鏡

酒店浴室入便有塊鏡。

鏡（粵拼：geng3）係反射光嘅架生，表面光滑，用玻璃等嘅材料造。鏡能夠照出影像，方便人觀察自己嘅外貌或者周圍環境。典型嘅鏡通常係特製嘅玻璃片，背後搽咗一浸金屬（例如銀或者鋁）製成後能夠產生清晰、穩定嘅鏡像。除咗常見於屋企附近同交通工具等嘅日常應用，鏡亦有用於光學儀器、天文望遠鏡等嘅科技架生。

物理分析

睇埋：光學同反射定律

由光學角度嚟分析，鏡會引起鏡面反射。鏡面反射係其中一種基本嘅光與物質互動方式。根據反射定律，當一條光線射落一塊平滑表面（好似係鏡噉）嘅時候，入射角會等同反射角。所謂入射角，係指入射光線同法線（即同鏡面垂直嘅假想線）之間夾住嘅角度；而反射角就係反射光線同法線夾住嘅角。用符號表示嘅話，呢條定律可以寫做：

$\theta _{r}=\theta _{i}$

其中 $\theta _{i}$ 係入射角，而 $\theta _{r}$ 係反射角。

如果想像有條光線 ${\text{P}}$，由空氣中射落去鏡面上嘅某點 ${\text{O}}$，佢會根據反射定律，以同樣角度反彈出去，形成反射光線 ${\text{Q}}$。呢種幾何對稱性，令平面鏡能夠產生對稱、穩定嘅鏡像，亦係人類可以靠鏡嚟照面、對稱畫畫或者修容嘅物理基礎。由於入射同反射之間嘅角度係可預測、可計算嘅，鏡喺天文學、攝影、雷射技術等領域都發揮咗重要作用。

日常使用

鏡喺日常生活中用途廣泛。鏡最基本嘅功能係俾人自我觀察，方便人檢查自己嘅外貌、衣著或者動作。喺一般屋企或者洗手間入面，掛牆鏡或者小型化粧鏡都好常見，幫人整理儀容、剃鬚、化粧等。其中化粧鏡成日會整做可攜式嘅設計，方便用家可以隨時睇清楚自己塊面嘅細節，提升化粧嘅精準度。

舞蹈成日會用到全身鏡。喺芭蕾舞當中，全身鏡係舞蹈室其中一種必備設備。舞蹈室牆上通常會裝有全身鏡，噉樣練舞嘅人就可以一路練一路觀察自己身體嘅線條、動作嘅節奏同埋姿勢嘅準確度，亦方便老師即場指出學生喺動作上有咩偏差。

呢幅相入便嘅係典型芭蕾舞課室嘅佈置－有練功扶手俾學生掹住嚟練，同時牆上有大型全身鏡，學生一路練一路清楚睇到自己嘅動作啱唔啱。 呢幅相入便嘅係典型芭蕾舞課室嘅佈置－有練功扶手俾學生掹住嚟練，同時牆上有大型全身鏡，學生一路練一路清楚睇到自己嘅動作啱唔啱。

學術用途

鏡測試係一種用嚟檢驗動物有冇自我意識嘅實驗方法，常見於動物學。鏡測試嘅實驗做法通常係，研究人員喺動物身上畫一個無害嘅標記，然後擺一塊鏡畀佢照。如果嗰隻動物見到鏡中影像之後，會針對個標記作出反應（例如伸手摸、試圖清潔等等），噉就表示佢認得到得鏡入面嘅自己，通過呢種測試，通常表示隻動物展現咗一定程度嘅自我意識。截至廿一世紀初，人類、黑猩猩、樽鼻海豚等都成功通過咗鏡測試。

虛構作品

格林童話嘅《白雪公主》入面有提到魔鏡。故事中嘅惡毒王后有一塊魔鏡，佢每日都會向魔鏡問：「魔鏡魔鏡，世界上邊個最靚？」魔鏡唔識講大話，初頭話王后最靚，但後來開始答白雪公主靚過佢，就搞到王后心生妒忌，從而觸發成個故事嘅主情節。

睇埋

照鏡

• 視覺
• 美感
• 鏡神經元