加查遊戲（粵讀：gaa1 caa4 jau4 hei3；日文：ガチャ ゲーム，日羅轉寫係 gacha gēmu；英文：gacha game），又譯做抽卡遊戲，係採用虛擬化「扭蛋」機制嘅電子遊戲，意思即係指隻遊戲俾玩家使一定量嘅錢，嚟隨機噉攞到一啲可以幫助玩家嘅嘢（例如係可以喺對局當中用嘅咭牌），例子可以睇吓虛擬抽獎盒。喺廿一世紀初嘅遊戲設計界，抽卡遊戲有相當嘅爭議性，例如好多人都覺得抽卡遊戲純粹係引玩家使錢嘅技倆[1]。
