跳去內容

鏡測試

出自維基百科，自由嘅百科全書
爾隻狗知唔知鏡入面嗰個係自己呢？佢個腦有冇自己爾個概念呢？
事實表明，狗通過唔到鏡測試，另外可以睇吓呢條片。

鏡測試（嚟自英文：mirror test），又叫鏡中測試，英文又稱之為鏡自我識別測試[註 1]，係廿一世紀初動物行為學上成日用嘅實驗，尤其常見於動物認知相關嘅研究。鏡測試嘅重點係想測試吓隻動物，睇佢識唔識得認得鏡入便嘅自己。一般認為，呢種測試能夠揭示隻動物有冇自我意識：自我意識係一種認知狀態，指緊個體意識到自己係一件分離嘅物體，有別於環境同其他個體；若果某隻動物有能力理解自己呢個概念，噉佢理應能夠（例如）用塊鏡睇到自己頭頂上有笪污漕嘢，並且郁手清理[1]。

喺廿一世紀初嘅動物行為學同認知科學，鏡測試成為咗評估自我意識嘅其中一種標準方法。根據鏡測試嘅結果，大多數動物物種都冇自我意識，人類、黑猩猩同鬼蝠魔鬼魚等嘅物種係少數例外。不過，亦有唔少學者質疑呢種測試係咪真係量度到自我意識[2][3]。又有研究指出，部分動物會以第啲方式展現自我意識，而嗰啲方式唔一定係鏡測試測得到嘅，例如係佢哋識得分自己嘅叫聲或者自己陣除，會對自己嘅聲同除有特別反應[4]。

背景概念

[編輯]
呢幅畫描繪一位畫家喺度畫自畫像。識畫自畫像表示，佢腦入便知「自己」係一件有別於「其他嘢」嘅物體。
内文：自我意識
睇埋：認知科學同心靈

自我意識係心理學同哲學成日討論嘅概念，指一種心靈狀態，喺呢種狀態下，個體能夠覺察到自己係一個獨立存在嘅實體，識得將自己嘅思緒、感受、身體狀況等同環境區分開嚟處理。喺認知科學同相關討論之中，自我意識通常會當係自我概念嘅其中一個核心組件—如果某隻生物具有自我意識，即係佢有能力將自己當成係一個對象噉去觀察，甚至反思自己嘅狀態，諗自己係點樣思考嘅[5][6]。

人類以好多種方法展現到自我意識：人類嘅 BB 仔通常出世大約 18 至 24 個月後就會過到鏡測試，明白鏡入便嘅係自己[7][8]。除咗識得用鏡之外，人類仲曉用語言：人類會用第一人稱代詞我嚟表達自己嘅內在狀態，諸如我好眼瞓、我好嬲等嘅語句，都反映講嘢嘅人對自己內部嘅狀態有一定理解；此外，人仲識得對過去嘅行為感到後悔、為未來做計劃，又會建立關於我係邊個嘅自我敍事。一般認為，呢啲都係高度自我意識嘅表徵[9]。

雖然學界大致理解人類點樣展現自我意識，但有關非人動物有冇自我意識[註 2]，學界仲有唔少爭議：一方面，唔少研究發現好多非人物種，譬如係黑猩猩、海豚都有可能過到鏡測試；另一方面，又有學者質疑呢種測試嘅效度，指出唔同物種會以唔同形式嚟表現自我意識，因此鏡測試根本唔能夠有效量度個概念。

動物研究

[編輯]
呢條視頻顯示一隻歐亞喜鵲照鏡見到自己身上有笪嘢，就嘗試清理。
睇埋：人科

鏡測試呢種實驗，最初係由美國心理學家哥頓哥立（英文：Gordon G. Gallup）諗出嚟嘅。其最常見嘅做法，係觀察手上嗰種動物物種，睇佢哋望住鏡中嘅自己嗰陣有咩行為，尤其係所謂嘅針對標記[10]行為：研究人員會搵啲無害嘅物質畫一笪顏色喺佢哋（例如）嘅頭上面[註 3]；被標記嘅動物，通常起初見鏡入便嘅自己就會有社交反應，例如展現攻擊性嘅動作呀噉，甚至重複測試咗幾次之後都仲係噉，彷彿好似試極都唔明鏡入面嗰個係自己；少數物種會有截然不同嘅行為，佢哋會去觸摸個標記，或者嘗試清理，呢啲物種就算係通過鏡測試，展現到自我意識。

成功通過鏡測試嘅動物包括有：

要留意嘅係，同一個物種唔同個體之間可以有個體差異。例如學界對黑猩猩做咗好多份研究，發覺唔係每一隻參與測試嘅黑猩猩都通過到鏡測試。有研究估計，就後生嘅成年黑猩猩嚟講，約莫 75% 嘅個體會過到鏡測試，同時年紀太細或者年老嘅個體，通過率就會明顯低一截。[25]

學界曾經認為淨係得哺乳類動物先會通過到鏡測試。當時嘅學界普遍認為，自我意識能力源自腦部嘅新皮層[26]而由於非哺乳類嘅動物腦部缺少呢個結構，學界就認為佢哋冇可能過到鏡測試。但喺二〇〇八年有研究發現喜鵲（屬於鳥類）有可能通過鏡測試，就推翻咗呢個諗法[27]。

批評聲音

[編輯]

有唔少學者都批評鏡測試嘅使用，好多人都質疑鏡測試係咪真係能夠有效噉量度自我意識。[27]

假如研究嘅係依賴非視覺感官嘅物種，鏡測試嘅參考價值就好有限。生物學家指，人類係咁多種動物當中其中一種視覺最發達嘅物種，喺日間光照充足嘅情況下佢哋嘅視力超越絕大部分嘅動物。相比之下，例如狗就係主要靠嗅覺同聽覺嚟感知世界嘅，呢點被指可以解釋到點解狗會過唔到鏡測試[28]。

攻擊性亦係一個問題。有學者指，某啲物種一見到鏡中嘅自己就迅速出現有攻擊性嘅反應，好似遇到入侵自己地盤嘅同類噉款。喺呢種情況下，隻動物未必有足夠時間或者冷靜程度，去思考鏡中嘅影像實際上係乜。呢種過度嘅反應，被指係可能解釋得到點解馬騮等嘅動物未能通過鏡測試。[29][30]

亦有學者討論動機呢種影響因素：喺鏡測試過程中，可能某啲動物唔覺得自己身上嘅標記有咩特別，或者個標記對佢嚟講唔夠重要，所以佢哋就冇動機去搞個標記；不過噉唔等於佢哋冇認知能力去知道鏡入便嗰個係自己。例如有一份研究，對三隻大笨象做鏡測試，當中得一隻通過測試，但係另外嗰兩隻依然展現咗某啲「可能係展現緊自我意識」嘅行為。研究人員指出，嗰兩隻象可能係覺得個標記唔重要，所以就冇特別去掂佢。[31]

睇埋

[編輯]

註釋

[編輯]
  1. ↑ 英文：Mirror Self-Recognition Test，MSRT
  2. ↑ 或者有幾強嘅自我意識
  3. ↑ 未必係頭，但總之貼咗標記嗰個部位，一定要係嗰種動物有能力用自己嘅肢體去掂嘅。

引用

[編輯]
  1. ↑ Gallup, GG Jr. (1970). "Chimpanzees: Self recognition". Science. 167 (3914): 86–87. Bibcode:1970Sci...167...86G. doi:10.1126/science.167.3914.86. PMID 4982211. S2CID 145295899.
  2. ↑ Swartz, Karyl; Evans, Sian. "Anthropomorphism, Anecdotes, and Mirrors" in Mitchell, Robert; Thompson, Nicholas; and Miles, Lyn Anthropomorphism, Anecdotes, and Animals. New York: State University of New York Press (1997). pp 296-310.
  3. ↑ Crair, Ben (April 14, 2023). "The Mirror Test Is Broken". The Atlantic. 喺January 27, 2025搵到.
  4. ↑ Bekoff, Marc (2002-09-19). "Animal reflections". Nature. 419 (6904): 255. doi:10.1038/419255a. PMID 12239547. S2CID 10070614.
  5. ↑ "self-awareness". Merriam-Webster. September 15, 2023.
  6. ↑ "The roots of human self-awareness | Iowa Now - The University of Iowa". now.uiowa.edu (英文). 喺2025-01-21搵到.
  7. ↑ Rochat, Philippe (23 October 1998). "Self-perception and action in infancy". Experimental Brain Research. 123 (1–2): 102–109. CiteSeerX 10.1.1.602.6987. doi:10.1007/s002210050550. PMID 9835398. S2CID 985947.
  8. ↑ Brownell, Celia A.; Zerwas, Stephanie; Ramani, Geetha B. (September 2007). "'So Big': The Development of Body Self-Awareness in Toddlers". Child Development. 78 (5): 1426–1440. doi:10.1111/j.1467-8624.2007.01075.x. PMC 3351035. PMID 17883440.
  9. ↑ Jabr, Ferris (2012). "Self-Awareness with a Simple Brain". Scientific American Mind. 23 (5): 28–29. doi:10.1038/scientificamericanmind1112-28.
  10. ↑ 英文：mark-directed
  11. 1 2 3 Miller, Jason (2009). "Minding the Animals: Ethology and the Obsolescence of Left Humanism". American Chronicle. 原著喺2012-12-08歸檔. 喺2009-05-21搵到. {{cite news}}: Unknown parameter |deadurl= ignored (|url-status= suggested) (help)
  12. ↑ Povinelli, Daniel (2003). "An 8-year longitudinal study of mirror self-recognition in chimpanzees (Pan troglodytes)". Neuropsychologia. 41 (2): 229–334. doi:10.1016/S0028-3932(02)00153-7. ISSN 0028-3932. 喺2009-05-21搵到. {{cite journal}}: Unknown parameter |coauthors= ignored (|author= suggested) (help)
  13. ↑ "National Geographic documentary "Human Ape"". 原著喺2021-04-26歸檔. 喺2010-06-11搵到.
  14. ↑ [29] ^Francine Patterson and Wendy Gordon The Case for Personhood of Gorillas 互聯網檔案館嘅歸檔，歸檔日期2012年7月25號，.. In The Great Ape Project, ed.Paola Cavalieri and Peter Singer, St. Martin's Griffin, 1993, pp. 58–77.
  15. ↑ Keim, Brandon (2010). "Monkeys See Selves in Mirror, Open a Barrel of Questions". Wired. 原著喺2013-06-17歸檔. 喺2010-10-01搵到.
  16. ↑ "Intelligence and Humans". 原著喺2012-08-18歸檔. 喺2008-08-11搵到. {{cite web}}: Unknown parameter |dead-url= ignored (|url-status= suggested) (help)
  17. ↑ Marten, K. & Psarakos, S. (1995). "Evidence of self-awareness in the bottlenose dolphin (Tursiops truncatus)". 出自 Parker, S.T., Mitchell, R. & Boccia, M. (編). Self-awareness in Animals and Humans: Developmental Perspectives. Cambridge University Press. pp. 361–379. 原著喺2008-10-13歸檔. 喺2008-10-04搵到. {{cite book}}: Unknown parameter |deadurl= ignored (|url-status= suggested) (help)CS1 maint: multiple names: 作者名單 (link)
  18. ↑ 〈海豚比其他動物（甚至是人類）早得多意識到自己的存在〉。原著喺2019-07-10歸檔。喺2018-07-27搵到。 {{cite web}}: Unknown parameter |dead-url= ignored (|url-status= suggested) (help)
  19. ↑ "Mirror image processing in three marine mammal species: killer whales (Orcinus orca), false killer whales (Pseudorca crassidens) and California sea lions (Zalophus californianus)". 原著喺2020-04-23歸檔. 喺2010-08-27搵到.
  20. ↑ [26] ^Joshua M. Plotnik, Frans B.M. de Waal, and Diana Reiss (2006) Self-recognition in an Asian elephant. Proceedings of the National Academy of Sciences 103(45):17053–17057 10.1073/pnas.0608062103 摘要 互聯網檔案館嘅歸檔，歸檔日期2008年5月16號，.
  21. ↑ Prior, Helmut; Schwarz, Ariane; Güntürkün, Onur; De Waal, Frans (2008). "Mirror-Induced Behavior in the Magpie (Pica pica): Evidence of Self-Recognition" (PDF). PLoS Biology. Public Library of Science. 6 (8): e202. doi:10.1371/journal.pbio.0060202. PMC 2517622. PMID 18715117. 原著 (PDF)喺2008-11-19歸檔. 喺2008-08-21搵到. {{cite journal}}: Unknown parameter |deadurl= ignored (|url-status= suggested) (help)
  22. ↑ Uchino, Emiko; Watanabe, Shigeru (2014-11-01). "Self-recognition in pigeons revisited". Journal of the Experimental Analysis of Behavior (英文). 102 (3): 327–334. doi:10.1002/jeab.112. ISSN 1938-3711. PMID 25307108.
  23. ↑ Jordan, Alex; Asai, Jun-ya; Tanaka, Hirokazu; Awata, Satoshi; Takeyama, Tmohiro; Takashi, Hatta; Kohda, Masanori (2018-08-21). "Cleaner wrasse pass the mark test. What are the implications for consciousness and self-awareness testing in animals?". bioRxiv (英文). p. 397067. doi:10.1101/397067. 原著喺2020-01-23歸檔. 喺2020-05-04搵到. {{cite web}}: Unknown parameter |dead-url= ignored (|url-status= suggested) (help)
  24. ↑ 〈存檔副本〉。原著喺2021-04-13歸檔。喺2021-04-13搵到。
  25. ↑ Povinelli, D.J.; Rulf, A.B.; Landau, K.R.; Bierschwale, D.T. (1993). "Self-recognition in chimpanzees (Pan troglodytes): distribution, ontogeny, and patterns of emergence". J. Comp. Psychol. 107 (4): 347–372. doi:10.1037/0735-7036.107.4.347. PMID 8112048.
  26. ↑ 英文：neocortex
  27. 1 2 Suddendorf, Thomas; Collier-Baker, Emma (7 May 2009). "The evolution of primate visual self-recognition: evidence of absence in lesser apes". Proceedings of the Royal Society B: Biological Sciences. 276 (1662): 1671–1677. doi:10.1098/rspb.2008.1754. PMC 2660989. PMID 19324830.
  28. ↑ Gibson, Johanna (6 December 2019). Owned, An Ethological Jurisprudence of Property: From the Cave to the Commons (英文). Routledge. ISBN 978-1-000-02720-4.
  29. ↑ Couchman, J.J. (2011). "Self-agency in rhesus monkeys". Biology Letters. 8 (1): 39–41. doi:10.1098/rsbl.2011.0536. PMC 3259954. PMID 21733868.
  30. ↑ Anderson, J.R. (1984). "Monkeys with mirrors: Some questions for primate psychology". International Journal of Primatology. 5 (1): 81–98. doi:10.1007/bf02735149. S2CID 30888917.
  31. ↑ Koerth-Baker, Maggie (29 November 2010). "Kids (and animals) who fail classic mirror tests may still have sense of self". Scientific American. 喺30 May 2013搵到.
由「https://zh-yue.wikipedia.org/w/index.php?title=鏡測試&oldid=2422681」收