電子角色扮演遊戲

電子角色扮演遊戲（英文：electronic role-playing game）係種電子遊戲類型，遊戲係玩角色扮演。最定義性嘅特性係有經驗值呢種遊戲機制，玩家控制嘅角色會隨住遊戲進行而升呢。電子角色扮演遊戲通常會有比較強嘅故事性，通常有好多任務要做，令劇情推進。

動作 RPG

一隻動作 RPG 會要求玩家親手控制角色，而唔係齋靠用選單俾命令嚟控制角色。

動作角色扮演遊戲（action RPG）結合動作遊戲同 RPG。即係話隻遊戲會有「玩家角色得到經驗值同變強」嘅機制之餘，同時又好似動作遊戲噉，會有即時制嘅戰鬥，考玩家嘅反應同手眼協調：喺一隻典型嘅動作 RPG 當中，隻遊戲要求玩家親手控制自己嘅角色移動同攻擊（好似動作遊戲噉），而唔似得傳統嘅 RPG 噉，俾玩家齋靠用選單俾命令嚟控制自己嘅角色，不過隻遊戲同傳統嘅 RPG 一樣，戰鬥過後角色會得到經驗值同升呢；同時因為噉，動作 RPG 好多時都冇傳統嘅 RPG 咁睇重角色嘅能力值－例：喺傳統嘅 RPG 嗰度，一個角色有冇成功打中敵人係由佢嘅能力值話事嘅，但喺一隻動作 RPG 裏面，因為角色係由玩家親手控制嘅，所以個角色有冇成功打中敵人取決於玩家嘅技術。

動作 RPG 喺電子遊戲早期經已存在，而且到咗廿一世紀都仲有發展緊：呢種遊戲類型源自 1980 年代，由《屠龍劍系列》（Dragon Slayer）同埋《伊蘇系列》（Ys）等嘅作品帶起。而廿一世紀初出名嘅動作 RPG 就有《最終幻想系列》嘅某啲作品（例如係《最終幻想 XV》）、有射擊成份嘅《質量效應系列》（Mass Effect）同埋《闇龍紀元系列》（Dragon Age）嘅多部作品。

戰術 RPG

戰術角色扮演遊戲（tactical RPG）結合戰略遊戲同 RPG。一雙戰術 RPG 會好似一般嘅戰略遊戲噉，俾玩家指揮部隊進行有計劃嘅行動，可以係即時制又得、回合制都得，同時玩家指揮嘅部隊嘅個體會有好似典型嘅 RPG 角色噉，喺戰鬥過程當中攞到經驗值同升呢，升呢就會增強一個角色嘅能力。戰術 RPG 一般都唔似得傳統嘅 RPG 噉有探索嘅成份：喺（例如）《最終幻想系列》或者《闇龍紀元系列》當中，玩家可以用自己嘅角色探索遊戲入面嘅虛擬世界，但戰術 RPG 就比較睇重戰略，而唔係靠探索嚟吸引玩家，通常每一關都代表故仔入面嘅一段，故仔可能有少量嘅分支，但大體上係單向進行嘅。

戰術 RPG 早喺 1980 年代經已存在，而且就算到咗廿一世紀初，呢個遊戲類型都仲有發展緊：出名嘅戰術 RPG 作品有 Square Enix 嘅《最終幻想戰略版》（Final Fantasy Tactics）同相關系列，仲有係《火焰之紋章系列》（Fire Emblem）同《前線任務系列》（Front Mission）等嘅作品。

日式

日式角色扮演遊戲（Japanese RPG，JRPG），又或者叫日式 RPG，泛指出自日本遊戲界嘅 RPG。喺風格上，JRPG 通常具有同西方嘅 RPG 唔同嘅一套特色：相對於西方嘅 RPG，JRPG 比較傾向於單一路線嘅故仔發展（玩家有一條定死咗嘅路徑行，而唔係用開放世界）、會運用日本動畫嘅美術設計風格、以及係唔興用西方 RPG 用開嗰種奇幻美學。

馴怪獸遊戲

馴怪獸遊戲（monster tamer），又或者叫怪獸育成遊戲，泛指有一大柞怪獸俾玩家捉嘅遊戲，通常屬 RPG，喺 1990 年代尾興起：喺一隻馴怪獸遊戲裏面，玩家角色通常唔會參與戰鬥；但隻遊戲世界入面有若干種怪獸存在，啲怪獸曉戰鬥，唔同種嘅怪獸喺能力值等嘅特性上有差異，而且能夠通過戰鬥得到經驗值同升呢（好似一般嘅 RPG 噉）；於是玩家角色要做嘅嘢，就係用某啲方法收服啲怪獸，將自己養嘅怪獸訓練同升呢，建立成一隊由怪獸組成嘅隊伍，再同人工智能或者第啲玩家對戰。

例如一般俾人認為係馴怪獸遊戲元祖嘅《寵物小精靈》（Pokémon）噉。《寵物小精靈》入面嘅世界有好多品種嘅寵物小精靈（包括好出名嘅比卡超），唔同品種喺能力值同特殊能力等嘅特性上都有差異，玩家扮演一位精靈訓練員（Pokémon trainer），能夠用精靈球呢種架生收服住喺野外嘅寵物小精靈，而玩家要做嘅嘢就係收服自己想要嘅寵物小精靈，再組成自己嘅隊伍，並且同人工智能或者第啲玩家對戰。除咗《寵物小精靈》之外，出名嘅馴怪獸遊戲仲有《數碼暴龍系列》（Digimon）相關嘅遊戲、《勇者鬥惡龍怪獸系列》（Dragon Quest Monsters）同埋《妖怪手錶系列》（Yo-kai Watch）呀噉。

MMORPG

大型多人網上角色扮演遊戲（massively multiplayer online role-playing game，MMORPG）結合咗大型多人網上遊戲同埋角色扮演遊戲。一隻典型嘅 MMORPG 玩法如下：喺遊戲開始嗰陣，玩家要創造自己控制嘅角色，決定自己個角色嘅外形、種族以至職業等嘅特性，並且喺一個（好多時用奇幻美學嘅）虛擬世界入面冒險同做任務，而個角色會喺冒險嘅過程當中得到經驗值同升呢（同一般嘅 RPG 類似）。廿一世紀初 MMORPG 最出名嘅作品係《魔獸世界》（World of Warcraft）。

MMORPG 最大嘅特徵在於虛擬世界：响一隻典型嘅 MMORPG 當中，玩家可以透過控制自己嘅角色同第啲玩家嘅角色互動，而玩家嘅數量好多時閒閒地都數以萬計，令到遊戲世界好似真係有一大柞有智能嘅人噉樣；好多 MMORPG 仲會模擬埋現實社會嘅制度，例如係容許玩家之間交易遊戲入面嘅物品（武器同虛擬錢等等），形成虛擬經濟（virtual economy）；除此之外，個遊戲世界通常仲會係一個持續世界（persistent world）－噉講意思即係話，隻遊戲嘅營運者會用主機伺服器一路行住隻遊戲嘅虛擬世界，所以原則上就算冇玩家喺入面，個遊戲程式都會係噉行落去，似十足一個真嘅世界噉。遊戲界認為，MMORPG 其中一個最大嘅賣點在於能夠令玩家感覺自己好似穿梭咗去另一個世界，體驗緊角色嘅人生噉。

睇埋

• 經驗值，RPG 呢種遊戲嘅定義性特徵。