跳去內容

語言學嘅大綱

出自維基百科，自由嘅百科全書
語言學系列
語言結構
語音（語言聲學 · 發聲 · 聽覺）同音系 · 構詞同句法（亦可以睇睇語法） · 語義（詞彙語義學 · 原型語義學）同語用
語言學領域
描述同規範語言學 · 理論同應用語言學 · 歷史語言學（比較語言學） · 語言類型學 · 計量語言學 · 描述語言學同規範語言學 · 心理語言學、神經語言學同認知語言學 · 社會語言學 · 語言習得（SLA） · 運算語言學 · 文體學、語言規範同詞源學 · 語料庫語言學
語言學應用
詞彙學同辭典學 · 正字法 · 語言教育 · 自然語言處理 · 計量文體學
拉雜相關
文法（文法範疇） · 生成文法 · 社會科學同人文學（文學 · 樂理） · 聲學 · 進化論 · 巴別塔
Portal Portal
睇 • 論 • 改 • 歷

以下呢篇大綱，旨在將語言學最基本嗰啲概念冚唪唥列晒出嚟。語言學係用科學方法研究語言嘅領域，通常會當係社會科學，有陣時會隸屬人文學。

語言學家分好多種。理論語言學嘅研究者會建立理論嚟嘗試解釋語言相關嘅現象，而應用語言學則會思考點樣解決實際嘅語言相關問題，比如係研究學語言嗰陣嘅心理過程，就被指係有助剖析點樣教語言[1][2]。

基礎概念

[編輯]

二〇二二年嘅不列顛百科全書用咗一句簡短嘅句子，界定語言學係乜[1][3]：

粵文翻譯：語言學，（係）對語言嘅科學研究。

當中科學係重要嘅關鍵詞，即係語言學要跟科學哲學同科學方法等嘅原則。至於語言呢個概念要點定義，有語言學者就噉講[2]:p. 3[4]：

粵文翻譯：語言係符號嘅集合。符號會結合一嚿 exponent 掕住個意思。語法係由較細較散嘅符號嗰度產生（更複雜嘅）符號嘅方法...

仲有學者進一步強調，語言學研究要分清楚手上啲語言係咪自然語言[歐 1]：自然語言包括一啲响人類當中自然噉發展出嚟嘅語言，人類响日常講嘢寫嘢嗰陣會用，諸如係粵語、客家話同英語等等，都屬於自然語言，呢啲語言有別於[5]

呢啲語言同自然語言有明顯差異，所以唔可以就噉擺埋一齊分析。

普世通則

[編輯]

普世語言通則[歐 2]係語言學最重要嘅概念之一。如果話某特徵屬於普世語言通則，意思係話世上嘅語言全部都有呢種特徵[6]，例如[7]:4. 1.4；

  1. 所有語言都有語法[註 1]。
  2. 所有語言都會演變。
  3. 人類學語言嗰陣，需要學大量嘅內隱知識... 等等。

有好多語言學家都致力想將普世語言通則冚唪唥搵晒出嚟，但呢樣工作往往講就易做就難：事實表明，要睇勻晒所有語言，非常困難；二十一世紀初嘅世界有成幾千隻語言，時常都有一個情況，就係語言學家睇咗大量語言之後，搵到某樣特性係嗰啲語言全部都有嘅，諗住自己搵到一條普世語言通則，但係冇幾耐佢就發現有某隻佢前所未知嘅語言，係冇呢種特性嘅。

領域分支

[編輯]

基本結構

[編輯]

語言學分子領域嗰陣，時會考慮語言嘅基本構造，包括：

  • 音系學[歐 4]：一隻語言嘅音系，大致可以理解為嗰隻語言「組織語音」嘅方法。
  • 構詞學[歐 5]：專門研究詞語，包括詞嘅內部結構，會講到形態素嘅概念，亦會研究啲詞可以點樣變化，譬如係詞形變化噉[9]。
  • 句法學[歐 6]：專門研究詞語點樣結合埋一齊，形成句子[10]。
  • 語義學[歐 7]：專門研究詞等嘅語言結構點樣表達意思；語義學唔單只會諗個別嘅詞點樣掕到意思，仲會諗埋個別嘅詞會點樣影響成句句子嘅意思[11]。
  • 語用學[歐 8]：語言學家成日都會將語用學同語音、音系、構詞等並列；語用學簡單講就係研究人點樣使用語言－人用語言嗰時會表達意思，但事實表明，詞語表達嘅意思好多時都唔合符佢哋字面意思，語用學會諗埋語境等嘅概念，剖析人點樣表達意思[12]。

第啲分法

[編輯]

語言學要分科，仲有：

語音同音系

[編輯]

語音學

[編輯]
人條聲帶開咗嘅樣
呢幅矢狀面圖描繪人頭剖開由左邊睇嘅樣；啲阿拉伯數字表示唔同嘅調音部位。
内文：語音學
睇埋：聲學同聽覺

簡而言之，語音學專門研究語言嘅聲。

  • 聲學：隸屬物理學，專研究聲嘅物理特徵，會用到頻率、波長同埋振幅等嘅概念，將聲波嘅各種特性表達做數值；聲可以話係語言嘅起始[註 4]，屬於波動一種，反映介質—空氣或者水等—粒子嘅振盪[18]:p. 2。
  • 矢狀面圖[歐 22]：語音學研究時常用到嘅一種圖解；語音學用嘅矢狀面圖睇起上嚟似攞住個人頭，由左或者右邊透視頭殼內嘅結構噉；語音學研究時常會用呢種圖，剖析人講嘢發出聲嗰陣時聲道周圍嘅結構有乜嘢活動，從而理解呢啲聲係點發出嚟嘅[19]。
  • 國際音標[歐 23]：語音學研究上成日用嘅一種工具，用嚟精確噉將講嘢嘅聲寫低；喺現實世界，人平時生活用嘅文字梗會有一定程度嘅混沌[20]，例如名呢隻漢字，喺粵語可以讀做
    粵拼：meng2 —例如佢個名入便個名字；或者
    粵拼：ming4 —例如姓名個名，
    • 而且即使係英語同葡語等用開表音文字嚟寫嘅語言，都有噉嘅情況；有見及此，語音學工作者就製定咗國際音標。國際音標最大特徵係夠精確，而且隻隻符號都淨係會對應一個音，同時每個音亦淨係得一個符號對應，仲會用方括號 [] 嚟括住記嘅音，噉語音學研究者望住一串國際音標符號嗰陣，就能夠次次都精確噉得知係寫緊咩音。亦可以睇下變音符號嘅概念。

語音學可以話係語言學嘅基礎。語言學家攞住啲精確噉記錄低嘅語音，就要假設啲標音完全冇問題作前提，做進一步嘅分析。

講嘢嘅聲

[編輯]
睇埋：聲道

單音[歐 24]係指任何語言入面用到嘅一個聲。唔洗有咩特別意思，都可以算係單音。

  • 清音[歐 25]同濁音[歐 26]：指個單音有冇涉及聲帶嘅振動；冇嘅話就算係清音，有嘅話就謂之濁音；單音係清定濁，可以簡單噉用手嚟感覺－人將隻手擺喺自己喉核個位，佢發嗰個音係濁音嘅話，佢隻手會感受到自己喉部有振動；例如英語中嘅 [s] 就係清音而 [z] 就係濁音[21][22]。
  • 元音[歐 27]、輔音[歐 28]同固有音響[歐 29]：固有音響可以大致理解為某個聲同音高或者長度等因素對等嘅聲比，有幾響；固有音響反映咗該個聲帶有幾多聲能，例如 [a] 等嘅元音就有高嘅固有音響，人發出 [a] 音嗰陣聲道大開，令到個聲帶有大量嘅聲能，而相比之下，好似 [t] 噉嘅音就係固有音響低，人發出 [t] 等嘅輔音嗰時佢聲道會局部或者完全噉閂埋，能夠通過聲道嘅空氣量就少咗[23]。
    • 調音部位[歐 30]同方法[歐 31]：元音同輔音可以用好多方法分類，最常見嘅分類係按照眾聲道結構發出該輔音嗰陣，聲道喺邊度閂埋阻斷空氣嘅流動（調音部位），例如 [m] 同 [n] 就涉及口部封閉空氣通過個鼻流出，粵語入便都有啲噉嘅音，例子可以睇吓 maa1（對應漢字：媽、嗎）開頭嘅輔音噉[24]。而喺空氣通過聲道再由口鼻噴出嘅中途，條脷嘅位置同郁動等嘅多個變數（調音方法）都可以影響到該音有乜特性[25]。
    • 可以睇下元音圖嘅概念。
    • 輔音嘅分類：啲人要將輔音分類嗰陣時，一般都係按調音部位同調音方法嚟分：用粵語有嘅音做例子，例如雙唇鼻音（想像粵拼：maa1）/m/ 同齒齦鼻音（想像粵拼：naa1）/n/ 兩者都係鼻音，都涉及軟腭下垂（相同調音方法）但係調音部位唔同—/m/ 用晒兩塊嘴唇嚟發音，而 /n/ 就係用到脷尖；又或者可以想像 /m/ 同 /p/（想像粵拼：baa1）之間嘅差異，兩者嘅調音部位相同，都係用兩塊嘴唇嚟發音嘅，但係調音方法就唔同—/p/ 涉及嘅係聲道空氣流動受阻。
  • 音節[歐 32]：一個可能嘅定義係畀固有音響冇咁高嘅聲包圍嘅固有音響頂峰，可以大致上想像成一個元音，前或後掕住啲輔音，亦可以係前後都掕或者前後都唔掕。好似粵語等嘅漢語嘅書寫系統，傾向一隻漢字對應一段音節。唔同語言喺音節特性上可以好大分別，例子可以睇吓日語同粵語，日語淨係得 CV，例如 ra，CCV，例如 gya，同埋 CVn，例如 nan，噉嘅音節，而相比之下，粵語可以有多種唔同嘅 CVC 音節[26]，亦可以睇睇入聲嘅概念。
    • 單元音[歐 33]同雙元音[歐 34]：例如粵語裏便 saa1（對應漢字沙、紗等）嘅元音係單元音，而 saai1（對應漢字嘥）個元音（aai1）則係雙元音[27]。
    • 音節[歐 35]輔音：係指一個輔音自成一段音節，例子可以睇吓粵語嘅 m4（對應漢字唔）噉[28]或者英語嘅 rhythm（[ˈɹɪð.m̩] ，指節奏噉解）入便最尾嗰個輔音。
    • 元音弱化[歐 36]：指人講嘢嗰時將冇咁重嗰啲音節嘅元音「弱化」，令到呢啲元音變到冇咁明顯。睇埋語音省略[29]。
    • 音位變換[歐 37]：指人將要講嗰啲音嘅某啲部份對調，常見於好細個嘅細路；例如英語嘅 hospital（指醫院）正常嚟講發音係 /hɔspɪtəl/，但以英語做母語嘅四歲細路不時會錯誤噉將隻詞讀做 /hɔstɪpəl/ 噉嘅音⸺佢將最尾嗰兩個輔音掉轉咗[29]。
  • 送氣[歐 38]：講繄某個聲發出嚟嗰時，會帶有「一下空氣噴出」，喺國際音標中會寫做上標嘅細階 h（h）噉嘅樣；觀察者可以擺隻手掌係自己個口前面，如果呢個聲有送氣，佢可以感覺到有股空氣噴落佢隻手[30]；用粵語做例：
    有送氣嘅輔音：paa3（漢字可作怕）、taa1（漢字可作他），呢兩個音用國際音標嚴式標音寫係 pʰ 同 tʰ；
    冇送氣嘅輔音：baa1（漢字可作巴）、daa1（漢字可作打，一打打嗰個打）。
  • 共同發音[歐 39]：指某個講嘢嘅聲，受佢前或者後嗰個聲影響而變樣，例如想像廣東話音 ki1 同埋 ku1 噉，兩個聲嘅起始輔音原則上一樣，但想像有個人正打算發出一段聲，ki1 同 ku1 喺臨出聲前聲道嘅形態呢點上唔完全一致－當個人正要講出 ki1 嗰陣時，佢聲道要為咗發出元音 i1 而做少少準備，因而個樣會同想講出 ku1 嗰時有啲唔同咗[31]。

可以睇埋口音嘅概念。

音系學

[編輯]
内文：音系學
睇埋：音素同音系類型

語言學家比較唔同語言嗰時，可以比較好多嘢。其中一樣最多人留意嘅係手頭上嘅語言喺音系上有咩差異，而啲人學語言嗰陣，好多時都會想理解學緊嗰隻語言有邊啲元音同輔音，同埋呢隻語言嘅音系同自身母語嘅有乜嘢異同。

一隻語言可能會有某啲元音同輔音，係第啲語言冇嘅，例如比較吓粵語同普通話嘅音系，粵語容納多種普通話冇嘅結尾輔音，包括係[32]

[t]，例子有 tit3（漢字：鐵）
[k]，例子有 sik1（漢字：識、悉）
[m]，例子有 sam1（漢字：心、深）

亦可以睇下入聲嘅概念。即使係完全唔識粵語亦唔識普通話嘅人聽，依然有可能聽得出呢兩種話嘅聲有分別。除此之外，二十一世紀初語言音系差異嘅例子仲有：

  • 日語唔似得英語（或者普通話）噉，會分 [l] 同 [r]。
  • 韓語並冇 /f/ 呢個音素，而粵語就有，例如係 faa1（漢字花）一詞噉。
  • 越南話同上海話有 [ɲ]，但粵語就冇。

詳情可以睇下音系類型嘅相關討論。

音素概念

[編輯]
内文：音素
睇埋：心智表徵

音素[歐 41]係指令到該語言嘅使用者能夠分辨兩隻詞嘅最細聲單位。用粵語做例，想像以下嘅音－

bou1（可以對應嘅漢字：煲）、dou1（可以對應嘅漢字：都、刀）－聽嘅人聽得出兩個聲唔同；
bo1（可以對應嘅漢字：波、玻）、lo1（可以對應嘅漢字：欏）－聽嘅人都係聽得出兩個聲唔同；

－改變最頭嗰個輔音嘅舉動，能夠令個聲（由粵語音系嘅角度睇）算係唔同咗，有可能變咗第隻詞語，而且仲係能夠做到令到個聲唔同咗嘅最細可能改動，所以呢啲開頭輔音就算係粵語嘅音素[33][34]。

音素呢個概念帶有心理性質：想像依家有兩個人，明仔同勤仔，佢哋各自用粵語講出 bou1 噉嘅音，而第三個人，阿松，則負責聽佢哋嘅發音，三個人對粵語都去到同母語使用者相當嘅水平；阿松發覺明仔讀起上嚟大聲過勤仔少少，但喺阿松腦海入面，兩個聲都係表示緊相同嘅語音，即係話雖然兩個聲喺物理上有差異，但聽嗰個人喺腦海裡便當佢哋係同一款聲，所以呢兩個聲喺粵語入面屬同一音素[35]。呢點亦係音系學同語音學嘅主要分野：音系學比較關注人腦點樣將聽到嘅聲分辨做唔同音素，而相比之下語音學更重視聲嘅物理特性。

音素相關嘅概念：

  • 最細對立體[歐 42]：如果話兩隻詞，或者兩句短語，成一對最細對立體，意思係指嗰兩隻詞淨係喺一個音素上有異[35]；粵語例子[36]－gam1（可以對應嘅漢字：金、甘）同 gan1（可以對應嘅漢字：巾、根），而 /m/ 同 /n/ 就算係處於對比[歐 43]分佈。
  • 同位異音[歐 44]：如果有若干個聲，佢哋响聲性質上有異但冚唪唥都屬同一款音素，噉佢哋彼此之間就謂之係成同位異音嘅關係[37]－
    • 自由變異[歐 45]：指個音素嗰幾隻款嘅出現近乎隨機咁滯，冇話邊隻款特別大機會喺某啲情況下出現。
    • 互補[歐 46]分佈：想像一個音素有兩隻款，第一款硬係會喺某啲情況下出現，同時第二款永遠唔會喺嗰啲情況下出現，而第二款出現嗰啲情況下又永遠唔會見到款第一款，噉兩者就算係處於互補分佈[38]。睇埋差集同互斥嘅概念。

韻律使用

[編輯]
内文：語言韻律
睇埋：聲調同音樂理論

韻律[歐 47]可以大致理解為講嘢嘅聲嘅某一類特性，唔係元音或者輔音，但係可以影響表達緊啲乜嘢意思[39]。語音學同音系學上嘅研究，都會關注韻律呢個概念。

音高係語言韻律成日講嘅概念。用日常用語，音高就係指某段聲音聽落「有幾高」，科學化啲講係指該聲波嘅頻率。相關嘅概念：

  • 聲調[歐 48]：指某隻語言會用音高嚟辨別唔同嘅詞語或者同一隻詞做詞形變化；譬如粵語就屬於聲調語言，會用聲調嚟辨別唔同嘅詞或者形態素，好似係[40]
    詩si1、史si2、試si3、時si4、市si5、事si6
    －輔音同元音一樣，但聲調變咗，個音表達嘅詞就唔同咗。二十一世紀初嘅漢語，大多數都係聲調語言，不過聲調並非漢語嘅專利，有唔少漢語外嘅語言都有聲調，例子可以睇吓越南話同泰國話等，或者喺西非各地嘅多種語言。
    • 聲調輪廓[歐 49]：指該聲調語言入便啲聲調，可能會有一種情況，音高喺詞或音節中途改變；如果畫幅圖，打戙軸做音高打橫軸做時間，佢哋啲聲調會成唔平嘅線，例如下圖就係二十一世紀初粵語詩史試時市事嗰六個調分別嘅輪廓。
  • 語調[歐 50]：指某隻語言用音高嘅變化，表達講嘢嗰個人嘅情緒或者態度，而唔係用嚟分辨唔同嘅意思；好似英語噉，英語唔係聲調語言，不過佢哋仍然有語調，例如佢哋問問題嗰陣，句嘢最尾嗰橛會有音高上升嘅情況[39]。
  • 高低重音
  • 音拍
  • 重音
  • 等時

構詞學

[編輯]
I love you 呢句英語句子有三隻詞。啲人用字母書寫語言嗰時，詞之間好多時都會用空位隔開。
内文：構詞學同形態素
睇埋：語法、詞綴同詞庫

構詞學簡單講就係研究詞語嘅結構同組成。

形態素[歐 51]係指可以有意思嘅最細可能單位，唔一定能夠自成一隻詞；攞英語做例子，想像以下呢啲詞[41]

Redo，即係動詞再做過噉解
Reappear，即係動詞再出現噉解

當中個 re- 呢段，本身唔能夠自成一隻詞，但帶有再... 噉嘅意思，同時佢若果再斬細件啲，就唔會再有咩意思可言。所以 re- 係英語入便嘅一個形態素[註 5][42]。

詞語概念

[編輯]
内文：詞語

形態素可以帶出詞[歐 56]呢個概念：有關詞嘅概念喺語言學上要點定義，查實係有唔少爭議性；一個常見定義係

包含至少一個形態素、可以單獨存在嘅語言單位

例如英語 re- 就係形態素，但唔係詞，因為佢喺正常講嘢嗰陣冇得單獨噉存在；正路嚟講，一隻詞會有以下呢啲特徵[43][46]－

  1. 係對答嗰陣嘅最短可能答覆；例如
    「你飲緊阿嫲煲嘅蕃茄薯仔湯？正zeng3唔正？」「正。」
    「我都𢳂返碗嚟飲吓得唔得？」「得。」
  2. 要再變長有難度嘅單位當中，詞係最大嘅[註 6]。
  3. 如果句子要變，一隻詞係「郁得，而且郁咗又唔會搞到句嘢唔啱語法」嘅最細單位。

亦都要留意，語言學上嘅詞同文字（攞嚟寫嘢嘅系統）係兩個好唔同嘅概念，不過兩者喺粵語入便嘅名好似，日常語境成日撈亂。

詞語變化

[編輯]
内文：詞形變化
睇埋：構詞衍生

詞形變化[歐 57]同語法範疇[歐 58]係兩個緊密相關嘅概念。大致噉講，一種語法範疇係某隻語言嘅語法入便，語言單位可以有嘅特徵；每個範疇都有若干個可能值，如果某隻詞要由其中一個值變成第個數值，好多時就要做詞形變化，即係隻詞要變樣，表達佢屬該語法範疇嘅邊個值[47]；一般認為粵語等嘅漢語較少詞形變化，但英語等嘅歐語就有較豐富嘅詞形變化[48]，

  • 時態[歐 59]：語法範疇一種，一隻詞喺時態上有過去式同現在式等嘅幾個可能值；喺英語裏便，如果某隻詞要改變時態，通常都要做詞形變化，隻詞要變樣嚟表達時態，例如 run 指跑，隻詞做過去式嗰陣要變成 ran，表示嗰個動作係過去發生嘅[49]。包括粵語在內嘅大多數漢語都冇時態詞形變化呢家嘢。
  • 人稱[歐 60]：指隻詞按主語係邊個而起變化，例如英語嘅 (to) be 噉，若果主語係講嘢嗰個人，要變成 am（I am... = 我係...）而若果主語係聽嘢嗰個人，就要變成 are（You are... = 你係...）呀噉。
  • 語法數量[歐 61]：又用返英語做例子，喺英語裡便，數量係一種語法範疇，某隻詞喺數量方面有單數同眾數等嘅幾個可能值；喺英語，如果某隻詞要由單數變成眾數，通常會喺隻詞最後加個 /s/ 噉嘅音[50]。
  • 語法性別：英語冇，但好多歐洲語言都有呢種變化，出現「檯同櫈都要分男女」噉嘅情況，諸如係法語同德語等都有性別。亦可以睇下將語法性別廣義化嘅名詞類別概念。
  • 變格[歐 62]
  • 詞幹[歐 63]：一隻詞嘅意思最「核心」嗰部份，無論隻詞點做詞形變化，詞幹嗰橛都唔會變樣，例如英文詞 wait 係指等待，可以變成 waits 呢個現在式第三人稱嘅樣，又或者係 waited 呢個過去式嘅樣等等－當中 wait- 呢橛，無論做咗咩詞形變化，都唔會變樣，所以就謂之該詞嘅詞幹。

構詞衍生[歐 64]：係指用該語言嘅構詞方法造新詞；例如二十世紀粵語由英語嗰度借咗的士一詞用嚟指一種交通工具，及後喺呢個詞嘅尾加入佬呢個粵語固有形態素，形成的士佬一詞。

句法學

[編輯]
英文句子 The dog ate the bone（隻狗食嚿骨；過去式）用分析樹嚟表達嘅樣，圖入面隻隻字都標明咗係乜詞性，例如 dog 係名詞（N）。
一個短語中心會同佢啲修飾語並排。可以睇睇修飾原則[歐 65][51][52]。
内文：句法學同分析樹

語言嘅句法，一般會視為佢哋嘅語法嘅重要一環。句法學專門研究句子嘅結構。

詞性

[編輯]
内文：詞性

詞語嘅詞性[歐 66]大致上係指佢喺句法上做乜功能。最基本上，屬於同一隻詞性嘅詞，冚唪唥都喺負責做句子邊部份呢點上一樣或大致一樣，是謂句法分佈[歐 67]，而喺有顯著詞形變化嘅語言（譬如係眾歐洲語言）當中，唔同詞性嘅詞，能夠有嘅詞形變化都唔同，是謂構詞分佈[歐 68]，例如英文入便，眾數嘅詞要加 /s/ 呢樣嘢，淨係某啲名詞至做得[53][54]。

一般嚟講，語言學家同啲詞分詞性嗰陣，正常係按隻詞嘅句法分佈同構詞分佈嚟分，而唔係按意思嚟分—例如啲人日常生活討論語言嗰陣，成日會有一類諗法，話名詞都係指緊物件，動詞係指行動，形容詞係指特性... 等等，但睇以下嘅粵語例句：

「誠懇係做人嘅一種重要素質。」
「郁手打人係唔啱嘅。」

誠懇係一種特性，郁手打人係一種行動，兩者都唔係睇得到摸得到嘅物件，但兩隻詞都顯然係做緊名詞角色。好似噉嘅語句反映，語義唔可以攞嚟清楚定義一隻詞係邊種詞性。而包括眾多歐洲語言在內嘅好多語言，都有顯著嘅詞形變化，噉就表示例如，對英文有返咁上下熟嘅人，初接觸到未聽過嘅英文詞嗰陣，可以作出以下噉嘅判斷—

「隻詞加咗 /s/ 喺尾表示眾數，所以似係名詞。」
「呢句嘢講緊尋日發生嘅事，而呢隻詞變咗過去式，所以似係動詞。」

更加反映咗一點：唔靠語義都可以理解詞性[10]:Ch. 2。

比較常見嘅詞性包括咗[55]：

開放詞類[歐 70]同封閉詞類[歐 71]：開放詞性係指容易有新詞嘅詞性，而封閉詞性就係指唔容易有新字嘅詞性，例如名詞、動詞同形容詞就係開放詞性，成日都有新字詞，而相比之下冠詞同代名詞就被指係封閉詞性，難有新詞出現[53][57]。至於邊啲詞性係開放，邊啲詞性係封閉，唔同語言喺呢點上可以有差異。

自然語言處理中亦有講詞性標注嘅工作。

句子

[編輯]
内文：句子

句子，或者叫語句：對於句子呢個概念要點定義，語言學上有些少爭拗；簡化講，句子可以界定為有最少一隻詞、能夠表達完整諗法，嘅語言單位[58]，會描述一件事件[59]。

有一種諗法係，句子同形態素最大嘅分別在於，句子嘅意思可以由其組成部份（形態素）嚟估計，但形態素就唔得[註 7]—假設某個人從來未聽過粵語 hoi1 faa1（漢字作開花）呢隻形態素，佢冇得由 f 同 aa 等嘅語音度估計呢隻形態素係咩意思。

是但搵一隻主流語言，佢哋都可以有無限咁多句可能、啱語法嘅句子：喺現實世界，語言嘅形態素數量實係有限嘅，例如根據廿一世紀初估計，以英語做母語嘅人到咗二十歲嗰陣，會識大約 40,000 隻英語生詞；但係可能句子數量就有無限咁多—自然語言可以有遞歸[歐 72]，砌出無限咁長嘅句子，例如想像

  • 短語：貓（一隻單獨名詞）、阿明養嘅貓（名詞短語）、同阿松打過交嗰個阿明養嘅貓（名詞短語，繼續駁落去）...
  • 副詞：佢行緊路、佢悠閒噉行緊路（駁隻副詞）、佢又開心又悠閒噉行緊路（繼續駁副詞）、佢又笑住又開心又悠閒噉行緊路（繼續駁副詞）...

長得滯嘅語句往往會變得難以理解，但原則上呢啲長嘅語句仍然可以係語法上正確嘅。

垃雜句子相關概念：

句法理論

[編輯]

亦可以睇下接受度判斷測驗，可以攞嚟評估語言嘅「隱藏」語法。

語義學

[編輯]
内文：語義學同語義

語言本質上就係符號，例如粵語入便（粵拼）faa1（漢字：花）呢隻詞同花冇咩相似嘅地方，但識粵語嘅人一聽到 faa1 呢隻詞[註 8]就會諗起花呢種事物，即係話啲人用某樣同花冇乜直接相似性嘅嘢嚟表示佢，而

表示一啲同自己冇乜直接相似性嘅事物

正正就係符號嘅功能。

要正確噉表達語義，就要結合語音、構詞、詞彙同句法先得，當中句法好重要。想像噉嘅句子：

  1. 「我將粒荔枝食落肚。」
  2. 「粒荔枝將我食落肚。」

兩句說話用咗嘅詞完全一樣，但一般認為句二應該唔會係講嘢嘅人想表達嘅意思，除非例如佢寫緊粵文恐怖小說，情節講啲角色遇到一粒會食人嘅恐怖荔枝。亦可以睇睇複合原理[歐 75]所講嘅諗法[61]。

語義學嘅基本概念包括以下呢啲：

主題關係

[編輯]
内文：主題關係

主題關係[歐 83]：大致上係指一句名詞短語同佢附近嘅動詞短語之間成乜嘢關係，可以喺動詞描述嗰啲動作當中扮演咩角色。主題關係分好多種[59]。

  • 施事[歐 84]同受事[歐 85]：如果話 XX 係施事而 YY 係受事，即係指 XX 係（可能有意圖噉）做出隻動詞指嗰樣行動嘅主體，而 YY 就係嗰樣行動嘅受體。
  • 成因：亦係一種常見嘅主題關係。

語用學

[編輯]
「係，係，你好勁。你好叻。」
反話呢樣嘢展示咗語境幾咁重要－上面句嘢就噉字面解係讚緊對方，但講嗰個人講嘢嗰陣嘅面部表情，令人覺得佢只係講緊反話。
内文：語用學

語用學同語義學有啲似，都係研究緊意思，但係就更側重於言外之意同埋語境點樣左右表達嘅意思。

  • 語境[歐 81]：呢個概念嘅具體定義有些少爭議性；一個比較寬鬆嘅定義係，語境可以泛指任何嘢，特徵係佢並非集中睇緊嗰隻詞或者句，但對詞或者句嘅意思有影響[64][65]，例如之前嘅句子（唔係集中睇緊嘅嘢）會影響手頭嗰句句子入便啲詞嘅意思。
  • 言外之意
  • 協調原則

言語行為

[編輯]

心理語言學

[編輯]
顯示人左腦嘅 3D 模型；圖裏面紅色嗰笪係顳葉，顳葉同處理語言嘅能力好有啦掕。

心理語言學結合語言學同心理學呢兩個學科，尤其關注語言所涉及嘅認知功能同腦活動。

  • 認知[歐 86]：心理語言學成日會由認知心理學嗰度借概念同埋研究方法嚟用。
  • 言語產生[歐 87]：指一個人將「諗住想講嘅嘢」變做「實際講到出嚟嘅嘢」嘅過程，起碼包括個人喺腦海將啲思緒轉換成相應嘅字，要將啲字組合成想講嘅句子，而且佢個腦仲要命令佢聲道相關結構嘅肌肉做出必要嘅郁動。言語產生涉及咗複雜嘅認知過程，有好多腦相關嘅病都可以搞到個人言語產生有問題，例子可以睇吓顳葉病變引起嘅障礙[66]。
  • 詞庫決定作業[歐 88]：認知語言學嘅一種出名實驗方法，（簡化講）涉及研究者畀受試者接二連三噉睇一大拃真嘅字同「望落似真、但查實乜意思都冇」嘅偽字，再暗中量度啲受試者對啲字反應有幾快；而事實表明，噉做能夠得到好多對語言學研究有用嘅資訊[67]。
  • 能力對表現[歐 89]：兩個緊密相關嘅概念；語言能力係指一個人對某隻語言嘅內隱知識有幾深厚，而語言表現就係指一個人實際用隻語言嗰陣嘅表現有幾好（講得有幾流暢或者有冇錯文法呀噉）；表現會反映能力，但能力高嘅人有時都有可能會因為精神唔好等嘅原因，搞到到表現惡劣。
  • 促發[歐 90]

語言習得

[編輯]
2009 年影到有個 BB 喺度聽佢太嫲講嘢；事實表明，細路喺生命頭嗰幾年聽住身邊啲大人講嘢，聽聽吓就會學識佢哋嘅母語（第一語言習得）。

語言習得[歐 91]指人由完全唔識某隻語言，變到能夠純熟噉運用一隻語言，期間嘅學習過程[68]。

是但攞隻語言嚟睇，如果語言學家想由完全唔知呢隻語言嘅嘢，去到詳盡噉明文紀低晒隻語言啲詞庫同文法等語言特性，閒閒哋要用成十幾年嘅時間，而且就算做晒呢啲工作，都唔等如佢哋能夠純熟噉用隻語言講嘢同寫嘢。但事實又表明，細路可以喺生命嘅頭嗰幾年之內學識純熟噉運用自己嘅母語，表示佢個腦實係成功噉响相對短嘅時間內學咗極大量嘅知識，而且因為佢唔使有意識諗都可以運用隻語言，即係話佢吸收咗嘅知識應該係內隱知識[69]:Ch. 1。

語言習得相關嘅概念：

  • 歸納[歐 92]：語言習得研究上嘅一種常見諗法係，啲人學語言嗰時查實就係一路重複做歸納，由聽過睇過嘅詞句嗰度搵出呢啲詞句有咩共通點，並且按呢啲共通點嚟理解隻語言嘅構詞同句法規則[註 9]。
  • 學第二語言嘅其中一個大難處，係唔同語言之間嘅音系差異：想像依家有個人，佢母語叫 L1，想學一隻叫 L2 嘅語言；如果 L2 有兩隻音素係對應（或者大致對應）L1 度嘅某一對音素，個人能夠容易掌握到 L2 嗰兩隻音素；如果 L2 有對音素係完全唔存在喺 L1 度嘅，個人都會覺得嗰對音素相對易學；真正最難學嘅，係一啲聲，L2 會當做唔同音素、但 L1 當佢哋係同一隻音素嘅[70]。
  • BB 嘅可塑性：睇埋神經可塑嘅概念。
  • 不匹配負向波（MMN）同習慣化[歐 93][71][72]
  • 語言習得裝置[歐 94]
  • 認知發育[歐 95]：語言習得同認知發育關係密切。亦可以睇埋語言習得裝置（LAD）同智能等嘅概念。
  • 刺激嘅貧乏[歐 96]
  • 環境豐富化

社會語言學

[編輯]
睇埋：傳理學同翻譯

社會語言學結合咗語言學同社會學呢兩個學科，剖析語言點樣同社會嘅各部份互動，當中社會各部份有文化同社經地位等等。

  • 語碼轉換[歐 97]：指某個人講嘢嗰陣，會使用多過一種語言或者話[73]，例如二十一世紀初嘅香港人，就出名在講嘢嗰時成日都會粵英夾雜[74]。
  • 個人方言：指某個人使用語言嘅獨特方式；想像澳門人講粵語，原則上澳門人唔同個體之間喺用粵語講嘢嘅方式上都梗有一啲微細嘅差異，不過差異唔係咁大，彼此之間仍然完全溝通到噉解；比如話有個人，叫佢做明仔，明仔有句口頭禪，硬係會將句嘢掛喺口邊，成日都會重複講嗰句嘢，噉明仔使粵語嘅獨特方式就謂之佢嘅個人方言[75]。語料庫相關嘅工作中，相當關注語料入便嘅個人方言特徵要點樣處理。
  • 口音[歐 98]：指某個國家、地區或者個人講某隻語言嗰陣，會有嘅獨特讀法；例如就噉靠日常觀察已經可知，以粵語為母語嘅人就算佢熟晒英文嘅發音、用詞同埋文法，佢講英文嗰時啲音，仲係會稍為有別於真係以英文做母語嘅人[註 10]，而且以英文做母語嘅人亦會聽得出[76]；除此之外，例如攞一個香港人同一個廣州人，縱使兩人嘅母語都係粵語，佢哋嘅口音都會有少少差異[77]。

語言地位

[編輯]
内文：語言威望

二十一世紀初嘅社會語言學界，相當關注唔同語言「地位唔同」嘅問題。

歷史語言學

[編輯]

語言比較

[編輯]
内文：語言距離同語系
睇埋：物種同聚類分析

例如下圖噉，就係日耳曼語族[歐 103]嘅分類樹狀圖，圖入便包括咗英語[歐 104]同德語[歐 105]等。



亦可以睇返語言習得講到，唔同語言之間喺 phoneme 上嘅差異。

語言接觸

[編輯]
内文：語言接觸

語言接觸[歐 106]泛指兩隻或者以上嘅語言變體彼此互動同埋互相影響。

相關領域

[編輯]
《粵典》嘅撈稿；《粵典》出自香港，係粵語嘅網上詞典，以粵語同英語雙語噉解釋粵語嘅詞彙。

睇埋

[編輯]

文獻

[編輯]
  • Anderson, C. (2018). Essentials of linguistics. McMaster University，呢本書係喺二十一世紀初頗受歡迎嘅語言學入門書。
  • Hayes, B. P. (2010). Introductory linguistics (PDF). Unpublish textbook.
  • Pinker, S. (2004). Clarifying the logical problem of language acquisition. Journal of Child Language, 31(4), 949-953.

註釋

[編輯]
  1. ↑ 不過某語言嘅語法有冇被記錄落文獻嗰度，就係另一條問題－世上有好多語言都因為地位唔夠高等嘅原因而冇文字，甚至根本冇畀人攞文獻研究佢哋同埋寫低佢哋嘅語法。
  2. ↑ 亦可以睇下語言威望嘅概念。
  3. ↑ 尤其係如果有隻口語詞搵唔到對應嘅漢字，或者有對應漢字但寫嘅人唔識。
  4. ↑ 語言同文字係兩樣嘢。正常嚟講，文字做緊嘅係用視覺嘅方法表達語言所講嘅嘢。喺二十一世紀初仍然有好多語言係冇文字嘅。
  5. ↑ 順帶一提，唔可以單獨存在嘅形態素，就係所謂嘅規範形態素。
  6. ↑ 呢點嚟自對英語等嘅歐洲語言嘅研究，喺漢語中未必啱用。
  7. ↑ 講緊語音上嘅詞，唔好諗文字住。
  8. ↑ 假設嗰隻詞顯然係做緊名詞，而唔係動詞。
  9. ↑ 有語言學家提出質問：事實表明，兒童往往能夠判定一啲極長但啱語法嘅句子「係就係噚啲，但的確啱語法」；問題係，呢啲語句出現嘅頻率非常低，點解細路有能力判定呢啲句子啱語法？
  10. ↑ 假設佢冇接受過訓練，教佢隱藏自己口音。

歐詞

[編輯]
  1. ↑ natural language
  2. ↑ linguistic universal
  3. ↑ phonetics
  4. ↑ phonology
  5. ↑ morphology
  6. ↑ syntax
  7. ↑ semantics
  8. ↑ pragmatics
  9. ↑ descriptive
  10. ↑ prescriptive
  11. ↑ theoretical
  12. ↑ applied
  13. ↑ psycholinguistics
  14. ↑ cognitive
  15. ↑ historical
  16. ↑ comparative
  17. ↑ linguistic typology
  18. ↑ text corpus
  19. ↑ quantitative
  20. ↑ graphemics
  21. ↑ orthography
  22. ↑ sagittal section
  23. ↑ International Phonetic Alphabet，IPA，粵拼：aai1 pi1 ei1
  24. ↑ phone
  25. ↑ voiceless
  26. ↑ voiced
  27. ↑ vowel，V
  28. ↑ consonant，C
  29. ↑ sonority
  30. ↑ place
  31. ↑ manner
  32. ↑ syllable
  33. ↑ monophthong
  34. ↑ diphthong
  35. ↑ syllabic
  36. ↑ vowel reduction
  37. ↑ metathesis
  38. ↑ aspiration
  39. ↑ coarticulation
  40. ↑ assimilation
  41. ↑ phoneme，近似粵拼：fung1 nim4
  42. ↑ minimal pair
  43. ↑ contrastive
  44. ↑ allophone；粵拼：aa1 lou4 fung4
  45. ↑ free variation
  46. ↑ complementary
  47. ↑ prosody
  48. ↑ tone
  49. ↑ tone contour
  50. ↑ intonation
  51. ↑ morpheme，有啲似粵拼：mo1 fim4
  52. ↑ affix
  53. ↑ infix
  54. ↑ Tagalog
  55. ↑ allomorph
  56. ↑ word
  57. ↑ inflection
  58. ↑ grammatical category
  59. ↑ tense，粵拼：ten1 si2
  60. ↑ person
  61. ↑ number
  62. ↑ declension
  63. ↑ stem
  64. ↑ morphological derivation
  65. ↑ Principle of modification
  66. ↑ part-of-speech，POS
  67. ↑ syntactic distribution
  68. ↑ morphological distribution
  69. ↑ noun
  70. ↑ open class
  71. ↑ closed class
  72. ↑ recursion
  73. ↑ phrase
  74. ↑ clause，句法分析上用 TP 表示。
  75. ↑ principle of compositionality
  76. ↑ ambiguity
  77. ↑ passive voice
  78. ↑ denotation
  79. ↑ connotation
  80. ↑ prototype theory
  81. 1 2 context
  82. ↑ anaphora
  83. ↑ thematic relation
  84. ↑ agent
  85. ↑ patient
  86. ↑ cognition
  87. ↑ speech production
  88. ↑ lexical decision task
  89. ↑ competence versus performance
  90. ↑ priming
  91. ↑ language acquisition
  92. ↑ induction
  93. ↑ habituation
  94. ↑ language acquisition device，LAD
  95. ↑ cognitive development
  96. ↑ poverty of the stimulus
  97. ↑ code-switching
  98. ↑ accent
  99. ↑ prestige
  100. ↑ linguistic distance
  101. ↑ mutual intelligibility
  102. ↑ language family
  103. ↑ Germanic languages
  104. ↑ English
  105. ↑ German
  106. ↑ language contact

引咗

[編輯]
  1. 1 2 linguistics. Encyclopedia Britannica.
  2. 1 2 Kracht, M. Introduction to Linguistics 互聯網檔案館嘅歸檔，歸檔日期2023年2月22號，. (PDF). Department of Linguistics, UCLA.
  3. ↑ 原版英文嗰句嘢："linguistics, the scientific study of language."
  4. ↑ 原版英文嗰句嘢："Languages are sets of signs. Signs combine an exponent (a sequence of letters or sounds) with a meaning. Grammars are ways to generate signs from more basic signs..."
  5. ↑ Lyons, John (1991). Natural Language and Universal Grammar. New York: Cambridge University Press. pp. 68-70.
  6. ↑ linguistic universal. Oxford Reference.
  7. ↑ Anderson, C. (2018). Essentials of linguistics. McMaster University.
  8. ↑ O'Grady, W. (2005). Contemporary Linguistics: An Introduction (5th ed.). Bedford/St. Martin's. p. 15.
  9. ↑ Aronoff, Mark (1993). Morphology by Itself. Cambridge, MA: MIT Press.
  10. 1 2 Carnie, Andrew (2006). Syntax: A Generative Introduction (2nd ed.). Oxford: Wiley-Blackwell.
  11. ↑ Palmer, F. R., & Frank Robert, P. (1981). Semantics. Cambridge university press.
  12. ↑ pragmatics. Encyclopedia Britannica.
  13. ↑ Crystal, David (2008). A Dictionary of Linguistics and Phonetics (6th ed.). Blackwell. p. 384.
  14. ↑ Ayres-Bennett W. From Haugen's codification to Thomas's purism: assessing the role of description and prescription, prescriptivism and purism in linguistic standardisation. Language Policy. 2020 May;19(2):183-213. p. 188，呢篇仲提到多種唔同嘅語言規範。
  15. 1 2 Betti, Mohammed Jasim. (2021). Applied Linguistics vs Theoretical Linguistics. Publications on ResearchGate.
  16. ↑ Liu, V., & Curran, J. R. (2006, April). Web text corpus for natural language processing. In 11th Conference of the European Chapter of the Association for Computational Linguistics (pp. 233-240).
  17. ↑ Cahill, Michael; Rice, Keren (2014). Developing Orthographies for Unwritten Languages. Dallas, Tx: SIL International.
  18. ↑ Acoustic phonetics 互聯網檔案館嘅歸檔，歸檔日期2023年6月2號，. (PDF). University of Massachusetts.
  19. ↑ 2.2 Articulators. Essentials of Linguistics. Open Library.
  20. ↑ 2.3 Describing Speech Sounds: the IPA. Essentials of Linguistics. Open Library.
  21. ↑ 2.1 How Humans Produce Speech. Essentials of Linguistics. Open Library.
  22. ↑ voice - phonetics. Encyclopedia Britannica.
  23. ↑ 2.5 Sonority, Consonants, and Vowels. Essentials of Linguistics. Open Library.
  24. ↑ Nasals and Nasalization. Oxford Bibliographies.
  25. ↑ What is the Manner of Articulation in Linguistics. Medium.
  26. ↑ Akulov, A. (2015). Contemporary condition and perspectives of Ainu language. Cultural Anthropology and Ethnosemiotics, 1(1), 3-23.
  27. ↑ Zee, Eric (1999), "Chinese (Hong Kong Cantonese)" (PDF), Handbook of the International Phonetic Association: A guide to the use of the International Phonetic Alphabet, Cambridge: Cambridge University Press.
  28. ↑ Stokes, S. F., & To, C. K. S. (2002). Feature development in Cantonese. Clinical linguistics & phonetics, 16(6), 443-459.
  29. 1 2 3.6 Other Articulatory Processes. Essentials of Linguistics. Open Library.
  30. ↑ aspirate - linguistics. Encyclopedia Britannica.
  31. ↑ 3.5 Articulatory Processes: Assimilation. Essentials of Linguistics. Open Library.
  32. ↑ Wong, A. W. K., Huang, J., & Chen, H. C. (2012). Phonological units in spoken word production: Insights from Cantonese. PLoS One, 7(11), e48776.
  33. ↑ Phoneme. Encyclopedia Britannica.
  34. ↑ 5.1 How Babies Learn the Phoneme Categories of Their Language. Essentials of Linguistics. Open Library.
  35. 1 2 4.1 Phonemes and Contrast. Essentials of Linguistics. Open Library.
  36. ↑ Ng, C. L. C. (2017). Merger of the Syllable-Initial [n-and [l-] in Hong Kong Cantonese] (PDF).
  37. ↑ 4.2 Allophones and Predictable Variation. Essentials of Linguistics. Open Library.
  38. ↑ Handout #1 Complementary and contrastive distribution (PDF).
  39. 1 2 3.7 Suprasegmentals. Essentials of Linguistics. Open Library.
  40. ↑ Tong, X., Lee, S. M. K., Lee, M. M. L., & Burnham, D. (2015). A tale of two features: Perception of Cantonese lexical tone and English lexical stress in Cantonese-English bilinguals. PloS one, 10(11), e0142896.
  41. ↑ Master List of Morphemes: Suffixes, Prefixes, Roots 互聯網檔案館嘅歸檔，歸檔日期2023年3月15號，. (PDF). Florida Department of Education.
  42. ↑ Haspelmath, Martin (2010). Understanding Morphology. Andrea D. Sims (2nd ed.). London: Hodder Education.
  43. 1 2 6.1 Words and Morphemes. Essentials of Linguistics. Open Library.
  44. ↑ 6.2 Allomorphs. Essentials of Linguistics. Open Library.
  45. ↑ Alan, C. L. (2007). Understanding near mergers: The case of morphological tone in Cantonese 互聯網檔案館嘅歸檔，歸檔日期2023年4月3號，. (PDF). Phonology, 24(1), 187-214.
  46. ↑ What is a Word? 互聯網檔案館嘅歸檔，歸檔日期2023年3月1號，.. SIL Glossary of Linguistic Terms.
  47. ↑ Hayes, B. P. (2010). Introductory linguistics 互聯網檔案館嘅歸檔，歸檔日期2023年3月4號，. (PDF). Unpublish textbook，尤其係睇 2.4 "Breaking up the words into morphemes" 嗰段，講做咗詞形變化嘅詞可以𢱕散做多個形態素。
  48. ↑ 6.3 Inflectional Morphology. Essentials of Linguistics. Open Library.
  49. ↑ Fabricius-Hansen, Catherine (2006). "Tense". In Brown, E.K.; Anderson, A. (eds.). Encyclopedia of Language and Linguistics (2nd ed.). Boston: Elsevier. pp. 566-573.
  50. ↑ Beard, R (1992), "Number", in Bright, W (ed.), International Encyclopedia of Linguistics.
  51. ↑ Current Grammar. UCSD Linguistics - LIGN 121, Syntax. (13) Principle of Modification
  52. ↑ Carnie, Andrew (2006). Syntax: A Generative Introduction (2nd ed.). Oxford: Wiley-Blackwell.
    第 74 頁講咗呢句："Principle of Modification (revised): "If an XP (that is, a phrase with some category X) modifies some head Y, then XP must be a sister to Y (i.e., a daughter of YP)."
    第 90 頁講咗："Trees allow us to capture the differences between ambiguous readings of the same surface sentence."，用咗英文句子 "The princess killed the king with the knife." 做例。
  53. 1 2 7.1 Nouns, Verbs and Adjectives: Open Class Categories. Essentials of Linguistics. Open Library.
  54. ↑ Feng, S., Qi, R., Yang, J., Yu, A., & Yang, Y. (2020). Neural correlates for nouns and verbs in phrases during syntactic and semantic processing: An fMRI study. Journal of Neurolinguistics, 53, 100860，呢篇文集中於標準官話，亦講到名詞同動詞會引起嘅腦活動明顯有異，分別主要係喺額葉同顳葉嗰度。
  55. ↑ Kroeger, Paul (2005). Analyzing Grammar: An Introduction. Cambridge: Cambridge University Press.
  56. ↑ Gupta, Anil (1980). The logic of common nouns. New Haven and London: Yale University Press
  57. ↑ 7.3 Closed Class Categories (Function Words). Essentials of Linguistics. Open Library.
  58. ↑ sentence. Cambridge Dictionary.
  59. 1 2 9.2 Events, Participants, and Thematic Roles. Essentials of Linguistics. Open Library.
  60. ↑ Clause 互聯網檔案館嘅歸檔，歸檔日期2023年3月9號，.. SIL Glossary of Linguistic Terms.
  61. ↑ Baggio, G., Van Lambalgen, M., & Hagoort, P. (2012) The processing consequences of compositionality, in M. Werning, W. Hinzen, & E. Machery (Eds.), The Oxford handbook of compositionality (pp. 655–672).
  62. ↑ 9.1 Ambiguity. Essentials of Linguistics. Open Library.
  63. ↑ 10.1 Elements of Word Meaning: Intensions and Extensions. Essentials of Linguistics. Open Library.
  64. ↑ Goodwin, Charles; Duranti, Alessandro, eds. (1992). "Rethinking context: an introduction" (PDF). Rethinking context: Language as an interactive phenomenon. Cambridge: Cambridge University Press. pp. 1-42.
  65. ↑ Song, L. (2010). The role of context in discourse analysis (PDF). Journal of Language Teaching and Research, 1(6), 876.
  66. ↑ Levelt, W. J. M. (1989). Speaking: From Intention to Articulation. MIT Press.
  67. ↑ Sze, W. P., Rickard Liow, S. J., & Yap, M. J. (2014). The Chinese Lexicon Project: A repository of lexical decision behavioral responses for 2,500 Chinese characters (PDF). Behavior Research Methods, 46, 263-273.
  68. ↑ Norton, B., & Toohey, K. (2011). Identity, language learning, and social change. Language teaching, 44(4), 412-446.
  69. ↑ Hayes, B. P. (2010). Introductory linguistics 互聯網檔案館嘅歸檔，歸檔日期2023年3月4號，. (PDF). Unpublish textbook.
  70. ↑ 5.2 How Adults Learn the Phoneme Categories in a New Language. Essentials of Linguistics. Open Library.
  71. ↑ Phillips, C.; Pellathy, T.; Marantz, A.; Yellin, E.; Wexler, K.; McGinnis, M.; Poeppel, D.; Roberts, T. (2001). "Auditory Cortex Accesses Phonological Category: An MEG Mismatch Study". Journal of Cognitive Neuroscience. 12 (6): 1038-1055.
  72. ↑ Draganova, Rossitza; Eswaran, Hari; Murphy, Pamela; Huotilainen, Minna; Lowery, Curtis; Preissl, Hubert (2005-11-01). "Sound frequency change detection in fetuses and newborns, a magnetoencephalographic study". NeuroImage. 28 (2): 354-361.
  73. ↑ code-switching. Encyclopedia Britannica.
  74. ↑ A look into 'Kongish' - the English language among Hongkongers. TimeOut.
  75. ↑ Gerard, Christophe (2010). "The Individual and His Language: Idiolect, Idiosemy, Style". Philologie Im Netz. 51: 1-40.
  76. ↑ Kat, L. W., & Fung, P. (1999, March). Fast accent identification and accented speech recognition. In 1999 IEEE International Conference on Acoustics, Speech, and Signal Processing. Proceedings. ICASSP99 (Cat. No. 99CH36258) (Vol. 1, pp. 221-224). IEEE，呢篇文搵咗班以英文做母語嘅美國人同埋一班以香港粵語做母語嘅人返嚟，剖析兩者講英文嗰陣啲聲有咩分別。
  77. ↑ Baratta, A. (2016). Keeping it real or selling out: The effects of accent modification on personal identity. Pragmatics and Society, 7(2), 291-319.
  78. ↑ Lippi-Green, Rosina (2001). English with an Accent: Language, Ideology and Discrimination in the United States. Routledge; 2nd Edition.
由「https://zh-yue.wikipedia.org/w/index.php?title=語言學嘅大綱&oldid=2459849」收