語言相對論

出自維基百科，自由嘅百科全書
粵語：藍色嘅天。
英文：Blue sky.（藍色嘅天噉解）
某啲語言嘅使用者：綠色嘅天。

語言相對論（粵拼：jyu5 jin4 soeng1 deoi3 leon6），又叫薩丕pei1爾-沃夫假說，係源自廿世紀語言學嘅一個假說。語言相對論最重點嗰個諗頭係話，一隻語言嘅結構會影響佢嘅使用者用咩方式思考現實，亦即係話一個人用咩語言會影響到佢嘅思維。要留意呢個假說講緊嘅，唔淨只係話唔同語言用字句嘅習慣唔同，而係講緊語言會影響人腦嘅深層認知過程[1]。

基本諗頭[編輯]

睇埋：認知科學同心理語言學

「想像一個世界，個天係綠色嘅。噉唔係因為你去咗第個行星，而係因為你隻語言入便冇字詞可以指藍色（所以你個腦將天嘅藍色當咗做綠色嘅一種）。」[2]

語言相對論嘅諗頭源自廿世紀上半，當時歐美嘅語言學家睇勻咗好多歐洲語言以外嘅語言，見識到唔同語言喺文法上可以爭幾咁遠[註 1]。當中美國語言學家班哲文·李·沃夫喺 1956 年撰文，提到噉嘅諗法：沃夫佢主張每一隻語言嘅文法系統唔單只係用嚟表達思緒咁簡單，仲能夠形塑語言使用者嘅思緒；人喺個腦入便建立自己諗緊嘅嘢嗰陣，會跟從佢慣用嗰隻語言嘅文法嚟組織思緒；除此之外，唔同語言分辨事物嘅方法都唔同—例如有好多語言都冇字詞可以指藍色，嗰啲語言嘅使用者傾向會用「綠色」或者「黑色」嚟描述藍色嘅物品[3]，噉就表示一個人隻語言點樣分辨唔同嘅事物，好大程度上主宰咗佢個腦點樣將事物分類[4]。

除此之外，沃夫佢仲有提到隱密型嘅概念：根據佢呢個諗法，一隻字詞可以有一啲「冇開口講出嚟嘅文法類型」；例如喺廿一世紀初嘅英文入便，啲動詞過去式要加 -ed 就唔係一種隱密型—因為講嘢嘅人會將佢對隻字詞嘅分類（係咪過去式）明確噉講出嚟（加 -ed 尾）；相比之下，英文入邊有關一個人名「係男定女」就係一個隱密型—名詞表示緊嗰個個體係男定女，唔使要隻字變樣嚟表示，但係一個用英文用得有返咁上下純熟嘅人，心入便會知隻名詞指嗰個個體係男抑或係女，能夠正確噉揀要用 he 定 she 做代名詞[5]。

強弱版本[編輯]

内文：語言決定論

語言相對論依個假說，可以分做強同弱兩個版本。

  • 弱語言相對論：根據呢個諗法，語言能夠影響思緒；呢個版本嘅語言相對論被指係太過籠統[註 2]—語言起碼會影響一個人睇咩科學節目同睇咩書，實會影響到一個人接觸到乜嘢知識，所以弱語言相對論呢個諗法，講咗等於冇講[6]。
  • 強語言相對論（語言決定論）：根據呢個諗法，一隻語言嘅特性會「定死咗」佢嘅使用者嘅思維，令到佢嘅使用者難以思考某啲嘢；呢個諗法受到唔少科學同哲學嘅研究者反對—因為呢啲人士做嘅，正正就係諗一啲前人未諗過（所以現時語言未有字詞可以指）嘅概念。到咗廿一世紀初，語言學嘅研究者一般都唔會認真看待語言決定論。

於是就出現咗一種比較中庸嘅思想：

我哋用緊嘅語言，可以影響我哋嘅某啲認知功能，但未至於令到我哋冇能力思考某啲諗頭。

例如想像一隻語言冇字詞可以指藍色，但係佢哋依然可以形容嗰一笪藍色有幾深，亦能夠睇得出笪顏色同粵語使用者心目中嘅綠色有啲唔同[7]。

實驗證據[編輯]

睇埋：心理實驗

有唔少語言學家都同心理學家合作做研究，想探究語言會點樣影響人類嘅認知。

顏色研究[編輯]

睇埋：色名

語言學家指出，唔同語言對顏色嘅描述可以幾唔同。例如粵語入邊藍（粵拼：laam4）同英文入邊嘅 blue（IPA：/bluː/）可以當係等同，兩隻字詞都係指緊藍色。不過俄羅斯話對藍色嘅描述就好唔同，廿一世紀初嘅俄羅斯話有兩隻字詞[8]

  1. Goluboy（斯拉夫字母：голубой）
  2. Siniy（斯拉夫字母：синий）

當中 1 大致可以理解做「淺藍」而 2 大致可以理解做「深藍」—留意俄羅斯話對呢兩種顏色畀咗兩隻唔同嘅字詞，唔似得粵語或者英文噉將兩隻色當做「藍」嘅變體。語言學家做咗心理實驗，搵咗一班英文嘅使用者（E 組）同埋一班俄羅斯話嘅使用者（R 組）返嚟，叫佢哋分辨唔同嘅顏色，發現 R 組能夠以更快嘅速度（反應時間）分辨淺藍同深藍，而且分起上嚟更加準[9]。

方向研究[編輯]

亦有語言學家研究語言會點樣影響人腦對空間同方向嘅處理。喺呢方面，一個出名嘅例子有澳洲土著嘅辜古依密舍話：據講喺呢隻語言裡便，講親方向一定係用東南西北嘅；喺粵語、標準官話以及英文等嘅歐洲語言當中，一個人要講一件物件喺邊，會講「喺阿明前面」或者「喺阿偉嘅左手邊」（相對方位；相對一個人嘅方向）等嘅說話，但係辜古依密舍話就好唔同，傾向用東南西北（方位），即係話如果將辜古依密舍話嘅對話譯做粵語，會有類似以下噉嘅字句[10]—

  • 「我見到巴士站喺我嘅西面。」
  • 「部手提電腦喺邊？喺你嘅東面呀。」
  • 「間超市喺邊？嗱，由你而家嘅位置向東行，行咗 XXX 咁遠距離，就會見到超市喺你南面。」

呀噉。噉即係話，辜古依密舍話嘅使用者要無時無刻留意住東南西北喺邊。事實亦表明，研究者一要求辜古依密舍話嘅使用者指出（例如）南面喺邊，佢哋能夠即刻準確無誤噉作答，而其他語言嘅使用者就往往要諗幾秒至答得出。由呢個例子可見，語言能夠影響一個人腦對方向嘅認知。

參考[編輯]

以下係文中用咗嘅重要概念或者專有名詞嘅英文名：

以下係文中引用咗嘅網頁或者學術文獻：

  1. ↑ Kay, P., & Kempton, W. (1984). What is the Sapir‐Whorf hypothesis?. American anthropologist, 86(1), 65-79.
  2. ↑ （英文） 你嘅字詞變成你嘅思緒，自然期刊
  3. ↑ Alexander, Caroline (Summer 2013). "A Winelike Sea". Lapham's Quarterly. VI (3).
  4. ↑ Whorf, Benjamin Lee, 1956, Language, Thought and Reality, Cambridge University Press: MIT Press. Edited by John B. Carroll.
  5. ↑ Whorf, Benjamin Lee, 1956, Language, Thought and Reality, Cambridge University Press: MIT Press. Edited by John B. Carroll. p. 87-101.
  6. ↑ Pinker, Steven, 2007, The Stuff of Thought: Language as a Window into Human Nature, New York, NY: Viking Penguin. "five banal versions of the Whorfian hypothesis"
  7. ↑ Thierry, Guillaume, Athanasopulous, Panos, Wiggett, Alison, Dering, Benjamin, and Kuipers, Jan-Rouke, 2009, "Unconscious effects of language-specific terminology on pre-attentive color perception", Proceedings of the National Academy of Sciences, 106(11): 4567-4570.
  8. ↑ Paramei, G. V. (2005). Singing the Russian blues: An argument for culturally basic color terms. Cross-cultural research, 39(1), 10-38.
  9. ↑ Winawer, J., Witthoft, N., Frank, M. C., Wu, L., Wade, A. R., & Boroditsky, L. (2007). Russian blues reveal effects of language on color discrimination. Proceedings of the national academy of sciences, 104(19), 7780-7785.
  10. ↑ Haviland, J. B. (1998). Guugu Yimithirr cardinal directions. Ethos, 26(1), 25-47.

註釋[編輯]

  1. ↑ 如果想睇具體例子，可以參考吓語言類型同語序所講嘅嘢。
  2. ↑ 亦冇乜可否證度。

睇埋[編輯]

由「https://zh-yue.wikipedia.org/w/index.php?title=語言相對論&oldid=2106943」收