洛克人 (遊戲)

《洛克人》（日版名：ロックマン，Rockman，英文版名：Mega Man）係一款由遊戲開發商Capcom開發，紅白機專用嘅一款動作遊戲，喺1987年12月17日喺日本首度發售。呢隻遊戲係洛克人系列同洛克人元祖系列嘅第一部作品，仲被移植到唔同嘅平台度。

《洛克人》係當時以高難度同新奇創意而出名，總共有七關。玩家需要操控主角洛克人打敗瘋狂科學家威利博士手下嘅六個機械人大師，更住摧

毀佢統治世界嘅計劃。遊戲嘅非線性關卡選擇玩法等班玩家可以決定用唔同順序通關，每一關玩家都需要打低一個機械人大師，之後就可以攞到佢嘅特殊武器。因為唔同武器有屬性相剋系統，遊戲嘅其中一個戰略就係要玩家仔細考慮打敗敵人嘅次序，咁就可以攞到對應嘅武器喺之後嘅關卡入邊用。

呢隻遊戲嘅開發組只有唔夠10個人，北村玲係製作人，稻船敬二負責主要美工，松島信行負責程式設計，音樂就由松前真奈美製作。本作亦係洛克人系列所有遊戲入邊唯一有得分功能嘅作品。

《洛克人》嘅整體設計廣受玩家好評，被IGN稱為「紅白機史上不可磨滅嘅經典作之一」，同時被IGN同埋《任天堂力量》列為「史上最佳100個紅白機遊戲」之一，1990年金搖桿獎亦授予佢「最佳家用機遊戲」獎，不過呢隻遊戲並冇造成商業上嘅成功，部分媒體認為呢隻遊戲嘅難度偏高。呢隻遊戲為其系列續作同埋衍生作打下咗遊戲玩法、故事線同埋畫面傳統嘅基礎。之後嘅重製版《洛克人洛克人》就喺2006年喺PlayStation Portable平台發佈。

故事同人物

20XX年，由於著名機械人設計師萊特博士嘅貢獻，各個領域都有唔同嘅機械人幫人類工作。但係有一日，呢啲機械人突然失控同開始攻擊人類，其中就包括萊特博士製造嘅六部工業用先進機械人，呢六部機械人被稱為「機械人大師」，分別係「剪刀人」、「氣力人」、「冰人」、「炸彈人」、「火焰人」同「電流人」。萊特博士意識到呢啲襲擊嘅罪魁禍首就係佢嘅老對手「威利博士」，但係佢唔知道點做先好。有強烈嘅正義感嘅機械人助手「洛克」主動要求將自己改造成戰鬥型機械人嚟阻止威利博士嘅邪惡計劃，變成「洛克人」。之後佢阻止咗六部機械人大師同恢復咗佢哋嘅中央核心。喺威利博士喺太平洋嘅機械人工廠入邊，製造緊萊特博士嘅機械人複製品。洛克人趕到同威利博士對抗，喺打敗咗六部機械人大師嘅複製品同威利博士為咗打敗佢而特別製造嘅機械人之後，洛克人迎嚟咗同威利博士嘅最終戰。洛克人最終打敗咗威利博士，之後返去同萊特博士團聚。

呢隻遊戲喺西方國家發行嘅版本喺基本劇情上保持一致，但係原說明書上嘅改動就比較明顯。喺呢個版本入邊，洛克人同六部機械人大師都係萊特博士同威利博士合力製造出來嘅（說明書話威利博士係萊特博士嘅前助手），同埋每一個機械人都係為咗畀「怪物城」（原版劇情唔存在）嘅公民謀福祉而製造。但威利博士因為萊特博士將兩人嘅合作成果歸為自己而感到憤怒，同埋想要通過呢啲機械人進行犯罪活動，就竊取咗六個工業用機械人同對佢哋改造，建造成自己嘅機械人大師，意圖控制怪物城同將佢宣佈造自己嘅帝國。萊特博士被威利博士嘅背叛感到恐懼，就差遣洛克人摧毀機械人大師同從威利嘅機械人手中解放怪物城。

遊戲玩法

睇埋：橫向捲軸遊戲同平台遊戲

呢個遊戲包含六個橫向捲軸平台關卡，玩家可以自己揀玩嘅順序。喺每關入邊，玩家會控制洛克人突破各種敵人同障礙，最後到達關卡終點同機械人大師頭目對決。玩家贏咗之後，可以得到頭目嘅標誌性攻擊或者「特殊武器」，然後裝備喺洛克人嘅裝備庫入邊。同標準嘅洛克炮唔同，從機械人大師度得到嘅武器唔可以無限使用。玩家需要打低敵人，收集隨機掉落嘅彈藥電池嚟補充能量。敵人有時都會掉落補充體力值（HP）嘅能量電池。雖然玩家可以喺遊戲入邊隨意揀選頭目進行通關，但每一個機械人大師都會被特定嘅一種武器克制，咁就可以鼓勵玩家喺完成嗰關之前先去完成可以收集到嗰款武器嘅關卡，不過玩家都可以重新進入已經過咗嘅關。除咗可以從機械人大師度得到特別武器之外，玩家亦可以得到一個平台生成器，比如喺電流人關卡中，玩家可以收集到「磁束」工具。

呢個遊戲亦有得分功能，打低敵人之後可以得到對應分數，當通關或者收集從敵人掉落嘅提升道具都可以獲得額外分數。每一個機械人大師嘅擊敗分數係50,000到100,000之間嘅隨機值，但打低威利博士之後就可以得到200,000分。因為後期開發組認為得分系統冇必要同對玩家冇意義，呢個遊戲都係所有洛克人系列中唯一有得分系統嘅作品。

當玩家打低咗六個機械人大師之後，最後嘅關卡就會出現喺關卡選單嘅中央。呢關係四個普通關卡嘅結合版，玩家需要穿越威利博士嘅機械人工廠，而且每一個小關卡入邊都至少有一個新頭目需要玩家打敗。喺最後一輪面對威利博士之前，玩家仲需要按照既定順序再次打敗前面嘅六位機械人大師。由於喺呢個關卡裡面洛克人嘅HP同彈藥喺小關卡中唔會恢復，玩家做出嘅每一步都需要深思熟慮。

外拎

• （日文） 官網