蠍獅

蠍獅

蠍獅（英文：Manticore）係一種源自波斯傳說嘅野獸。但佢亦頻繁出現喺歐洲嘅文獻記載之中，例如老普林尼嘅《博物志》，或者克特西亞斯嘅《印度史》。

特徵

蠍獅係一種力大無窮嘅動物，棲息喺印度同埃塞俄比亞。體形仲大隻過最大嗰啲獅子，有朱紅色、類似狗隻皮毛。佢嘅腳好似獅子，頭部就好似人，入面有三排牙，叫聲仲噪過喇叭。蠍獅獸條尾生咗一枝蠍子咁嘅長針，仲有一啲3英尺長嘅刺，佢會發射呢啲刺嚟攻擊敵人，射程可達100英尺。而且蠍獅獸跑得好快，所以冇動物可以脫離佢嘅追捕。

因為呢啲恐怖嘅特性，蠍獅會捕食任何一種動物，而佢更鍾意食人。所以印度人會坐喺大象嘅背脊上面射箭捕獵蠍獅。亦因為蠍獅鍾意食人，佢又被稱為瑪提柯拉斯（martichoras），意思係「食人嘅動物」。

真實嘅蠍獅

蠍獅嘅真身好有可能係棲息南亞次大陸、俾波斯人誇大描述嘅孟加拉虎。

流行文化

龍與地下城嘅蠍獅

• 喺龍與地下城（Dungeons & Dragons）入面，蠍獅係一種超大型魔法獸，陣營係守序邪惡。

• 喺哈利波特嘅情節，蠍獅冇直接出現。但係書入面嘅角色，半巨人魯霸·海格將蠍獅同另一種神奇動物火螃蟹雜交咗一種叫做爆尾釘蝦（Blast-Ended Skrewt）嘅怪獸。

• 喺教科書《怪獸與牠們的產地》（Fantastic Beasts and Where to Find Them）提到蠍獅嘅皮可以抵擋任何魔法咒語。

• 波西傑克森系列第三部小說《泰坦魔咒》（The Titan's Curse），有一隻蠍獅偽裝成人類，襲擊主角嘅行列。

圖集

• 
• 
• 
• 
• 
  上面嗰隻係蠍獅

參考

博物學家的神秘動物圖鑑，讓·巴普蒂斯 ·特·德·帕納菲厄著，楓樹林出版，ISBN 978-986-5688-96-7