狀態效果

出自維基百科,自由嘅百科全書
Jump to navigation Jump to search
超級瑪利奧入面嘅無敵星

狀態效果(status effect)係常見於(但唔衹限於)電子 RPG 嘅一種遊戲機制,指一個角色暫時或者永久噉進入某種狀態。狀態效果可以係由異能引致嘅,例子有 RPG 或者隊制射擊遊戲當中「暫時提升隊友攻擊力」嘅異能;又有啲角色可以齋靠普通嘅攻擊就令敵人進入狀態效果,例如好多 RPG 裏面,有啲敵人喺美學設計上係一啲有毒嘅怪獸(例:蠍子),玩家角色淨係俾佢哋攻擊揩到經已會中毒;喺好多遊戲入面,當一個角色陷入咗負面嘅狀態,佢可以搵某啲特定嘅道具或者異能嚟清除個狀態,又有啲負面狀態係曉隨時間自己甩返落嚟嘅[1]

常見狀態[編輯]

常見嘅狀態效果有以下呢啲[1]

  • 增益(status buff,簡稱「buff」):能力值暫時提升,直至效果或者戰鬥結束。
  • 減益(debuff):能力值暫時下降,直至效果或者戰鬥結束。
  • 緩慢(slow):角色速度下降,直至效果或者戰鬥結束。
  • 敏捷(haste):角色速度提升,直至效果或者戰鬥結束。
  • 中毒(poisoning):一個中咗毒嘅角色會慢慢噉失去生命值,緩慢但持續噉步向死亡;多數有中毒機制嘅遊戲都會一係會包括用咗可以解毒嘅道具,一係個中毒狀態會隨時間自己甩落嚟。
  • 瞓覺(sleep):個角色會停咗喺度郁唔到同採取唔到任何行動;喺多數遊戲當中,瞓覺狀態會喺若干時間之後甩落嚟,而個角色如果喺瞓覺途中俾敵人打中,會即刻醒返。
  • 混亂(confusion):個角色嘅攻擊會變隨機,可能個玩家要佢去打敵人,佢會隨機噉揀打敵人、打自己、或者打隊友。
  • (blind):個角色嘅攻擊命中率會急跌;如果係(由玩家直接操控角色嘅)動作遊戲,玩家可能會喺自己角色盲咗嗰段期間成個遊戲畫面黑嗮。
  • 沉默(mute / silence):常見於以奇幻為題材嘅遊戲;個角色暫時唔能夠使用魔法異能。
  • 發癲(rage / berserk):個角色暫時唔受控制,仲會亂噉攻擊。
  • 石化(stone / petrify):個角色完全郁唔到同採取唔到任何行動;同瞓覺有啲似,分別在於石化通常係永久嘅,要隊友用某啲道具或者異能嚟拎走個狀態先得。
  • 詛咒(curse):一個籠統嘅狀態效果,其效果視乎遊戲而定;詛咒嘅可能效果包括咗搞到個角色用唔到異能、攞唔到經驗值、以至無法回復生命值等等。
  • 無敵(invincible):衹要呢個效果持續,個角色唔會受到任何傷害或者有害嘅狀態效果影響;喺多數包括無敵狀態嘅遊戲當中,無敵效果一係衹係暫時性,一係就好難得到、而且戰鬥結束之後會消失;例子有多隻超級瑪利奧系列嘅遊戲-主角瑪利奧喺食咗一粒無敵星之後,會暫時進入無敵狀態一陣。另一方面,亦都有啲遊戲會用無敵狀態嚟避免過度挫折,例如喺好多高卡車賽車遊戲當中,當有個玩家唔小心飛咗出賽道外,個遊戲程式會將佢移返去賽道上面同埋俾佢有兩三秒嘅無敵狀態-防止佢一上返賽道就即刻俾對手用道具打中(噉樣會嚴重令個玩家感到受挫)[2]

[編輯]

  1. 1.0 1.1 Status Effects. Giant Bomb.
  2. Temporary Invincibility. Giant Bomb.