角色職業

出自維基百科,自由嘅百科全書
Jump to navigation Jump to search

角色職業character class)係喺 RPG 當中常見嘅概念:為咗令到隻遊戲有更大嘅多樣性,每個角色都會有「職業」嘅屬性;一個角色通常衹可以同時屬一個職業,但好多 RPG 都會容許一個角色遊戲中途轉工。職業會決定個角色嘅能力值同有乜異能,而每個職業都有專用嘅異能-於是玩家就有得透過揀職業嚟突顯自己個性,或者要思考唔同職業嘅角色喺戰術上要點互相配合。以下係一啲比較常見嘅職業。順帶一提,因為 RPG 傳統多數用奇幻作為遊戲嘅美學,所以呢啲職業係以奇幻故仔入面常見嘅角色類型嚟命名嘅[1][2]

大類 美學設計 機制上嘅特徵
戰士類 戰士(warrior / fighter) 喺前線打交嘅人員 通常武器射程唔長、血量高、而喺團隊戰鬥裏面會企前排,幫血量低啲隊友擋攻擊。
白騎士(paladin / white knight) 光明同神聖嘅戰士 具有一般戰士嘅能力之餘,仲曉幫隊友回復生命值或者提高隊友防禦力等嘅支援性異能。
黑騎士(black knight) 黑暗同邪惡嘅戰士 具有一般戰士嘅能力同一啲感覺「邪惡」嘅異能,例如係削減自己同隊友嘅生命值嚟暫時提高攻擊力等。
野蠻人(barbarian) 野蠻嘅戰士,好多時會身穿獸皮同用原始武器 通常重視攻擊、忽略防守,例如攻擊力嘅殺傷力勁過一般戰士,但唔曉用盾保護隊友。
騎兵(cavalier) 騎喺某啲生物上嘅戰士 移動速度快過一般戰士,但好多時因為身體大而容易俾敵人打中。
浪客類 浪客(rogue) 擅長做鬼祟嘢嘅人員 速度快、身手敏捷,通常武器射程唔長,但會或多或少噉曉放狀態同有隱身異能。
刺客(assassin) 刺客 有攻擊性嘅浪客,擅長靜靜雞祟去敵人身後,用強力嘅近身攻擊一嘢殺死敵人。
賊仔(thief) 賊仔 攻擊力唔及刺客,但能夠由敵人身上偷走有用嘅物件。
間諜(spy) 間諜 攻擊力唔及刺客,但曉偵察,可以幫隊友獲取一啲特殊資訊
忍者(ninja) 忍者 具有奇怪特殊異能嘅浪客,例如係分身術等等。
遊俠類 遊俠(ranger) 擅長喺野外生存嘅人員 速度有返噉上下(但唔及浪客),有一定近身同長距離作戰能力。
弓箭手(archer) 弓箭手 能夠由遠距離對敵人造成巨大傷害,考驗用家嘅眼界,但近身作戰能力弱。
陷阱大師(trap master) 擅長使用陷阱嘅人員(好似係獵人 能夠喺地圖上設陷阱,敵人踩中陷阱會受傷或者中狀態。
魔法師類 魔法師(mage / magician) 使用魔法等超自然力量嘅人員 通常有一啲犀利嘅異能,但有「唸咒語花時間」或者血量低等嘅缺點,近身作戰能力多數弱。
巫師(wizard) 使用咒語為主嘅魔法師 唸咗咒之後能夠一嘢對一個或者多個敵人造成巨大傷害。
薩滿(shaman) 薩滿 啲異能以落毒同放其他狀態為主,多過直接造成傷害。
德魯伊(druid) 德魯伊(同大自然友好嘅魔法師) 曉回復生命值、生成同伴、甚至變身做動物角色等等。
召喚師(summoner) 用咒語召喚怪獸嘅魔法師 唸咗咒之後,會生成一個強力嘅友好單位幫自己嗰隊作戰。
死靈術士(necromancer) 使用招魂術等邪術嘅魔法師 具有「操控死者」嘅異能,例如將死咗嘅敵人變成喪屍,再迫呢啲敵人幫自己戰鬥。
神職人員(cleric) 神職人員 啲異能以支援隊友為主,基本上實會識回復隊友嘅生命值。
紅魔法師(red mage) 唔專化嘅魔法師(源自最終幻想系列 有齊唔同類型魔法師嘅異能,但樣樣精通、冇樣成功。

[編輯]

  1. Character Class. TV Tropes.
  2. Voorhees, Gerald. The Character of Difference: Procedurality, Rhetoric, and Roleplaying Games. Game Studies. 1 November 2009, 9 (2) [12 June 2016].