腳尖企

出自維基百科,自由嘅百科全書
跳去導覽 跳去搵嘢
一位 ballerina 喺度做緊腳尖企,同時佢對手臂處於 RAD 第五手位

腳尖企粵拼geok3 zim1 kei5英文en pointe)係一種芭蕾舞上嘅技巧,傳統上通常係女舞蹈員先會用嘅,指個舞蹈員[1][2]

  • 腳踭離地,淨係腳趾尖掂地,用腳趾尖支撐住全身嘅重量,而且
  • 支撐身體嘅要伸到直一直;

傳統上,腳尖企俾人認為係專業女芭蕾舞蹈員想追求嘅技巧:一個女芭蕾舞蹈員做腳尖企嘅姿態一般都俾人覺得係好體現到芭蕾舞追求嘅輕盈美感[3];而事實係,腳尖企要求極高嘅技術-腳尖企會對舞蹈員嘅腳趾造成極大嘅壓力,腳尖企做得唔好成日都會搞到舞蹈員整親,而一路做腳尖企一路做腳尖旋轉(pirouette)等嘅進階舞步更加係要求好勁嘅平衡力,所以普遍認為,一個芭蕾舞蹈員「能夠喺腳尖企嘅情況下順暢噉做出舞步」表示佢係有返咁上下技術嘅[4]

技巧[編輯]

腳尖企技巧包含咗力學同美學兩部份。「力學」係指個舞蹈員要識得身體點擺、手同腳嘅位置要令到身體能夠喺成個過程-由變腳尖企至到做完返去正常企-當中維持平衡;而「美學」就係指對眼望嘅方向同手臂嘅擺位嘅擺位等嘅嘢要能夠配合腳尖企嘅動作,形成一個整體上有美感嘅姿勢。

進入腳尖企[編輯]

一般嚟講,要由「唔係腳尖企」進入「腳尖企」嘅狀態,有三種方法[5]

  • Relevé:指個舞蹈員兩隻腳板一齊喺企定定嘅腳位,然後兩腳一齊腳踭離地,雙髀外開進入半腳尖企狀態,最後再進入腳尖企;
  • Sauté:指個舞蹈員係噉咦彈起,再以腳尖企嘅形式降落,常用於節奏快啲嘅舞段;
  • Piqué:指個舞蹈員一腳踏出去(伸出去嗰條髀要伸直),並且以腳尖企落地,跟手另外嗰隻腳就去佢要去嘅位(例如係跟住踏前變成第五腳位腳尖企);

半腳尖企[編輯]

內文:半腳尖企

半腳尖企(demi-pointe)指跳舞嗰個人淨係腳板嘅前半橛掂地而腳踭離地,相對於完全腳尖企要求跳舞嗰個人淨係得腳趾尖掂地。半腳尖企可以話係容易版嘅腳尖企-喺腳尖企嗰陣,個舞蹈員全身嘅體重會將壓力施加落去腳趾嗰度,而做半腳尖企嗰陣,個舞蹈員嘅身體重量會由腳趾加埋腳板前半橛一齊承受[1]

半腳尖企喺舞台同課堂上都有用:男芭蕾舞蹈員會做大量嘅半腳尖企;而喺芭蕾舞教育上,芭蕾舞老師通常都會要初階學生練習勁喺練功扶手隔離做半腳尖企;噉做用意在於想要學生習慣吓「腳板唔完全掂地」嘅感覺,準備第時學做腳尖企,而除此之外,練習做半腳尖企仲可以提升學生腳板同腳瓜肌肉力量,而等到佢哋平衡力同肌肉力量有返咁上下,老師就可以開始要佢哋試吓做完全嘅腳尖企[1]

一位 ballerino 喺度做半腳尖企嘅 90 度阿拉伯斯卡舞姿-佢腳踭離地,但腳板嘅前半橛仲係掂地嘅。

足尖鞋[編輯]

一對足尖鞋;鞋腳尖嗰部份加強咗。
內文:足尖鞋

足尖鞋(pointe shoes)係一種為女芭蕾舞蹈員特別設計嘅芭蕾舞鞋,俾好多人認為係芭蕾舞用具當中其中一種最易認、最廣為人知嘅。足尖鞋嘅特徵係喺腳尖個位特別加強咗,會用厚嘅布料甚至嚟造(正常嚟講,芭蕾舞鞋係用絲綢真皮等軟淋淋嘅物料造嘅),令到著住呢種鞋嘅舞蹈員能夠做完全嘅腳尖企做一段長啲嘅時間。足尖鞋通常唔擺得幾耐:一個舞蹈員著住呢啲鞋嗰時,通常會係噉勁做腳尖企-將自己全身嘅重量施落去對鞋嘅腳尖位度,所以一對足尖鞋通常著得嗰十零廿個鐘頭已經開始爛;相比之下,一對普通嘅芭蕾舞鞋喺正常情況下,起碼可以著到成兩三個月[6]

足尖鞋源於浪漫芭蕾舞(romantic ballet)盛行嘅 1820 年代[7],當時意大利名芭蕾舞蹈員瑪麗塔里奧尼(Maria Taglioni)開始咗嘗試做腳尖企,而因為當時仲未有足尖鞋呢家嘢,佢就自己郁手改造自己對軟鞋,將棉花塞入去對鞋嘅腳尖位嗰度,等自己做腳尖企嗰陣腳趾冇咁辛苦。打後腳尖企開始盛行,成為正規芭蕾舞技巧嘅一部份,正式令到芭蕾舞界研究整足尖鞋。而遲吓到咗 1862 年,足尖鞋嘅製作技術成熟,大致上成為咗廿一世紀見到嘅樣[8]

睇埋[編輯]

[編輯]

  1. 1.0 1.1 1.2 Hammond, S. N. (2000). Ballet basics. McGraw-Hill Humanities, Social Sciences & World Languages.
  2. Janice Barringer; Sarah Schlesinger (2012). The Pointe Book. Princeton Book Company.
  3. Ivor Guest, The Romantic Ballet in Paris (Alton, Hampshire: Dance Books, 2008).
  4. Yang, Raissa. "Understanding Pointe". Weebly.com.
  5. Theory and Practice of Classical Theatrical Dancing, C. Beaumont, S. Idzikowski
  6. Reinhardt, Angela (2008) [2008]. Pointe shoes, tips and tricks (1st ed.). Dance Books Ltd.
  7. Garafola, L. (1997). Rethinking the Sylph: New Perspectives on the Romantic Ballet. Wesleyan University Press.
  8. Pointe Shoes. Ballet Hub.

[編輯]