模擬遊戲

一個玩家喺度玩一隻模擬打籃球嘅體育遊戲。

一隻高卡車競速遊戲嘅截圖；畫面中間嘅係玩家角色，玩家角色同電腦對手喺度賽車鬥快。

一隻飛行模擬器嘅遊戲截圖

模擬遊戲（粵拼：mou4 ji5 jau4 hei3；英文：simulation game / sim game）係種電子遊戲類型，遊戲模擬真實世界嘅環境同事件，譬如打仗、起城市、搞生意噉。原則上，模擬遊戲係個幾籠統嘅分類。基本上，只要一隻遊戲「唔屬任何一個已知嘅類型，而且係俾人設計到盡可能模擬某啲現實世界嘅活動」嘅話，隻遊戲就會俾人歸類做模擬遊戲。

現實嘅研究表明咗，模擬遊戲有相當嘅實用價值；噉係因為模擬遊戲只要設計得夠寫實，就可以攞嚟訓練玩家做隻遊戲所模擬嘅工作，例如飛行模擬器就有俾人攞嚟幫手訓練新進飛機師揸飛機，而教育方面嘅工作者亦有喺度研究點樣擴張模擬遊戲嘅應用。

體育遊戲

内文：體育遊戲

體育遊戲（sports game）係史上最早出現嘅遊戲類型之一，早喺 1950 年代尾經已有。體育遊戲顧名思義係模擬緊現實世界當中嘅運動，例如係《FIFA 系列》噉，就模擬緊英式足球，亦都可以睇埋《FIFA 系列》以外嘅《EA Sports》遊戲－呢啲遊戲包括咗模擬多種團隊運動嘅遊戲作品，由籃球以至美式足球都有。

喺最基本上，體育遊戲會考玩家嘅反應同手眼協調，要求玩家好似動作遊戲噉，直接控制住運動員參與比賽；但另一方面，有好多體育遊戲又會比較睇重策略或者管理，例如《EA Sports》當中有啲模擬團隊運動嘅作品，呢啲遊戲往往會要求玩家指揮一隊球隊嘅唔同成員作出有計劃嘅團隊行動，考反應同手眼之餘又要求玩家識得團隊運動上嘅策略；呢啲遊戲好多時仲會要求玩家管理球隊－例如用球隊嘅資金嚟請球員，途中要考慮到資源分配等嘅問題。

交通工具模擬

内文：交通工具模擬遊戲

交通工具模擬遊戲（vehicle simulation game）俾玩家模擬揸某啲交通工具，當中「交通工具」可以係指車、火車、船、飛機以至太空船呀噉，甚至係一啲遊戲設計師想像出嚟嘅架空交通工具；唔同嘅交通工具模擬遊戲目的可以唔同，有啲嘗試盡可能真實噉模擬以揸嗰種交通工具維生嘅人（例：的士司機）嘅體驗，有啲係要玩家揸住嗰種交通工具戰鬥（例：揸戰鬥機），又有啲係要玩家揸住嗰種交通工具同第啲玩家鬥快。一般嚟講，無論係邊種子類型都好，交通工具模擬遊戲嘅玩家都會由揸嗰個人嘅角度睇嘢，並且直接控制架交通工具。

• 競速遊戲（racing game）：亦可以算係體育遊戲嘅一種，主要模擬賽車或者賽艇等鬥快嘅活動；喺一隻典型嘅競速遊戲裏面，玩家會控制比賽嘅其中一位參加者，並且嘗試揸住自己部座駕（跑車等）喺賽道上有咁快得咁快奔馳，並且以「最先去到終點」為目的－就好似現實世界嗰啲競速活動噉。一般競速遊戲嘅出名例子有《跑車浪漫旅系列》、《極限競速系列》以及係《虛擬船長 5》等嘅作品。
  • 高卡車競速遊戲（kart racing game）係一種特別嘅競速遊戲。喺設計上，高卡車競速遊戲特點係唔真實（所以嚴格嚟講，唔再算係模擬遊戲）－高卡車競速遊戲玩家揸嘅係高卡車，响駕駛機制上簡化咗，唔會用真實嘅物理，而且仲好有可能會容許玩家用道具一路賽車一路打交，又或者係啲賽道上設有一啲危險嘅機關同障礙物（現實世界嘅賽車因為安全問題，所以唔會有啲噉嘅嘢）。喺廿一世紀初，高卡車競速遊戲最出名嘅例子係《孖寶賽車系列》。
• 雖然啲人好多時一講「模擬揸車嘅遊戲」就淨係會諗起俾人揸跑車嘅賽車遊戲，但「模擬揸車嘅遊戲」原則上仲可以包括埋俾玩家揸第啲類型嘅車輛嘅模擬遊戲，譬如係以《歐卡模擬》為首嘅《貨車模擬器系列》噉，就模擬揸貨車，俾玩家一嘗做貨車司機嘅滋味。
• 飛行模擬器（flight simulator）：泛指俾玩家模擬揸識飛嘅機械嘅遊戲，當中「識飛嘅機械」包括喺地球大氣層內飛行嘅飛機同埋喺太空當中飛行嘅太空船；喺一隻典型嘅飛行模擬器當中，玩家會控制揸架飛行機嘅機師，並且嘗試揸住自己部座機達成某啲任務－例如係要同第啲玩家或者電腦戰鬥（可以睇空戰模擬遊戲）、又可以係要好似競速遊戲噉同第啲玩家或者電腦鬥快；有好多飛行模擬器仲做到高度真實，模擬嗮一架飛機飛行嗰陣要諗嘅空氣動力學等嘅物理，真實到直頭俾人攞嚟做好多專業嘅用途，包括係幫手訓練新進嘅飛機師，或者幫手模擬新設計嘅飛機飛起上嚟係點。飛行模擬器可以再細分做幾大類：
  • 空戰模擬遊戲（combat flight simulation）：俾玩家控制航空器（通常係戰機）進行模擬空戰嘅飛行模擬器，可以話係結合咗飛行模擬器同射擊遊戲。喺廿世紀尾同廿一世紀初，空戰模擬遊戲喺主流玩家之間嘅人氣明顯高過一般嘅飛行模擬器，出名作品有《皇牌空戰系列》同埋非常仿真嘅《數字戰鬥模擬》。
  • 業餘飛行模擬（amateur flight simulation）：呢種飛行模擬俾玩家控制民用飛行器，追求有返咁上下仿真嘅飛行，但唔係為咗訓練飛機師或者開發飛機等嘅專業原因（業餘）而存在嘅；同專業用嘅飛行模擬器比起嚟，業餘飛行模擬通常會設計得簡化啲，費事專業飛行嘅複雜技術性搞到玩家措手不及；業餘飛行模擬嘅出名作品有《微軟模擬飛行系列》。
  • 太空航行模擬遊戲（space flight simulator）：顧名思義模擬太空飛行，包括俾玩家控制太空船；同一般嘅飛行模擬器一樣，太空航行模擬遊戲可以整到好真實，例子有《Orbiter》同《卡布太空計劃》，當中《Orbiter》仲真實到有俾人攞嚟做物理學教育方面嘅用途；另一方面，又有啲太空航行模擬遊戲會比較幻想性，俾人模擬揸太空船打仗或者自由噉探索太空，例子可以睇《星際遊俠》等嘅作品。
• 火車模擬器（train simulator）：顧名思義指俾玩家模擬揸火車喺鐵路上面行嘅遊戲；除咗交通工具模擬嘅成份之外，火車模擬器仲成日會加入經營遊戲嘅成份，即係話會俾玩家設計火車站、設計火車路線、甚至係管理火車路線嘅營運呀噉。例子可以睇《微軟模擬火車》。
• 交通工具戰鬥遊戲（vehicular combat games）：指俾玩家揸住某啲帶有武器嘅交通工具嚟進行戰鬥嘅遊戲，例如玩家架車上面裝咗啲槍炮（會有射擊遊戲成份），隻遊戲要玩家揸住啲噉嘅車嚟彼此之間或者同電腦打交，而空戰模擬遊戲就係呢種遊戲同飛行模擬器嘅結合。除此之外，又有唔少遊戲會有交通工具戰鬥嘅成份，例如《俠盜獵車手系列》（GTA）就時不時會要求玩家一路揸住車一路向敵人開槍，而《孖寶賽車系列》等嘅高卡車競速遊戲又好興有戰鬥模式，即係個遊戲模式唔睇重競速，而係要玩家坐住車用道具打交。

建造經營模擬

内文：建造經營模擬遊戲

建造經營模擬遊戲（CMS）源於 1980 年代尾，泛指要求玩家喺有限嘅資源之下建造、擴充或者管理架空嘅團體，即係模擬做某啲團體嘅管理者，當中「團體」可以係指一個政府（政治模擬遊戲）、一間企業（商業模擬遊戲）以至一個城市（城市建造遊戲）呀噉。建造經營模擬遊戲可以分以下幾種：

• 政治模擬遊戲（government simulation game）：模擬部份或者成個國家嘅政治系統，有時仲會模擬埋國際政治同地緣政治；喺呢啲遊戲當中，玩家一般會扮演一個（架空或者現實）國家嘅領導人或者國家意志，並且透過具體嘅政治系統（法律、制度、政策同條令等等）嚟掌控就業、教育同財富分配等嘅事務；政治模擬遊戲成日俾人話同戰略遊戲好相似，而遊戲設計界一般用「有冇打仗嘅內容」嚟分別呢兩種遊戲類型－相對於大多數嘅戰略遊戲，政治模擬遊戲多數唔多睇重軍事相關嘅嘢，就算模擬埋軍事嘅嘢都唔會涉及戰術（即係唔會要玩家實際控制上戰場嘅單位），甚至乎係成隻遊戲根本冇打仗嘅內容。不過，政治模擬遊戲同大戰略遊戲有相當大嘅重合。政治模擬遊戲嘅經典作品有《地緣政治模擬系列》同《超級大國》。
• 商業模擬遊戲（tycoon game）：模擬俾玩家管理經濟（主要係微觀經濟）同金融系統嘅遊戲；喺呢啲遊戲當中，玩家會負責經營或者係扮演一間企業，向啲客提供貨品或者服務，並且務求做到從中賺取利潤得嚟又要佔領個市場、擴大企業規模或者產業升級。商業模擬遊戲比較出名嘅例子有《金融帝國》同埋相關嘅遊戲，又或者可以睇吓出嗮名俾玩家模擬管理一座遊樂園嘅《模擬樂園系列》。
• 城市建造遊戲（city-building game）：顧名思義模擬俾玩家建造城市同埋做城市規劃嘅工作；喺呢啲遊戲入面，玩家通常係扮演一個城市嘅市長，要負責規劃、建造同管理個城市啲交通、水電以及城市服務等嘅各種基建，仲要制定城市嘅政策、開發資源、找平收支同抵禦災難等等。城市建造遊戲出名嘅例子有《模擬城市系列》（SimCity）同埋《城市：天際線》呀噉，當中《城市：天際線》用咗當時算係相當先進嘅交通模擬技術嚟令到虛擬城市嘅交通極度真實，甚至仲有科學家想攞佢哋啲技術嚟做學術性嘅城市規劃研究。

... 等等。

一隻城市建造遊戲嘅遊戲截圖；圖入面見到玩家建造嘅虛擬城市（有齊馬路同各種建築物），仲有多個視窗俾玩家睇到個城市嘅狀態（例如係入息）。

生命模擬遊戲

内文：生命模擬遊戲

生命模擬遊戲（life simulation game）模擬要玩家負責維持同照顧一啲虛擬嘅生命，而呢啲虛擬生命可以係虛擬人：喺一隻典型嘅生命模擬遊戲裏面，玩家通常會由一個能夠一眼睇到嗮遊戲空間嘅角度嚟望嘢，並且有一啲選單俾佢揀要對遊戲空間作出乜嘢操作，而呢啲操作就會影響玩家嘅成敗；例如係好出名嘅社會模擬遊戲《模擬市民系列》（The Sims）噉，喺呢個系列嘅遊戲當中，玩家會控制一班（通常係頂櫳 8 個）模擬人喺一笪地上面生活，一群模擬人會有（有限嘅）資金，呢啲資金可以攞嚟買床同雪櫃等滿足日常生活需要嘅物品，用呢啲物品嚟照顧啲模擬人（例：一個模擬人覺得眼瞓就需要用床嚟滿足佢「要瞓覺」嘅需要），而且資金仲可以用嚟買電腦同書等俾模擬人學新技能（技能提升有助佢哋提升賺錢能力）嘅物品，於是玩家嘅任務就係照顧好啲模擬人，並且幫佢哋追求各種嘅人生目標（「人生目標」包括咗想賺錢或者想生細路呀噉）。生命模擬遊戲同人工生命相關嘅課題息息相關。

• 生物學模擬遊戲（biological simulation）係指模擬非人類嘅生物同埋由呢啲生物組成嘅生態系統，會俾玩家操作遺傳等嘅嘢。譬如《孢子》就係一隻出名嘅生物學模擬遊戲，喺呢隻遊戲當中，玩家操控嘅係一柞虛擬生物，隻遊戲會模擬埋呢啲生物嘅遺傳特性，以及係呢啲特性點樣隨住時間喺玩家嘅操作之下進化，例如玩家可以特登將一個物種進化到變得智能更加高。好似《孢子》噉嘅生物學模擬遊戲仲有俾人攞嚟做生物學方面嘅教育用途。
• 電子寵物（digital pet）都可以算係一種生命模擬遊戲。顧名思義，電子寵物係以用電腦模擬嘅形式存在嘅寵物，呢啲寵物喺電子空間存在，會要求玩家好似真嘅寵物主人噉，照顧佢哋嘅各種所需，包括餵嘢食、沖涼、同佢哋玩以至係幫佢哋清理排泄物呀噉，務求確保隻寵物生活得健康舒服。有人指，電子寵物嘅過癮之處在於，玩家有得體驗養寵物得嚟又唔使應付養真寵物要應付嗰啲撈絞嘢。電子寵物嘅出名例子有他媽哥池，而廿一世紀嘅例子就有《任天狗》。
• 上帝遊戲（God game）係對生命模擬遊戲作嘅一個子分類，指一隻生命模擬遊戲俾玩家喺大規模上控制遊戲嘅虛擬世界，好多時會俾玩家擁有好似上帝噉嘅力量或者俾啲模擬生物當係上帝噉嚟拜，例如喺《模擬市民系列》入面，玩家只要資金充足就可以任意添加或者攞走啲虛擬物品，改變玩緊嗰笪地嘅地形，甚至乎係殺死啲模擬人（例如特登韞住個模擬人喺間房入面唔俾佢食嘢，個模擬人餓到咁上下就會死）。《孢子》等嘅作品亦都俾人指屬於上帝遊戲嘅一個例子。
• 戀愛模擬遊戲（dating sim）模擬拍拖，通常會重視故仔同會似互動式小說，故仔入面會有若干個可能嘅戀愛對象可以同主角拍拖，而玩家就要控制住主角採取行動，玩家嘅行動會影響呢啲角色對主角嘅好感同埋想唔想同主角拍拖，而且因為戀愛模擬遊戲對故仔嘅重視，可能嘅拍拖對象好多時會係豐富嘅角色－玩家同佢哋拍拖嘅過程當中往往會展現出角色嘅背景故仔同角色發展呀噉。戀愛模擬遊戲有得分多個子類型，而分起上嚟通常係按性取向嚟分嘅，會分做：
  • 美少女遊戲（galgame；日文：ギャルゲーム）會有多個日本動畫風格嘅後生女仔俾男主角做拍拖對象。
  • 乙女遊戲（otome game；乙女ゲーム）俾玩家扮演一位女主角，可以有多個男主角做拍拖對象。
  • 耽美遊戲（BL game）以やおい為主題，即係講日本動畫風格嘅後生男仔之間嘅男男戀。
  • 百合遊戲（Yuri game；百合ゲーム）以百合向為主題，講女同性戀嘅戀愛遊戲。

... 等等。

睇埋

• 戰略遊戲
• 認真遊戲
• 教育遊戲
• 電腦模擬

拎

• 維基同享中有關模擬遊戲嘅資源類