緊身褲

兩位芭蕾舞蹈員著住襪褲跳舞。

緊身褲（粵拼：gan2 san1 fu3 | 英文：tights）係一種衣物，指一條緊身噉包住腰並且一路最少包到腳踭位嘅褲，而如果條褲包埋腳板嘅話，噉條褲就算一條襪褲（footed tights）。緊身褲有好多功用，包括著喺條面褲下面做保暖，或者係跳芭蕾舞嗰陣用嚟展示身體線條呀噉。

舞蹈上嘅使用

睇埋：芭蕾舞

古典芭蕾舞嘅舞蹈員喺跳舞嗰陣通常會著緊身褲或者襪褲。一般認為，著住緊身褲跳芭蕾舞有以下嘅好處：

• 緊身褲會輕輕噉壓縮雙髀嘅肌肉，改善血液循環。
• 緊身褲喺凍嗰陣可以幫對髀保暖，喺熱嗰陣就可以吸汗。
• 緊身褲表面一般都比較平滑，所以喺個舞蹈員做一啲會涉及雙髀互相掂到嘅舞步嗰陣，緊身褲可以起到減低摩擦力嘅作用。
• 喺練習嗰陣，一個學生著住緊身褲令老師可以睇清楚佢雙髀每一嚿肌肉嘅狀態啱唔啱；事實係喺 18 世紀，啲人最初提議男芭蕾舞蹈員要著緊身褲嗰陣其中一個最重要嘅理由就係，佢哋發覺當時男芭蕾舞蹈員「著一般嘅長褲跳舞」嘅做法搞到老師成日都睇唔到男學生上堂嗰時嘅失誤。
• 喺表演嗰陣，緊身褲幫到舞蹈員展示身體嘅線條。