芭蕾舞腳位

出自維基百科,自由嘅百科全書
(由五大腳位跳轉過嚟)
一班細路喺度練第五腳位;五大腳位係初班實會教嘅芭蕾舞技巧。

芭蕾舞腳位粵拼baa1 leoi4 mou5 goek3 wai2英文ballet positions of the feet)係最基本嗰種芭蕾舞技巧,指一柞用嚟起始同終結每個舞步腳板位置。

腳位係芭蕾舞當中最緊要最基礎嘅技巧之一:古典芭蕾舞嘅舞步冚唪唥都係以五大腳位當中其中一個起始同作結嘅-喺跳舞嗰陣,舞蹈員會用其中一個腳位起始,做個舞步,做完之後又成其中一個腳位(有啲舞步可能會做前做後腳位變咗,有啲做前做後腳位不變),跟住再去做下一個舞步,如是者一路做到跳完段舞為止[1][2]

五大腳位[編輯]

一般嚟講,無論係跟邊個門派,芭蕾舞學生首先要學識嘅實係喺 1725 年由法國芭蕾舞大師皮雅·布淳諗出嚟嘅五大腳位(The five positions of the feet)[1]。五大腳位大致上如下[2]

  • 第一腳位(first position):兩腳腳踭掂住位住身體正下方,而腳尖就指住相反方向,雙要直一直。
  • 第二腳位(second position):似第一腳位,但係兩腳腳踭要分開,彼此之間維持大約髖關節咁闊嘅距離。順帶一提,用第二腳位做 grand plié (一種基礎芭蕾舞舞步,雙髀喺個膝頭嗰度向外彎曲、同時上半身維持垂直、而且身體冇橫向郁動)嗰陣,腳板會由頭到尾掂地(用第啲腳位做宏髀屈曲嗰時,腳踭會中途離地)。
  • 第三腳位(third position):同第一腳位類似,但係雙腳嘅腳踭要互相平行,大致上去到另一隻腳板嘅中間位置;呢個係比較少用嘅一個腳位,因為成日俾人以為係一個做得衰嘅第一或者第五腳位。
  • 第四腳位(fourth position):兩隻腳板平行但腳尖指住相反方向,腳尖要去到另一隻腳踭咁遠,兩隻腳板相距大約一隻腳板嘅距離。呢個腳位都係比較少用。
  • 第五腳位(fifth position):係五大腳位當中最難做嗰個;同第四腳位類似,唯一嘅分別係兩隻腳板要掂住。
圖解
五大腳位嘅抽象圖解;最左手邊係第一腳位,佢隔離嘅係第二腳位,如此類推。
第一腳位 第二腳位 第三腳位 第四腳位 第五腳位

五大之後[編輯]

除咗五大腳位,後期嘅芭蕾舞仲有咗由烏克蘭裔芭蕾舞蹈員 Serge Lifar 發明嘅第六同第七腳位,不過呢啲腳位冇咁常用,而且使用嘅分佈亦都冇咁廣[3]

第六腳位

兩隻腳並排一齊。

第七腳位

雙腳好似第四腳位噉一前一後,不過要腳尖企(en pointe),腳踭嘅底向住中間,「左腳前右腳後」定「左腳後右腳前」都得。

實例[編輯]

睇埋[編輯]

[編輯]

  1. 1.0 1.1 Ballet Terms for Beginners. TutuTix.
  2. 2.0 2.1 Hammond, S. N. (2000). Ballet basics. McGraw-Hill Humanities, Social Sciences & World Languages.
  3. Paolacci, Claire (2004). "Serge Lifar and the Paris Opera during World War II". Journal of the Oxford University History Society: 8.

[編輯]