生命模擬遊戲

出自維基百科,自由嘅百科全書
跳去導覽 跳去搵嘢

生命模擬遊戲英文life simulation game)係模擬遊戲嘅一種,模擬要玩家負責維持同照顧一啲虛擬嘅生命,而呢啲虛擬生命可以係虛擬人:喺一隻典型嘅生命模擬遊戲裏面,玩家通常會由一個能夠一眼睇到嗮遊戲空間嘅角度嚟望嘢,並且有一啲選單俾佢揀要對遊戲空間作出乜嘢操作,而呢啲操作就會影響玩家嘅成敗;例如係好出名嘅社會模擬遊戲模擬市民系列》(The Sims)噉,喺呢個系列嘅遊戲當中,玩家會控制一班(通常係頂櫳 8 個)模擬人喺一笪地上面生活,一群模擬人會有(有限嘅)資金,呢啲資金可以攞嚟買雪櫃等滿足日常生活需要嘅物品,用呢啲物品嚟照顧啲模擬人(例:一個模擬人覺得眼瞓就需要用床嚟滿足佢「要瞓覺」嘅需要),而且資金仲可以用嚟買電腦等俾模擬人學新技能(技能提升有助佢哋提升賺錢能力)嘅物品,於是玩家嘅任務就係照顧好啲模擬人,並且幫佢哋追求各種嘅人生目標(「人生目標」包括咗想賺錢或者想生細路呀噉)。生命模擬遊戲同人工生命(artificial life)相關嘅課題息息相關[1]

生物學模擬遊戲[編輯]

生物學模擬遊戲(biological simulation)係指模擬非人類嘅生物同埋由呢啲生物組成嘅生態系統,會俾玩家操作遺傳等嘅嘢。譬如《孢子》(Spore)就係一隻出名嘅生物學模擬遊戲,喺呢隻遊戲當中,玩家操控嘅係一柞虛擬生物,隻遊戲會模擬埋呢啲生物嘅遺傳特性,以及係呢啲特性點樣隨住時間喺玩家嘅操作之下進化,例如玩家可以特登將一個物種進化到變得智能更加高[註 1]。好似《孢子》噉嘅生物學模擬遊戲仲有俾人攞嚟做生物學方面嘅教育用途[2]

註釋[編輯]

  1. 孢子》喺科學上唔完全準確,有為咗令隻遊戲更加好玩而偏離現實世界嘅進化。

睇埋[編輯]

[編輯]

  1. "Unsung Heroes: Little Computer People". GameSpot.
  2. Owens, Trevor (2012). "Teaching intelligent design or sparking interest in science? What players do with Will Wright's Spore". Cultural Studies of Science Education. 7 (4): 857-868.