清版射擊遊戲

出自維基百科,自由嘅百科全書
(由Run-and-gun跳轉過嚟)
一隻清版射擊遊戲嘅截圖;玩家控制住架飛機向四周圍亂咁射。

清版射擊遊戲英文shoot 'em up,「盡情噉開槍射佢哋」)係射擊遊戲嘅一種,特色係有大量好少血(通常由電腦控制)嘅敵人,等玩家可以盡情係噉射殺大量敵人。

特徵[編輯]

清版射擊遊戲通常會淨係考玩家嘅反應:玩家要及時俾反應,每當有敵人出現嗰時即刻開槍,如果唔係就會俾敵人打中,而雖然呢啲遊戲入面嘅敵人通常都好弱,但因為佢哋數量多,所以多次噉「反應唔夠快而俾敵人打中」就會造成玩家角色死亡;同時呢啲遊戲唔使點樣用策略思考-相比之下,第啲射擊遊戲好多時都會考驗玩家運用戰術,所以又有遊戲評論者將清版射擊遊戲描述為「唔使用腦但好玩過癮」嘅遊戲[1][2]

類型[編輯]

睇埋:電子遊戲類型一覽
  • Run-and-gun:顧名思義係集中於「畀玩家一路前進一路開槍」嘅遊戲。呢啲遊戲同一般嘅平台遊戲類似,主要特點係結合咗射擊遊戲(尤其係清版射擊遊戲)-同典型嘅平台遊戲一樣,玩家要喺遊戲空間入面跑同跳,通常需要由關卡嘅起點行到去終點,不過喺一般嘅平台遊戲裏面,玩家要攻擊虛擬敵人通常要靠近距離攻擊,而喺 run-and-gun 入面,玩家可以使用長距離武器射啲敵人,所以一定程度上會好似射擊遊戲噉,會考玩家開槍嗰陣嘅眼界[註 1][3]
    • 1987 年發行嘅《魂斗羅》(Contra)同埋 1996 年出嘅《鋼鐵蟲師》(Metal Slug)都係 run-and-gun 嘅出名作品。

簡史[編輯]

清版射擊遊戲早喺 1970 年代嗰陣經已存在:喺一隻典型嘅清版射擊遊戲入面,玩家角色要面對數量多嘅虛擬敵人,而玩家能夠控制玩家角色郁動,並且要用手上嘅長距離武器嚟打低呢啲敵人;呢啲敵人通常好弱,即係血量少俾主角打中一兩吓就會死,攻擊力又唔強,而且喺行為上簡單,所以要打低一個呢啲敵人好容易,於是玩家就有能力靠「係噉勁開槍」嚟大量噉射殺敵人,感受盡情殺大量虛擬敵人嘅快感。呢啲遊戲通常唔會係第一身或者第三身,而係會俾玩家由上空鳥瞰式噉望住笪戰場。清版射擊遊戲嘅出名例子有响 1978 年出、俾人指係確立咗清版射擊遊戲呢個遊戲類型嘅《太空侵略者》(Space Invader)[4]

註釋[編輯]

  1. 不過 run-and-gun 嘅具體定義有些少爭議,例如有啲業界人士主張隻遊戲一定要設計到鼓勵玩家係噉開槍,先算 run-and-gun,而好似《洛克人》噉嘅作品唔畀人當係 run-and-gun。

睇埋[編輯]

參考[編輯]

  1. Ashcraft, Brian (2008), Arcade Mania! The Turbo Charged World of Japan's Game Centers, Kodansha International. p. 70.
  2. Kraig Kujawa; Sushi-X (October 1997). "Straight Shooters: When Dumb is More Fun". Electronic Gaming Monthly. No. 99. Ziff Davis. p. 84.
  3. A HISTORY OF RUN-AND-GUN SHOOTERS. Mega Cat Studios.
  4. Bielby, Matt, "The Complete YS Guide to Shoot 'Em Ups", Your Sinclair, July, 1990 (issue 55), p. 33.