不死鳥

  呢篇文章講嘅係西方神話中一種近似鳳凰嘅雀鳥。假如你想揾嘅係中國神話中類似嘅鳥類，請睇「鳳凰」。

一八零六年一幅插圖，描繪畫師心目中嘅不死鳥。

不死鳥，粵港地區嘅中文又有叫火鳳凰，或者叫西洋鳳凰，係一種傳說中嘅雀鳥，源自希臘神話。根據傳說，不死鳥能夠由太陽嗰度得到神力，死嗰陣會發放出強烈嘅火同光，燒完之後隻雀然後就會由灰燼中重生，所以佢永遠都唔會死；不死鳥嘅形象，喺二十世紀起嘅奇幻作品當中亦不時會出現，例如英倫奇幻小說系列《哈利波特》裏便，就有提到不死鳥。

詞源

十六世紀一幅圖畫，描繪想像中嘅不死鳥。

呢幅圖畫，描繪想像中「全身由火焰組成」嘅不死鳥。

現代英文 phoenix（粵拼：粵化口語音：fi1 nik4s）呢個詞，係由拉丁文（西羅馬帝國嘅主要語言）傳入嘅，後來又受到法文嘅影響而加強咗。最初 phoenix 經由拉丁文 phoenīx 借入古英文變成 fenix。及後由於法文都係由拉丁文借用呢個名詞，所以英文亦受到法文影響，令呢個詞得以鞏固落嚟。

原則上，西方嘅不死鳥同中華文化入便嘅鳳凰概念上相似，但並非完全一樣。雖然係噉，大中華地區譯不死鳥一詞嘅時候，依然經常會直接譯作鳳凰就算。例如奇幻小說《哈利波特：鳳凰會的密令》嘅中文名就係噉。

形象

古時歐洲嘅文獻不時有提到不死鳥。喺中世紀嘅文學同藝術中，不死鳥經常會描繪成頭上有光環嘅形象，以突顯佢同太陽之間嘅聯繫。最早記錄有關不死鳥嘅圖像，已經展示佢頭頂有光環，當中好多時都畫上七條放射線，類似於希臘神話入面象徵太陽嘅天神希路斯。亦有人描述呢隻雀頭上有羽毛冠冕，而悲劇作家以西結就曾經將鳳凰比作公雞噉嘅形象。

喺現代嘅奇幻創作品之中，不死鳥經常被塑造成神聖嘅生物，象徵住重生、不滅同埋希望。佢哋通常被描寫成全身火紅噉嘅色，甚至成隻都係火焰組成，死亡之後能夠由灰燼嗰度重生（浴火重生），代表住生命力。現代不死鳥形象其中一個出名嘅例子有哈利波特系列入面嘅霍斯，佢由鄧不利多教授飼養，曾經用自己嘅眼淚始癒哈利仔身上嘅傷口，展示出不死鳥除咗重生之外，亦象徵治癒同忠誠。另外喺最終幻想系列系列入面，不死鳥係一隻經典嘅召喚獸，可以召令火焰攻擊敵人，同時令失去戰鬥能力嘅隊友復活，體現重生同守護嘅形象。

睇埋

廿一世紀初喺香港影到有個花樽，上便有鳳凰圖案。中華文化入便嘅鳳凰被指係同不死鳥好相似。

• 鳳凰
• 惡龍

文獻

• Van den Broek, Roelof (1972), The Myth of the Phoenix According to Classical and Early Christian Traditions, Seeger, I.翻譯, EJ Brill.

拎

• 維基同享中有關不死鳥嘅資源類