呢篇文係一篇好文。想知更多,請撳呢個掣。

雙人舞

出自維基百科,自由嘅百科全書
Jump to navigation Jump to search

2017 年一場芭蕾舞表演嘅大雙人舞;「女舞蹈員喺男舞蹈員支撐下做出特大角度嘅阿拉伯斯卡」係雙人舞常見嘅舞步之一[1]

雙人舞粵拼soeng1 jan4 mou5英文pas de deux法文讀音:[pɑ d(ə) dø];呢個字係法文裏面「兩個人嘅舞步」噉解)喺芭蕾舞上係指由(通常一男一女)兩位舞蹈員一齊跳嘅一段舞:編舞師一般都會想飾演一齣芭蕾舞劇嘅男女主角嗰兩位舞蹈員一齊跳返幾段有浪漫氣氛嘅舞,表達「男女主角墮入愛河」嘅情節;而呢啲舞段往往會係成齣芭蕾舞劇最矚目嘅部份之一[2]-好似《天鵝湖》當中王子同天鵝公主跳嘅雙人舞、仲有係《胡桃夾子》當中由糖梅仙子同騎士所跳嘅雙人舞等等,都屬於芭蕾舞史上最廣為人知嘅舞段[3][4]

雙人舞亦係芭蕾舞當中最講求技術嘅部份之一:芭蕾舞有好多進階舞步同技巧都係專門設計嚟俾兩個人一齊跳嘅-比較簡單嘅例子有由男舞蹈員捧起佢舞伴,又或者係由男舞蹈員支撐住女舞蹈員,再要女舞蹈員做出冇支撐做唔到嘅特大角度阿拉伯斯卡(arabesque)等等[5];對於男主角嚟講,跳雙人舞多數都會或多或少噉要求佢做支撐舞伴嘅工作,甚至乎要佢捧起舞伴以及捧住舞伴行一段距離,所以雙人舞會要求男舞蹈員有一對強而有力嘅雙臂;而對於女主角嚟講,佢喺俾舞伴捧起嗰陣,需要非常留意自己身體嘅擺位以及平衡,否則就會有可能會搞到佢舞伴失平衡,然後兩個人一齊仆落地[6][7]

因為雙人舞嘅重要性同技術性,有唔少古典芭蕾舞老師都會用雙人舞評估學生嘅進度,例如源自俄羅斯華加諾娃派(Vaganova method)芭蕾舞就主張,大雙人舞可以用嚟一嘢展示嗮所有重要嘅芭蕾舞技巧,所以跟呢個門派嘅學生喺要畢業嗰陣,會俾老師要求佢哋跳一場大雙人舞(grand pas de deux)展示佢哋所學[8]

常用技巧[編輯]

睇埋:芭蕾舞詞彙表#進階技巧

芭蕾舞當中有唔少技巧係專門設計嚟喺雙人舞當中使用嘅,又或者係單人都做到嘅舞步會有喺雙人舞下先做到嘅版本[9][10]

NWFusion11.jpg NWFusionPaquitaPasLift.jpg Ballet Teresa Carreño.jpg Pirouette.gif
魚衝式舞姿 一位男舞蹈員高舉自己舞伴;
佢舞伴做緊阿拉伯斯卡。
傾斜阿拉伯斯卡 一位女舞蹈員喺佢舞伴輔助下
做腳尖旋轉。

高舉[編輯]

高舉(lift / ballet lift)指雙人舞當中其中一方(通常係男主角)捧起另一方(通常係女主角)嘅技巧。喺最簡單嗰種情況下,女主角會做一啲姿勢(例如係阿拉伯斯卡或者 port de bras 等等),然後女主角一路做一路俾男主角舉起佢,令女主角成為全舞台嘅注意力焦點[11]。高舉通常係比較進階嘅芭蕾舞先會做嘅,因為呢個動作要求相當強嘅體力,而且對男主角嚟講,做得唔正確會有搞到腰背受傷嘅危險[12]

阿拉伯斯卡[編輯]

睇埋:阿拉伯斯卡

阿拉伯斯卡(arabesque;法文讀音:[aʁabɛsk])係芭蕾舞入面常用嘅一種舞步,涉及個舞蹈員淨係一隻腳掂地(掂地嗰隻髀叫支撐髀)而另外嗰隻髀(抬起髀)就外開並且抬高去身體後面,而且要伸到直一直,手嘅位置唔定,而支撐髀嘅腳板可以處於腳尖企(en pointe;指淨係腳趾尖掂地)或者半腳尖企(demi-pointe;指淨係腳板前半橛掂地)嘅狀態都得。噉做目的係要令成個身體形成一條由膊頭一路延伸落去抬起咗嗰隻髀嘅腳趾尾嗰度嘅線,達到一個嘅視覺效果[13][14]

傾斜阿拉伯斯卡(arabesque penché)係雙人舞常見嘅一種阿拉伯斯卡,指抬起髀抬起嘅角度大到抬起髀腳板嘅位置高過個舞蹈員嘅頭[15]。傾斜阿拉伯斯卡通常淨係會喺雙人舞當中見到:就算對專業嘅舞蹈員嚟講,獨力噉做傾斜阿拉伯斯卡都係一個高難度動作,所以芭蕾舞編舞一個常見嘅做法係,要一位強壯嘅男舞蹈員支撐住一位身體柔軟嘅女舞蹈員,再由女舞蹈員一路用佢舞伴做支撐一路做出傾斜阿拉伯斯卡[9][10]

2002 年一場《芝莎》(Giselle)表演當中嘅傾斜阿拉伯斯卡;兩人做緊嘅舞步表達齣芭蕾舞劇情節之餘,又展現佢哋嘅身手。

魚衝式舞姿[編輯]

魚衝式舞姿(fish dive)係高舉嘅一種,涉及一位女舞蹈員抽起(retiré)佢其中一條髀,將抽起髀屈曲,令抽起髀腳板去到另一條髀膝頭咁高嘅位置,再由佢舞伴捧住佢橫向噉移動,令佢好接近地板噉「飄」過若干距離(但佢成個人由始至終都掂唔到地板)-就好似一條游過河床嘅噉。魚衝式舞姿好多時係由個女舞蹈員做嘅阿拉伯斯卡做起始嘅:當個女舞蹈員做緊阿拉伯斯卡舞姿,要轉換做魚衝嗰陣,佢舞伴通常會用佢兩隻手分別托住佢條腰同抬起咗嗰條髀嘅大髀,然後個女舞蹈員再將自己條支撐髀移位變成魚衝式嘅位,乘勢改變姿勢變成魚衝式[16]

腳尖旋轉[編輯]

睇埋:腳尖旋轉

腳尖旋轉(piroutte;法文讀音:[piʁwɛt],呢個字喺法文入面係「旋轉」噉解)係一種旋轉舞步,俾人認為係最有美感最好玩嘅芭蕾舞舞步之一。

  • 腳尖旋轉可以係一個人做嘅:喺最簡單嗰種情況下,個舞蹈員首先要雙手成第二手位,一隻腳企定定,而另一隻腳處於第二腳位噉嘅位置兼且淨係腳尖掂地(即係 tendu à la seconde);跟手出咗去嗰隻腳要向後移,令雙腳成第四腳位,同時雙手要變成第三手位,跟住再用一個快速嘅抽起(retiré)將出咗去嗰條髀抽起,用企定定嗰隻腳做旋轉嘅軸心,用快速抽起嗰股力加埋核心肌嘅力,乘勢令個身體旋轉至少 360 度,轉若干個圈[17][18]
  • 雙人舞上嘅腳尖旋轉通常係由男舞蹈員捉住女舞蹈員條腰,用手嘅力協助控制旋轉,令佢舞伴能夠轉多幾個圈,轉完之後,通常女舞蹈員會乘勢變成一個腳尖企鶴立式舞姿(attitude)等嘅姿勢,而男舞蹈員會望向觀眾但同時用雙手捉住佢舞伴,等佢舞伴維持一個正常情況下維持唔到嘅姿勢[9][10]
圖中嗰位女主角舞蹈員做緊一個腳尖企鶴立式舞姿(attitude;淨係一隻腳掂地,另外嗰隻屈曲同抬起),而男主角舞蹈員用雙手捉實佢舞伴條腰,等佢舞伴能夠定格維持(相當高難度嘅)腳尖企鶴立式舞姿維持一段時間。

漫步[編輯]

漫步(promenade;法文讀音:[pʁɔm.nad])指以下嘅舞步:舞蹈員一隻腳掌完全掂地,而另一隻腳掌就喺半空-即係阿拉伯斯卡或者向後嘅鶴立式舞姿(attitude derriere)等嘅狀態;跟住掂地嗰隻腳要隻腳踭係噉咦離開地面、郁少少、再落返地嚟到令成個人轉向,於是抬起髀嘅腳掌就會喺半空劃過若干距離。漫步常見於雙人舞:個女主角做咗一個阿拉伯斯卡等涉及其中一條髀抬起去半空嘅舞步,然後個男主角要雙手掂住佢舞伴條腰或者手嚟到支撐住佢舞伴,跟住個男主角會圍住佢舞伴打圈行,然後個女主角要一路用漫步嘅方式旋轉,同時由男主角一路用對手幫佢舞伴保持平衡,令女主角穩定噉一路維持一個優美嘅姿勢一路俾觀眾睇到佢由各個方向睇到嘅姿態[19]

手指旋轉[編輯]

手指旋轉(finger turns)係一種由一男一女舞蹈員一齊做嘅旋轉,重點係個女主角喺捉住佢舞伴隻中指嘅情況下旋轉,一般做法如下:個男主角企喺佢舞伴嘅左後面,高舉噉伸出佢嘅右手,當中中指指向下,而其餘手指同地板平行,身體其餘部份離佢舞伴有一定距離(唔會阻住佢舞伴旋轉);跟住個女主角會捉住佢舞伴隻向下嘅中指,並且開始做旋轉;全程個男主角都會擔當住支撐嘅角色,佢要有一對強而有力嘅雙臂,等個女主角無論做幾勁嘅旋轉,兩個人都可以穩穩陣陣噉企到喺度[20]

「兩位舞蹈員同步噉做出相同嘅舞步」亦係雙人舞常用嘅做法之一[21]

大雙人舞[編輯]

2010 年一場《羅密歐與朱麗葉》大雙人舞
內文: 大雙人舞

大雙人舞(grand pas de deux)係有結構而且規模大嘅雙人舞,喺廿一世紀初嘅芭蕾舞當中往往會係一齣芭蕾舞劇入面最引人注目嘅一部份,會由個芭蕾舞團嘅兩位首席舞蹈員負責跳。一段典型嘅大雙人舞會分做五大部份-起曲、大慢板、兩段獨舞(跳雙人舞嗰兩位舞蹈員一人一段),然後以終曲作結。呢五個部份一定會有一個共同嘅主題,最常見嘅係代表男女主角兩個人之間嘅愛情,好多時會加入擁抱同錫咀等嘅動作嚟表達浪漫嘅劇情[7][22]

起曲[編輯]

起曲(entreé;法文讀音:[ɑ̃tʁe],法文入面「進場」噉解)係大雙人舞嘅起始,作為段舞嘅高潮嘅一個前戲。喺起曲嗰陣,舞蹈員會喺舞台上出場,初頭會以定格但表達到角色嘅姿勢企喺度,然後會望向自己舞伴,示意自己知道舞伴嘅位置,以及移去做大慢板嘅位,例如王子會企直,並且望向作為佢舞伴嘅公主同做一個輕微嘅鞠躬。視乎編舞,男女主角舞蹈員可能會同時進場,但又有可能分別先後進場[23]

大慢板[編輯]

大慢板(adagio / adage,即係意大利文入面「慢慢嚟」噉解)係大雙人舞嘅第二部份,重點係會用慢但優美嘅動作,為打後嘅高潮製造氣氛:喺大慢板當中,通常女主角會做注意力嘅中心;肌肉力量強嘅男主角要負責用捧住女主角或者將一隻手伸出嚟俾女主角掹住(男主角隻手變成咗一條虛擬嘅扶把)等嘅方法,支撐女主角-呢個時候女主角會做嘅舞步往往會係一啲要求超人平衡力、冇男主角幫手撐住冇乜可能做得到嘅舞步,例如係角度極大而且動作慢嘅傾斜阿拉伯斯卡(睇返上面);又或者係女主角做一個阿拉伯斯卡姿勢,同時男主角一路俾隻手佢掹住一路圍住佢行圈,等女主角嘅腳喺空中劃過一條長嘅弧線[22]。喺呢個過程當中,女主角要追求慢同優雅,而男主角就會追求隱陣得嚟又保持從容不迫[7][23]

喺大慢板當中,男主角要做嘅嘢技巧上相對簡單,但就往往會要求強嘅肌肉力量。例如「一路俾隻手女主角掹住、一路圍住女主角行若干個圈」或者「捧起女主角,甚至乎一路捧住女主角一路行一段距離」等查實並唔係乜嘢複雜嘅動作,但男主角必需要有一對強而有力嘅雙臂先至會做得到[24][25]

2016 年一場《胡桃夾子》大雙人舞;女主角做緊一個抬起角度接近 180 度嘅超大阿拉伯斯卡(仲要係用腳尖企),男主角要負責用膊頭承擔舞伴嘅部份重量。

獨舞[編輯]

睇埋:獨舞

雙人舞嘅下一部份係兩段獨舞(variation;喺芭蕾舞上係指由一位舞蹈員單獨跳嘅舞段)。通常會係男主角做先,然後先到女主角做,等啱啱喺大慢板做咗一大輪大動作嘅女主角可以唞一吓氣:喺做完大慢板之後,兩位主角舞蹈員會分開;到咗佢做獨舞嗰陣,舞蹈員會企去舞台中間,成為全場注意力嘅中心。一般嚟講,獨舞有以下嘅特徵[7][23]

  • 獨舞嘅功用係要展示明星舞蹈員嘅身手,所以會有好多高難度嘅舞步,例如轉多過一個圈嘅腳尖旋轉,而男主角嘅獨舞通常會有好多大型嘅跳躍;
  • 因為獨舞想要同節奏慢嘅大慢板成對比,所以節奏一般會比較快,或者至少會有節奏快嘅部份;
  • 獨舞嘅另一個重要功用係用嚟展示角色嘅個性,例如《天鵝湖》當中王子同黑天鵝所跳嘅大雙人舞噉,黑天鵝因為係(向天鵝公主落咒,搞到佢變成天鵝嘅)邪惡魔法師羅夫巴特(Von Rothbart)嘅手下,傳統上係一個奸角,所以黑天鵝嘅獨舞好多時會帶有攻擊性[22]

終曲[編輯]

終曲(coda;意大利文讀音:[ˈkoːda])係一場大雙人舞嘅終結部份。喺終曲開始嗰陣,兩位主角舞蹈員會行返埋一齊,並且做出要兩個人一齊做嘅舞步。一般嚟講,終曲會有大慢板同獨舞嗰陣出現過嘅舞步組合,用意在於要終曲同場大雙人舞打前部份有對應,重點在於節奏一定要快過大慢板,而且規模會大過大慢板同獨舞,會用高舉、大跳躍同多次腳尖旋轉;終曲嘅目的係要成段大雙人舞嘅氣氛去到高潮,並且喺音樂嘅高峰之下完結;最後終曲會以一個優美嘅姿勢收尾(例如下圖噉),等兩位主角可以喺觀眾嘅掌聲下行禮同結束段舞[3][23]

2011 年一場《胡桃夾子》表演嘅一幕;男女主角喺最後一刻以一個兩人相依、優美又高難度嘅姿勢作結,等成段大雙人舞喺觀眾嘅掌聲下結束。

出名嘅大雙人舞[編輯]

2006 年一場《唐吉訶德》當中嘅男女主角大雙人舞
  • 天鵝湖》(Swan Lake)[26]
    • 第二幕由王子同白天鵝公主跳嘅大雙人舞,講兩人喺湖邊相遇並且墮入愛河。
    • 第三幕由王子同黑天鵝跳嘅大雙人舞,故仔講黑天鵝呃王子,等王子以為佢係白天鵝公主。
  • 胡桃夾子》(The Nutcracker)[27]
    • 第一幕第二景由胡桃鉗同女主角卡拉娜(Clara)跳嘅大雙人舞,講兩人打低咗老鼠王之後喺聖誕樹下墮入愛河。
    • 第二幕由糖梅仙子(Sugar Plum Fairy)同佢個騎士舞伴跳嘅大雙人舞,係卡拉娜糖果之國之旅嘅高潮點。
  • 睡美人》(The Sleeping Beauty)[28]
    • 第三幕由藍雀(Bluebird)同佛羅蓮公主(Princess Florine)跳嘅大雙人舞,講兩人出席王子同公主嘅婚禮。
    • 第三幕由王子同公主跳嘅大雙人舞,嗰一幕講深愛嘅兩人結婚。
  • 芝莎》(Giselle)[29]
    • 第一幕同第二幕都可以有由男女主角一齊跳嘅大雙人舞,第一幕會講在生嘅兩人之間嘅戀情,而第二幕會講死後化成幽靈嘅女主角芝莎寬恕犯咗錯而意外害死佢嘅男主角。
  • 唐吉訶德》(Don Quixote)[30]
    • 第一幕有男主角巴西里奧(Basilio)同女主角潔特妮(Kitri)嘅大雙人舞,講兩人喺得唔到父母祝福之下相戀。
    • 第二幕有唐吉訶德遇到佢心目中嘅完美女神豆善妮雅(Dulcinea)而跳嘅大雙人舞。
  • 羅密歐與朱麗葉》(Romeo and Juliet)[31]
    • 好多幕當中都會有主角羅密歐同朱麗葉跳嘅大雙人舞。

... 等等。

簡史[編輯]

大雙人舞嘅元素最早係喺 18 世紀早期出現嘅。當時有歌劇同芭蕾舞劇會喺開場嗰陣會要一男一女嘅表演者一齊做同樣嘅舞步,有陣時係一路拖手一路做-而「一男一女舞蹈員一齊做同樣嘅舞步」呢家嘢到咗現代嘅芭蕾舞當中都仲見得到。喺及後嘅兩個世紀裏面,芭蕾舞嘅拍檔跳舞會進化成有更多戲劇性嘅內容,例如係喺 1717 年嘅芭蕾舞劇《瑪斯同維納斯嘅愛情》(The Loves of Mars and Venus)就涉及飾演打仗之神瑪斯嘅男舞蹈員同飾演愛神維納斯嘅女舞蹈員嘗試用舞蹈表達愛情[32]

到咗 18 世紀尾同 19 世紀頭,芭蕾舞開始發展出完整嘅浪漫雙人舞:跳雙人舞嘅男女舞蹈員會有親密嘅接觸,女舞蹈員會將佢隻手擺喺男舞蹈員嘅手上,用男舞蹈員嘅支撐力,用腳尖企(en pointe;指成隻腳淨係腳趾尖掂地,係極講求平衡力嘅舞步)嘅方式跳舞,而呢種做法令女舞蹈員可以跳輕飄飄嘅舞,喺當時嘅芭蕾舞界引起咗巨大嘅迴響(睇埋浪漫芭蕾舞[23][32]

到咗 19 世紀尾,莫里斯·珀蒂帕(Marius Petipa)等嘅大編舞師正式引進咗「大雙人舞」嘅概念,指出芭蕾舞劇嘅一幕可以用一男一女兩位舞蹈員一齊跳一段大嘅舞嚟做高潮,令到芭蕾舞界有咗一套有關大雙人舞嘅結構同固定做法,而呢種大雙人舞成為咗當時嘅芭蕾舞劇大作-好似係《胡桃夾子》(The Nutcracker)同《睡美人》(The Sleeping Beauty)等-基本上必有嘅一部份。及後廿世紀嘅大雙人舞仲變得更加融入於齣劇嘅故仔當中,成為專業芭蕾舞表演當中嘅基本部份[32]

雙人舞姿留影[編輯]

睇埋[編輯]

參考文獻[編輯]

  • Richard Elis and Christine Du Boulay (1955). Partnering - The fundamentals of pas de deux, Wyman and Sons.
  • Anton Dolin (1969). Pas de deux - The Art of Partnering, Dover Publications.
  • Charles R. Schroeder (1971). Adagio. Regmar Publishing Co.
  • Kenneth Laws and Cynthia Harvey (1994). Physics, Dance and the Pas de Deux, Schirmer Books.
  • Nikolaij Serebrennikov and Marian Horosko (2000). Pas De Deux: A Textbook on Partnering, University of Florida.
  • Suki Schorer (1999). On Balanchine Technique, Partnering section, p. 383. ISBN 0-679-45060-2.

[編輯]

  1. What is a Pas de Deux?. Ballethub.
  2. THE GREATEST LOVE STORIES EVER DANCED? A LOOK AT SOME OF OUR FAVOURITE PAS DE DEUX. Birmingham Royal Ballet.
  3. 3.0 3.1 Greskovic, Robert. Ballet 101: A Complete Guide to Learning and Loving the Ballet. pp. 194–195.
  4. The 8 best pas de deux in the history of ballet.
  5. The trials and tribulations of pas de deux.
  6. Richard Elis and Christine Du Boulay (1955). Partnering - The fundamentals of pas de deux, Wyman and Sons.
  7. 7.0 7.1 7.2 7.3 Dolin, A. (2005). Pas de Deux: The art of partnering. Courier Corporation.
  8. Agrippina, I., & Vaganova, A. (1969). Basic principles of classical ballet: Russian ballet technique. Courier Corporation.
  9. 9.0 9.1 9.2 Hammond, S. N. (2000). Ballet basics. McGraw-Hill Humanities, Social Sciences & World Languages.
  10. 10.0 10.1 10.2 Grant, Gail (1982) [1950]. Technical Manual and Dictionary of Classical Ballet (3rd ed.). New York: Dover Publications. ISBN 0-486-21843-0.
  11. THE ART OF LIFTING. The Australian Ballet.
  12. Alderson, J., Hopper, L., Elliott, B., & Ackland, T. (2009). Risk factors for lower back injury in male dancers performing ballet lifts. Journal of Dance Medicine & Science, 13(3), 83-89.
  13. Arabesque 互聯網檔案館歸檔,歸檔日期2017年9月22號,.. BalletHub.
  14. Ballet Glossary: Arabesque.
  15. Penché. Ballethub
  16. Fish dive 互聯網檔案館歸檔,歸檔日期2017年9月22號,.. BalletHub.
  17. Lin, C. W., Chen, S. J., Su, F. C., Wu, H. W., & Lin, C. F. (2014). Differences of ballet turns (pirouette) performance between experienced and novice ballet dancers. Research quarterly for exercise and sport, 85(3), 330-340.
  18. Denardi, R. A., & Corrêa, U. C. (2013). Effects of instructional focus on learning a classical ballet movement, the pirouette. Journal of Dance Medicine & Science, 17(1), 18-23.
  19. Promenade 互聯網檔案館歸檔,歸檔日期2019年6月25號,.. BalletHub.
  20. Finger Turns 互聯網檔案館歸檔,歸檔日期2019年6月21號,.. Ballethub.
  21. The Magic of Pas De Deux: How To Be A Great Partner.
  22. 22.0 22.1 22.2 OUR 5 FAVOURITE GRAND PAS DE DEUX 互聯網檔案館歸檔,歸檔日期2020年2月2號,..
  23. 23.0 23.1 23.2 23.3 23.4 BALLET 101: PAS DE DEUX BREAKDOWN. Ballet Arizona.
  24. Kersley, Leo. A Dictionary of Ballet Terms.
  25. Charles R. Schroeder (1971). Adagio. Regmar Publishing Co.
  26. C. W. Beaumont. The Ballet called Swan Lake (London, 1952).
  27. Anderson, Jack (1979), The Nutcracker Ballet, New York: Gallery Books.
  28. Warrack, John. 1985. Tchaikovsky's Ballets. Oxford, UK: Oxford University Press.
  29. Beaumont, Cyril W (1944), The Ballet Called Giselle, London: C W Beaumont.
  30. Letellier, Robert Ignatius (2008). The Ballets of Ludwig Minkus. Cambridge Scholars Publishing.
  31. S. Prokofiev: Op. 64 Romeo and Juliet, Ballet in Four Acts, Nine Scenes. Moscow: Muzyka, 1976. (С. Прокофьев: Соч. 64 Ромео и Джульетта, Балет в четырех действиях, девяти картинах. Москва: Издательство «Музыка», 1976 г.).
  32. 32.0 32.1 32.2 Cohen, Selma Jean (2004). International Encyclopedia of Dance. Oxford University Press. pp. 105–108.

[編輯]