小飛俠同溫蒂

1906 年嘅雜誌封面，描述一位演員飾演小飛俠彼得潘。

小飛俠同溫蒂（參見英文：Peter and Wendy ）係一九〇四年出嘅劇作，喺一九一一年以長篇小說出版。個故仔講述永遠唔會大嘅男仔彼得潘，帶同嚟自倫敦嘅溫蒂同埋溫蒂嘅兩個細佬，飛去夢幻，同鐵鈎船長等嘅角色展開一連串冒險。

呢個故事以童年、想像力為核心主題，透過小飛俠同溫蒂之間嘅互動，講到拒絕成長同踏入成人世界之間嘅張力。自從出版以嚟，呢本小說經已被廣泛改編成舞台劇、電影、動畫同第啲媒體嘅作品，成為英文文學中最具代表性嘅兒童文學作品之一。

古仔

1907 年至 1909 年間影到位演員飾演鐵鈎船長。

個舞台劇同小說版本喺故仔細節上有啲唔同，不過大方向同內容都好相似。兩個版本入面，彼得潘（小飛俠）都會喺夜晚飛去倫敦布林斯貝利嘅達靈屋企，喺打開嘅窗邊偷聽瑪莉太太講瞓覺故仔。有一晚，彼得畀人發現咗，佢想走嗰陣唔小心跌咗個影。之後佢返轉頭想攞返個影，結果意外整醒咗瑪莉個女溫蒂。溫蒂用針線幫佢縫返個影上身，彼得就知道原來溫蒂識好多瞓覺故仔。於是佢邀請溫蒂去夢幻島，做佢班「迷途仔」嘅媽媽，啲細路係以前由嬰兒車跌出嚟，之後就迷咗路。溫蒂答應咗，佢細佬約翰同米高都一齊跟住去。

飛去夢幻島途中，佢哋畀海盜用大炮打落嚟。溫蒂差啲畀迷途仔圖圖斯射死，因為彼得嘅小仙女同伴叮叮鈴（Tinker Bell）呷醋，呃佢以為溫蒂係隻雀。溫蒂最後冇事，係因為佢戴住一粒橡果吊墜保住條命仔，嗰粒係彼得用嚟換溫蒂一個「吻」（其實只係個頂針）送畀佢嘅。彼得同迷途仔幫溫蒂起咗間屋仔，等佢養傷。慢慢地，約翰同米高開始學迷途仔嘅生活方式，而三兄妹都逐漸忘記咗自己嘅父母同屋企。

彼得帶溫蒂去咗佢住喺地下嘅屋，歡迎佢做「媽媽」角色，之後又帶達靈兄妹經歷咗好多冒險。喺美人魚湖，彼得同迷途仔救咗紅人族族長個女虎蓮莉，仲同海盜打咗一場，包括鐵鈎船長 —— 彼得嘅死對頭。船長右手個鐵鈎，就係以前畀彼得斬斷之後，裝上去嘅。自此之後，船長就畀一條鱷魚追住，因為條鱷魚食咗佢隻手，仲想食埋佢成個人。條鱷魚仲吞咗個鬧鐘落肚，所以鐵鈎船長一聽到「滴答」聲就好驚。彼得之後畀船長整傷咗，佢以為自己會死，因為潮水漲緊，海水就快冚住棄逐之岩（Marooner's Rock）。不過，一隻叫「夢幻鳥」嘅雀乸畀佢用自己個巢當船，彼得就咁樣安全返到屋企。

為咗報答彼得救虎蓮莉，紅人族幫手守住彼得間屋，防止下一次海盜偷襲。與此同時，溫蒂開始鍾意彼得，問佢對自己有咩感覺。彼得就話，佢對溫蒂只有「一個乖仔對媽媽嘅感情」，令溫蒂好失望。有一日，溫蒂同迷途仔同細佬講故事嗰陣，突然諗起自己嘅父母，決定返英國。彼得完全唔知，其實溫蒂同班男仔已經畀鐵鈎船長捉走咗；鐵鈎船長仲殺咗紅人族，趁彼得瞓覺嗰陣落毒喺佢嘅「藥」入面。

彼得醒返之後，叮叮鈴話畀佢知溫蒂畀人捉走咗。彼得為咗令溫蒂開心，打算飲藥，但佢唔信叮叮鈴講藥有毒，因為佢覺得鐵鈎船長唔可能入到佢哋秘密基地，而自己完全冇察覺。結果叮叮鈴自己飲咗啲毒藥，差啲死。佢話，只要細路相信仙女，佢就有得救。喺舞台劇入面，彼得會轉向觀眾，求相信仙女嘅人拍手；小說入面，佢就係同所有瞓緊、發夢去緊夢幻島嘅細路講。

去海盜船途中，彼得遇到條鱷魚，發現佢冇聲，於是以為個鬧鐘停咗。彼得決定學條鱷魚發出「滴答」聲，等其他動物唔會傷害佢。佢自己都唔知，上船之後仲一路發緊嗰個聲，搞到鐵鈎船長同啲海盜以為條鱷魚嚟咗，嚇到縮埋一嚿。趁佢哋搵條鱷魚嗰陣，彼得偷偷入船艙偷鎖匙，救返迷途仔。之後彼得同鐵鈎船長決鬥，輕鬆打贏，將鐵鈎船長一腳踢落去畀條鱷魚食。鐵鈎船長臨死前仲覺得滿意，因為彼得真係「踢佢落船」，喺鐵鈎船長眼中呢啲算係「冇禮貌嘅行為」。彼得之後接管咗隻船，揸返去倫敦。

溫蒂同細佬返到屋企之前，彼得先飛返去，想閂埋窗，等溫蒂以為媽媽已經忘記咗佢。不過，當佢知道瑪莉太太有幾傷心之後，佢嬲嬲地打開返道窗，然後飛走。達靈一家終於團聚，溫蒂仲介紹晒迷途仔畀父母識，佢哋決定收養佢哋。彼得短暫返嚟一次，見到瑪莉太太。瑪莉想收養佢，但彼得拒絕，因為佢驚人哋會「捉住佢，逼佢變大人」。暗示其實瑪莉細個嗰陣識彼得；佢嘴角一直有個冇人攞到嘅「吻」，但彼得走嗰陣攞走咗。

彼得答應每年春天都會返嚟，帶溫蒂去夢幻島玩一個星期。舞台劇最後一幕發生喺一年後，溫蒂準備再去夢幻島，而春季大掃除已經做完。叮叮鈴喺呢一年入面死咗，因為仙女壽命好短。不過，當溫蒂再見彼得嗰陣，彼得已經完全唔記得叮叮鈴、迷途仔，甚至鐵鈎船長，亦唔明白點解溫蒂咁想帶佢一齊返去。

尾聲

原版《彼得潘》首演四年後，巴里寫咗一段附加場面，叫《溫蒂長大之後》，後來收錄喺《彼得同溫蒂》最後一章，再之後喺一九五七年獨立出版。喺呢一幕入面，彼得多年後返嚟搵溫蒂，但溫蒂已經大個咗，仲有個女叫珍。故事亦透露，溫蒂嫁咗一個迷途仔，不過小說冇提邊個。彼得知道溫蒂「背叛」佢、長大成人之後，好心碎；直到珍答應去夢幻島做彼得新嘅「媽媽」，佢先好返。小說最後提到，當珍長大後，彼得又會帶珍個女瑪嘉烈去夢幻島。只要細路仔仲保持「開心、純真同冇心肝」，呢個循環就會永遠繼續落去。

角色

• 溫蒂·達靈
• 鐵鈎船長

改編

睇埋：小飛俠 (1953年電影)

睇埋

• 仙子
• 童話