大逃殺遊戲

大逃殺遊戲個基本格局：
(1)：遊戲地圖上面有笪安全區（白色個圓圈）；
(2)：白色三角形表示玩家而家身處嘅位置；
(3)：紫色嗰笪係風暴區－玩家入咗會慢慢喪失生命值；
(4)：綠色嗰笪就係「而家仲係安全區，但就快變成風暴區」嘅地帶。

大逃殺遊戲daai6 tou4 saat3 jau4 hei3（英文：battle royale game，BR game）係一種電子遊戲類型，屬網上多人遊戲。大逃殺遊戲建基於 last man standing 嘅概念，結合生存遊戲嘅要素，有以下嘅特徵：

• 一場對局有 N 位玩家參與；喺實際應用上，N 嘅數值通常有咁上下大，由 60 至 100 不等。
• 遊戲一開始嗰陣會將嗰 N 位玩家擺喺一幅好大嘅虛擬空間（戰場）裏面。
• 戰場分做安全區同非安全區，如果一位玩家身處喺非安全區，佢會係噉喪失生命值（生命值變 0 就死）。
• 每隔一段時間（例如每兩分鐘），安全區都會開始縮細。
• 戰場上面有多種物資可以畀玩家搜集，包括係武器同回復生命值嘅藥包呀噉。

－於是玩家就要一路確保自己身處安全區、一路殺敵，最後淨低生存到落嚟嗰位（或者嗰隊）玩家就算贏。包括《絕地求生》、《要塞英雄：空降行動》、《Apex 英雄》同埋《使命召喚：戰爭地帶》等嘅出名 BR 作品，都係跟從以上嘅格局嘅。

大逃殺遊戲喺 2010 年代後半橛成為咗一種文化現象：《絕地求生》（PUBG）喺 2017 年問世，跟住話咁快就引起咗股大逃殺遊戲熱潮，唔同嘅電子遊戲公司爭住開發大逃殺遊戲；打後幾年喺 Steam 等嘅平台上面，主要嗰啲大逃殺遊戲一路佔據住「最多人睇同玩嘅遊戲」嘅地位，亦引起（例如）大逃殺遊戲愛好者玩 cosplay 扮遊戲入面嘅角色或者整網絡 meme 。

概論

内文：Last man standing

睇埋：生存遊戲同動作遊戲

大逃殺遊戲建基於 last man standing（以下簡稱 LMS）嘅諗頭：LMS 係一種遊戲模式；想像家陣有隻玩家對局嘅射擊遊戲，玩家要互相對射嚟定輸贏；一隻噉嘅遊戲有最少兩種做法可以揀－

1. 死亡競賽（deathmatch）：玩家畀人射到生命值變咗 0 就會死，死咗嘅玩家會喺 5 秒後重生，場對局會維持 10 分鐘咁耐，時間夠嗰陣殺敵次數最多嗰位玩家就算贏；
2. Last man standing（「最後一個企到喺度嘅人」）：玩家畀人射到生命值變咗 0 就會死，死咗嘅玩家冇得重生－死咗就出局輸咗，最後淨低生存到落嚟嗰位（或者嗰隊）玩家就算贏。

後者就係大逃殺遊戲嘅基礎。早响廿世紀，電子遊戲界經已有作品採用 LMS 制，畀多位玩家對局，玩家要嘗試打低對手，畀人打低咗嘅就出局，最後「企到喺度」嗰位（或者嗰隊）玩家就算係贏咗場對局。例如 1980 年代同 1990 年代嘅多份《炸彈人》（Bomberman）作品就係噉。不過當時啲遊戲因為技術上嘅限制，一場 LMS 對局頂攏淨係可以畀 5 至 10 位玩家參與。打後到咗廿一世紀初，網上遊戲相關技術日趨成熟，遊戲開發者嘅伺服器可以輕易噉創建大嘅虛擬世界，容納得到數以百計嘅玩家。於是就有人產生咗個諗頭：

「

要畀數量龐大（講緊起碼 60 至 100 位）嘅玩家玩 LMS 對局。

」

－大逃殺遊戲就隨之而喺 2010 年代後半橛冒起。

機制

睇埋：射擊遊戲

一隻大逃殺遊戲會以一局局（主要）PvP 對局嘅形式進行：一場對局進行嘅世界會有咁上下大，容納到 60 至 100 位玩家，行 LMS 制，輸咗嘅玩家就出局冇得再玩，最後淨低嗰位或者嗰隊玩家就算贏；廿一世紀初嘅大逃殺遊戲多數都同時屬射擊遊戲，要玩家用長距離武器射對手，畀人射中會喪失生命值，生命值變 0 嘅就輸。為咗令隻遊戲好玩，大逃殺遊戲通常仲會喺呢套基本格局上加嘢，有以下呢啲遊戲機制：

對局流程

睇埋：掠奪 (電子遊戲)

• 「跳降落傘」（skydive）：喺多數大逃殺遊戲裏面，對局一開始嗰陣參與嘅玩家冚唪唥都身處喺一架「飛機」入面，架飛機會喺戰場上空直線飛過，途中玩家有得揀幾時由架飛機度「跳出」並且降落喺戰場上佢想去嘅地點度－如是者就形成「對局開始，玩家散佈喺戰場各處」噉嘅狀態。响典型嘅大逃殺遊戲當中，「揀喺邊度降落」都有技巧－例如遊戲往往會設定成戰場某啲地點比較多物資執（尤其係啲外形設計到好獨特嘅地標），但呢啲地點好多時又會吸引大班玩家爭住喺嗰度降落，於是一位玩家就要衡量「喺嗰笪地點降落係咪著數」噉嘅問題。
• 遊戲物資：正路嚟講，對局開始嗰時玩家係「乜都冇」咁滯嘅（或者手上淨係得最基本嗰啲物資），佢哋要喺戰場上面搜集各種嘅物資（掠奪；looting），常見嘅物資有武器（尤其係槍械）、子彈同埋回復生命值嘅藥包... 呀噉；除咗喺戰場上面執之外，玩家仲可以透過「打低對手」嚟攞走對手嘅物資－如是者，隻遊戲就形成「隨住對局演進，玩家開始被淘汰；淨低嗰啲玩家因為由被淘汰嘅玩家身上攞咗物資，因而手上物資愈嚟愈充裕，令佢哋有局勢升溫噉嘅感覺」噉嘅形勢。
• 大逃殺圓圈（circle）：指遊戲地圖上一個玩家可以安全企喺度嘅區域（安全區）；喺一般嘅大逃殺遊戲當中，圓圈會慢慢縮細，身處圓圈外（非安全區）嘅玩家會逐啲逐啲噉喪失生命值－圓圈呢種機制，令玩家有誘因係噉移動想留喺圓圈入面，而隨住圓圈縮細，玩家可以活動嘅範圍就會愈嚟愈細，最後玩家就要撞到第啲玩家，焗住要進入戰鬥。

生存狀態

内文：倒下狀態

睇埋：命 (電子遊戲)

• 倒下狀態（knocked down / downed）：指一個角色正常生命值冇嗮之後會進入嘅狀態；喺典型嘅大逃殺遊戲裏面，一個角色會有若干生命值，冇嗮呢啲生命值嗰陣佢會倒下，一個倒下咗嘅角色會（例如）失去攻擊或者用道具嘅能力，而且因為只可以喺地上面爬而移動能力大減，不過佢仲未死，喺呢個時期，佢嘅隊友可以幫佢復活（revive；將佢變返做未倒下、淨低少少正常生命值嘅狀態），而通常如果過咗一段時間都冇隊友幫佢復活，或者倒下狀態嘅生命值因為畀敵人攻擊而冇嗮嘅話，個角色就會死亡。
• Respawn：原則上，LMS 遊戲係「玩家死咗就出局」嘅，所以冇「玩家死咗幾秒後，喺戰場某地點 respawn」嘅情況；因為噉，大逃殺遊戲通常冇 respawn 機制，或者最少會對 respawn 作出巨大限制，例如 2019 年出嘅《Apex 英雄》噉就有 respawn 機制－三位玩家成一隊，如果有個玩家死咗，佢啲隊友可以喺限時內去佢死嘅地點度執佢嘅 banner，然後有得攞住 banner 去戰場上嘅特定地點度畀死咗嘅玩家 respawn，不過如果全隊人冚唪唥死嗮，嗰隊玩家就出局輸咗。

... 等等。

技巧

馬拉松戰役當中用嘅側擊戰術圖解；側擊指一隊部隊移去敵人嘅側面，爭取戰略上嘅優勢。

睇埋：軍事戰術同軍事戰術一覽

喺 2010 年代尾，大逃殺遊戲成為咗電競入面相當有影響力嘅一環：好似《要塞英雄：空降行動》等嘅射擊型大逃殺遊戲涉及極高技術；首先啲玩家要有咁上下射擊技術，能夠喺高壓力環境下準確噉射對手；除此之外，大逃殺遊戲嘅玩家仲要係噉做快速嘅決策，甚至會用到現實軍事上會用到嘅戰術（例如下面講到嘅側擊同埋伏），包括－

• 玩家需要係噉思考周圍嘅資訊，例如「周圍有幾多個敵人」、「每個敵人喺乜位置」同埋「每個敵人跟住可能移去乜位置」等都係極重要嘅資訊，而且未必吓吓能夠精確噉判斷。
• 淨係「揀企喺乜嘢位置」經已有一定嘅學問－例如遊戲空間入面嘅某啲位置有比較多物件可以攞嚟做掩護，所以比較安全。可以睇埋射擊遊戲上講到嘅企位概念。
• 「眼前有拃物資執，攞邊啲（假設隻遊戲設做「玩家手上最多淨係可以揸 X 件物資」）先能夠最大噉提升我嘅贏面？」
• 「啱啱去到一個新嘅地帶，唔知有冇敵人喺入面，我好唔好入去搜集物資？如果要，由邊條路線入去好？」
• 「離遠見到有個敵人，佢似乎仲未知我存在，我好唔好嘗試同佢交戰？如果要，噉要用咩戰術攻擊？側擊定埋伏好？要喺咩時機郁手攻擊？」
• 「而家同敵人交戰緊，邊一方比較有優勢（有優勢 = 例如人數多啲、淨低嘅生命值多啲、有制高點、或者比較近安全區）？」
• 「而家同敵人交戰緊，我有冇需要推進？」
• 「而家我啲隊友要各自噉同敵人交戰，啲隊友當中邊個比較需要我支援佢？」
• 「頭先嗰個敵人，突然冇嗮動靜，佢係咪冇乜生命值淨，忙緊用藥包？我好唔好趁機推進？」
• 「我啲隊友冇乜生命值淨要用藥包。我要點做，先確保到佢哋用藥包期間唔受敵人侵襲呢？」
• 「而家同敵人交戰緊，佢哋會唔會推進？如果佢哋會，我有冇方法可以確保自己唔處於劣勢（例如畀自己唔使一個打兩個）？」
• 「而家同敵人交戰緊，我有冇需要進入防守狀態？」
• 「而家同敵人交戰緊，好唔好用咗我把勁武器佢？」
• 「而家同敵人交戰緊，我有冇需要撤退？」
• 「頭先同我交戰緊嗰個敵人喺度撤退，我好唔好追佢？」
• 「圓圈喺度收細緊，我用邊條路線行去安全區好？」

... 呀噉。

呢啲問題條條都會涉及大量運算，喺遊戲對局進行中途，玩家往往得嗰幾秒時間做決策，冇得話慢慢計嗮所有可能方案先至郁。事實亦表明，專業嘅電子競技參賽者的確展現到「喺幾秒甚至一秒都唔夠嘅時間內做決定」，同時佢哋嘅決策明顯唔係齋靠運氣－如果攞呢啲專業玩家同普通玩家對局，專業玩家會（例如）贏 95% 嘅對局。

起源

描繪《絕地求生》入面嘅角色嘅圖像

睇埋：大逃殺 (電影)同絕地求生

行 LMS 制嘅電子遊戲，早喺 1990 年代已經存在，不過大逃殺遊戲要一路去到 2010 年代先真正成形。

• 2000 年：《大逃殺》（日文片假名：バトル・ロワイアル，日羅係 Batoru Rowaiaru）：《大逃殺》係一套 2000 年出嘅電影，套戲故仔講一場大逃殺比賽，啲參加者被迫要互相殺戮，直至淨低一個生還者為止，而且場比賽進行嘅場地一路縮細緊，生還者要喺噉嘅場地上面收集物資戰鬥－基本上就係大逃殺遊戲嘅電影版本；呢套戲跟住仲引發咗一陣「大逃殺」風潮，吸引啲人製作故仔同《大逃殺》相似嘅電影同漫畫，據講就係「大逃殺遊戲」個名嘅起源。
• 2012 年：《飢餓遊戲》（The Hunger Games）呢套戲出咗而且大受歡迎，個故仔同《大逃殺》類似；因為套戲受歡迎，吸引咗啲人同包括《做個創世神》（Minecraft）在內嘅好幾隻遊戲整 mod 加入類似《大逃殺》故仔噉嘅遊戲模式。當中著名嘅 PlayerUnknown－真名布蘭登·格連（Brendan Greene）－都有份喺呢個時期整啲噉嘅 mod 。
• 2017 年：建基於 PlayerUnknown 整嘅 mod 嘅《絕地求生》（PUBG: Battlegrounds）問世，大受歡迎，喺跟住嗰幾年一路都係 Steam 等平台上最多人玩嘅遊戲之一，被人指係「大逃殺遊戲熱潮」嘅創始作。
• 2018 年：《要塞英雄：空降行動》（Fortnite Battle Royale）問世，都係大受歡迎，出名在喺大逃殺遊戲入面加入「起嘢」嘅機制，畀玩家喺戰場上搜集木材、石頭同金屬等嘅材料，用啲材料嚟起建築物，為遊戲增添咗豐富嘅策略。
• 2019 - 2020 年：有多隻模仿《絕地求生》同《要塞英雄：空降行動》嘅作品問世，當中有啲甚至畀人話算係抄襲，呢啲作品多數失敗收場。喺呢個時期出名嘅作品有藝電公司出嘅《Apex 英雄》－呢件作品被指成功結合大逃殺遊戲同英雄射擊遊戲，亦都創始咗「大逃殺遊戲入面有 respawn 呢家嘢」嘅遊戲機制，《Apex 英雄》過一兩年後將會加入《絕地求生》同《要塞英雄：空降行動》嘅行列，同《絕地求生》喺 Steam 上面嘅玩家人數等方面睇齊。
  • 順帶一提，呢個時期亦都開始出現「唔係射擊遊戲」嘅大逃殺遊戲，例子可以睇吓 2019 年 2 月問世嘅《俄羅斯方塊 99》（Tetris 99），隻遊戲每場對局有 99 位玩家，大家同時玩俄羅斯方塊，清到方塊嘅人可以攻擊對手，喺對手嘅區域度落方塊，玩家一旦自己區域嘅方塊出現點畀方塊塞住，就會被淘汰，最後淨低嗰個玩家就算贏。
• 2020 年 3 月：《使命召喚：戰爭地帶》（Call of Duty: Warzone）問世，評語唔算好正面。喺跟住落嚟嗰兩年，大逃殺遊戲界仲係處於《絕地求生》、《要塞英雄：空降行動》同埋《Apex 英雄》三家並立嘅局面。
• 2022 年 11 月：《使命召喚：戰爭地帶 2.0》（Call of Duty: Warzone 2.0）問世，用咗進階嘅 AI 技術，對局入面有由電腦控制嘅玩家，評語相當正面。

睇埋

• 射擊遊戲，多數大逃殺遊戲都同時屬射擊遊戲，尤其係 FPS 同 TPS。
• 季票同戰鬥通行證，大逃殺遊戲成日用嘅搵錢方法。
• 開放世界
• 遊戲模組
• Game as a service

文獻

• Choi, G., & Kim, M. (2018). Battle Royale game: In search of a new game genre (PDF). International Journal of Culture Technology (IJCT), 2(2), 5.
• Zhou, N., Doerner, M., Ryan, L., & Pierse, C. (2021, October). AI Coach for Battle Royale Games. In Extended Abstracts of the 2021 Annual Symposium on Computer-Human Interaction in Play (pp. 280-286).

拎

• Best battle royale games: what are the top BR games in 2022?. PCGames.