意譯

意譯（粵拼：ji3 jik6）係指譯嘢嗰陣着重嘅係表達原文意思。喺中文，｢意譯｣ 可以用喺詞語、句子、段落甚至成篇文、成本書、成套戲；如果係譯緊詞語，意譯會同音譯相對（呢種意譯，如果目的係創造新詞，學術上叫仿譯），但係如果係譯緊第啲嘢，意譯會係同直譯相對。

英文所講嘅 sense-for-sense translation 同中文所講嘅意譯概念上有些少唔同，原因係喺英文，翻譯（translation）同借詞（borrowing）係完全唔同嘅概念，所以歐洲傳統講嘅意譯，只會同直譯相對，而唔會同音譯相對（如果係由非拉丁字語言借詞，借嘅方法通常係音譯，但係佢哋唔會咁叫，只係會話係借返嚟）。

不過，無論係同音譯相對定同直譯相對，兩者都並唔係二揀一，而係某程度上形成一個光譜。例如，中文由外語借返嚟嘅詞語，早期好多係同時又完全譯音又完全譯意，亦有一橛譯意一橛譯音嘅借詞；真係做翻譯就更加係咁，幾大程度上保留原文嘅段落（或者句子、子句、字詞等等）次序或者文法結構，個翻譯會視乎文體、翻譯目的（讀者需要、客戶要求等等）等等嘅約束而作出唔同嘅決定。

喺專業翻譯，喺字詞以上嘅層面可以點樣意譯法，某程度上可能會受到電腦輔助翻譯嘅制肘。

概論

睇埋：直譯

喺詞嘅層面，意譯係指嘗試由目標語言嗰度搵隻意思相近嘅詞，對應來源語言入邊嗰隻詞。舉個簡化例子，粵港地區會用嘅中文詞腦電波意思上大致對應英文嘅 brain-（腦）同 -wave（波）。

專有名詞（例如人名、地名、國名等等）通常會用音譯，但除此之外，漢語會用嘅翻譯一般以意譯為主。不過亦有啲情況，專有名詞會用意譯，原因可能係意譯出嚟嘅詞語更加易讀同易記。例如加拿大安省嘅 Newmarket 中文有譯新市，屬於意譯，但係亦有音譯紐馬克特，屬於音譯，兩個名喺粵語都有用。

另外，意譯亦可以指一種翻譯句子、詞組（甚至更大嘅語義單位）嘅方法，呢種方法同直譯（即係逐隻詞嚟譯）係相對嘅。

睇埋

• 音譯
• 仿譯
• 形態素

文獻

• （英文） Gentzler, Edwin (2001). Contemporary Translation Theories. 2nd Ed. London and New York: Routledge.