旋轉舞步

一位旋轉緊嘅佛蘭明歌舞蹈員

旋轉舞步（粵拼：syun4 zyun2 mou5 bou6；英文：turn）係好多種舞蹈當中都有嘅一類舞步，指跳舞嗰個人以一條垂直嘅軸作為軸心，旋轉自己嘅身體。舞蹈員所轉嘅總角度由 90 度以至 360 度都有，有啲類型嘅旋轉舞步甚至會涉及個舞蹈員一嘢轉好幾個圈，而轉多過一個圈嘅旋轉舞步會有「雙重旋轉」（double turn）同「三重旋轉」（triple turn）等嘅名。

喺舞蹈上，旋轉舞步係一個大嘅類。除咗轉嘅角度之外，旋轉舞步仲可以按好多屬性分類：

• 幾多隻腳掂地－有啲旋轉會要個舞蹈員一路兩腳都掂地一路轉（例如係芭蕾舞當中嘅連鎖旋轉），又有啲會要個舞蹈員喺其中一條髀抬起咗嘅情況之下旋轉（例如芭蕾舞當中嘅腳尖旋轉），而有啲旋轉舞步甚至乎會涉及個舞蹈員跳起，喺空中轉若干角度之後再落返地；
• 以乜方法起始－有好多旋轉舞步都會要個舞蹈員兩腳進入半腳尖企（指隻腳掌淨係前半橛掂地）嘅狀態先至開始旋轉；
• 上身嘅狀態－喺做旋轉舞步嗰陣，頭、手臂同身體嘅擺位都可以有好多變化。

喺好多舞種入面，旋轉舞步都屬於好考驗舞蹈員技術嘅舞步。例如喺芭蕾舞（ballet）裏面，旋轉嘅過程要求舞蹈員識防頭暈嘅技巧，要佢哋有高強嘅平衡力，能夠一路半腳尖企一路保持平衡（女舞蹈員往往仲需要做完全嘅腳尖企），佢哋仲要有強勁嘅核心肌，用呢啲肌肉嘅力量起始同維持旋轉；而且做旋轉又有一定嘅危險，可以搞到舞蹈員跌親；不過，旋轉舞步嘅高技術性令呢類舞步成為咗芭蕾舞表演當中最矚目嘅部份之一，所以對芭蕾舞蹈員嚟講，「做旋轉舞步做得靚」係其中一樣佢哋最想追求嘅嘢。

定點法

内文：定點法

定點法（spotting）係做旋轉舞步嘅基本技巧，指個舞蹈員喺旋轉嗰陣，雙眼盡可能維持望同一個點：包括芭蕾舞在內嘅多種舞蹈都會要求舞蹈員做旋轉，而激得滯嘅旋轉有可能會搞到個舞蹈員頭暈；定點法就係一種喺旋轉當中用嘅技巧，涉及個舞蹈員特登將佢頭頸同身體其他部份轉速唔一致－

• 喺啱啱開始旋轉嗰時，舞蹈員條頸以下嘅身體要加速，但頭同頸就要盡量唔好轉住繼續向住前面，
• 然後等條頸以下嘅身體轉到咁上下，頭唔可以再向住前面，頭頸先至一嘢轉嗮大半個圈，再返去原初嘅位置。

即係話用咗定點法嘅話，個舞蹈員身體會以恆定嘅速度旋轉，而頭就大多數時間都向住同一個方向，等佢冇咁容易頭暈。喺練習定點法嗰陣，一個芭蕾舞學生通常會要自己一路練、一路望實埲牆上面嘅某一點，所以呢種技巧就有咗個名叫「定點法」。

芭蕾舞

美國芭蕾舞蹈員蘇珊·花里做完全腳尖企嘅腳尖旋轉；幅相係 1965 年影嘅。

旋轉舞步係芭蕾舞（ballet）入面不可或缺嘅一環。傳統嘅芭蕾舞技巧當中有多種旋轉舞步，而且芭蕾舞取得嘅重大成功仲令到好多其他舞種都採用咗芭蕾舞當中嘅旋轉技巧。以下呢幾種係最出名嘅芭蕾舞旋轉舞步：

連鎖旋轉

連鎖旋轉（chaînés，又有叫「chaînés turns」；法文讀音：[ʃɛne]）係指雙腳腳尖企（pointe）或者半腳尖企（demi-pointe）嘅情況下一路旋轉一路移位，最簡單嗰種做法如下：首先，個舞蹈員要用第一腳位企喺度，手臂多數喺第一或者第五手位，跟手佢兩隻腳要進入腳尖企或者半腳尖企嘅狀態，喺兩隻腳板之間距離不變嘅狀態之下，佢要用髖關節嘅力量旋轉，令到其中一隻腳郁，另外嗰隻腳就做旋轉嘅軸心，成個人 180 度旋轉，而喺下一個旋轉當中，用髖關節嘅力令到另外嗰隻腳郁，啱啱郁咗嗰隻腳要改為做旋轉軸心，旋轉方向不變，而個芭蕾舞舞蹈員要重複呢個過程若干次（所以就叫「連鎖」），形成好似成個人輕盈噉一路旋轉一路「飄」過舞台噉嘅視覺效果。

呢個舞步有陣時會俾人稱之為「猛衝」（déboulé；法文讀音：[debule]），噉因為連鎖旋轉嘅法文全名係「les tours chaînés déboulés」（連鎖猛衝旋轉）。

刺步旋轉

刺步旋轉（piqué tour，又有叫「piqué turn」；法文讀音：[pike tuʁz]）係女舞蹈員常用嘅舞步。喺做刺步旋轉嗰陣，個舞蹈員將其中一隻腳伸出去（例如用 tendu），嗰隻腳跟住會半腳尖企或者腳尖企掂地，跟手個舞蹈員再將身體重心一嘢移去嗰隻腳尖企或者半腳尖企嘅腳掌嗰度，跟手再用嗰條髀做軸心旋轉，另外嗰條髀劃過空中，最後仲可以乘勢停低變成阿拉伯斯卡舞姿（arabesque；芭蕾舞一種舞步，涉及個舞蹈員上身向前傾，其中一條髀抬起身體後方，淨係用一隻腳支撐身體）嘅姿勢。

腳尖旋轉

腳尖旋轉（piroutte；法文讀音：[piʁwɛt]，呢個字喺法文入面係「旋轉」噉解）俾人認為係最有美感最好玩嘅芭蕾舞舞步之一，指個舞蹈員喺其中一條髀抬起咗嘅情況下旋轉。最簡單嗰種腳尖旋轉係噉做嘅：個舞蹈員首先要雙手成第二手位（雙手大開），一隻腳企定定，而另一隻腳處於第二腳位噉嘅位置伸出，兼且淨係腳尖掂地；跟手處於第二腳位位置嗰隻腳要向後移，令雙腳成一前一後嘅第四腳位，同時雙手要變成第四手位相交（睇芭蕾舞手位），跟住再用一個快速嘅抽起將向後移咗嗰條髀抬起，用企定定嗰隻腳做旋轉嘅軸心（呢隻腳要同時變腳尖企），用快速抽起嗰股力加埋核心肌乘勢令個身體開始旋轉至少 360 度，可以再轉若干個圈。腳尖旋轉可以按照做旋轉嗰陣條髀抬高嘅角度、雙手嘅位置、或者係轉幾多個圈等嘅因素再細分做幾種，重點係個舞蹈員喺其中一條髀抬起咗嘅情況之下旋轉。

喺學芭蕾舞嘅過程當中，腳尖旋轉通常都係起碼去到中階嘅學生先會做嘅，噉係因為佢屬於相當之高難度嘅一種舞步，要求個學生有極之勁嘅核心肌同埋平衡力，俾人形容做「芭蕾舞蹈員冚唪唥都想做到最好嘅大師級舞步」。亦都因為噉，腳尖旋轉係比較高階啲嘅芭蕾舞考試當中差唔多實會考嘅一種舞步。

• 宏腳尖旋轉（grand piroutte，又有叫「piroutte à la seconde」）係指抬起髀抬起 90 度嘅腳尖旋轉。

擺位

一位女芭蕾舞蹈員喺佢舞伴嘅輔助下做腳尖旋轉。

喺做腳尖旋轉嗰陣，一個舞蹈員身體各部份都要有準確嘅擺位，先至唔會失平衡：

• 頭頸：
  • 雙眼要向前而且係噉咦向上；
  • 條頸要伸到直一直；
  • 要識做定點；
• 軀幹：
  • 膊頭要放鬆，心口要大開；
  • 肩胛骨要同背脊連接；
  • 核心肌肉要用力;
• 髖同臀：
  • 髖關節要同地板平行；
  • 用臀部嘅肌肉令抬起髀外開；
• 髀同腳：
  • 雙髀要能夠快速同準確噉上升；
  • 支撐髀成條髀同腳板要伸到直一直，成條髀嘅肌肉用力；
  • 高嘅半腳尖企。
• 整體：
  • 上身同支撐髀要成一條垂直嘅線；

一個男舞蹈員用揮鞭轉轉向做腳尖旋轉。

揮鞭轉

揮鞭轉（fouetté；法文讀音：[fwɛte]）係指一個舞蹈員運用支撐髀嘅肌肉，令到自己成個身體同埋條抬起髀以支撐髀做軸心轉向若干角度（由 45 度以至 180 度嘅都得）。揮鞭轉嘅一個例子如下：個舞蹈員條抬起髀向前伸前抬起，而條支撐髀進入半腳尖企狀態，而條支撐髀跟住快速噉旋轉 180 度，令到身體變成向住相反方向，而條抬起髀就變成喺身後面好似阿拉伯斯卡舞姿（arabesque）噉嘅狀態。揮鞭轉可以用嚟將身體由向前轉成向後、由向側轉成向後、或者由向後轉成向側等等都得，重點係運用支撐髀嘅旋轉嚟改變身體同抬起髀面向嘅方向。

• 揮鞭轉轉向（fouetté turn）係腳尖旋轉當中嘅一種重要技巧，步驟如下：首先，個舞蹈員條支撐髀要做一個髀屈曲（雙髀屈曲，令身體下沉），然後條抬起髀要向前伸，再一嘢揈去身體側面或者後面嘅位置，跟手條抬起髀收返埋、變成抽起噉嘅狀態掂住支撐髀嘅膝頭，同時條支撐髀要伸返直同變成半腳尖企或者腳尖企。呢個過程會產生一股力，令成個人繼續旋轉，而喺完成咗一個轉之後，個舞蹈員可以重複以上嘅步驟，令自己身體再繼續旋轉若干個圈。

睇埋

• 舞蹈
• 華爾茲
• 芭蕾舞
• 芭蕾舞技巧
• 物理上講嘅轉動