短語

喺語言學上，短語（粵音：dyun2 jyu5；英文：phrase ）係指若干隻詞砌埋一齊，形成一個語法單位。例如喺粵語入邊，三個盒、搽咗牛油嘅麵包或者好大隻嘅松鼠等，都係由好幾隻詞組成，但可以當正係單一一隻名詞噉嚟用，是謂名詞短語。即使將噉嘅短語換咗做一隻名詞或者代名詞，或者移去第個名詞可以去嘅位，成句嘢依然係語法上正確嘅－

「檯上面有三個盒。」

「我食緊塊搽咗牛油嘅包。」

「樖樹上高有隻好大隻嘅松鼠。」

句法學當中分析句子嘅結構嗰陣，就成日都會用到短語呢個概念。

概論

内文：句法同句子

中心

内文：短語中心

中心係指短語當中最「核心」嗰部份，負責決定呢句短語嘅句法功能係乜，可以當咩詞性噉嚟用，例如

三個盒－中心係盒（盒係名詞，決定咗句短語係名詞短語）；

Boiling water（名詞短語；滾水噉解）－中心係 water（名詞，決定咗句短語係名詞短語）；

補語同修飾語則會掕住中心，同中心補充一啲額外嘅資訊。語法上必要嘅就謂之補語，而語法上唔必要（冇咗都仲會合乎語法）嘅就謂之修飾語，例如滾緊嘅水入便滾緊嘅就係修飾語，同中心（水）補充咗額外資訊，同時喺語法上唔係必要嘅。

及物

内文：及物

有啲中心（尤其係動詞）比較「揀擇」，例如動詞就有分及物同唔及物，及物動詞可以（甚至實要）有個賓語接受嗰樣動作，而唔及物動詞就冇得掕賓語。

英文嘅及物例子：like（鍾意噉解）

I like Cantonese opera.（意思：我鍾意粵劇大戲）

－like 掕住賓語（Cantonese opera），隻賓語表示接受 like 嗰一樣事物；

英文嘅不及物例子：sneeze（打乞嚏噉解）

He sneezes.（佢打乞嚏）

He sneezes her.（一句語法上錯誤嘅語句）

有啲動詞更係所謂嘅雙及物，即係可以有兩個賓語，粵語例子－

佢畀本書我。

－畀後面掕住兩個賓語，本書同我。呢點同英文入便嘅做法好相似，例子：

He handed Sarah the book.（佢遞本書畀莎拉）

－hand 做動詞嗰時通常係指遞某樣嘢畀某某噉嘅意思，後面掕兩個名詞，第一個名詞表示收件物品嘅人，而第二個名詞表示件物品係乜。

睇埋

• 分析樹
• 語序
• 子句