悲劇英雄

伊底帕斯係希臘神話中有代表性嘅悲劇英雄。

悲劇英雄（參見英文：tragic hero ）喺戲劇上係指悲劇嘅主角。悲劇英雄嘅概念源自古希臘嘅戲劇藝術，亞里士多德寫《詩論》嗰陣經已有喺度探討。即使到咗二十一世紀初嘅歐美，悲劇英雄嘅概念仍然廣受討論。

定義

内文：主角同悲劇

要留意嘅係，悲劇一詞喺日常語境中可以泛指任何慘嘅故事，但係喺古希臘以至成個西方文明嘅戲劇傳統之中，悲劇有較嚴謹嘅定義，一定要跟某一套特定嘅格局，先可以算係悲劇：

典型嘅悲劇英雄係一個才能出眾、值得人敬仰嘅人物，通常具備勇氣、自我犧牲精神，或者對社會有重大貢獻。不過，佢同時亦擁有一個致命嘅悲劇缺憾——呢個缺憾唔只帶嚟一般困難，而係源自佢自身嘅錯誤、性格弱點或者判斷失誤，最終令佢走向死亡或者無法挽回嘅重大失敗。個故事唔會以成長同開心收場，而係以悲劇結束，令讀者或觀眾明白呢種缺憾可以造成嘅嚴重後果，同時對呢位英雄產生深切嘅同情與惋惜。

例子

由古代文學以至現代嘅虛構作品，都時會用到悲劇英雄嘅概念。

古典文學

呢幅畫描繪馬克白刺殺國王之景。馬克白係莎翁筆下嘅悲劇英雄。

1831 年版《科學怪人》書中嘅插圖，描繪主角出於對科學嘅好奇而創造出怪物。

哈姆雷特同馬克白係莎士比亞筆下最出名嘅悲劇英雄，佢哋都展示咗內在缺點點樣一步步帶嚟滅亡。哈姆雷特聰明、有道德感，又好有思想深度，但正正因為佢成日諗得太多、遲遲唔肯行動，先令局勢失控，邪惡同暴力愈演愈烈，最後連自己同身邊嘅人都死晒。相反，馬克白一開始係一個勇敢又忠誠嘅戰士，但佢最大嘅悲劇缺陷就係野心過盛。受到預言同他人操控之下，佢選擇權力多過道德，而隨之而來嘅內疚同疑神疑鬼，最終逼佢走向瘋狂同滅亡。

喺希臘文學入面，《伊底帕斯王》（Oedipus Rex）嘅伊底帕斯係最典型嘅悲劇英雄，佢嘅下場同命運同個人選擇緊緊扣埋一齊。伊底帕斯斯係一個有能力又有責任感嘅國王，一心想救自己嘅城市。不過，佢嘅驕傲同對真相嘅執著，反而令佢一步步揭開自己曾經無意中實現嘅預言。佢嘅悲劇結局突顯咗一個重點：英雄最強嘅優點，例如自信同決心，同時都可能變成導致毀滅嘅原因。

Sophocles 斯作品《Antigone》入面嘅 Antigone。佢出身高貴，道德感好強，而且係清楚、有意識咁選擇違抗國王嘅法律，去遵從佢心目中更高層次嘅道德責任。佢嘅悲劇缺點係過份堅持同固執，永遠唔肯退讓，最終因此走向死亡。Antigone 嘅下場係直接由佢自己嘅選擇造成，呢一點令佢成為文學史上其中一個最清晰、最典型嘅女性悲劇英雄。

另一個好出名嘅例子係歐里庇得斯（Euripides）《Medea》入面嘅 Medea。Medea 聰明、有力量，而且情感極端強烈。當佢被背叛之後，憤怒同自尊心失控，成為佢最大嘅悲劇缺點。雖然佢嘅行為非常激烈甚至極端，但整個悲劇係由佢自己嘅選擇同拒絕接受羞辱所推動，完全符合悲劇英雄嘅結構同特徵。

好多女作家都有創作悲劇英雄嘅作品，例如瑪莉雪萊喺《科學怪人》 入面寫咗悲劇英雄 Victor Frankenstein、Emily Brontë 喺《Wuthering Heights》 入面塑造咗悲劇英雄 Catherine Earnshaw，仲有 Toni Morrison 喺《Beloved》入面創造咗悲劇女英雄 Sethe。張愛玲嘅小說如《金鎖記》，女主角曹七巧就係一個悲劇英雄式人物：父權社會壓抑，內心充滿衝突，最終毀咗自己同周圍人，充滿絕望同悲情。女作家喺唔同時期都會攞悲劇英雄做材題。

近代電影

近代電影嚟講，《星球大戰》嘅安納金天行者就係一個由恐懼推向墮落嘅悲劇英雄。佢天生異稟，認定為「救世主」，但內心深處卻充滿情感掙扎，同對失去身邊人嘅恐懼。佢極度渴望保護所愛嘅人，結果令自己作出愈來愈黑暗嘅選擇，最終變成黑武士。Anakin 嘅故事反映出，好意如果夾雜住恐懼同憤怒，最終都可能帶嚟毀滅性嘅後果。

《教父》入面嘅米高柯里昂亦係電影史上一個極具代表性嘅悲劇英雄。一開始嘅米高刻意同家族嘅黑幫世界保持距離，佢冷靜、聰明，又有原則。不過，環境同對家人嘅忠誠一步步將佢拉入自己曾經抗拒嘅世界。隨住權力愈來愈大，佢慢慢犧牲咗道德、感情同人性，最後變得孤獨又冷酷。米高嘅悲劇，就在於佢以為掌控同保護一切，結果卻失去咗原本最重要嘅自己。

港產片

香港電影其實有唔少角色係有悲劇英雄色彩嘅，而且好有本土味，多數都係「想做好人，但環境逼佢哋走向毀滅」嗰種。

其中一個最經典嘅例子係《英雄本色》入面嘅宋子豪（狄龍）。佢本來係黑幫大佬，但內心重情重義，想洗心革面，重新做人。不過，過去嘅身份、江湖恩怨同家庭壓力一直追住佢，令佢無論點努力都無法真正甩身。佢嘅悲劇在於，佢明知條路錯，但已經無得返轉頭。

另一個代表人物係《無間道》嘅陳永仁（梁朝偉）。佢係警方臥底，長期活喺黑社會世界，身份模糊、精神崩潰，但仍然堅持信念，想做返一個「真正嘅警察」。可惜，佢付出一切都未能換嚟應有嘅結局，最後甚至連身份都冇人知，屬於典型「犧牲自我但得唔到救贖」嘅悲劇英雄。

仲有《阿飛正傳》入面嘅旭仔（張國榮），佢外表瀟灑、魅力十足，但內心空虛又迷失，一直搵身份認同同愛。佢逃避責任、傷害他人，同時亦傷害自己，最終走向孤獨同死亡。旭仔嘅悲劇唔係來自命運或權力，而係內心嘅空洞同無法面對現實。

另見

• 英雄旅程
• 反英雄

文獻

• Carlson, Marvin. 1993. Theories of the Theatre: A Historical and Critical Survey from the Greeks to the Present. Expanded ed. Ithaca and London: Cornell UP. ISBN 0-8014-8154-6.
• Janko, Richard, trans. 1987. Poetics with Tractatus Coislinianus, Reconstruction of Poetics II and the Fragments of the On Poets. By Aristotle. Cambridge: Hackett. ISBN 978-0-87220-033-3.
• Pavis, Patrice. 1998. Dictionary of the Theatre: Terms, Concepts, and Analysis. Trans. Christine Shantz. Toronto and Buffalo: U of Toronto P. ISBN 978-0-8020-8163-6.