳情可以睇「développé」)向前踏,最後嗰隻腳又要成好似向前髀伸展噉嘅狀態,再落地,呢個過程可以重複若干次,令個舞蹈員喺台上移動一段距離[39]

喺古典芭蕾舞當中,幾乎台上所有嘅舞蹈員都會使用古典式行走,用意在於展示舞蹈員嘅高貴氣質[39]

Fondu

單髀屈曲(fondu;法文讀音:[fɔ̃dy])係法文「溶化」嘅意思。喺芭蕾舞用詞上,呢個字通常俾人加喺某個舞步嘅名後面,指做嗰個舞步嗰陣條支撐髀要係噉咦屈曲-即係好似單髀嘅髀屈曲(睇「plié」)。例如係單髀屈曲擊打(睇「battement fondu」)或者單髀屈曲獨腳站立(睇「arabesque」)噉,就用咗單髀屈曲。值得一提嘅係,單髀屈曲擊打係單髀屈曲最常見嘅應用,所以有陣時啲人會用「單髀屈曲」(fondu)作為單髀屈曲擊打(全名「battement fondu」)嘅簡稱[40]

單髀屈曲個法文名「溶化」嘅典故據講係源自法國菜嘅:法國菜入面有涉及溶芝士嘅餸(睇埋芝士火鍋),當法國人將一塊麵包由煮得靚嘅溶芝士當中拎返出嚟嗰陣,啲溶芝士會慢慢噉由塊麵包嗰度跣返落嚟,而唔係一嘢躂返落嚟-而喺古典芭蕾舞傳統上,呢種慢慢下降(而唔係一嘢跌落嚟)嘅感覺就係做單髀屈曲嗰陣應有嘅美感[40]

Placement

擺位(placement)形容一個芭蕾舞蹈員嘅身體各部位喺做一個舞步嗰陣擺得好唔好(夠唔夠準、平衡得好唔好呀噉),例如一個芭蕾舞老師喺觀察一個學生練舞嗰陣,可能會同佢講,指出佢個頭嘅擺位唔正確(有啲舞步會要求個舞蹈員望向某個特定方向),又或者話佢手腳擺位唔好(唔夠平衡)等等,就會用到「placement」呢個字[41]

Pulling up

拉高(pulling up,pull up)係古典芭蕾舞當中舞蹈員應有嘅一種感覺:喺跳芭蕾舞嗰陣,一個舞蹈員應該要有一種同時掂地又「俾一股力拉高咗」嘅感覺-佢要將佢嘅胸腔胸骨提高,同時要將膊頭放鬆同以髖關節做中心(要用到腹肌),背脊要保持垂直,但要小心個人唔好因為個胸腔提高而墜向後。一般認為,拉高令個舞蹈員望落更加有氣質[2]

中階技法[編輯]

Compound step

複合舞步(compound step)係指一個由某啲初階舞步組成嘅舞步。例如聚合舞步(睇「assemblé」)當中就包含咗個舞蹈員喺起跳之前做一個髀屈曲(睇「plié」),所以髀屈曲係聚合舞步嘅其中一個組成部份,而聚合舞步就屬於其中一種複合舞步。中階同進階嘅芭蕾舞舞步多數都係複合舞步[42]

Positions of the body
身體位置第二式

身體位置(positions of the body)係芭蕾舞上常用嘅一啲全身性嘅姿勢,好多時用嚟做大舞步嘅準備動作。芭蕾舞身體位置主要嘅有六大:

  • 交叉位(croisé;法文讀音:[kʁwɑze],法文入面「打咗交叉」噉解)指個舞蹈員面向舞台嘅一個角落頭,由心口向前指出去嗰條線要同觀眾嘅眼光成 45 度角左右,等觀眾同時睇到佢嘅兩個膊頭同髖關節,手位通常係 RAD 第三或者第四手位,而佢其中一條髀用髀伸展(睇「tendu」)嘅方式向前或者向後伸,令到由觀眾嘅角度睇嘅話,佢嗰兩條髀好似打咗交叉噉。喺 RAD 派同切劇蒂派當中,交叉位可以分做向前(croisé devant)同向後(croisé derrière)兩種,向前交叉位涉及近觀眾嗰條髀做向前髀伸展,而向後交叉位涉及遠離觀眾嗰條髀做向後髀伸展[43]
  • 陰影(effacé;法文讀音:[ɪˈfeɪs])可以話係交叉位嘅相反,步驟上同交叉位嘅唯一分別係雙髀由觀眾嘅角度睇要處於開放狀態-即係近觀眾嗰條髀向後伸展(effacé derrière)或者遠離觀眾嗰條髀要向前伸展(effacé devant)[44]。法國派興嗌呢個位置做打開向前(ouvert;法文讀音:[uvɛʁ(t)][45]
  • 第二式(à la seconde;法文讀音:[a la səɡɔ̃d])同黐喺第啲舞步嘅名嗰度嘅側伸式(睇「à la seconde」)唔同。身體位置第二式(有陣時會嗌做「à la seconde en face」)涉及個舞蹈員面向觀眾(en face)、對手成第二位置,而兩條髀其中一條要做個向外嘅髀伸展(tendu à la seconde),令到個舞蹈員可以準備用彈跳等嘅方法向側移動同埋做下一個舞步[46]
  • 第四式(à la quatrième;法文讀音:[a la katʁijɛm],法文入面「去到第四」噉解)係指個舞蹈員身體面向觀眾(en face)、對手成第二位置(睇「positions of the arms」)、其中一條髀要喺另一條髀前面(quatrième devant)或者後(quatrième derrière)形成成第四腳位[47]
  • 分離式(écarté;法文讀音:[ekaʁte])指個舞蹈員身體打斜,由心口向前指出去嗰條線要同觀眾嘅眼光成 45 度角左右,近觀眾嗰條髀要向外伸成第二腳位,同一邊隻手臂要好似 RAD 第五手位噉高舉;支撐髀就要企定定,同支撐髀同一邊嗰隻手臂要成低嘅第二手位;個頭要係噉咦向上傾而且轉咗向高舉嗰隻手臂嗰邊,對眼要望到高舉咗嗰隻手掌。某啲門派,例如係法國派,會將分離式身體位置分做向前分離式(écarté devant)同向後分離式(écarté derrière)兩種,向前分離式如前述,而向後分離式同向前分離式分別在於,向後分離式嘅近觀眾嗰條髀伸展嗰陣要向前伸(伸向身體面向嗰個方向)[48]
  • 膊頭式(épaulé;法文讀音:[epole])指個舞蹈員面向舞台角落頭,遠離觀眾嗰條髀要向後伸展,令兩腳成完全掂地嘅第四腳位,近觀眾嗰隻手臂就要向前伸直,而遠離觀眾嗰隻手臂就向後伸直,通常個頭會面向觀眾。喺呢個動作入面,個舞蹈員總體成個人最樣眼嗰部份係近觀眾嗰隻手臂嘅膊頭-所以就叫「膊頭式」[46]
Épaulment

擰膊頭(épaulment;法文讀音:[epolmɑ̃])指個舞蹈員係噉咦擰轉條腰,令到一邊膊頭移去腰嘅前面,而另一邊膊頭就移去腰嘅後面,通常個頭會係噉咦擰向前面嗰邊膊頭指向嘅地方。喺做擰膊頭嗰陣,個舞蹈員要做到好似成個上半身慢慢噉旋轉嘅美感,而唔係淨係膊頭擰轉咗方向。擰膊頭喺某啲身體位置(positions of the body)當中會用到[49]

Préparation

準備步(préparation;法文讀音:[pʁe.pa.ʁa.sjɔ̃])係指一個俾個舞蹈員用嚟為一個(通常高難度嘅)舞步做準備嘅舞步或者位置[50]

Retombe

退卻(retombe)係法國派同切劇蒂派當中會用嘅一個詞彙,指一個舞蹈員跳返去佢起始嗰個位置[51]

Soutenu

維持動作(soutenu,又有叫「soutenu en tournant」;法文讀音:[sutny])係一種旋轉動作,過程如下:首先個舞蹈員要用第五腳位企定定,跟住做一個半髀屈曲(睇「demi-plié」),再用髀伸展(睇「tendu」)將其中一條髀(帶頭髀)移向身體前面,再做個 90 度嘅用髀畫圈(睇「rond de jambe」),令到帶頭髀移去身體嘅側面,跟手支撐髀要一撐,身體以帶頭髀做軸心旋轉,並且向側邊移動,然後個舞蹈員仲可以重複噉做「髀伸展伸出」至「成個身體向側邊移動」嘅過程若干次,令到自己旋轉式噉移動若干距離,所以呢個動作喺舞台上好常用嚟幫啲舞蹈員優雅噉移動去特定嘅位置[52]

Balloné

波形舞步(balloné;法文讀音:[ba.lɔ.ne])係一個移動性嘅舞步,涉及個舞蹈員用第四腳位企喺度先,再將抬起髀向外伸、離地、再返落嚟成跗(睇「cou-de-pied」)狀態,然後可以將「向外伸」至「返落嚟成跗狀態」嘅過程一路做一路用支撐髀向前彈跳,重複若干次,嚟到喺舞台上移動若干距離[53]

Ballotté

上拋(ballotté)呢個舞步嘅基本過程如下:個舞蹈員以第五腳位做起始,再用半髀屈曲(睇「demi-plié」)嚟起跳,喺空中佢其中一條髀(抬起髀)向外伸展而且唔著地,另外嗰條髀(支撐髀)落地;跟住條支撐髀再一撐起跳,做一個切入(睇「coupé」)-抬起髀著地變成支撐髀,同時支撐髀向外伸成抬起髀,最後又成一個「一隻腳掂地,另一隻腳抬起」嘅狀態,而如果抬起髀喺身後面、而且抬起嘅角度夠高,呢個最後嘅狀態可以係一個獨腳站立(睇「arabesque」)[54]

Polonaise

波蘭舞步(polonaise;發音:[pɔlɔnɛz])個名嚟自同名嘅波蘭民族舞蹈,喺古典芭蕾舞步當中通常指一個簡單舞步。芭蕾舞嘅波蘭舞步指個舞蹈員由一個企定定嘅腳位開始,然後用髀伸展(tendu)嘅方式將一隻腳向前移動,跟住嗰隻腳著地成半腳尖企(demi-pointe)狀態,同時另外嗰隻腳進入半腳尖企狀態同向前踏,然後再以呢個方法行多一步(全程兩隻腳都要係喺半腳尖企狀態),然後再變返做兩腳完全掂地做一個腳位,下一刻起始嗰條髀要做髀屈曲(plié)而另一條髀要掃向前[55]

向側嘅聚合舞步示範;如果用慢鏡睇,會見到個舞蹈員落地前一刻兩隻腳聚合。
Assemblé

聚合(assemblé;法文讀音:[asɑ̃ble]),全名聚合舞步(pas assemblé),係男芭蕾舞蹈員成日做嘅一種跳躍,而且女舞蹈員間中都會做,指個舞蹈員用一隻腳跳起,再用兩隻腳落地。最普通嘅做法如下:一開始嗰陣,個舞蹈員兩隻腳都掂住地板,跟手其中一條髀做抬起髀,以某啲方式抬起離開另一條髀(睇埋「battement」),而嗰隻腳掌喺離地之前要掃過塊地板,跟住個舞蹈員會用仲掂住地板嗰條髀(支撐髀)一撐跳起,而第二隻腳掌要喺佢成個人落地之前掂到第一隻腳掌,成其中一個腳位(即係喺半空嗰度「聚合」),最後落地嗰陣,雙髀會處於屈曲嘅狀態(睇「plié」)[1][56]

聚合舞步有得分好多款:唔同款嘅聚合舞步喺跳嘅方向同抬起嗰條髀離地嘅方式等各方面都唔同,但重點係要「兩隻腳掌喺半空嗰度聚合,再落地」[56];聚合嘅高度亦都唔定,個舞蹈員可能喺離地 50 厘米嗰陣兩隻腳掌聚合,又可以係喺臨掂到地板前一刻先聚合[56]

搖擺舞步示範 追趕踢示範 貓舞步示範 分髀跳示範
Balancé

搖擺舞步(balancé;法文讀音:[balɑ̃se])涉及個舞蹈員一路移位一路變換雙腳嘅平衡,通常會好似圓舞曲噉分三步。一般嚟講,個舞蹈員會以第五腳位做起始,跟住佢要做髀屈曲(睇「plié」)成跗狀態(睇「cou-de-pied」),跟住抬起咗嗰隻腳掃去前、側、或後(成 fondu 噉嘅狀態),跟手要彈一吓變成以帶頭腳支撐身體(成前後或者左右相反咗嘅 fondu),並且跟尾嗰隻腳要開始郁,並且移去支撐腳嘅腳踭後面,成一個跗狀態,再落地,雙腳半腳尖企,成落落(睇「sous-sous」)狀態,再落返地成一個企定定嘅腳位,跟住佢仲可以重複呢個過程若干次。喺成個過程當中,個舞蹈員一路移動其中一隻腳一路轉換重心腳,造成好輕快嘅美學效果[57]

Chassé

追趕踢(chassé;法文讀音:[ʃase])係一種中階嘅舞步。一個芭蕾舞蹈員做最基本嗰種追趕踢嘅過程如下:首先,佢其中一條髀要向前伸,嗰條髀嘅腳尖要差啲掂地或者係噉咦離地,並且將身體嘅重量放嗮喺冇伸前嗰條髀嗰度;跟住冇伸前嗰條髀要好快噉向前跳或者跣,同向前伸咗嗰條髀會合;跟手下一刻個舞蹈員要將身體重量移返落去後面嗰條髀度,並且向前伸嗰條髀要再向前郁。如是者,個舞蹈員可以一路係噉重複以上嘅過程若干次,造成好似一路「半跣半跳」過舞台、一路用後髀「追趕」前髀噉樣嘅效果。追趕踢雙髀同雙手嘅位置可變,重點係「後面嗰條髀追趕前面嗰條髀」[58]

  • 旋轉式追趕踢(chassé en tournant;法文讀音:[ʃase ɑ̃ tuʁnɑ̃])係追趕踢嘅一個中階變種,做法同追趕踢相似,分別係個舞蹈員喺空中嗰陣,要一路旋轉、兩條髀同兩隻腳板要一路合埋一齊,跟住前髀要伸前並且用後髀落地。同追趕踢一樣,一個舞蹈員做旋轉式追趕踢嗰時可以重複個過程若干次,並且靠噉嚟喺舞台上移動一段距離[59]
Pas de chat

貓舞步(pas de chat;法文讀音:[pɑ d(ə) ʃa],法文入面「嘅舞步」噉解)過程如下:個舞蹈員要以第三或者第五腳位做起始點,跟手做半髀屈曲(睇「demi-plié」)再一吓伸直後面條髀嚟起跳,而同一時間,前面條髀要做一個好快速嘅經過舞步(睇「passé」)令到對髀前後互換,跟手原先喺後面嗰條髀要做一個抽起(睇「retiré」),再用原先喺前面嗰條髀嘅腳板落地。喺成個過程當中,個舞蹈員向前、向側、或者向後跳都得[60]

貓舞步之所以有個噉嘅名,係因為喺呢個舞步誕生嗰陣有相傳話貓喺跳嗰陣會前雙腳離地先,再後雙腳離地,然後前雙腳落地先再後雙腳落地-而貓舞步好相似,涉及一隻腳離地先,跟手離地先嗰隻腳會落地先。但考究證實,冇人證實過貓真係興噉樣跳嘅-呢個只不過係一個都市傳說,但係芭蕾舞界到咗家吓都仲係鍾意用「貓舞步」嗌呢個舞步[60]

睇埋「grand pas de chat」。

Sissonne

分髀跳(sissonne;法文讀音:[sisɔn])係跳躍嘅一種,普通嘅分髀跳過程如下:個舞蹈員首先要兩隻腳掂地企喺度,腳位同手位就是但一個都得;跟住佢要用兩隻腳一𨅝跳起,喺空中嗰陣兩條髀要分開若干角度,個角度可以去到成 180 度(即係兩條髀成一字馬)噉大都得,角度到咗最大之後,跟手其中一隻腳要先過第隻腳著地或者兩腳同時著地(「sissone fermee」係由第五腳位起始,兩腳同時著地嘅分髀跳),最後落地嗰刻兩隻腳要成五大腳位當中其中一個,通常對髀會成半髀屈曲狀態(睇「demi-plié」)吸收落地嗰吓嘅衝力。分髀跳係一種中階舞步,係好多快板舞步(睇「allegro」)嘅組成部份,所以啲學生學芭蕾舞嘅時候老師多數會喺教一啲高階嘅快板之前要求個學生做好分髀跳先[61]

分髀跳同時亦都係最廣為人知嘅芭蕾舞舞步之一,啲芭蕾舞劇或者芭蕾舞班嘅宣傳海報好興展示處於分髀跳最高點嘅舞蹈員[61]

Failli

飛逝(failli;法文讀音:[faji])係一種連接性嘅舞步,用嚟連接兩個跳躍性嘅舞步:個舞蹈員做第一個跳躍性嘅舞步著地,跟住下一刻將其中一隻腳向前解離(dégagé),然後乘勢做下一個跳躍性嘅舞步,例如係用解離咗嗰條髀作為抬起髀,做一個聚合(assemblé)噉[62]

  • 另一方面,「飛逝」有陣時會俾人攞嚟做分髀跳飛逝(sissonne failli)嘅簡稱,分髀跳飛逝指嘅係個舞蹈員做一個兩腳唔同時著地嘅分髀跳(sissonne)之後,後著地嗰隻腳用要落地嗰吓嘅下墜力一嘢掃向前,然後做下一個舞步,而好多時「下一個舞步」係一個追趕踢(chassé)[62]
Pas de Basque

巴斯克舞步(pas de Basque;法文讀音:[pɑ d(ə) bask],法文入面「巴斯克人嘅舞步」噉解)係一種中階舞步,源自法國南部嘅巴斯克族人嘅民族舞蹈,典型嘅步驟如下:首先,個舞蹈員要以第五腳位企定定,右腳喺左腳前面,跟住左髀要做一個髀屈曲(睇「demi-plié」),左髀一路維持髀屈曲狀態、一路將右髀以用髀畫圈(睇「rond de jambe」)噉嘅方式向前、側、或者後伸,然後個舞蹈員要一瞬間將身體重心由左腳移去右腳嗰度,右腳一踏,變成用右腳企喺度,而左腳以用髀畫圈噉嘅方式喺半空,跟住左腳可以再以用髀畫圈方式向前、側、或者後踏,又或者收返埋去右腳嗰度成第五腳位;如果係再踏嘅話,「改變重心腳一踏」嘅過程可以重複若干次,重點係喺終止嗰吓兩隻腳要變成第五腳位[63]

Chaînés

連鎖旋轉(chaînés,又有叫「chaînés turns」;法文讀音:[ʃɛne])係旋轉舞步嘅一種,過程如下:首先,個舞蹈員要用第一腳位企喺度,手臂多數喺第一或者第五手位,跟手佢兩隻腳要進入腳尖企(睇「pointe」)或者半腳尖企嘅狀態,喺兩隻腳板之間距離不變嘅狀態之下,佢要用髖關節嘅力量旋轉,令到其中一隻腳郁,另外嗰隻腳做旋轉嘅軸心,成個人 180 度旋轉,而喺下一個旋轉當中,用髖關節嘅力令到另外嗰隻腳郁,啱啱郁咗嗰隻腳要改為做旋轉軸心,旋轉方向不變,而個芭蕾舞舞蹈員要重複呢個過程若干次(所以就叫「連鎖」),形成好輕盈噉一路旋轉一路「飄」過舞台噉嘅視覺效果[64]

呢個舞步有陣時會俾人稱之為「猛衝」(déboulé;法文讀音:[debule]),噉因為連鎖旋轉嘅法文全名係「les tours chaînés déboulés」(連鎖猛衝旋轉)。

Temps levé

時間上升(temps levé;法文讀音:[tɑ̃ l(ə)ve])大致上係指一個舞蹈員喺其中一條髀以某啲方式抬起咗嘅狀態下,用冇抬起嗰條髀輕力彈跳,一種常見嘅做法如下:個舞蹈員首先企好,然後以髀伸展(tendu)嘅方式將其中一條髀向前伸,跟住嗰條髀要落地,而喺後面嗰條髀乘勢變成抽起(retiré)嘅狀態,然後仲掂地嗰條髀要一撐,令到佢成個人係噉咦離地,最後落地,並且成一個企定定嘅腳位[2]

Brisé

分散舞步(brisé;法文讀音:[bʁize],法文入面「破碎」或者「分散」噉解)係聚合舞步(睇「assemblé」)嘅一個變種,涉及個舞蹈員由是但一個腳位-通常係第四或者第五-做起始,一路做個半髀屈曲(睇「demi-plié」)一路轉移成第一腳位,跟住就用由半髀屈曲伸直返對髀嗰吓力起跳,喺空中雙髀互相拍打(合埋再分開)並且前後轉換若干次,成個過程當中上半身要同下半身唔成垂直-腰要喺上下半身嘅左邊或者右邊,即係上下半身同條腰「分散」咗,最後再以一隻或者兩隻腳著地。破碎舞步跳嗰陣可以向前(en avant)或者向後(en arrière)移動都得[65]

  • 飛行分散舞步(brisé volé)係分散舞步嘅一個變種,指個舞蹈員做一個分散舞步,跟住再做一個腰喺相反方向嘅分散舞步,並且重複呢個過程若干次。飛行分散舞步係一個男舞蹈員常做嘅舞步[66]
分散舞步嘅示範圖解
Pas de valse

華爾滋舞步(pas de valse;法文讀音:[pɑ d(ə) vals])係一個中階舞步,成日俾女舞蹈員用嚟喺舞台上優雅噉移動,要做一個華爾滋舞步,個舞蹈員會用單髀屈曲(fondu)將其中一隻腳伸出,然後伸出去嗰隻腳會落地成半腳尖企或者腳尖企,同時另外嗰條髀會掃向前,而呢條髀嘅腳尖去到目的地嘅同時,另外嗰隻腳會完全掂地並且成單髀屈曲狀態,如是者重複若干次,令個舞蹈員可以向任何方向移動一段距離[67]

Piqué tour

刺步旋轉(piqué tour,又有叫「piqué turn」;法文讀音:[pike tuʁz])係女舞蹈員常用嘅舞步。喺做刺步旋轉嗰陣,個舞蹈員用刺步(詳情參考「piqué」)嘅方式將身體重心一嘢移去一隻腳尖企(pointe)或者半腳尖企(demi-pointe)嘅腳掌嗰度,跟手再用嗰條髀做軸心旋轉,另外嗰條髀劃過空中,最後仲可以乘勢停低變成獨腳站立(arabesque)嘅姿勢。刺步旋轉可以用向前或者向後嘅經過舞步(passé)做起始,即係話伸出去做軸心嗰條髀用經過舞步嘅方式伸去目的地[68]

Emboîté

盒型舞步(emboîté;法文讀音:[ɑ̃bwate]

  • 盒型旋轉(emboîté turns)係一種常用嚟喺舞台上移動嘅方法,步驟如下:個舞蹈員通常先以右髀以向前髀伸展(tendu devant)嘅方式向前伸,企好,跟住佢全身要旋轉,右髀以用髀畫圈(睇「rond de jambe」)嘅型式去到身體側邊嘅位置,然後身體一嘢彈起,重心移去右髀嗰度,變成用右髀做支撐,而本嚟做支撐嘅左髀要抬起,雙髀喺一剎那間成抽起(睇「retiré」)狀態,然後左髀落地,再喺雙腳半腳尖企掂地嘅情況下旋轉,轉到噉上下,右髀以抽起型式抬起再落地,重複由「雙腳半腳企之下旋轉,再其中一條髀以抽起抬起」嘅步驟若干次(通常係兩髀交替抬起),令個舞蹈員喺舞台上優雅噉移動若干距離。盒型旋轉唔使一定以右髀做起嘅,將上述講嘅嘢「左」同「右」掉轉都得[2]
Entrechat

交織舞步(entrechat;法文讀音:[ɑ̃tʁəʃa])係一種中階舞步,涉及個舞蹈員由某一個腳位(多數係第五)一嘢跳起,喺空中嗰度雙髀互相拍打(雙髀前後互換)若干次,再落返地成企定定嘅腳位。喺現實嘅應用當中,啲人用「交織舞步」呢個詞嗰時通常都會將佢掕住另外一個字,個字表示空中雙髀拍打嘅次數,例如「entrechat quatre」係指個舞蹈員喺空中雙髀拍打兩吓-「quatre」係法文「四」噉解,兩條髀都拍打咗兩吓,所以總共算四吓,而「entrechat six」(six 係法文「六」)同「entrechat huit」(huit 係法文「八」)等都係同一道理[69]

如果「交織舞步」掕住嗰個數字係單數,就表示要用一隻腳落地:例如「entrechat trois」(trois 即係「三」)就係指個舞蹈員用雙腳離開地面,喺空中雙髀都拍打一吓(3 減 1 再除 2 等如 1),跟住再用其中一隻腳著地(可以當「一隻腳著地」做「拍打咗一吓」)[69]

交織舞步四(entrechat quatre)嘅示範圖解

進階技法[編輯]

一男一女嘅舞蹈員喺度拍擋跳舞。
Aplomb

Aplomb法文讀音:[aplɔ̃]),漢文當中一般會譯做「自信」或者「穩重性」,大致係指一個芭蕾舞蹈員跳舞嗰陣時嘅功架。一個具有 aplomb 嘅芭蕾舞蹈員會有能力好穩陣噉樣做出垂直嘅姿勢同動作,而且具有完美嘅平衡力,令到觀賞佢跳舞嘅人完全唔會擔心佢做高難度舞步嗰陣會整親[70][71]

Ballon

Ballon,漢文當中一般會譯做「輕快優雅」,係形容芭蕾舞舞姿嘅一個詞語。一個跳舞嗰陣展示出 ballon 嘅芭蕾舞蹈員步法會好輕盈,望落好似完全唔使用力就跳得起、離地嗰時望落會好似飄緊,而落力嗰時感覺會好似冇重量嘅噉。涉及跳躍嘅快板(睇「allegro」)類舞步一般都俾人覺得係最能夠考驗一個芭蕾舞蹈員嘅 ballon 嘅舞步[72]

Batterie

擊打式舞步(batterie;法文讀音:[batʁi])泛指所有涉及個舞蹈員喺空中雙髀互相擊打嘅舞步,例子有打吓髀跳(睇「jeté battu」)同雀躍(睇「cabriolé」)[73]

Extension

伸展(extension)係指一個舞蹈員抬起一條髀同埋將條髀維持喺半空嘅能力。一個具有高伸展能力嘅舞蹈員喺抬起咗一條髀嘅情況下-例如係做緊獨腳站立(arabesque)或者鶴立式舞姿(attitude)等嘅舞步-能夠將支撐髀(掂住地嗰條髀)保持伸直、上半身擺位正確(例如做鶴立式舞姿嗰時上身應該係完全垂直嘅)、腳掌指向正確方向、而且喺幾秒之內完全保持到平衡。平衡力、柔軟度、同埋肌肉力量等都係伸展嘅必要成份[74]

Line

線條(line)包含咗個舞蹈員跳舞嗰陣成個身體形成嘅大致形狀:喺古典芭蕾舞上,一個舞蹈員身體嘅線條包含咗由佢頭頂到腳趾成嘅線,亦都包括咗身體其他重要嘅部份-例如係手臂、腰、膝頭、同腳踭等-彼此之間形成嘅線。一個具有優美線條嘅芭蕾舞蹈員會識得考慮嗮自己成個身體,例如喺佢做宏髀跳(睇「grand jeté」)呢一個主要涉及對髀嘅舞步嗰陣,佢仲會曉諗埋自己對手臂同頭頸應該成乜嘢位置先可以令佢成個身體整體成有美感嘅線,所以芭蕾舞上講嘅線條係一種宏觀性嘅考量。

線條呢家嘢通常都係中至高階嘅芭蕾舞堂先會開始諗嘅-喺初階芭蕾舞堂當中,老師正路都會集中於確保「學生識做啲舞步」同埋「學生做啲舞步嗰陣能夠保持平衡」先[75]

Partnering

拍檔跳舞(partnering)係指兩個舞蹈員(通常一男一女)一齊合作跳舞。喺拍檔跳舞嗰陣時,兩個舞蹈員會務求配合對方嚟跳,達到和諧同互相協調嘅動作。對於男芭蕾舞蹈員嚟講,拍檔跳舞係相當要求體力嘅,因為好多時佢哋都要喺拍檔跳舞嘅過程當中捧起自己舞伴、接住跳起嘅舞伴、甚至乎捧住自己舞伴行一段距離,而且佢哋仲要喺舞伴跳起同做腳尖旋轉(睇「pirouette」)嗰時負責做支撐嘅工作[76]

睇埋大雙人舞(grand pas de deux)。

Pointe, en

腳尖企(en pointe,又有叫「sur les pointes」;法文讀音:[ɑ̃ pwɛ̃t],呢個字喺法文入面係「用腳尖」噉解)係一種技法,指個舞蹈員跳舞嗰陣淨係腳尖掂地-即係齋用腳趾支撐住成個身體嘅重量,目的係要令個舞蹈員望落好似無重量噉,達到一種輕盈嘅美感,所以喺女舞蹈員當中零舍常見。跳芭蕾舞所用嗰啲鞋係有特別設計嘅,經過強化所以能夠撐住個舞蹈員成個身體嘅重量。喺教芭蕾舞嘅過程當中,老師好多時會要啲學生做「半腳尖企」(demi-pointe)先,即係要啲學生試吓淨係腳板前半橛掂地,等佢哋腳板同腳趾有返噉上下強壯先至要佢哋做更加講求體力嘅腳尖企[16]

Bourrée

布雷(bourrée,唔好同「pas de bourrée」撈亂;法文讀音:[buʁe])個名取自同名嘅法國舞曲,涉及一個舞蹈員以落落(睇「sous-sous」)開始,雙腳做完全嘅腳尖企(「pointe」),再要雙髀好快噉做細幅度嘅向橫移動,兩隻腳板交替噉係噉咦離地再落返地,成個人喺舞台上移動一段距離。布雷喺舞台上成日俾女舞蹈員用嚟優雅噉移去佢哋需要去嘅位置[16]

Split

一字馬(split)係指兩條髀向相反方向伸展,可以係一條向左一條向右,又或者一條向前一條向後都得。一字馬喺多個進階舞步當中都會用到,好似係宏髀跳(睇「grand jeté」)噉,就要求個舞蹈員喺跳到最大高度嗰陣雙髀成一字馬[77]

Renversé

仰翻姿(renversé;法文讀音:[ʁɑ̃vɛʁse])係一種伴隨某啲旋轉性舞步嘅動作,指個舞蹈員一路做某個旋轉性嘅舞步,一路向後側方彎腰,例如係腳尖旋轉仰翻姿(piroutte renversé)噉,就係指個舞蹈員喺做腳尖旋轉(piroutte)嘅過程當中做仰翻姿[78]

EnPointeFoot.jpg Ballet Teresa Carreño.jpg Yamamoto Mashiko - Le Corsaire - Prix de Lausanne 2010-4.jpg NWFusion11.jpg NWFusionPaquitaPasLift.jpg
腳尖企 傾斜獨腳站立 鶴立式舞姿 魚衝式舞姿 一個男舞蹈員舉起自己舞伴。
Fouetté
一個男舞蹈員用揮鞭轉轉向做腳尖旋轉。

揮鞭轉(fouetté;法文讀音:[fwɛte];睇埋旋轉舞步)係指一個舞蹈員運用支撐髀嘅肌肉,令到自己成個身體同埋條抬起髀以支撐髀做軸心轉向若干角度(由 45 度以至 180 度嘅都得)。揮鞭轉嘅一個例子如下:個舞蹈員條抬起髀向前伸前抬起,而條支撐髀進入半腳尖企狀態,而條支撐髀跟住快速噉旋轉 180 度,令到身體變成向住相反方向,而條抬起髀就變成喺身後面好似獨腳站立(睇「arabesque」)噉嘅狀態。揮鞭轉可以用嚟將身體由向前轉成向後、由向側轉成向後、或者由向後轉成向側等等都得,重點係運用支撐髀嘅旋轉嚟改變身體同抬起髀面向嘅方向[79]:pp. 164–165

  • 揮鞭轉轉向(fouetté turn)係腳尖旋轉當中嘅一種重要技法,步驟如下:首先,個舞蹈員條支撐髀要做一個髀屈曲(雙髀屈曲,令身體下沉),然後條抬起髀要向前伸,再一嘢揈去身體側面或者後面嘅位置,跟手條抬起髀收返埋、變成抽起噉嘅狀態掂住支撐髀嘅膝頭,同時條支撐髀要伸返直同變成半腳尖企或者腳尖企。呢個過程會產生一股力,令成個人繼續旋轉,而喺完成咗一個轉之後,個舞蹈員可以重複以上嘅步驟,令自己身體再繼續旋轉若干個圈[79]:pp. 164–165
Arabesque

獨腳站立(arabesque;法文讀音:[æɹ.əˈbɛsk];呢個字喺法文入面係「阿拉伯式」噉解)係一種常見嘅舞步,指個舞蹈員用其中一條髀(支撐髀)支撐住成個身體,而另一隻髀(抬起髀)就抬高去身體後面,上身係噉咦傾前少少,條抬高咗嘅髀可以係伸直又或者係屈曲咗嘅都得,所抬高嘅角度由 20 度左右嘅低角以至大過 90 度角嘅都有,例如所謂嘅傾斜獨腳站立(arabesque penché),就係指抬髀角度高到抬起嗰條髀嘅腳板位置高過個頭。做獨腳站立嗰陣手嘅位置唔定。獨腳站立目的係要令成個身體形成一條由膊頭一路延伸落去抬起咗嗰條髀嘅腳趾尾嗰度嘅線條,達到一種美學上嘅效果。要留意嘅係,芭蕾舞蹈員喺抬起髀嗰時,抬起咗嗰條髀嘅腳板要係噉咦擰轉少少,令到隻腳板腳甲嗰面對住觀眾,噉樣做嘅話個腳踭就唔會阻礙到條髀所形成嘅線條[1][80]

一個專業嘅芭蕾舞蹈員會記得自己嘅「最大獨腳站立」-指佢喺唔犧牲流暢度同精確度之下做獨腳站立隻腳可以去到幾高[80]

Attitude

鶴立式舞姿(attitude;法文讀音:[atityd])涉及個舞蹈員用其中一條髀(支撐髀)企喺度,而另外嗰條髀(抬起髀)抬起、膝頭屈曲、大髀同細髀成大約 90 度角,而手臂嘅位置同抬起嗰條髀要抬幾高角度就唔定。抬起嗰條髀可以喺身體嘅後面(derrière)、前面(devant)、又或者側面(à la seconde)都得,睇情況而定。支撐住身體嗰條髀可以屈曲或者伸直,而嗰條髀隻腳掌可以係平放嘅(a terre),又或者係腳尖企或者半腳尖企嘅(睇「pointe」同「demi-pointe」)。向後抬髀嘅鶴立式舞姿同獨腳站立最大嘅分別係,一個芭蕾舞蹈員喺做鶴立式舞姿嗰陣個上身要盡可能垂直,唔似得獨腳站立噉向前傾[81]

鶴立式舞姿需要有相當勁嘅平衡力,所以係相對高階嘅舞步[81]

Fish dive

魚衝式舞姿(fish dive)係雙人舞(睇「pas de deux」)常用嘅一種舞步,涉及一個女舞蹈員抽起(睇「retiré」)佢其中一條髀,再由做佢舞伴嗰個男舞蹈員捧住佢,令佢好接近地板噉「飄」過若干距離(但個女舞蹈員成個人由始至終都掂唔到地板)-就好似一條游過河床嘅噉。魚衝式舞姿好多時係由個女舞蹈員做嘅獨腳站立(睇「arabesque」)做起始嘅,當個女舞蹈員做緊獨腳站立,要轉換做魚衝嗰陣,個男舞蹈員通常會用佢兩隻手分別托住佢舞伴條腰同抬起咗嗰條髀嘅大髀,再將自己身後嗰隻腳移位變成魚衝式嘅位,跟住個女舞蹈員就可以乘勢改變姿勢變成魚衝式[82]

  • 魚姿勢(poisson;法文讀音:[pwasɔ̃],即係法文入面「魚」噉解)係一種姿勢,涉及個舞蹈員條腰屈曲,令上半身向後傾(睇「cambré」),同時雙髀以第五腳位嘅姿態相交(對髀中間冇空間)或者抬起髀成抽起狀態(睇「retiré」),好多時(但唔一定)雙手成 RAD 第五手位。魚姿勢通常係一個舞蹈員跳起咗或者係以魚衝式舞姿俾舞伴捧住嗰陣先會做嘅[2]
  • 魚姿勢其中一個最常見嘅應用係個舞蹈員由第五腳位起跳,喺空中成魚姿勢,好似一條跳出水面嘅魚噉-呢個跳躍就係所謂嘅魚舞步(pas de poisson;法文讀音:[pɑ də pwasɔ̃][2]
一個轉多個圈嘅腳尖旋轉;個舞蹈員仲勁到中途改變條髀抬起嘅角度同雙手位置。
Pirouette

腳尖旋轉(piroutte;法文讀音:[piʁwɛt],呢個字喺法文入面係「旋轉」噉解)係一種旋轉舞步,俾人認為係最有美感最好玩嘅芭蕾舞舞步之一。最簡單嗰種腳尖旋轉涉及以下步驟:個舞蹈員首先要雙手成第二手位(睇「positions of the arms」),一隻腳企定定,而另一隻腳處於第二腳位噉嘅位置(睇「positions of the legs」)兼且淨係腳尖掂地;跟手處於第二腳位位置嗰隻腳要向後移,令雙腳成第四腳位,同時雙手要變成第四手位相交(睇「positions of the arms」),跟住再用一個快速嘅抽起(睇「retiré」)將向後移咗嗰條髀抬起,用企定定嗰隻腳做旋轉嘅軸心,用快速抽起嗰股力乘勢令個身體開始旋轉至少 360 度,可以再轉若干個圈。腳尖旋轉可以按照做旋轉嗰陣條髀抬高嘅角度、雙手嘅位置、或者係轉幾多個圈等嘅因素再細分做幾種,重點係個舞蹈員喺其中一條髀抬起咗嘅情況之下旋轉[83][84]

喺學芭蕾舞嘅過程當中,腳尖旋轉通常都係起碼去到中階嘅學生先會做嘅,噉係因為佢屬於相常之高難度嘅一種舞步(尤其係轉多過一個圈嗰種),要求個學生有極之勁嘅核心肌同埋平衡力,俾人形容做「芭蕾舞蹈員冚唪唥都想做到最好嘅大師級舞步」。亦都因為噉,腳尖旋轉係比較高階啲嘅芭蕾舞考試當中差唔多實會考嘅一種舞步[85]

  • 宏腳尖旋轉(grand piroutte,又有叫「pirouette à la seconde」)係指抬起髀抬起 90 度嘅腳尖旋轉[86]
Spotting

定點法(spotting)喺舞蹈上係指一種旋轉嘅技巧:包括芭蕾舞在內嘅多種舞蹈都會要求舞蹈員做旋轉動作(例如係腳尖旋轉),而旋轉動作有可能搞到個舞蹈員頭暈;定點法就係一種喺旋轉當中用嘅技巧,涉及個舞蹈員特登將佢頭頸嘅轉速同身體其他部份嘅唔一致-喺開始旋轉嗰時,個舞蹈員頸以下嘅身體要加速,但頭同頸就要唔好轉住,等個頸以下身體轉到噉上下(大約轉咗 80 度角之後),頭頸先至一嘢轉嗮一個圈再返去原初嘅位置。喺練習定點法嗰時,一個芭蕾舞學生通常會要自己一路練一路望實埲牆上面嘅某一點,所以就叫「定點法」[87]

Promenade

漫步(promenade;法文讀音:[pʁɔm.nad])嘅做法如下:個舞蹈員一隻腳掌完全掂地,而另一隻腳掌就喺半空-即係獨腳站立(arabesque)或者向後鶴立式舞姿(attitude derriere)等嘅狀態;跟住掂地嗰隻腳要靠腳踭係噉咦離開地面、轉少少、再落返地嚟到令成個人旋轉,於是條抬起髀嘅腳掌喺半空劃過若干距離。要留意嘅係,漫步唔似得腳尖旋轉(pirouette)噉涉及個舞蹈員處於上升(relevé)狀態,而且同腳尖旋轉比起上嚟,漫步轉嘅速度通常會比較慢[88]

漫步嘅一種常見應用係喺男女舞蹈員嘅拍檔跳舞(partnering)當中:個女舞蹈員做咗一個獨腳站立等涉及一條髀抬起嘅舞步,然後個男舞蹈員要雙手掂住佢舞伴條腰或者手嚟到支撐住佢舞伴,跟住個男舞蹈員會圍住佢舞伴打圈行,然後個女舞蹈員要一路用漫步嘅方式旋轉,而個男舞蹈員一路用對手幫佢舞伴保持平衡[88]

Finger turns

手指旋轉(finger turns)係一種由一男一女舞蹈員一齊做嘅旋轉,重點係個女舞蹈員喺捉住佢舞伴隻中指嘅情況下旋轉,通常做法如下:個男舞蹈員會企喺佢舞伴嘅左後面,高舉噉伸出佢嘅右手,當中中指指向下,而其餘手指同地板平行,身體其餘部份離佢舞伴有一定距離(唔會阻住佢舞伴旋轉);跟住個女舞蹈員會捉住佢舞伴隻向下嘅中指,並且開始做旋轉;全程個男舞蹈員都會扮演住支撐嘅角色,佢要有一對強而有力嘅雙臂,等個女舞蹈員無論做幾勁嘅旋轉,兩個人都可以穩穩陣陣噉企到喺度。手指旋轉喺大雙人舞(grand pas de deux)嗰度成日會用到[89]

David Hallberg.jpg Antonio tours.gif Antonio cabriole.gif Chenxin Liu - Don Quichotte, Kitri - Prix de Lausanne 2010-7 edit.jpg
一個跳好高嘅男舞蹈員;
男舞蹈員成日會做大型嘅快板。
空中轉圈;
個舞蹈員用腳掌同膝頭著地。
細雀躍 宏髀跳最高點
Allegro

快板(allegro;呢個字喺意大利文入面係「開心」噉解)係指一啲又快又充滿能量嘅舞步,可以分做好多種,而涉及親個舞蹈員跳起嘅舞步冚唪唥都屬於快板。喺一堂芭蕾舞堂當中,呢類舞步通常係臨尾先至練嘅,因為啲學生通常都係喺課堂嘅尾聲嗰陣最處於熱好身嘅狀態。當啲學生要練快板嗰時,個老師會叫啲學生做細啲(petit)嘅快板,跟住再要佢哋試吓做一啲幅度大啲嘅快板,最後要啲學生試吓挑戰自己嘅極限,睇吓自己喺跟足音樂嘅情況之下可以跳到幾高[1][90]

Tours en l'air

空中轉圈(tours en l'air;法文讀音:[tuʁz ɑ̃ l ɛːʁ],法文入面「喺空中轉圈」噉解)係男舞蹈員成日會做嘅一種快板,涉及個舞蹈員用突然躍起(睇「soubresaut」)嘅技法跳起,並且喺空中全身旋轉至少一個圈先至著地-當中勁啲嘅舞蹈員仲可以喺空中轉多個圈;喺著地嗰陣,個舞蹈員要用兩隻腳掌著地成一個企定定嘅腳位,又或者一隻腳掌著地另一隻成(例如)獨腳站立(睇「arabesque」)噉嘅狀態。空中轉圈嘅一種高階做法涉及個舞蹈員用一隻腳掌同埋另一條髀嘅膝頭嚟著地(著地之前要減速,以免撞親個膝頭),呢種做法喺男主角做獨舞(睇「variation」)嘅收尾嗰陣時相當常用[91]

Cabriolé

雀躍(cabriolé;法文讀音:[kabʁijɔl],法文入面大致上係「愩」噉解)係男舞蹈員成日會喺舞台上做嘅一種快板,涉及個跳起嘅舞蹈員喺半空嗰度兩條髀互相打擊。雀躍分大(grande)同細(petite)兩種,細雀躍涉及個舞蹈員雙髀喺同上身成大約 45 度角嗰時打擊,而大雀躍就涉及個舞蹈員雙髀同上身成差唔多 90 度嘅高角嗰時打擊。喺雙髀互相打擊嗰時,喺下面嗰條髀會向喺上面嗰條施力,令到上面條髀移得更加高。最後個舞蹈員會用喺下面嗰條髀落地。雀躍可以向前(en avant)、向後(en arrière)、或者向側面(à la seconde)做都得,而上半身嘅位置唔定[92]

  • 雙重雀躍(double cabriole)指喺半空雙髀互相打擊兩次嘅雀躍,幾乎淨係男舞蹈員先會做嘅。
  • 封閉雀躍(cabriole fermée)指落地嗰陣雙腳成第五腳位嘅雀躍。
宏髀跳嘅動畫
Jeté

髀跳(jeté;法文讀音:[ʒəte],法文入面「掟出去」噉解)係跳躍嘅一種,涉及個舞蹈員其中一條髀好似向住佢郁嘅方向飛出去噉。喺做髀跳嗰陣,個舞蹈員會將佢嘅其中一隻髀抬向前(jeté devant)、向後(jeté derrière)、或者向側面(jeté à la seconde),然後用仲掂住地嗰隻髀起跳,可以分做好多種[93][94][95]

  • 普通髀跳(jeté ordinaire,或者「pas jeté」),某啲門派興叫細髀跳(petit jeté),由髀屈曲(睇上面「plié」)做起始,跟住而要抬起嗰條髀隻腳板會掃過地板,同時個舞蹈員會乘機將身體重量集中落去仲掂住地嗰條髀嗰度,跟手要抬起嗰條髀會完全離地,再用掂住地嗰隻腳起跳,令個舞蹈員飛越一段短嘅距離,最後要用抬起咗先嗰隻腳落地(異於兩隻腳一齊落地嘅聚合舞步)。呢種髀跳喺做啲細規模嘅快板嗰陣成日都會用到。
  • 打吓髀跳(jeté battu)係指一個涉及個舞蹈員喺半空嗰陣雙髀互相拍打嘅普通髀跳。
  • 轉向髀跳(jeté entrelacé,或者「tour jeté」)係髀跳嘅一個變種,涉及個舞蹈員用髀跳方式起跳,喺抬起髀去到空中之後,條支撐髀都起跳,跟住用抬起髀著地,同時身體轉向,最後變成條支撐髀喺身體後面,用原先嗰條抬起髀支撐住身體,成一個獨腳站立嘅姿態(睇「arabesque」)。
  • 宏髀跳(grand jeté)係一種大型嘅跳躍性舞步,通常涉及個舞蹈員用一隻腳向前跳。做宏髀跳過程如下:個舞蹈員其中一隻腳會向跳嘅方向掃,以宏擊打嘅形式(睇「battement」)抬起,而喺後面嗰隻腳要一𨅝起跳,令到成個人離地;而喺空中嗰陣,個舞蹈員對髀要擘開成一字馬,而且擘開嘅幅度喺跳躍最高點嗰時要達到最大,兩條髀通常要完全伸直,個身體重心係噉咦向移動嘅方向傾,造成個舞蹈員望落好似成個人喺空中「飄」過咗若干距離噉嘅視覺效果,俾好多評論家覺得係最有美感嘅芭蕾舞舞步之一。宏髀跳可以係向前(devant)、向後(derrière)、或者向側面(à la seconde)做都得[93]
  • 旋轉式切入髀跳(coupé-jeté en tournant)係宏髀跳嘅一個變種。旋轉式切入髀跳係涉及旋轉嘅宏髀跳。喺做旋轉式切入髀跳嗰陣,個舞蹈員要以好似宏髀跳噉嘅方法起跳;同一般宏髀跳嘅分別係,一般宏髀跳涉及個舞蹈員喺空中直線噉移動,而喺旋轉式切入髀跳當中,個舞蹈員就要喺空中令身體旋轉,因而改變移動方向。一個舞蹈員可以做一連串嘅旋轉式切入髀跳(en manège),用呢個方法嚟喺舞台上打圈[96]
Rivoltade

大轉步(rivoltade,又有串做「revoltade」)係一個強力嘅高階舞步,通常由男舞蹈員做。做大轉步嗰陣,個舞蹈員會一路成個身旋轉,一路將其中一條髀用大擊打(grand battement)嘅方式一嘢掃向半空,然後掂住地嗰條髀(跟尾髀)一撐起跳,再將跟尾髀用大擊打嘅方式掃去一個高過另外嗰條髀嘅空中,跟尾髀喺空中劃過一條弧線,再先過另外嗰條髀著地。大轉步喺男主角嘅獨舞(variation)當中時不時會用到[97]

Hortensia

繡球花步(hortensia)係一種進階嘅男舞蹈員舞步,涉及個舞蹈員「跳起,雙腳一前一後而且繃緊,跟住雙腳前後互換若干,最後著地並且兩隻腳掌分開」。呢個舞步俾人指話好似喺空中游水噉[2]:p. 62

Gargouillade

隆隆(gargouillade)係一種相當高難度嘅進階舞步,涉及個舞蹈員,首先其中一隻腳進入解離(dégagé)狀態,跟住嗰隻腳喺半空做一個用髀畫圈(「rond de jambe」),同時另一條髀一嘢起跳同埋喺半空做一個用髀畫圈,最後用第五腳位著地[98]

Grand pas de chat

大貓舞步(grand pas de chat;法文讀音:[ɡʁɑ̃ pɑ d(ə) ʃa])係貓舞步(睇「pas de chat」)嘅一個變種,涉及個舞蹈員喺空中嗰陣一路維持住帶頭嗰條髀(leading leg)擊打式伸直抬起(睇「battement」)並且同上身成 90 度角,而跟尾嗰條髀(trailing leg)成抽起(睇「retiré」)狀態,雙髀一路維持呢個狀態直到要落地為止。同貓舞步唔同嘅係,通常個舞蹈員離地同落地都係用跟尾嗰條髀嘅-離地同落地都係用同一條髀。有啲舞蹈員做大貓舞步會做得再激啲,做到抬起咗嗰條髀抬起嘅角度超過 90 度[60]

練習運動[編輯]

Adagio

慢板(adagio;呢個字喺意大利文入面係「慢慢嚟」噉解)係啲學生上芭蕾舞堂成日會做嘅一種運動,指啲學生慢慢(但要流暢)噉做出芭蕾舞嘅舞步:無論級別,喺一堂古典芭蕾舞堂入面,個老師通常都會花唔少時間要啲學生企係條練功扶手(睇「barre」)隔離,一隻手掹住扶手,並且緩慢噉做出某啲特定嘅舞步;噉做嘅目的係要個學生首先精確噉掌握好個舞步,掌握好先至試吓用表演嗰陣會用嘅速度做出嗰個舞步,而且慢慢噉做出古典芭蕾舞嗰啲(好多時好講求體力嘅)舞步仲有助提升個學生嘅平衡力同力量。一個成功噉掌握到個舞步嘅學生會曉流暢又精確噉做出個舞步,兼且仲達到穩陣嘅平衡感同埋強而有力噉企到喺度。芭蕾舞老師跟手就可以按照一個學生喺做各種舞步慢板嗰時嘅表現評定佢掂唔掂[1][99]

Balançoire

鐘擺(balançoire;法文讀音:[balɑ̃swaʁ])係芭蕾舞堂上嘅一種運動,涉及個學生重複噉將自己其中一條髀向前向後來回噉做擊打(睇「battement」)-好似鐘擺噉樣。同時,個學生上身會隨住條髀嘅擺動而係噉咦向前或者向後傾。呢種運動有助提升一個學生髖關節嘅柔軟度,好多時喺芭蕾舞堂俾老師用嚟幫啲學生熱身[100]

兩個芭蕾舞學生喺扶手側邊熱身,準備上堂-一堂芭蕾舞堂通常會以喺練功扶手側邊做運動起始。
Center

中心(center)係芭蕾舞堂當中嘅一個部份。喺一個典型嘅芭蕾舞堂當中,前半橛嘅練習多數係喺練功扶手(睇「barre」)嗰度做嘅,而上堂上到噉上下之後,個老師通常會收起啲練功扶手,要啲學生練喺冇扶手嘅情況下做出啲舞步。呢個時候,個老師通常會要啲學生行去課室嘅中心嗰度練,費事佢哋撞埋牆度-喺呢個時候,個老師會叫啲學生行去「中心」嗰度[101]

Port de bras

手臂運行(port de bras;法文讀音:[pɔʁ d(ə) bʁa])指一個芭蕾舞蹈員手臂嘅郁動,係芭蕾舞堂上成日會做嘅一種運動,用嚟教初階學生熟習啲手位。喺芭蕾舞堂做手臂運行嗰陣,個學生會將手臂移去唔同嘅手位,例如一個基本嘅手臂運行運動涉及個學生雙腳唔郁,並且將手臂由第五位移去第一位,再移去第二位,再返去第五位。手臂運行嘅做法可以按照門派而有所不同,而且「port de bras」呢個字喺某啲門派當中仲俾人用嚟指身體喺腰嗰度向前或者向後彎再變返直[102]

手臂運行就噉望落好似好簡單濕碎噉,但查實唔容易:好多芭蕾舞蹈員都要用成幾年嘅時間先至做得到完美嘅手臂運行,有啲就算係專業嘅都仲要喺度練,而喺初階芭蕾舞堂當中,老師好多時會要個學生維持第五位維持一段時間,呢個動作會要求一定嘅手臂肌肉力量[102]

技法綴詞[編輯]

以下呢啲詞彙屬於技法綴詞-噉講意思係話,呢柞詞彙喺單獨存在嗰陣時係冇意義嘅。啲人用呢啲詞彙,主要係將佢哋加喺某個技法嘅名嘅前或者後,用嚟指嗰個舞步技法嘅某一個特別形態。芭蕾舞上嘅主要技法綴詞有以下呢啲[2][103]

À la seconde、Devant、Derrière

側伸式(à la seconde;法文讀音:[a la səɡɔ̃d],意思係「去到第二」噉解)係指要將個目標舞步打側噉嚟做,係芭蕾舞堂當中老師時不時會俾學生嘅一個指令。例如「tendu à la seconde」噉,就係指條髀移去身體側邊嘅髀伸展(睇「tendu」)[104]

前移式(devant;法文讀音:[ɑ̃n avɑ̃])係指「向前郁動」噉解,係「derrière」嘅相對。例如「某個舞步 devant」係指做嗰個舞步嗰陣向前做或者向前抬髀。例如「tendu devant」噉,就係指條髀移去身體前邊嘅髀伸展(睇「tendu」)。

後移式(derrière;法文讀音:[ɑ̃n aʁjɛːʁ])係指「向後郁動」噉解,係「devant」嘅相對。例如「某個舞步 derrière」係指做嗰個舞步嗰陣向後做或者向後抬髀。例如「tendu derrière」噉,就係指條髀移去身體後邊嘅髀伸展(睇「tendu」)。

À terre

喺地下(à terre;法文讀音:[a tɛʁ])係指「掂住地板」噉解,例如「某個舞步 à terre」係指喺是但一隻腳掌或者兩隻腳掌都完全掂住地板嘅情況下做嗰個舞步。

Allongé、Arrondi

延伸(allongé;法文讀音:[alɔ̃ʒe])係指「伸長啲噉做」噉解,例如「某個舞步 allongé」指喺做嗰個舞步嗰陣手同腳要伸展得出少少直少少,成日會同獨腳站立(睇「arabesque」)一齊用。

彎曲(arrondi;法文讀音:[aʁɔ̃di])係延伸嘅相對,指「圓啲噉做」噉解,「某個舞步 arrondi」係指喺做嗰個舞步嗰陣手同腳唔好伸展到直。

Bas, en、Haut, en

低位(en bas;法文讀音:[ɑ̃ ˈbɑ])係指「做得低啲」噉解,例如「arms in fifth en bas」係指一個對手唔好去到噉高嘅 RAD 第五手位。

高位(en haut;法文讀音:[ɑ̃ ˈo])係指「做得高啲」噉解,例如「arms in fifth en haut」係指一個對手擺得高啲嘅 RAD 第五手位。

Battu

打吓(battu;法文讀音:[baty])係指「要喺空中打一吓」噉解。「某個舞步 battu」(當中「某個舞步」實係一個涉及跳躍嘅舞步)意思係喺做嗰個舞步嗰陣,雙髀要喺半空中互相拍打一吓先至著地。打吓常見嘅應用有打吓髀跳(jeté battu)。

Changé

換腳(changé;法文讀音:[ˈtʃeɪndʒ])係指做一個舞步嗰陣要途中雙腳腳板嘅位置要互換,例如如果做「某個舞步 changé」開始嗰陣係右腳喺前左腳喺後,做完之後要變成左腳喺前右腳喺後。

Cloche, en

鐘式舞動(cloche, en;法文讀音:[ɑ̃ klɔʃ])指個舞蹈員做一個「本嚟條抬起髀喺前(或者後),由嗰個位置郁,經過第一腳位,再變成抬起髀去咗另一邊」嘅動作-好似一個鐘嘅前後擺動。例如係以下呢個鐘式舞動嘅髀伸展(睇「tendu」)噉:個舞蹈員首先以向前嘅髀伸展(tendu devant)起始,跟住條抬起髀慢慢向後掃,變成第一腳位,然後嗰條髀繼續向後掃,最後變成向後嘅髀伸展(tendu derriére),又或者將成個動作前後掉轉做。除咗噉,擊打(battement)等嘅舞步都可以用鐘式舞動做[105]

俄羅斯嘅華加諾娃派芭蕾舞興嗌呢個動作做「passé la jambe」或者「battement passé la jambe」[106]

Côté, de

打側郁(de côté;法文讀音:[də kote])係指做一個舞步嗰陣要向側移動,例如「balancé de côté」係指做一個搖擺舞步嗰陣要向側移動。

Croix, en

十字形噉做(en croix;法文讀音:[ɑ̃ kʁwɑ])係芭蕾舞堂上常用嘅一個詞,係個老師叫個學生將同一個舞步做四吓,第一吓向前(devant),第二吓向側(à la seconde),第三吓向後(derrière),而跟住第四吓向側(à la seconde),又或者前後掉轉都得。舉個例子說明,喺堂上,個老師可能會要班學生做「十字形噉做髀伸展」(睇「tendu」),意思即係叫佢前做一個向前嘅髀伸展(tendu devant),再做一個向側嘅髀伸展(tendu à la seconde),再做一個向後嘅髀伸展(tendu derrière),最後再做一個向側嘅髀伸展(tendu à la seconde)。十字形噉做主要係用喺芭蕾舞堂當中嘅,用途在於俾啲學生熟習一個舞步[107]

Dedans, en、Dehors, en

向內(en dedans;法文讀音:[ɑ̃ dədɑ̃])係指做一個舞步嗰陣要「由後到前」,例如「rond de jambe en dedans」係指隻移動腳先去身後,再去前嘅用髀畫圈(睇「rond de jambe」)。

向外(en dehors;法文讀音:[ɑ̃ dəɔʁ])係指做一個舞步嗰陣要「由前到後」,例如「rond de jambe en dehors」係指隻移動腳先去身前,再去後嘅用髀畫圈(睇「rond de jambe」)。

Demi、Grand

(demi;法文讀音:[dəmi])係法文「一半」噉解。喺芭蕾舞用詞上,呢個字通常係俾人攞嚟加喺某個舞步嘅名前面,用嚟指嗰個舞步幅度細啲嘅版本。好似係髀屈曲(睇「plié」)噉,髀屈曲呢個舞步涉及個舞蹈員屈曲自己對髀,一個半嘅髀屈曲(demi-plié)涉及個舞蹈員係噉咦屈曲對髀。

(grand;法文讀音:[ɡʁɑ̃])係法文「宏大」噉解。喺芭蕾舞用詞上,呢個字通常係俾人攞嚟加喺某個舞步嘅名前面,用嚟指嗰個舞步幅度大啲嘅版本。好似係髀屈曲(睇「plié」)噉,大嘅髀屈曲(grand plié)涉及個舞蹈員屈曲對髀,而且屈曲嘅幅度犀利到對腳踭要焗住離開地板。

Dessous、Dessus

之下(dessous;法文讀音:[dəsu])喺芭蕾舞用詞上,有陣時俾人攞嚟加喺某個舞步嘅名後面,用嚟指做嗰個舞步嗰時其中一隻手或者髀要喺另外一隻後面經過。例如係聚合舞步之下(「assemblé dessous」),就係指喺做嗰個聚合舞步(睇「assemblé」)嗰陣,條抬起髀要喺空中變成喺支撐髀後面,再聚合。

之上(dessus;法文讀音:[dəsy])喺芭蕾舞用詞上,有陣時俾人攞嚟加喺某個舞步嘅名後面,用嚟指做嗰個舞步嗰時其中一隻手或者髀要喺另外一隻前面經過。例如係聚合舞步之上(「assemblé dessus」),就係指喺做嗰個聚合舞步(睇「assemblé」)嗰陣,條抬起髀要喺空中變成喺支撐髀前面,再聚合。

Double

(double;法文讀音:[dubl])係叫人同一個動作連續做兩次,例如「double rond de jambe en l'air」就係指將「rond de jambe en l'air」做兩次。

Face, en

面向(en face;法文讀音:[ɑ̃ fas])係指做一個舞步嗰陣塊面要向住觀眾。

Fermé

封閉著地(fermé;法文讀音:[fɛʁm])通常俾人加喺一個跳躍性嘅舞蹈嘅名前面,指做嗰個舞步著地嗰陣雙腳要成第五腳位(雙腳腳板好似「封閉」咗噉)[108]

Manèges

打圈做(manèges;法文讀音:[ma.nɛʒ])係指靠某個舞步喺舞台上面打圈噉移動,當中「某個舞步」多數係一個涉及旋轉嘅舞步,例如係一連串嘅旋轉式切入髀跳(coupé-jeté en tournant)噉,就成日俾男舞蹈員用嚟喺舞台上面打圈移動[109]

Penché

傾斜(penché;法文讀音:[pɑ̃ʃe])指做一個舞步嗰陣身體要向前傾,而向前傾嘅幅度要大到個人個頭位置低過抬起咗嗰條髀嘅,例如「傾斜獨腳站立」(睇「arabesque」)就係指做獨腳站立嗰陣抬髀嘅角度大到抬起嗰條髀嘅腳板位置高過個舞蹈員個頭。

Piqué

刺步(piqué;法文讀音:[pike])係指做一個舞步嘅起始嗰陣身體重心要一吓移落去一隻半腳尖企(demi-pointe)或者腳企尖(pointe)嘅腳掌嗰度,例子有刺步旋轉(piqué turn)同刺步獨腳站立(piqué arabesque)等等[110]

Tournant, en

旋轉式(en tournant;法文讀音:[ɑ̃ tuʁnɑ̃])係法文「旋轉」噉解。喺芭蕾舞用詞上,呢個字通常俾人加喺某個舞步嘅名後面,用嚟指個舞步嘅旋轉版本,例子有旋轉式追趕踢(睇「chassé en tournant」)[111]

行禮[編輯]

一個女舞蹈員做屈膝禮。
Reverence

行禮(reverence)係芭蕾舞蹈員喺芭蕾舞堂尾聲或者表演結束嗰陣時會做嘅一個舉動,涉及佢哋做一吓手臂運行(睇「port de bras」)再加上一個特定動作,嚟向老師或者觀眾表示敬意。喺傳統上,男舞蹈員嘅特定動作係鞠躬,而女舞蹈員嘅特定動作係屈膝禮[112]

行禮係芭蕾舞傳統嘅一部份,反映尊重同高貴嘅意涵。喺一場芭蕾舞表演結束之後,通常全體舞蹈員會一齊喺舞台上一路接受觀眾嘅掌聲、一路做個大行禮(grande reverence)-啲主角同有名嘅配角會企喺其他舞蹈員前面,並且先後做行禮[112]

Bow

傳統上,男舞蹈員嘅行禮動作係鞠躬(bow)。喺鞠躬嗰陣,個舞蹈員要將一隻手擺喺肚臍上面,而另一隻手向外開(即係類似 RAD 式第三手位,分別係喺鞠躬嗰陣,收埋嗰隻手要掂到自己個肚),跟住佢要彎腰,令到上半身向前傾。

Curtsy

傳統上,女舞蹈員嘅行禮動作係屈膝禮(curtsy)。喺做屈膝禮嗰時,個舞蹈員要雙手外開,將其中一隻腳半腳尖企,另外嗰隻腳完全掂地,跟住腳尖企嗰條髀要喺腳板掂住地板嘅情況下跣去身體後面,然後個舞蹈員兩隻髀要一齊係噉咦屈曲(參考「plié」)。

稱謂詞彙[編輯]

一場《胡桃夾子》表演當中糖梅仙子同佢舞伴跳嘅大雙人舞;呢個男舞蹈員就係所謂嘅騎士。
喺多數版本嘅《天鵝湖》入面都會有一班舞蹈員扮演小天鵝團隊跳舞,呢啲團隊跳舞而唔會獨舞嘅舞蹈員就係所謂嘅伴舞隊。
堪薩斯城芭蕾舞團演嘅《天鵝湖》當中嘅一幕;邪惡魔法師羅夫巴特喺王子同公主身後做緊宏髀跳,呢個角色多數係由首席角色藝術家演嘅。

舞者稱謂[編輯]

睇埋:芭蕾舞蹈員
Ballerina

「Ballerina」係意大利文入面「女芭蕾舞蹈員」噉解[113]

Prima ballerina assoluta

絕對一級女芭蕾舞蹈員(prima ballerina assoluta)係一個少見嘅頭銜,淨係會加俾絕對最頂尖嘅女芭蕾舞蹈員[114]

Ballerino

「Ballerino」係意大利文入面「男芭蕾舞蹈員」噉解[115]

Danseuse

「Danseuse」(法文讀音:[dɑ̃søz])係法文入面「女芭蕾舞蹈員」噉解[116]

Première danseuse

「Première danseuse」(法文讀音:[pʁəmjɛʁ dɑ̃søz])係法文「一級女芭蕾舞蹈員」噉解[117]

Danseuse en travesti

「Danseuse en travesti」(法文讀音:[dɑ̃søz ɑ̃ tʁa.vɛs.ti])係女扮男裝嘅舞蹈員:喺古典芭蕾舞上,一個編舞師喺編一齣芭蕾舞劇嗰時,佢有陣時會想編一個舞段涉及一個男性角色俾其他舞蹈員抬起,但係男舞蹈員嘅身體好多時比較重,於是個編舞師就可能會選擇將呢個角色安排俾一個身體輕啲嘅女舞蹈員嚟演-要呢個女舞蹈員著男裝上台跳呢個角色[118]

Danseur

「Danseur」(法文讀音:[dɑ̃sœʁ])係法文入面「男芭蕾舞蹈員」噉解[119]

Premier danseur

「Premier danseur」(法文讀音:[pʁəmje dɑ̃sœʁ])係法文「一級男芭蕾舞蹈員」噉解[117]

Danseur noble

「Danseur noble」(法文讀音:[dɑ̃sœʁ nɔbl],字面上解係「高貴嘅男芭蕾舞蹈員」)喺古典芭蕾舞上係指舞技好精湛、專門飾演王子等貴族角色嘅男芭蕾舞蹈員[119]

Cavalier

騎士(cavalier)係指一個負責做女主角舞伴、但係本身並冇故仔角色嘅男舞蹈員。舉個例子說明,《胡桃夾子》(The Nutcracker)呢一齣芭蕾舞劇當中嘅糖梅仙子(Sugar Plum Fairy)係一個好重要嘅女主角,而喺佢要跳舞嗰陣,通常都梗要有個男舞蹈員傍住佢、做佢舞伴(例如係跳舞嗰陣幫手舉起佢噉),但呢個男舞蹈員喺胡桃夾子個故仔當中並冇相應嘅角色。呢類冇故仔角色、但舞技上重要嘅男舞蹈員就係所謂嘅騎士[120]

Corps de ballet

伴舞隊(corps de ballet;讀音:[kɔʁ də balɛ],法文嗰度「芭蕾舞嘅身體」噉解)係舞蹈員嘅一種,屬個芭蕾舞團當中嘅永久性成員。一個芭蕾舞團嘅伴舞隊組成主要舞蹈員嘅骨幹,佢哋通常會一個團隊噉跳舞-而唔似得王子公主呢啲主角噉,會單獨噉跳(睇「variation」)做注意力嘅中心。雖然伴舞隊好多時都俾人覺得佢哋冇主角噉樣眼,但做伴舞隊查實好講求默契,喺舞台上要曉得互相配合同步噉做出舞步,係芭蕾舞表演當中不可或缺嘅一部份[2]

Coryphée

伴舞隊長(coryphée;法文讀音:[kɔʁife])係指伴舞隊嘅領導者,喺某啲門派(尤其係法國派)當中係一個略高過伴舞隊嘅舞蹈員等級。伴舞隊長負責控制伴舞隊嘅節奏:喺表演嗰陣,伴舞隊長要企喺其他伴舞隊成員前面,俾其他伴舞隊成員睇住佢嘅動作嚟跳舞,所以伴舞隊長嘅動作控制住成個伴舞隊嘅節奏。伴舞隊長通常唔會生得太高(費事遮住喺佢後面嘅舞蹈員),亦都唔一定係伴舞隊當中舞技最好嗰個,但就要好識按照音樂控制自己跳舞嘅節奏[2][121]

Étoile

明星(étoile;法文讀音:[e.twal],法文入面「星星」噉解)係指個芭蕾舞團入面最勁嗰個舞蹈員。呢個詞通常係法國派芭蕾舞先會用嘅[122][123]

Virtuoso

名家(virtuoso)係指一個舞技好了得嘅芭蕾舞蹈員[124]

舞者等級[編輯]

古巴裔名芭蕾舞蹈員卡洛斯·阿哥斯達嘅相,2019 年影嘅;佢曾經係古巴國家芭蕾舞團嘅首席舞蹈員。

英國皇家舞蹈學院將專業芭蕾舞蹈員分做以下幾個等級[125]

Artist

藝術家(artist)係最初階嘅舞蹈員,通常啲芭蕾舞學生啱啱畢咗業都係喺呢個級開始跳嘅。藝術家級嘅舞蹈員多數會俾人分派做伴舞隊。

First artist

一級藝術家(first artist)係高藝術家一級嘅舞蹈員,多數會繼續做伴舞隊嘅工作,但因為佢哋舞技高過藝術家級嘅舞蹈員,佢哋比較有機會擔當伴舞隊當中一啲樣眼啲嘅角色,例如係《天鵝湖》入面嘅小天鵝噉。如果個一級藝術家舞技夠好,個舞團諗住升佢職嘅話,佢有機會做獨舞(睇「variation」)。

Soloist

獨舞員(soloist)係再高一級嘅舞蹈員,顧名思義係指一啲正式開始可以做獨舞(睇「variation」)嘅舞蹈員。喺一齣芭蕾舞劇當中,獨舞員主要係負責飾演一啲有名、有機會做獨舞嘅配角,例如係《睡美人》當中嗰啲仙子噉。一個芭蕾舞團一般會有 15 到 20 個獨舞員。

First soloist

一級獨舞員(first soloist)再高一級嘅舞蹈員,仲係負責飾演一啲有名、有機會做獨舞嘅配角,但會擔當呢類配角當中樣眼啲嗰啲。一級獨舞員會有機會升做首席舞蹈員,而當個首席舞蹈員因為受咗傷或者點而跳唔到舞嗰陣,通常就會由一級獨舞員負責頂佢個位。

Principal character artist

首席角色藝術家(principal character artist)係高級嘅舞蹈員,會喺芭蕾舞劇當中演重要嘅角色,但唔會做太多獨舞。舉個例說明,《天鵝湖》入面嗰個角色邪惡魔法師羅夫巴特(Von Rothbart)多數會由首席角色藝術家飾演:羅夫巴特係《天鵝湖》嘅大奸角,係一個不可或缺嘅角色,但因為《天鵝湖》始終係以王子同公主做主角,所以羅夫巴特做獨舞嘅機會通常都冇王子同公主噉多。首席角色藝術家多數係年紀比較大嘅前首席舞蹈員-體力唔夠好,做唔到要係噉勁跳獨舞嘅主角,於是就憑住精湛嘅技術同演技擔當重要、但唔係主角嘅角色。

Principal

首席舞蹈員(principal)係一個芭蕾舞團入面最高級嘅專業芭蕾舞蹈員,會喺芭蕾舞劇當中飾演主角,並且做大量嘅獨舞,例如係《天鵝湖》當中嘅王子同公主或者《胡桃夾子》當中嘅女主角卡拉娜(Clara)同胡桃鉗等等多數會由個芭蕾舞團嘅首席嚟擔任。首席舞蹈員往往係成個芭蕾舞團當中最引人注目嘅舞蹈員,而喺一個芭蕾舞團為佢哋要演嘅芭蕾舞劇做宣傳嗰陣,好多時都會以「佢哋嘅首席舞蹈員會親自上台,表演精湛舞技」嚟做賣點。

呢個 RAD 舞蹈員等級等同於法國派入面嘅「明星舞蹈員」(danseur Étoile[男]/ danseuse Étoile[女])或者意大利派入面嘅「一級舞蹈員」(primo ballerino[男]/ prima ballerina[女])[123]

舞團人員[編輯]

Ballet company

芭蕾舞團(ballet company,又有叫「ballet troupe」)係指一班集合埋一齊合力搞芭蕾舞表演嘅人員-包括咗舞蹈員、編舞師、同各種嘅支援及管理人員呀噉。通常一個芭蕾舞團會代表所在嘅城市、省、或者國家,例如係香港芭蕾舞團(代表香港)、廣州芭蕾舞團(代表廣州,某程度上代表成個廣東)、同埋中央芭蕾舞團(代表成個中國,總部喺北京)等等[1]

Ballet master / ballet mistress

芭蕾舞大師(ballet master[男]/ ballet mistress[女])係芭蕾舞團當中嘅一個職位,係個舞團嘅藝術人員嘅一部份。芭蕾舞大師嘅主要職責係指導個舞團入面嘅舞蹈員,例如係日日朝頭早帶領成個舞團嘅舞蹈員演練當日要跳嘅舞,又或者係教啲舞蹈員微調自己嘅舞步等等,而當個舞團要表演一齣芭蕾舞劇嗰時,佢哋啲芭蕾舞大師會係首先開始練要跳嘅舞嘅,跟住班芭蕾舞大師就會負責教個舞團啲舞蹈員跳,並且監督佢哋成個演練過程。芭蕾舞大師好多時都係退咗休嘅舞蹈員-年紀大咗、體力唔夠好、冇辦法親自上台表演,但係就憑住佢哋豐富嘅經驗指導個舞團入面嗰啲後生啲、體力好啲、但經驗冇噉豐富嘅舞蹈員[126]

Répétiteur

演練教師(répétiteur;法文讀音:[ʁe.pe.ti.tœʁ])傳統上係淨係負責帶領演練嘅人員,但到咗現代,帶領演練呢家嘢通常都由芭蕾舞大師(睇「ballet master」同「ballet mistress」)一手搞埋[2]

Régisseur

舞台總監(régisseur;法文讀音:[ʁe.ʒi.sœʁ])係喺個芭蕾舞團當中負責管舞台事務同演練嘅管理人員。有陣時有啲芭蕾舞團唔會有舞台總監,而係靠個舞團嘅芭蕾舞大師(睇「ballet master」同「ballet mistress」)處理嗮呢啲事務[127]

Choreographer

編舞師(choreographer)係負責決定舞段嘅高級藝術人員。喺個芭蕾舞團要表演一齣芭蕾舞劇嗰時,佢哋個編舞師會負責用舞譜編寫出啲舞蹈員要跳嘅舞段。喺芭蕾舞當中,呢啲舞段一般都係用古典舞步拼砌出嚟嘅,但係都可以好千變萬化:一個舞段閒閒地由幾廿個舞步組成,所以可以有好多可能嘅組合;就算係同一段舞步組合,配合唔同音樂或者角色嚟跳都會有唔同嘅藝術效果;而且就算係古典芭蕾舞表演,編舞師一般都有權加入少量嘅非古典舞步。因為呢啲緣故,齣齣芭蕾舞劇嘅編舞都唔一樣,令到編舞成為一個專化嘅職位。有唔少舞蹈員年紀大咗之後都會改行做編舞[128]

一個舞譜

編舞詞彙[編輯]

一次《胡桃夾子》表演當中嘅男女主角大雙人舞
Ballet(s)

「Ballet」呢個詞通常指芭蕾舞呢種舞蹈本身,但當呢個字做可數嗰陣,通常係指一齣芭蕾舞劇。一齣芭蕾舞劇會有若干個舞段[129]

Pas

舞段(pas;法文讀音:[pɑ])係指一段舞步噉解。喺古典芭蕾舞當中,一段舞步係由古典舞步以某啲方式組合而成嘅[130]

Grand pas

大舞段(grand pas;法文讀音:[ɡʁɑ̃ pɑ])係指一場芭蕾舞表演當中專門編嚟俾某一班舞蹈員(首席又得、伴舞隊又得)展示自己舞技嘅大型舞段,一般都俾人認為係一場芭蕾舞表演當中最引人注目嗰一個部份。一場大舞段會以起曲(entreé;法文讀音:[ɑ̃tʁe])做起始,及後有場大慢板(grand adage),而最後係收尾嘅係終曲(coda;意大利文讀音:[ˈkoːda])。喺大慢板同終曲之間,個編舞師有陣時會加插一截由伴舞隊所跳嘅舞段,又或者係一截由首席或者半獨舞員所跳嘅獨舞,再唔係兩樣都有[1][2][130]

大舞段可以分做好幾種,包括咗[1][2][130]

  • 大行動舞段(grand pas d'action)係一段表達齣芭蕾舞劇嘅故仔嘅大舞段。
  • 經典大舞段(grand pas classique)係一段同故仔唔啦更、編嚟淨係為咗俾舞蹈員展示舞技嘅大舞段。
  • 大雙人舞(grand pas de deux)係俾一齣芭蕾舞劇當中嘅男女主角兩個人一齊跳嘅大舞段,通常帶有浪漫嘅氣氛。
  • 大三人舞(grand pas de trois)或者大四人舞(grand pas de quatre)等(分別)係指由三個角色同四個角色合力跳嘅大舞段,喺某啲芭蕾舞劇當中因為劇情需要而使用,例如係個故仔涉及咗三角戀嘅《仲夏夜之夢》入面,就好多時會有涉及喺三角戀入面嗰三個人一齊跳嘅大三人舞。
  • 大終曲(grand coda)係指規模零舍大或者編舞零舍複雜嘅終曲。
  • 多人終曲(coda générale,或者「grand coda générale」)係指參與嘅舞蹈員人數多嘅終曲。
Variation

獨舞(variation)係指一個芭蕾舞蹈員一個人獨力跳一場舞。啲人喺傾一場芭蕾舞表演嗰陣成日會用呢個字,用「某個角色獨舞」嚟指嗰一場表演當中某一段涉及嗰個角色自己一個人跳嘅舞,例如喺《睡美人》呢場芭蕾舞劇當中,就會有「王子獨舞」(prince variation)同「公主獨舞」(princess variation)呀噉[1][2]

喺一場表演當中,當一個芭蕾舞蹈員做獨舞嗰時,其他舞蹈員(睇伴舞隊)通常會行埋一邊,等佢可以成為注意力嘅中心。對於一場芭蕾舞表演嚟講,獨舞嘅功用包括咗幫手令觀眾嘅注意力集中喺王子同公主等嘅主角身上,而且做得主角嘅,通常都表示佢哋係個舞團當中最有料到嘅舞蹈員,所以獨舞嘅功用仲包括俾最勁嗰啲舞蹈員展示自己嘅舞技[1][2]

Divertissement

插舞(divertissement;法文讀音:[di.vɛʁ.tis.mɑ̃])喺法文入面係指「賞心悅目嘅分心」噉解:喺古典芭蕾舞劇當中,個編舞師好多時會加插一啲短嘅舞段俾啲舞蹈員展示舞技,呢啲短嘅舞段通常對個故仔嚟講無關痛癢,但係就可以用嚟做大舞段嘅「頭盤」,例如《胡桃夾子》同《天鵝湖》等芭蕾舞劇噉,呢啲芭蕾舞劇嘅故仔當中都有涉及舞會嘅情節,所以個編舞師可以喺呢啲情節當中加返一兩段短嘅舞段俾一啲配角舞蹈員跳,嚟作為(由男女主角跳嘅)大舞段嘅前奏。冇咗插舞嘅話,好多芭蕾舞劇都會短一大截[131]

Tableau

舞版(tableau;法文讀音:[tæ.bləʊ],法文入面「用嚟畫畫嘅表面」噉解)係喺舞台上一幅「由一眾舞蹈員組成嘅畫面」。無論有冇故仔,一齣芭蕾舞劇會有若干幕,而喺每一幕開始嗰陣,個編舞師多數會希望淨係用一個畫面嚟奠定嗰一幕嘅氣氛。一種常用嘅做法係噉嘅:個編舞師會叫嗰一幕出場嘅舞蹈員喺舞台簾打開之前,以特定嘅姿勢企定定;等舞台簾打開咗,觀眾會喺嗰一剎那睇到班舞蹈員企定定所形成嘅畫面,而跟手班舞蹈員就會由嗰個畫面嘅姿勢做起始,開始跳舞;有陣時,喺一幕要終結嗰陣,個編舞師又想用一個畫面總結嗰一幕,所以佢個編舞就會要班舞蹈員喺嗰一幕嘅最後一刻形成特定嘅姿勢,並且企定定,再喺啲舞蹈員冚唪唥以舞版姿勢企定定嘅狀態之下,關埋舞台簾[132]

舉個例子說明,《天鵝湖》個故仔第一幕講王子開舞會慶祝佢嘅生日,而《天鵝湖》編舞嘅一種常用手法係噉嘅:編舞師會安排若干對伴舞隊(睇「corps de ballet」)成員喺舞台上,每對一男一女,每個都以準備開始同自己舞伴跳舞嘅姿勢企定定唔郁,跟手再喺呢個狀態之下叫啲後台人員打開舞台簾,於是喺舞台簾打開嗰幾秒鐘之間,觀眾會見到「一班男男女女準備開始同舞伴跳舞」嘅定格畫面,理解到「開緊舞會」嘅情節,然後班舞蹈員就會乘勢由舞版嘅姿勢開始跳舞[132]

Bravura

氣勢舞(bravura;意大利文讀音:[braˈvuːra])呢個詞源自西人古典樂當中嘅詞「bravura」。「Bravura」大致上指「用嚟曬個表演者嘅技術嘅表演」[133],而喺芭蕾舞上,呢個詞多數用嚟形容一啲編舞上好大膽、要求高技術嘅舞段-呢啲舞段好多時編嚟係為咗要曬個舞蹈員嘅舞技嘅[134]

Csárdás

查達斯(csárdás;英文讀音:[ˈtʃɑːdæʃ])係匈牙利嘅民族舞蹈,喺 1870 年嘅《葛佩莉亞》(Coppélia)當中第一次出現喺芭蕾舞台上。呢種民族舞蹈最大特徵係開頭節奏好慢,跟住節奏會突然間變快。喺芭蕾舞入面,查達斯係一啲初頭節奏慢,跟住節奏突然間變快嘅舞段,除此之外,芭蕾舞查達斯仲有第啲特徵,例如係好多時會加入少量東歐民族舞蹈嘅舞步喺裏面,而且喺服裝上,編舞師編查達斯嗰陣好興要男舞蹈員著住嚟跳同要女舞蹈員著長裙嚟跳[135]

Mazurka

瑪祖卡(mazurka;英文讀音:[-ɜː(r)kə])係波蘭嘅一種民間舞蹈,喺芭蕾舞當中成日俾人用嚟做角色舞段。芭蕾舞嘅瑪祖卡通常跟 3/4 跳,會涉及一男一女嘅一對重要嘅配角同埋若干位伴舞隊隊員,舞步上多以女舞蹈員以輕化嘅舞步圍繞男舞蹈員移動而且男舞蹈員多會中途有一隻膝頭跪地,服裝上傾向用長裙(女舞蹈員)同靴(男舞蹈員)[136]

Finale

結局(finale;英文讀音:[fɪˈnɑːli])係指一場芭蕾舞劇嘅結尾。喺古典芭蕾舞當中,一齣芭蕾舞劇實會有故仔,而故仔就梗要有結局,通常一齣芭蕾舞劇最後嗰場舞段就要負責令氣氛去到高潮,再總括成齣劇個故仔,令到場芭蕾舞劇可以完滿噉落幕-呢個舞段就係芭蕾舞上所講嘅結局。結局嘅舞段多數會好有能量(好多大動作同高難度嘅舞步),配樂會有戲劇性,務求令到觀眾嘅情緒去到頂峰狀態[137]

法文數字[編輯]

喺芭蕾舞上,好多時講嘢嗰陣,講嘢嗰個人會需要掕個數字喺一個行話詞彙後面,例如大雙人舞(grand pas de deux)係指由兩個舞蹈員跳嘅大舞段,大三人舞(grand pas de trois)係指由三個舞蹈員跳嘅大舞段... 等等。而因為現有嘅芭蕾舞技法同概念好多都係喺法國發源嘅,所以芭蕾舞溝通上用嘅數字多數都會係用返法文數字。以下係法文當中「二」至「八」嘅講法[138]

  • Deux:二
  • Trois:三
  • Quatre:四
  • Cinq:五
  • Six:六
  • Sept:七
  • Huit:八

拉雜詞彙[編輯]

Abstract ballet

抽象芭蕾舞(abstract ballet)係指冇故仔嘅芭蕾舞劇。呢類芭蕾舞劇通常注重用芭蕾舞嘅動作表達某啲抽象概念或者情感[139]

Ballet blanc

白色芭蕾舞(ballet blanc;「blanc」係法文入面「白色」噉解)係指啲女舞蹈員著住白色長芭蕾舞裙跳舞嘅芭蕾舞劇,喺浪漫芭蕾舞當中特別常見[140]

Recital

小型舞會(recital)喺芭蕾舞上係指一場由一班人數少嘅舞蹈員(多數唔會係一個芭蕾舞團)所跳嘅小型表演。喺實際應用上,小型舞會通常都係由芭蕾舞學校搞嚟俾啲一班學生做表演嘅,用意在於俾啲學生熟習吓喺台上表演同團隊跳舞,而且如果跳小型舞會嗰班學生係細路,小型舞會亦都幫到手向家長展示啲學生嘅學習成果[141]

Balletomane

芭蕾舞迷(balletomane)係指一個熱愛芭蕾舞嘅人。呢個詞源自 1930 年,係「maniya」(俄羅斯文入面「狂熱」噉解)黐落去「ballet」呢個字嗰度嘅結果[142][143]

睇埋[編輯]

參考[編輯]

  • Beaumont, Cyril W.; Idzikowski, Stanislas (1975) [1922]. A Manual of the Theory and Practice of Classical Theatrical Dancing (Méthode Cecchetti). New York: Dover Publications. ISBN 0-486-23223-9.
  • Greskovic, R. (2006). Ballet 101: A Complete Guide to Learning and Loving the Ballet. Limelight. ISBN 0-87910-325-6.
  • Kersley, Leo; Sinclair, Janet (1981) [1977]. A Dictionary of Ballet Terms (3rd revised ed.). New York: Da Capo Press. ISBN 0-306-80094-2.
  • Minden, Eliza Gaynor (2005). The Ballet Companion: A Dancer's Guide to the Technique, Traditions, and Joys of Ballet. New York: Simon and Schuster. ISBN 0-7432-6407-X.
  • Ryman, Rhonda S. (1998). Dictionary of Classical Ballet Terminology (2nd ed.). London (Hightstown, NJ): Royal Academy of Dancing (distributed in the U.S.A. and Canada by Princeton Book). ISBN 0-9524848-0-3.
  • Glossary of Dance Terms. New York: New York City Ballet. 2010.
  • Beginner's Guide to Ballet (PDF).

[編輯]

  1. 1.00 1.01 1.02 1.03 1.04 1.05 1.06 1.07 1.08 1.09 1.10 1.11 1.12 1.13 1.14 1.15 1.16 Hammond, S. N. (2000). Ballet basics. McGraw-Hill Humanities, Social Sciences & World Languages.
  2. 2.00 2.01 2.02 2.03 2.04 2.05 2.06 2.07 2.08 2.09 2.10 2.11 2.12 2.13 2.14 2.15 Grant, Gail (1982) [1950]. Technical Manual and Dictionary of Classical Ballet (3rd ed.). New York: Dover Publications. ISBN 0-486-21843-0.
  3. Anderson, Jack (1992). Ballet & Modern Dance: A Concise History (2nd ed.). Princeton, NJ: Princeton Book Company, Publishers.
  4. 4.0 4.1 Barre. thefreedictionary.com. Farlex.
  5. 5.0 5.1 Adult Ballet. ThoughtCo.
  6. Debra Craine and Judith Mackrell, "Tutu," in The Oxford Dictionary of Dance (Oxford University Press, 2000).
  7. Leotard 互聯網檔案館歸檔,歸檔日期2017年9月22號,.. Ballethub.
  8. "How to Wear a Dance Belt". Dance Jox.
  9. Reinhardt, Angela (2008) [2008]. Pointe shoes, tips and tricks (1st ed.). Dance Books Ltd.
  10. Ballet technique 互聯網檔案館歸檔,歸檔日期2019年6月22號,.. Ballethub.
  11. Paolacci, Claire (2004). "Serge Lifar and the Paris Opera during World War II". Journal of the Oxford University History Society: 8.
  12. Grieg, Valerie (1994). Inside Ballet Technique: separating anatomical fact from fiction in the ballet class. Hightstown, NJ: Princeton Book Publishers, Company.
  13. 13.0 13.1 Positions of the Arms in Ballet. BalletHub.
  14. Rond de Bras 互聯網檔案館歸檔,歸檔日期2019年6月3號,.. Ballethub.
  15. Cambré 互聯網檔案館歸檔,歸檔日期2019年5月1號,.. Ballethub.
  16. 16.0 16.1 16.2 Janice Barringer; Sarah Schlesinger (2012). The Pointe Book. Princeton Book Company.
  17. Relevé 互聯網檔案館歸檔,歸檔日期2019年5月1號,.. Ballethub.
  18. Sus-sous 互聯網檔案館歸檔,歸檔日期2019年5月1號,.. Ballethub.
  19. Détourné 互聯網檔案館歸檔,歸檔日期2017年9月22號,.. Ballethub.
  20. Détourné, demi 互聯網檔案館歸檔,歸檔日期2017年9月22號,.. Ballethub.
  21. A Look at Tendu for Beginners in Ballet 互聯網檔案館歸檔,歸檔日期2019年5月1號,.. Ballethub.
  22. Cuisse 互聯網檔案館歸檔,歸檔日期2019年6月22號,.. Ballethub.
  23. Dégagé 互聯網檔案館歸檔,歸檔日期2019年5月14號,.. Ballethub.
  24. Retiré 互聯網檔案館歸檔,歸檔日期2019年5月1號,.. Ballethub.
  25. Frappé 互聯網檔案館歸檔,歸檔日期2019年6月29號,.. Ballethub.
  26. Cou-de-pied 互聯網檔案館歸檔,歸檔日期2019年5月1號,.. Ballethub.
  27. 27.0 27.1 Pas de cheval 互聯網檔案館歸檔,歸檔日期2019年7月6號,.. Ballethub.
  28. Coupé 互聯網檔案館歸檔,歸檔日期2019年5月1號,.. Ballethub.
  29. Plié 互聯網檔案館歸檔,歸檔日期2019年3月26號,.. Ballethub.
  30. Échappé 互聯網檔案館歸檔,歸檔日期2017年9月22號,.. Ballethub.
  31. Glissade 互聯網檔案館歸檔,歸檔日期2019年5月18號,.. Ballethub.
  32. Battement 互聯網檔案館歸檔,歸檔日期2019年5月1號,.. Ballethub.
  33. Rond de jambe 互聯網檔案館歸檔,歸檔日期2019年5月1號,.. Ballethub.
  34. Sickling 互聯網檔案館歸檔,歸檔日期2019年5月28號,.. Ballethub.
  35. Sickling in Ballet: What, Why and How to Avoid It 互聯網檔案館歸檔,歸檔日期2019年5月28號,.. Ballethub.
  36. Développé 互聯網檔案館歸檔,歸檔日期2019年5月1號,.. Ballethub.
  37. Enveloppé 互聯網檔案館歸檔,歸檔日期2019年5月2號,.. Ballethub.
  38. Passé 互聯網檔案館歸檔,歸檔日期2019年5月1號,.. Ballethub.
  39. 39.0 39.1 Classical walk 互聯網檔案館歸檔,歸檔日期2019年4月15號,.. Ballethub.
  40. 40.0 40.1 Fondu 互聯網檔案館歸檔,歸檔日期2019年5月6號,.. Ballethub.
  41. Placement 互聯網檔案館歸檔,歸檔日期2019年6月29號,.. Ballethub.
  42. Compound step 互聯網檔案館歸檔,歸檔日期2019年5月1號,.. Ballethub.
  43. Croisé 互聯網檔案館歸檔,歸檔日期2019年6月22號,.. Ballethub.
  44. Effacé 互聯網檔案館歸檔,歸檔日期2019年6月22號,.. Ballethub.
  45. Ouvert 互聯網檔案館歸檔,歸檔日期2017年9月22號,.. Ballethub.
  46. 46.0 46.1 Ballet Positions Of The Body.
  47. Quatrième 互聯網檔案館歸檔,歸檔日期2017年9月22號,.. BalletHub.
  48. Écarté 互聯網檔案館歸檔,歸檔日期2019年6月22號,.. BalletHub.
  49. Épaulment 互聯網檔案館歸檔,歸檔日期2019年7月1號,.. Ballethub.
  50. Préparation 互聯網檔案館歸檔,歸檔日期2019年6月29號,.. Ballethub.
  51. Retombe 互聯網檔案館歸檔,歸檔日期2019年7月5號,.. Ballethub.
  52. Soutenu 互聯網檔案館歸檔,歸檔日期2019年5月29號,.. Ballethub.
  53. Balloné 互聯網檔案館歸檔,歸檔日期2019年6月21號,.. BalletHub.
  54. Ballotté 互聯網檔案館歸檔,歸檔日期2019年5月27號,.. Ballethub.
  55. Polonaise 互聯網檔案館歸檔,歸檔日期2019年7月4號,.. Ballethub.
  56. 56.0 56.1 56.2 Assemblé 互聯網檔案館歸檔,歸檔日期2019年5月18號,.. BalletHub.
  57. Balancé 互聯網檔案館歸檔,歸檔日期2019年5月1號,.. BalletHub.
  58. Chassé 互聯網檔案館歸檔,歸檔日期2017年9月22號,.. BalletHub.
  59. Chassé en tournant 互聯網檔案館歸檔,歸檔日期2019年5月1號,.. BalletHub.
  60. 60.0 60.1 60.2 Pas de chat 互聯網檔案館歸檔,歸檔日期2019年3月26號,.. Ballethub.
  61. 61.0 61.1 Sissonne 互聯網檔案館歸檔,歸檔日期2019年5月1號,.. Ballethub.
  62. 62.0 62.1 Failli 互聯網檔案館歸檔,歸檔日期2019年7月4號,.. BalletHub.
  63. Pas de Basque 互聯網檔案館歸檔,歸檔日期2019年5月1號,.. Ballethub.
  64. Chaînés 互聯網檔案館歸檔,歸檔日期2019年5月1號,.. Ballethub.
  65. Brisé 互聯網檔案館歸檔,歸檔日期2019年5月1號,.. Ballethub.
  66. Brisé volé 互聯網檔案館歸檔,歸檔日期2019年5月1號,.. Ballethub.
  67. Pas de valse 互聯網檔案館歸檔,歸檔日期2019年7月7號,.. Ballethub.
  68. Piqué tour 互聯網檔案館歸檔,歸檔日期2019年4月3號,.. Ballethub.
  69. 69.0 69.1 Entrechat 互聯網檔案館歸檔,歸檔日期2019年6月26號,.. Ballethub.
  70. Bernard Taper (1996) "Balanchine: A Biography".
  71. Agrippina Vaganova (1969) "Basic Principles of Classical Ballet: Russian Ballet Technique".
  72. Greskovic, Robert (2005). Ballet 101: A Complete Guide to Learning and Loving the Ballet. Hal Leonard Corporation.
  73. Batterie 互聯網檔案館歸檔,歸檔日期2017年9月22號,.. Ballethub.
  74. Extension 互聯網檔案館歸檔,歸檔日期2019年6月30號,.. Ballethub.
  75. Line 互聯網檔案館歸檔,歸檔日期2019年5月24號,.. Ballethub.
  76. The Perils of Partnering. Dance Australia.
  77. Oxford English Dictionary, split, n. "4 b. the splits, in acrobatics or stage-dancing. Also in sing."
  78. Renversé 互聯網檔案館歸檔,歸檔日期2019年7月7號,.. Ballethub.
  79. 79.0 79.1 Wiley, Roland John (1997). The Life and Ballets of Lev Ivanov. New York: Oxford University press.
  80. 80.0 80.1 Arabesque 互聯網檔案館歸檔,歸檔日期2017年9月22號,.. BalletHub.
  81. 81.0 81.1 Attitude 互聯網檔案館歸檔,歸檔日期2017年9月22號,.. BalletHub.
  82. Fish dive 互聯網檔案館歸檔,歸檔日期2017年9月22號,.. BalletHub.
  83. Lin, C. W., Chen, S. J., Su, F. C., Wu, H. W., & Lin, C. F. (2014). Differences of ballet turns (pirouette) performance between experienced and novice ballet dancers. Research quarterly for exercise and sport, 85(3), 330-340.
  84. Denardi, R. A., & Corrêa, U. C. (2013). Effects of instructional focus on learning a classical ballet movement, the pirouette. Journal of Dance Medicine & Science, 17(1), 18-23.
  85. Ballet: Tips for Pirouettes. ThoughtCo.
  86. Ballet 101: Names of the Most Popular Ballet Turns.
  87. Dance Spotting: Technique Not To Get Dizzy.
  88. 88.0 88.1 Promenade 互聯網檔案館歸檔,歸檔日期2019年6月25號,.. BalletHub.
  89. Finger Turns 互聯網檔案館歸檔,歸檔日期2019年6月21號,.. Ballethub.
  90. Allegro 互聯網檔案館歸檔,歸檔日期2017年9月22號,.. BalletHub.
  91. How To: A Tour en l'Air. DanceTeacher.
  92. Cabriole 互聯網檔案館歸檔,歸檔日期2019年5月1號,.. BalletHub.
  93. 93.0 93.1 Jeté 互聯網檔案館歸檔,歸檔日期2019年5月1號,.. BalletHub.
  94. Lepelley, M. C., Thullier, F., Koral, J., & Lestienne, F. G. (2006). Muscle coordination in complex movements during Jeté in skilled ballet dancers. Experimental brain research, 175(2), 321-331.
  95. Hackney, J., Brummel, S., Jungblut, K., & Edge, C. (2011). The effect of sprung (suspended) floors on leg stiffness during grand jeté landings in ballet. Journal of Dance Medicine & Science, 15(3), 128-133.
  96. Coupé-jeté en tournant 互聯網檔案館歸檔,歸檔日期2019年5月3號,.. Ballethub.
  97. Rivoltade 互聯網檔案館歸檔,歸檔日期2019年7月6號,.. Ballethub.
  98. Gargouillade 互聯網檔案館歸檔,歸檔日期2019年5月1號,.. Ballethub.
  99. Adagio 互聯網檔案館歸檔,歸檔日期2019年5月1號,.. BalletHub.
  100. Balançoire 互聯網檔案館歸檔,歸檔日期2019年5月1號,.. BalletHub.
  101. Center 互聯網檔案館歸檔,歸檔日期2019年5月1號,.. Ballethub.
  102. 102.0 102.1 Port de bras 互聯網檔案館歸檔,歸檔日期2019年5月1號,.. Ballethub.
  103. Ballet Terms Dictionary 互聯網檔案館歸檔,歸檔日期2019年3月26號,.. Ballethub.
  104. Seconde, à la 互聯網檔案館歸檔,歸檔日期2017年9月22號,.. BalletHub.
  105. Cloche, en 互聯網檔案館歸檔,歸檔日期2017年9月22號,.. Ballethub.
  106. Barker/Kostrovitskaya: 101 Lessons in Classical Ballet - 1977.
  107. Croix, en 互聯網檔案館歸檔,歸檔日期2019年6月20號,.. Ballethub.
  108. Fermé 互聯網檔案館歸檔,歸檔日期2019年7月1號,.. Ballethub.
  109. Manèges 互聯網檔案館歸檔,歸檔日期2017年9月22號,.. Ballethub.
  110. Piqué 互聯網檔案館歸檔,歸檔日期2019年6月24號,.. Ballethub.
  111. Tournant, en. Glosario Ballet.
  112. 112.0 112.1 Reverence in Ballet. ThoughtCo.
  113. Ballerina 互聯網檔案館歸檔,歸檔日期2019年5月1號,.. Ballethub.
  114. "Ballet Company". Teatro alla Scala. Ballet Company, citing appointment as prima ballerina assoluta of La Scala in 1992.
  115. Ballerino 互聯網檔案館歸檔,歸檔日期2019年5月1號,.. Ballethub.
  116. Danseuse. The Free Dictionary.
  117. 117.0 117.1 Danseuses et danseurs étoile.
  118. Garafola, L. (1985). The travesty dancer in nineteenth-century ballet. Dance Research Journal, 17(2), 35-40.
  119. 119.0 119.1 Danseur 互聯網檔案館歸檔,歸檔日期2019年5月1號,.. Ballethub.
  120. Cavalier 互聯網檔案館歸檔,歸檔日期2019年4月13號,.. Ballethub.
  121. Coryphée 互聯網檔案館歸檔,歸檔日期2019年4月18號,.. Ballethub.
  122. Boisseau, Rosita (26 September 2017). "Danse: les adieux d'une étoile sur une rivière de joyaux". Le Monde.
  123. 123.0 123.1 Boisseau, Rosita (29 December 2016). "Germain Louvet élevé au rang de danseur étoile". Le Monde.
  124. The male virtuosos who prove that ballet isn't just for ballerinas. The Royal Opera House.
  125. Koegler, Horst (1982). Concise Oxford Dictionary of Ballet (2nd ed.). Oxford University Press.
  126. Ballet Master / Ballet Mistress 互聯網檔案館歸檔,歸檔日期2019年4月10號,.. Ballethub.
  127. Régisseur 互聯網檔案館歸檔,歸檔日期2019年5月11號,.. Ballethub.
  128. Choreographer 互聯網檔案館歸檔,歸檔日期2019年4月17號,.. Ballethub.
  129. The Most Famous Classical Ballets of All Time. ThoughtCo.
  130. 130.0 130.1 130.2 Pas 互聯網檔案館歸檔,歸檔日期2019年5月1號,.. Ballethub.
  131. Divertissement 互聯網檔案館歸檔,歸檔日期2019年5月2號,.. Ballethub.
  132. 132.0 132.1 Tableau 互聯網檔案館歸檔,歸檔日期2019年5月4號,.. Ballethub.
  133. John Alexander Fuller-Maitland, A dictionary of music and musicians (A.D. 1450-1889). p. 271-272
  134. The Cambridge Companion to Ballet, p. 151.
  135. Lafex, A. E. (2013). Reviving Ballet in the Nineteenth Century: Music, Narrative, and Dance in Delibes's Coppélia (Doctoral dissertation, University of Kansas).
  136. Mazurka 互聯網檔案館歸檔,歸檔日期2019年7月4號,.. Ballethub.
  137. Finale 互聯網檔案館歸檔,歸檔日期2019年6月25號,.. Ballethub.
  138. How to Count to 100 in French.
  139. Abstract Ballet 互聯網檔案館歸檔,歸檔日期2019年4月3號,.. Ballethub.
  140. Ballet Blanc 互聯網檔案館歸檔,歸檔日期2019年5月1號,.. Ballethub.
  141. 5 Benefits of Dance Recital Participation.
  142. Balletomane 互聯網檔案館歸檔,歸檔日期2019年5月1號,.. Ballethub.
  143. Balletomane. The New Yorker.

[編輯]