係噉跑遊戲

係噉跑遊戲hai6 gam2 paau2 jau4 hei3（英文：endless runner / auto-runner）係一隻電子遊戲類型，可以算係平台遊戲一種。

定位

睇埋：平台遊戲

呢隻類型早喺 1980 年代已經存在、但要去到 2000 年代先開始盛行。係噉跑遊戲最大特徵係：

「

玩家角色响絕大多數時間都會自動噉向住某個方向郁動，唔似得典型嘅平台遊戲噉，玩家唔撳掣主角就企喺度唔郁。

」

－即係話玩家角色會「係噉跑」。呢啲遊戲傾向會比較要求玩家反應快，會（例如）要求玩家一見到障礙物出現就喺 1 秒內畀反應撳掣，令玩家角色起跳或者以第啲方式避開障礙物－如果玩家角色唔跳，就會一嘢撞落嚿障礙物度受傷，生命值扣到咁上下玩家角色就會死。部份嘅係噉跑遊戲仲會配合埋程序生成技術，教隻遊戲自動噉產生關卡畀玩家跑。

簡史

睇埋：手機遊戲同流動應用程式

例如係 1999 年嘅著名廣告遊戲《百事超人》（Pepsiman）就畀人指係係噉跑遊戲嘅一隻早期作品：喺（例如）都係 1990 年代後半出嘅《孖寶兄弟 64》當中，玩家可以控制瑪利奧自由噉郁，向前後左右上下 6 個方向郁，而如果瑪利奧企喺唔郁嘅平地上面而玩家乜掣都唔撳，瑪利奧就會一路企定定唔郁；喺《百事超人》裏面就唔同，無論玩家撳唔撳掣都好，主角百事超人都會一路係噉向前跑，百事超人喺關卡入面會遇到各種危險嘅嘢，例如係各種障礙物（百事超人全速撞落去會受傷）或者地面嘅窿（百事超人會跌落去）呀噉，玩家要做嘅係控制百事超人嘅左右郁動同埋跳躍，令百事超人避開嗮啲危險嘢，最後安全抵達關卡終點。

係噉跑遊戲到咗 2000 年代中後開始進入全盛。有電子遊戲業界人士指，噉係因為手機遊戲嘅崛起：手機遊戲顧名思義係喺智能手機上面玩嘅遊戲，呢啲遊戲因為喺手機上面玩，技術限制表示佢哋嘅操作方式唔可以太複雜，於是有好多遊戲製作者就索性唔使玩家控制主角前後郁，淨係要玩家控制左右閃避同跳躍嚟避開障礙物。例子可以睇吓 2011 年出嘅《Temple Run》同相關嘅作品。

睇埋

• 平台遊戲
• 電子遊戲類型一覽