英文文法

英文句子 A mouse eats a cat（一隻老鼠食一隻貓）用分析樹表達嘅樣；
A mouse 結合成一段名詞短語（NP），
a cat 又係結合成一段名詞短語（NP），
eats（現在式，第三身所以加 s）係動詞（V）。

英文文法（粵拼：jing1 man2*4 man4 faat3；英文：English grammar）顧名思義係指英文（或者精確啲講，係英格蘭話）嘅文法。一隻自然語言嘅文法包括一拃規則，講明咗嗰隻語言啲字、短語同句子嘅結構「應該係點」；唔合乎文法嘅字句，會俾用開隻語言嘅人覺得佢怪，甚至完全唔明佢想講乜；而英文都有噉嘅規則。

舉個例說明：喺英文入面，字最基本上可以分做名詞、代名詞、動詞、形容詞、副詞、介詞、決定詞同連接詞等嘅多隻詞性，當中（簡化噉講）名詞多數係指人同第啲物件，而動詞多數係指某啲動作或者行動；動詞正路係會掕喺個名詞後面，意思係「名詞指嗰件物件，做出動詞指嗰樣動作」，好似以下嘅句子噉－

• He ( 代名詞指男性佢 ) swims ( 動詞指游水 )－係一句啱文法嘅句子，表示「佢游水」噉嘅意思；而
• He swims runs ( run 係動詞指跑 )－就係一句唔啱文法嘅句子，聽或者睇嘅人唔會明佢想噏乜；

值得注意嘅係，英文屬於西日耳曼語支（近親有德文同荷蘭文），所以同粵語等嘅漢語有頗大差異，文法上有好多同粵語截然不同嘅特徵。例如英文有時態詞形變化，即係話啲動詞會變樣，用嚟表示隻詞講嗰樣動作係喺咩時間發生嘅－好似係 swim 噉，如果 swim 指嗰吓游水動作係過去發生嘅，噉 swim 就要變做過去式 swam ；包括粵語在內嘅大多數漢語都冇時態詞形變化呢家嘢－

• 佢今日去游水，用耶魯拼音寫係 kéuih gām yaht heui yàuh séui；
• 佢尋日去游水，用耶魯拼音寫係 kéuih chàhm yaht heui yàuh séui－當中 yàuh séui（粵語「游水」）無論指嗰樣動作係而家發生定過去發生，隻字個樣都唔會變。

要留意嘅係，英文都有方言，唔同地區嘅英文會或多或少噉有差異。篇文以下嘅內容以廿一世紀初嘅主流英式英文同美式英文作準。

詞性基礎

睇埋：英文同詞性

英文嘅句子由字組成，字會組合埋一齊令到一句句子有某啲意思。喺英文入面，字最基本上可以分做九大詞性（part-of-speech，POS）：

• 名詞：通常係用嚟指一件或者多件物件，例如 butterfly 表示蝴蝶噉解；
• 動詞：通常都係指一啲動作，例如 fly 表示飛噉解；
• 冠詞（睇埋決定詞）：一個冠詞會掕住喺個名詞度，表示嗰個名詞指嗰樣嘢係咪可以指定，例如 the（指定嗰個 xx）同埋 a（一個 xx）噉；
• 形容詞：通常用嚟形容掕住嘅名詞，例如 beautiful 形容名詞，指靚噉解；
• 副詞：攞嚟修飾動詞或者形容詞等唔係名詞嘅字詞，例如 beautifully 可以形容動詞，指「靚噉」嘅意思；
• 介詞：通常係掕住個名詞或者動詞，表示時間或者空間上嘅關係，例如 atop 表示「喺... 上面」；
• 代名詞：攞嚟替代名詞，費事吓吓都要出返個名詞嘅名，例如 he 同 she 等；
• 連接詞：用嚟做「連接」嘅字詞，例如 because（「因為」噉解）；
• 語氣詞：用嚟表示語氣嘅字詞，好多時可以單獨噉出現，例如 ouch!（「好痛！」噉解）；

... 呀噉。當中名詞、動詞、形容詞同副詞係所謂嘅開放字類（open classes）－呢啲字類成日都會有新字詞加入，而淨低嗰啲詞性一般俾人認為封閉字類（closed classes）－好少可會有新字詞成功噉加入，例如代名詞就係噉。

分辨詞性

睇埋：詞性標注

「分辨每隻字係邊種詞性」係理解英文句子嘅過程嘅重要一環。就算個人識嗮英文裏面啲生字，佢都未必能夠齋靠睇或者聽一隻字就知隻字係咩詞性：舉例說明，英文入面嘅字好多都有「做名詞指某個角色，做動詞指嗰個角色做嘅行動」噉嘅情況，例如 mentor 做名詞係指「導師」噉解，但做動詞就係指「教導」噉解（隻字「係邊種詞性」會影響句嘢嘅意思）；一個人要睇好多第啲資訊，先可以知嗰隻字係邊種詞性，例如齋睇句句子入面嘅其他字嘅話，

• 淨係得名詞先可以掕隻冠詞喺前面，所以 the mentor 當中嗰個 mentor 應該係做緊名詞；
• 淨係得動詞先可以有時態詞形變化，所以 mentored 當中嗰個 mentor 應該係做緊動詞，而且係過去式（得動詞先可以加 -ed 做過去式）。
• 隻字喺句嘢入面嘅位置都提供到有關「隻字係邊種詞性」嘅資訊，例如如果 mentors 擺正喺 John（名詞，通常指叫嗰個名嘅人）後面嘅話，應該比較大機會係動詞。

... 呀噉。順帶一提，語境都可以左右對啲字嘅詞性嘅判斷。

主要詞性

名詞

Two bottles of milk（兩樽奶）－
Bottle（樽）同 milk（奶）都係普通名詞，
Bottle 可數而 milk 不可數。

内文：英文名詞

英文入面嘅名詞（noun）主要有以下呢啲特性：

• 固有（proper）同普通（common）名詞：話一隻名詞係固有名詞，意思係話隻名詞係指緊一件特定嘅物體，而相比之下，普通名詞係指緊一類嘅物體，冇話特定指緊邊－
  • 固有名詞例子有 England（特定噉指英格蘭）、Gregory（男人名，通常指一個特定嘅人）或者 Microsoft（特定噉指緊某間企業）
  • 普通名詞例子有 region（意思係地區噉解）、human（意思係人類噉解）或者 company（意思係公司噉解）
• 可數（countable）同不可數（uncountable）名詞：
  • 可數名詞可以有眾數－通常隻字指嘅物件可以明確噉分做一件件，例如 land（指土地）可以加 -s 變做 lands 指多笪土地，或者 butterfly 甩 -y 加 -ies 變成 butterflies 指多隻蝴蝶，亦都有部份嘅字變眾數嗰陣唔係就噉加 -s/ies 嘅，例如 woman 指女人而眾數係 women，或者 fungus 係指真菌而眾數係 fungi ，有啲字甚至係一變眾數就唔同嗮樣，例如 person 指一個人而 people 指多個人，或者 mouse 係指一隻老鼠而 mice 指多隻老鼠；
  • 不可數名詞就係指隻字冇眾數同單數嘅分別－通常係隻字指嘅物件冇得明確噉分做一件件，例如 milk 指奶（尤其係牛奶）噉，呢隻字冇得變樣變眾數，頂櫳係裝住啲奶嘅容器可以有眾數，例如 a bottle of milk 指一樽奶而 two bottles of milk 指兩樽奶－當中 bottle（樽）加咗 s 變眾數。
• 擁有式（possessive）：英文名詞可以加嘢表示擁有式－
  • 最簡單嘅係加 -'s ，例如 Maria 係個女人名，通常指某個人，Maria's 就係指 Maria 嘅... 噉解，例子有 Maria's parents（Maria 嘅父母）或者 Maria's home（Maria 嘅屋企）；
  • 如果隻名詞表示眾數，通常就要加 -s'，例如 the cat's owner 係指嗰隻貓嘅主人而 the cats' owner 係指嗰班貓嘅主人（貓變咗眾數）噉解。
• 英文名詞有啲常見特徵，有陣時齋睇隻字點串點讀經已可知隻字大機率係名詞，例如多數動詞加咗 -ing 就可以當名詞噉用，好似 swim 係動詞指游水而 swimming 可以做名詞指游水呢種活動，可以有

  I（我）like（鍾意；動詞）swimming，噉嘅句子－成句意思係我鍾意游水噉解；

• 自然性別（natural gender）：同第啲主要歐洲語言唔同嘅係，英文嘅名詞性別近乎淨係得自然性別咁滯；喺（好似係）德文同法文當中，好多唔係指緊有性別嘅物件嘅名詞，都可以有性別，例如法文入面嘅字 chaise 係指櫈，性別上屬陰柔，所以指「嗰張櫈」嗰陣要用 la chaise 唔係 le chaise－la 同 le 都係法文入面嘅常用冠詞，指「特定嘅一件...」，相當英文入面嘅 the，分別在於 la 係陰柔名詞用嘅而 le 係陽剛名詞用嘅，chaise 係陰柔所以指「嗰張櫈」嗰陣要用 la ；英文同法文唔同，淨係得自然性別咁滯，即係話啲名詞要真係指緊有性別嘅物體－例如 men（男人）或者 women（女人）呀噉－隻字先會分性別，唔會話一張櫈或者一部電腦都有性別。

... 呀噉。

決定詞

内文：英文決定詞同英文冠詞

喺英文當中，決定詞（determiner）嘅數量唔多。英文嘅決定詞會掕喺名詞前面，用嚟表示「嗰隻名詞指緊嘅係邊一件或者邊拃物體」，包括：

• 冠詞（article）：包括咗 a（一個）、an（一個，通常用於頭一個音節係元音嘅名詞）同埋 the（嗰個）；

睇埋

• 英文音系
• 詞性標注

拎

• The Internet Grammar of English at University College London.
• The Englicious website for school teachers developed by University College London.
• English Grammar at the British Council.