字典
字典，實為字書，書一種，收集字嘅書，並解釋意思，記載讀音，歸入工具書一類。西洋而言，字書定義好闊。爾雅、說文、玉篇、切韻、唐韻、廣韻、集韻、正字通、康熙字典等等，通通都應歸入字書，然而唐人而言，會再細分，故此有種種名目。
按此定義，及後衍生出字彙、字典、辭典、詞典等名目，都歸為字書一類。
字典一字，取自康熙字典，序文有寫[1]。康熙字典同其他字書唔同，一般字書只列出自己一家之言。而康熙字典並非自家述作，反而收納前人字書，以祈形音義俱全，有漏就補前人經典同注疏， 唔夠再有前人詩文補上。項項皆有出典，故此叫典。然而後世自稱為字典、辭典、詞典嘅，大多言過其實，音義例多數無出處。
華夏講字，有兩重意思，一種為單字，逐個單字理解，如說文咁，解林單字，「平土有叢木曰林。」另一種唔理單字定多字，按意思為一字，好似爾雅咁，釋訓有「明明斤斤，察也」，明明斤斤視為一字。又釋天，「大歲在寅曰攝提格」，「攝提格」為一字咁。
按周禮後人加註，「古曰名，今曰字。滋益而名，故更曰字。」上古叫字做名，叫字因為佢衍生繁多。亦即事物畀得名就係字，無話單個定多個。近世或有唔明解，或想將兩者分開，改叫辭，或叫詞，反而造成混亂。辭同詞經常通假，然意思各異，之不過，都同講嘢有關。不過都無拆細基本元素嘅意思。辭同詞，一句又得，長到成篇咁又得，如楚辭、陳辭、宋詞、曲詞。
西洋大多為屈折語，會睇重字根，將變化歸入一字，如英文動字，表示過去而屈折、表示現行而屈折，會合拼去一字來寫，唔會分開。如日文咁黏着語，字尾黐埋去字度，改變字義，如表示過去咁。咁所衍生會拼入去以基本字，當做一字來寫。傳統上依啲叫字，由字母組成。馬禮遜有段「英吉利國字語小引」，就係咁稱呼英文字[2]。近代有啲改叫詞，有時搞到混亂。
世上唔少地方，書寫都按音為主，用字母或類似記音符號，有既定編排。而唐字就無固定排法，排字多數根檢字方法。分類、部首、筆劃、聲韻、拼音、編碼都有。